Esekielu 33:1-33
33 Ua oo mai le afioga a Ieova iā te aʻu e faapea:
2 “Le atalii e o le tagata, ia e tautala atu i tagata o lou nuu,+ ma fai atu iā i latou,“‘Seʻi faapea ou te faaoo atu le pelu i se atunuu,+ ma ua ave e tagata uma o lea atunuu se tane e fai ma o latou tagata vāai,
3 ua ia iloa atu foʻi le pelu o loo agaʻi mai i le atunuu ma ua ia ili le pū ma lapataʻia tagata.+
4 Afai e faalogoina e se tasi le leo o le pū ae e lē amanaʻiaina le lapataʻiga,+ ma e sau le pelu ma fasiotia ai o ia, e i luga o lona lava ulu lona toto.+
5 Na ia lagonaina le leo o le pū, ae e na te leʻi utagia le lapataʻiga. E i ona lava luga lona toto. Pe ana ia amanaʻia le lapataʻiga semanū e faasaoina lona ola.
6 “‘Ae afai e vaai atu le tagata vāai o loo agaʻi mai le pelu, ae e na te lē iliina le pū+ ma lē oo atu ai se lapataʻiga i tagata, ma ua sau le pelu ma fasiotia ai se tasi o i latou, e oti lenā tagata ona o lana mea sesē, a o lona toto ou te taui atu lea i le tagata vāai.’*+
7 “A o oe le atalii e o le tagata, ua ou tofia oe e fai ma tagata vāai i le aiga o Isaraelu; ma pe a e faalogo i se upu mai i loʻu gutu, e tatau ona e avatu se lapataʻiga iā i latou mai iā te aʻu.+
8 Pe a ou fai atu i lē e amioleaga, ‘Le tagata amioleaga e, o le a e oti lava!’+ ae e te lē tautala atu ina ia lapataʻia ai lē e amioleaga ia liliuese mai i ona ala, e oti lava le tagata amioleaga ona o lana lava mea sesē,+ a o lona toto ou te taui atu lea iā te oe.
9 Ae pe afai e te lapataʻia lē e amioleaga ia liliuese mai i ona ala ae e musu o ia e liliuese mai i ona ala, e oti o ia ona o lana mea sesē,+ a o oe, ua e faasaoina lou lava ola.+
10 “O oe foʻi le atalii e o le tagata, ia fai atu i le aiga o Isaraelu, ‘Ua outou faapea ane: “Ua mamafa i o matou luga a matou fouvalega ma a matou agasala, ma ua tauau ina mou atu ai i matou;+ e faapefea la ona matou ola pea?”’+
11 Ia fai atu iā i latou, ʻ“Ou te tautō iā te aʻu lava,” ua fetalai mai ai le Alii Pule Silisili Ese o Ieova le Atua soifua, “ou te lē fiafia i le oti o le tagata amioleaga,+ ae ou te fiafia pe a liliuese le tagata amioleaga mai i lona ala,+ ma ola ai pea o ia.+ Le aiga o Isaraelu e, inā liliuese ia, ia liliuese mai i o outou ala leaga,+ auā aiseā o le a outou feoti ai?”’+
12 “A o oe, le atalii e o le tagata, ia fai atu i tagata o lou nuu, ‘E lē laveaʻiina lē ua amiotonu i lana amiotonu pe a ia fouvale;+ e lē tautevateva le tagata amioleaga ona o lana amioleaga, pe afai e liliuese o ia mai i lana amioleaga;+ e lē mafai foʻi ona ola pea se tagata amiotonu i lana amiotonu i le aso e agasala ai o ia.+
13 Pe a ou fai atu i lē ua amiotonu: “O le a ola pea oe,” ae ua faatuatua o ia i lana lava amiotonu ma faia le mea sesē,*+ e lē manatuaina ana galuega amiotonu uma, ae o le a oti o ia ona o mea sesē ua ia faia.+
14 “‘Pe a ou fai atu foʻi i lē ua amioleaga: “E te oti lava,” ae ua liliuese o ia mai i lana agasala ma faia le mea e tonu ma amiotonu,+
15 ma ua ia toe faafoʻi le mea na faamau ai se aitalafu,+ ua ia toe totogi atu foʻi mea na ia gaoia,+ ma ua savali e tusa ma tulafono e ola ai e ala i le lē faia o le mea sesē, o le a ola pea o ia.+ E lē oti lava o ia.
16 O agasala uma na ia faia, e lē toe lāgā mai* e faasaga iā te ia.+ O le a ola pea lava o ia, ona o le faia o le mea e tonu ma amiotonu.’+
17 “Ae ua faapea ane tagata o lou nuu: ‘E lē tonu ala o Ieova,’ peitaʻi o o latou lava ala ua lē tonu.
