Esekielu 28:1-26
28 Ua toe oo mai le afioga a Ieova iā te aʻu e faapea:
2 “Le atalii e o le tagata, ia e fai atu i le taʻitaʻi o Turo, ‘O le fetalaiga lenei a le Alii Pule Silisili Ese o Ieova:
“Talu ai ona ua faualuga lou loto,+ ua e fai mai ai pea, ‘O aʻu o se atua.
Ou te nofo i le nofoālii o se atua i le ogatotonu o le sami.’+
Ae ua na o oe o se tagata, e lē o se atua,E ui lava ua e manatu o oe o se atua.
3 Faauta! E te poto atu nai lo o Tanielu.+
E leai se mea lilo e te lē malamalama i ai.
4 O lou atamai ma lau faautaga loloto ua e faatamaoaigaina ai oe lava,Ua e faaputuina pea foʻi auro ma siliva i ou fale teuoloa.+
5 O lou tomai i le faia o fefaatauaʻiga, ua tele ai lou tamaoaiga,+Ma ua faualuga ai lou loto ona o lou tamaoaiga.”’
6 “‘O lea, o le fetalaiga lenei a le Alii Pule Silisili Ese o Ieova:
“Talu ai ua e manatu iā te oe lava, o oe o se atua,
7 O lea, ou te aumaia ai tagata ese, o pule sauā mai i nuu ina ia faasagatau iā te oe,+Ma e latou te seʻi aʻe a latou pelu e faasagatau ai i le matagofie o lou atamaiMa faaleagaina ai lou mamalu tele.+
8 O le a latou ave ifo oe i le lua,*Ma o le a e oti i se oti mataʻutia i le ogatotonu o le vasaloloa.+
9 Po o le a e fai atu pea i lē e fasiotia oe, ‘O aʻu o se atua’?
Ua na o oe o se tagata ae e lē o se atua, i lima o i latou e faaleagaina oe.”’
10 ‘O le a e oti i lima o tagata ese e pei o le oti o ē e lē peritomeina,Auā o aʻu lava ua ou fai atu ai,’ ua fetalai mai ai le Alii Pule Silisili Ese o Ieova.”
11 Ua oo mai foʻi le afioga a Ieova iā te aʻu e faapea:
12 “Le atalii e o le tagata, ia usu se pese faanoanoa* e faatatau i le tupu o Turo, ma fai atu iā te ia, ‘O le fetalaiga lenei a le Alii Pule Silisili Ese o Ieova:
“Sa avea oe ma faaaʻoaʻoga o le lelei atoatoa,E tumu i le atamai+ ma e atoatoa le matagofie.+
13 Sa e iai i Etena, le faatoʻaga a le Atua.
Na teuteuina oe i maa tāua umaO le salikea, o le topasi, ma le ialoma; o le tasesa, o le maa soama ma le iasepi; o le safaira, o le nofeka+ ma le samaraki;Ma na faia i le auro mea na faamauina ai nei maa.
Na saunia ia mea i le aso na faia ai oe.
14 Na ou tofia oe o se kerupi ua faauuina e faamalumalu.
Sa e iai i le mauga paia o le Atua,+ ma na e fesavaliaʻi i totonu o maa aasa.
15 Sa lē ponā ou ala mai i le aso na faia ai oeSeʻia oo ina iloa lau amiolētonu.+
16 Ona o le tele o au fefaatauaʻiga,+Na faatumuina ai oe i le sauā, ma ua e agasala ai.+
O lea, o le a ou lafoina ese ai oe o sē ua faaleagaina, mai i le mauga o le Atua ma faaumatia oe,+Le kerupi e, o loo faamalumalu, o le a ou aveese oe mai i lou tulaga i totonu o maa aasa.
17 Ua faualuga lou loto ona o lou aulelei.+
Ua e faaleagaina lou atamai ona o lou lava mamalu tele.+
O le a ou lafoina oe i le eleele.+
O le a ou tuuina oe i luma o tupu ina ia latou vaavaai atu iā te oe.
18 Ona o le tele o lou nofosala ma au fefaatauaʻiga lē tonu, ua e faaleagaina ai au mea paia.
O le a ou faapogaia se afi e sasao mai iā te oe ma o le a faatamaʻia ai oe.+
O le a ou faia oe ma lefulefu i le eleele i luma o ē uma o loo vaavaai atu iā te oe.
19 O i latou uma e iloaina oe mai i nuu, o le a sioa atu iā te oe ma le ofo.+
O le a mataʻutia ma oo faafuaseʻi mai lou iʻuga,Ma o le a e lē toe iai i aso uma lava.”’”+
20 Ua oo mai foʻi le afioga a Ieova iā te aʻu e faapea:
21 “Le atalii e o le tagata, ia faasaga atu ou mata i Saitonu+ ma faia valoaga e faasagatau atu iā te ia.
22 Ia e fai atu, ‘O le fetalaiga lenei a le Alii Pule Silisili Ese o Ieova:
“Saitonu e, ou te faasagatau atu iā te oe, ma o le a faamamaluina aʻu i ou lotolotoi;O le a iloa ai foʻi e tagata o aʻu lava o Ieova, pe a ou faaoo atu le faasalaga iā te ia ma faapaia ai aʻu i lona lotolotoi.
23 O le a ou faaoo atu le faamaʻi iā te ia ma o le a tafe le toto i ona auala.
O le a paʻuʻū ē e fasiotia i lona lotolotoi, pe a faasagatau atu le pelu iā te ia mai i itu uma;Ma o le a latou iloa ai o aʻu lava o Ieova.+
24 “‘“Ona lē toe siʻomia lea o le aiga o Isaraelu i laau talatala e afāina ai, ma laau tuitui e tigā ai,+ o i latou ia o loo tauemu iā i latou; ma o le a iloa ai e tagata o aʻu lava o le Alii Pule Silisili Ese o Ieova.”’
25 “‘O le fetalaiga lenei a le Alii Pule Silisili Ese o Ieova: “Pe a ou toe faapotopotoina le aiga o Isaraelu mai i nuu na faataapeapeina i ai i latou,+ o le a faapaiaina aʻu ona o i latou i luma o atunuu.+ O le a nonofo i latou i lo latou laueleele+ na ou avatu i laʻu auauna o Iakopo.+
26 O le a latou nonofo ai ma le saogalemu+ ma fau fale ma totō togāvine,+ e latou te nonofo foʻi ma le saogalemu pe a ou faaoo atu le faasalaga iā i latou uma, o ē o loo siʻomia i latou ma tauemua i latou;+ ona latou iloa ai lea o aʻu lava o Ieova lo latou Atua.”’”
