Esekielu 25:1-17
25 Ua toe oo mai le afioga a Ieova iā te aʻu e faapea:
2 “Le atalii e o le tagata, ia faasaga atu ou mata i le fanauga a Amoni,+ ma faia valoaga e faasaga iā i latou.+
3 E ao ona e fai atu i le fanauga a Amoni, ‘Inā faalogo mai ia i le afioga a le Alii Pule Silisili Ese o Ieova. O le fetalaiga lenei a le Alii Pule Silisili Ese o Ieova: “Talu ai ua e faapea mai, ʻUa ā la!’ e faatatau i loʻu malumalu ina ua faaleagaina, ma le laueleele o Isaraelu ina ua faatafunaina, faapea foʻi i le aiga o Iuta ina ua ave faapagota i latou,
4 o lea, ou te tuuina atu ai oe i tagata mai i Sasaʻe e fai mo i latou. O le a latou faatūina i lou laueleele o latou nofoaga e siʻomia i le pā, ma faatū foʻi i lou laueleele o latou faleʻie. O le a latou aai i au faaeleeleaga ma latou feinu i lou suāsusu.
5 O le a ou faia Rapa+ ma fanua e aai ai kamela, ma le laueleele o le fanauga a Amoni e fai ma mea e mālōlō ai lafumanu; ma o le a outou iloa ai o aʻu lava o Ieova.”’”
6 “Auā o le fetalaiga lenei a le Alii Pule Silisili Ese o Ieova, ‘Talu ai na patipati ou lima+ ma tatū ou vae, na e fiafia foʻi ma aamu lou loto e faatatau i le laueleele o Isaraelu,+
7 o lea, ou te faaloaloa atu ai loʻu lima faasaga iā te oe, ina ia tuuina atu oe e fai ma mea e faoa e atunuu. O le a ou faaumatia oe mai i tagata ma faafanoina oe mai i atunuu.+ O le a ou faaumatia oe ma o le a e iloa ai o aʻu lava o Ieova.’
8 “O le fetalaiga lenei a le Alii Pule Silisili Ese o Ieova: ‘Talu ai ua faapea mai Moapi+ ma Seira,+ “Vaai! Ua pei le aiga o Iuta o isi nuu uma,”
9 o lea, o le a ou tuua ai aai o loo i le tuaoi o Moapi ina ia lē puipuia, e aofia ai ma ona aai matagofie o Pete-semota, o Paala-meona, ma e oo lava i Kiriataima.+
10 Ou te tuuina atu Moapi ma le fanauga a Amoni i tagata mai i Sasaʻe+ e fai mo i latou, ma o le a lē toe manatuaina le fanauga a Amoni i nuu.+
11 O le a ou faaoo atu le faasalaga iā Moapi,+ ona latou iloa ai lea o aʻu lava o Ieova.’
12 “O le fetalaiga lenei a le Alii Pule Silisili Ese o Ieova: ‘Ua tauimasui Etoma i le aiga o Iuta, ma ua latou faatupuina lo latou matuā nofosala i lo latou taui atu iā i latou;+
13 o lea, o le fetalaiga lenei a le Alii Pule Silisili Ese o Ieova: “O le a ou faaloaloa foʻi loʻu lima e faasagatau iā Etoma, ma faaumatia ai tagata ma lafumanu o iai, ma ou faatafunaina lea nofoaga.+ O le a fasiotia i latou i le pelu e amata mai i Timanu e oo atu i Titana.+
14 ‘O le a ou tauimasui atu iā Etoma e ala i le lima o loʻu nuu o Isaraelu.+ O le a latou faaoo atu loʻu ita ma loʻu ita tele iā Etoma, ina ia latou tofo ai i laʻu tauimasui,’+ ua fetalai mai ai le Alii Pule Silisili Ese o Ieova.”’
15 “O le fetalaiga lenei a le Alii Pule Silisili Ese o Ieova: ‘O le ita pea o tagata Filisitia, ua latou matuā naunau ai e faaoo mai le tauimasui ma le faaumatiaga.+
16 O le mea lea, o le fetalaiga lenei a le Alii Pule Silisili Ese o Ieova: “Ou te faaloaloa atu loʻu lima e faasagatau i tagata Filisitia,+ ou te fasiotia foʻi tagata Kereti+ ma faaumatia isi o loo totoe i le talafatai.+
17 O le a ou faaoo atu iā i latou le tauimasui tele faatasi ma faasalaga ogaoga, ma o le a latou iloa ai o aʻu lava o Ieova pe a ou faaoo atu iā i latou laʻu tauimasui.”’”