18 “Pe a lafoaʻia e le tagata amiotonu lana amiotonu ae fai le mea sesē, e ao ona oti o ia ona o ia mea.+
19 Ae pe a liliuese le tagata amioleaga mai i lana amioleaga ae fai le mea e tonu ma amiotonu, o le a ola pea o ia ona o le faia faapea.+
20 “Ae ua outou faapea mai: ‘E lē tonu ala o Ieova.’+ Le aiga o Isaraelu e, o le a ou faamasinoina outou taʻitoʻatasi e tusa ma ona ala.”
21 Mulimuli ane, i le tausaga lona 12, i le masina lona sefulu, i le aso lona lima o le masina talu ona ave faapagota i matou, na sau ai iā te aʻu se tagata na sola mai i Ierusalema+ ma faapea mai: “Ua faaumatia le aai!”+
22 Ae i le afiafipō a o leʻi sau le tagata na sola mai, na oo mai ai le aao o Ieova iā te aʻu, ma ua ia toe faagaganaina aʻu a o leʻi sau le tagata iā te aʻu i le taeao. O lea ua matala ai loʻu gutu, ma ua mafai ai ona ou toe tautala.+
23 Ua oo mai foʻi le afioga a Ieova iā te aʻu e faapea:
24 “Le atalii e o le tagata, o loo faapea ane ē ua nonofo i aai ua faagaogaoina+ e faatatau i le laueleele o Isaraelu, ‘E na o le toʻatasi Aperaamo ae na fai mo ia le laueleele.+ Ae e toʻatele i tatou; e mautinoa ua tuuina mai lava le laueleele e fai mo i tatou.’
25 “O lea inā fai atu ia iā i latou, ‘O le fetalaiga lenei a le Alii Pule Silisili Ese o Ieova: “Ua outou ʻaina meaʻai ua iai le toto,+ ua tetepa aʻe o outou mata i a outou tupua inosia,* ma ua outou faamasaa pea le toto.+ Pe e tatau ea la ona fai mo outou le laueleele?
26 Ua outou faalagolago i a outou pelu,+ ua outou faia mea inosia, ma ua taʻitasi outou ma faaleagaina le avā a lona tuaoi.+ Pe e tatau ea la ona fai mo outou le laueleele?”’+
27 “Ia faapea ona e fai atu iā i latou, ‘O le fetalaiga lenei a le Alii Pule Silisili Ese o Ieova le Atua soifua: “Ou te tautō iā te aʻu lava, o le a fasiotia i le pelu i latou o loo i aai ua faagaogaoina; ou te avatu foʻi lē ua i le fanua taalaelae e fai ma meaʻai a manufeʻai; ma o le a feoti i le faamaʻi i latou o loo i nofoaga malupuipuia ma ana.+
28 O le a ou matuā faatafunaina le laueleele,+ o le a faamutaina foʻi lona faasausili ma lona faamaualuga, ma o le a faatafunaina mauga o Isaraelu,+ e lē toe ui atu i ai se isi.
29 Ona latou iloa ai lea o aʻu lava o Ieova pe a ou matuā faatafunaina le laueleele,+ ona o mea inosia uma na latou faia.”’+
30 “A o oe, le atalii e o le tagata, ua fetalanoaaʻi tagata o lou nuu e faatatau iā te oe i autafa o pā ma i faitotoʻa o fale.+ Ua fetalanoaaʻi le tasi i le isi, ua taʻitoʻatasi ma fai atu i lona uso, ‘Inā ō mai ia, seʻi tatou faalogologo po o le ā le afioga ua tulei mai ai Ieova.’
31 O le a latou lolofi mai e nonofo i ou luma e pei o loʻu nuu; e latou te faalogo foʻi i au upu ae e latou te lē faia.+ Auā ua latou faaʻoleʻole iā te oe e ala i a latou upu, ae ua pupū o latou loto i polofiti e maua mai i faiga lē faamaoni.
32 Faauta! Ua pei oe o se pese aualofa iā i latou, ua usuina i se leo manaia ma tāina lelei i se meafaifaaili e iai uaua. O le a latou faalogo i au upu, ae e leai se tasi e faia ia mea.
33 Pe a taunuu lea mea, auā o le a taunuu moni lava, o le a latou iloa ai na iai le perofeta i lo latou lotolotoi.”+
Faamatalaga Pito i Lalo
^ Po o le “ae ou te tuuaʻia le tagata vāai i lona toto.”
^ Po o le “ma fai le mea lē tonu.”
^ Epe., “manatua.”
^ O le faaupuga Eperu atonu e fesootaʻi atu i le upu mo le “otaotavale,” ma o se faaupuga e faaalia ai le ʻinoʻino.
