Esekielu 6:1-14
6 Ua toe fetalai mai Ieova iā te aʻu, e faapea:
2 “Le atalii e o le tagata, inā faasaga ia ou mata i mauga o Isaraelu ma faia valoaga faasaga i ia mea.
3 Ia e fai atu, ‘Mauga e o Isaraelu, inā faalogo mai ia i le afioga a le Alii Pule Silisili Ese o Ieova: O le fetalaiga lenei a le Alii Pule Silisili Ese o Ieova ua fai atu i mauga, o aʻega, o vaitafe ma vanu: “Faauta! O le a ou auina atu iā te outou le pelu, ma ou te faatafunaina a outou mea maualuluga.
4 O le a lepetia a outou fata faitaulaga ma a outou fata faitaulaga e faamū ai mea manogi,+ ma o le a ou lafoina ou tagata ua fasiotia i luma o au tupua inosia.*+
5 O le a ou lafoina tino oti o le fanauga a Isaraelu i luma o a latou tupua inosia, ma ou te faataapeapeina o outou ponaivi ia soo ai a outou fata faitaulaga.+
6 O le a faatafunaina aai i mea uma tou te nonofo ai,+ ma o le a lepetia mea maualuluga ma faatafunaina ai pea.+ O le a faatafunaina ma nutililiia a outou fata faitaulaga, o le a faaumatia a outou tupua inosia, o le a soloia a outou fata faitaulaga e faamū ai mea manogi, ma o le a soloiesea a outou galuega.
7 E paʻuʻū foʻi i lo outou lotolotoi ē ua fasiotia,+ ona outou iloa ai lea o aʻu lava o Ieova.+
8 “ʻ“Ae ou te tuu ai pea o ni ē e totoe, auā o le a iai nisi o outou e sao mai i le pelu pe a outou iai i atunuu ma ua faataapeapeina outou i le laueleele.+
9 O le a manatua foʻi aʻu e i latou ua sao i isi atunuu ua ave faapagota i ai.+ O le a latou iloa ai le tigā o loʻu loto ona o o latou loto lē faamaoni* ia na liliuese mai iā te aʻu,+ ma ona o o latou mata e tuʻinanau* i a latou tupua inosia.+ O le a faalumaina i latou ma ʻinoʻino i mea leaga ma mea inosia uma ua latou faia.+
10 Ona latou iloa ai lea o aʻu lava o Ieova, ma e lē i‘uvale aʻu faamata‘uga e tusa ai ma le faaooina atu o lenei mala iā i latou.”’+
11 “O le fetalaiga lenei a le Alii Pule Silisili Ese o Ieova: ‘Ia patipati ou lima ma tatū ou vae, ma faanoanoa ona o mea leaga ma inosia uma ua faia e le aiga o Isaraelu, auā o le a fasiotia i latou i le pelu, o le oge, ma le faamaʻi.+
12 O lē ua mamao, e oti o ia i le faamaʻi; o lē ua latalata mai, e oti o ia i le pelu; o lē foʻi ua sao mai i nei mea ma ua totoe, e oti o ia i le oge, ma ou te matuā faaoo atu loʻu ita tele iā i latou.+
13 Ona latou iloa ai lea o aʻu lava o Ieova,+ pe a taatitia ē ua fasiotia o i latou i le lotolotoi o a latou tupua inosia, e soo ai a latou fata faitaulaga,+ i luga o aʻega maualuluga uma, i luga o tumutumu o atumauga, ma i lalo o laau lauolaola uma ma lālā o laau tetele, i le mea ua latou ofo atu ai taulaga o mea manogi e faamalie ai a latou tupua inosia uma.+
14 O le a ou faaloaloa loʻu lima faasaga iā i latou ma faagaogaoina le laueleele, ma o le a sili atu ona faagaogaoina mea uma latou te nonofo ai, nai lo o le toafa* e lata i Tipelata. Ona latou iloa ai lea o aʻu lava o Ieova.’”
Faamatalaga Pito i Lalo
^ O le faaupuga Eperu atonu e fesootaʻi atu i le upu mo le “otaotavale,” ma o se faaupuga e faaalia ai le ʻinoʻino.
^ Po o le “o loo mulimuli ma le faitaaga.”
^ Po o le “lē mamā; mulilulua.”
^ Tagaʻi i le Uiga o Upu.
