Esekielu 37:1-28
37 Ua i oʻu luga le aao o Ieova, ma ua aveina aʻu e Ieova e ala i lona agaga ma tuu aʻu i le ogatotonu o le fanua laugatasi*+ ua tumu i ivi.
2 Ua ia faaui ane aʻu e faataamilo i ivi, ma na ou vaaia ai le matuā tele lava o ivi o loo taatitia i le fanua laugatasi, ma ua matuā mamago lava.+
3 Ua ia fesili mai iā te aʻu: “Le atalii e o le tagata, pe e mafai ona toe ola mai nei ivi?” Ona ou fai atu lea: “Le Alii Pule Silisili Ese o Ieova, o oe lava ua e silafiaina.”+
4 Ona ia fetalai mai lea iā te aʻu: “Ia e faia valoaga e tusa ma nei ivi, ma ia fai atu i ivi, ‘Ivi mamago e, inā faalogo mai ia i le afioga a Ieova:
5 “‘O le fetalaiga lenei a le Alii Pule Silisili Ese o Ieova i ivi nei: “O le a ou tuu atu iā te outou le mānava, ma o le a outou ola ai.+
6 Ou te tuu atu uaua ma aano iā te outou, ma ou te ufiufi iā te outou i le paʻu ma tuu atu iā te outou le mānava, ona outou ola ai lea; ma o le a outou iloa ai o aʻu lava o Ieova.”’”
7 Ona ou valoia ai lea e pei ona poloaʻiina ai aʻu. A o oʻu faia le valoaga, na ou faalogo ai i le gasēsē o ivi, ma ua amata ona fesootaʻi ivi, o le ivi i le isi ivi.
8 Ona ou vaaia lea ua iai uaua ma aano i ivi, ma ua ufitia i latou i paʻu. Ae ua leai se mānava iā i latou.
9 Ona ia fetalai mai lea iā te aʻu: “Ia faia valoaga i le matagi. Le atalii e o le tagata, ia faia valoaga ma fai atu i le matagi, ‘O le fetalaiga lenei a le Alii Pule Silisili Ese o Ieova: “Le matagi e,* inā sau ia mai i matagi e fā, ma ia agi atu i nei tagata ua fasiotia, ina ia toe feola ai i latou.”’”
10 Ona ou valoia ai lea e pei ona poloaʻiina ai aʻu, ma ua alu atu le mānava iā i latou, ma ua toe feola ai i latou ma ua tutū i o latou vae,+ o se ʻautau e matuā toʻatele lava.
11 Ona ia toe fetalai mai lea iā te aʻu: “Le atalii e o le tagata, o ivi nei, o i latou ia o le aiga uma o Isaraelu.+ Ua latou faapea mai, ‘Ua mamago o matou ivi, ma ua mou atu lo matou faamoemoe.+ Ua matuā vavaeesea i matou.’
12 O lea, ia faia valoaga ma fai atu iā i latou, ‘O le fetalaiga lenei a le Alii Pule Silisili Ese o Ieova: “Loʻu nuu e, o le a ou lagaina o outou tuugamau,+ ma ave aʻe outou mai i o outou tuugamau ma avatu i le laueleele o Isaraelu.+
13 Loʻu nuu e, o le a outou iloa ai o aʻu lava o Ieova pe a ou lagaina o outou tuugamau, ma ave aʻe outou mai i o outou tuugamau.”’+
14 ‘O le a ou tuu loʻu agaga i totonu o outou ma outou feola ai,+ ma o le a ou faanonofo outou i lo outou laueleele; ma o le a outou iloa ai o aʻu lava o Ieova, ua ou fai atu ai ma ua ou faia,’ ua fetalai mai ai Ieova.”
15 Ua toe oo mai le afioga a Ieova iā te aʻu e faapea:
16 “A o oe, le atalii e o le tagata, ia e ave se laau ma tusi ai i luga, ‘Mo Iuta ma le fanauga a Isaraelu o loo faatasi ma ia.’*+ Ona e ave lea o le isi laau ma tusi ai i luga, ‘Mo Iosefa, o le laau a Efaraima ma le aiga uma o Isaraelu o loo faatasi ma ia.’*+
17 Ona e uu faatasi lea o nei laau ina ia avea ma laau e tasi i lou lima.+
18 Pe a faapea atu iā te oe tagata o lou nuu,* ‘Pe e te lē taʻuina mai ea iā i matou le uiga o ia mea?’
19 ia fai atu iā i latou, ‘O le fetalaiga lenei a le Alii Pule Silisili Ese o Ieova: “O le a ou aveina le laau a Iosefa lea o loo i le lima o Efaraima, ma ituaiga o Isaraelu o loo faatasi ma ia, ma o le a ou tuuina faatasi i latou ma le laau a Iuta; o le a ou faia i latou ma laau e tasi,+ ona tasi ai lea o i latou i loʻu lima.”’
20 E ao ona e uuina i lou lima laau na e tusiaina, a o latou vāai mai i ai.
21 “Ia e fai atu iā i latou, ‘O le fetalaiga lenei a le Alii Pule Silisili Ese o Ieova: “O le a ou aumaia le fanauga a Isaraelu mai i atunuu na latou ō atu i ai, ma o le a ou faapotopotoina i latou mai i itu uma, ma avatu i lo latou laueleele.+
22 Ou te faia i latou e avea ma nuu e tasi i le laueleele,+ i mauga o Isaraelu, e tasi foʻi le tupu o le a pulea i latou uma,+ ma e lē toe avea i latou ma nuu e lua; e lē toe vaeluaina foʻi i latou i ni malo se lua.+
23 O le a latou lē toe faaleagaina i latou lava i a latou tupua inosia,* o a latou mea inosia na faia, ma a latou solitulafono uma.+ O le a ou faaolaina i latou mai i a latou gaoioiga lē faamaoni uma na latou agasala ai, ma ou te faamamāina i latou. O le a fai i latou ma oʻu nuu, e avea foʻi aʻu ma o latou Atua.+
24 “ʻ“O le a fai Tavita laʻu auauna ma o latou tupu,+ ma o le a tasi le leoleo mamoe mo i latou uma.+ O le a latou savavali e tusa ma iʻuga o aʻu faamasinoga ma tausia aʻu tulafono.+
25 O le a latou nonofo i le laueleele na ou avatu i laʻu auauna o Iakopo, lea na nonofo ai o outou augātamā,+ ma o le a latou nonofo ai e faavavau,+ o i latou ma a latou fanau,* ma fanau a a latou fanau;+ ma o le a fai laʻu auauna o Tavita ma o latou taʻitaʻi* e faavavau.+
26 “ʻ“O le a ou osia foʻi se feagaiga o le filemu ma i latou;+ e fai ma feagaiga e tumau ma i latou. O le a ou tuuina i latou i o latou laueleele ma faatoʻateleina i latou,+ ou te tuuina foʻi loʻu malumalu i lo latou lotolotoi e oo i le faavavau.
27 O le a iai loʻu faleʻie* faatasi ma i latou,* e fai aʻu ma o latou Atua, e fai foʻi i latou ma oʻu nuu.+
28 Ona iloa ai lea e nuu, o aʻu lava o Ieova, ua ou faapaiaina Isaraelu pe a iai loʻu malumalu faatasi ma i latou e faavavau.”’”+
Faamatalaga Pito i Lalo
^ E faasino atu i le fanua laugatasi i le pito i lalo o se vanu.
^ Po o “Le mānava e.”
^ Po o “o ana uō ia.”
^ Po o “o ana uō ia.”
^ Epe., “atalii o tagata o lou nuu.”
^ O le faaupuga Eperu atonu e fesootaʻi atu i le upu mo le “otaotavale,” ma o se faaupuga e faaalia ai le ʻinoʻino.
^ Po o le “perenise.”
^ Epe., “o latou atalii.”
^ Po o le “fale.”
^ Po o le “i luga o i latou.”
