Esekielu 21:1-32
21 Ua toe oo mai le afioga a Ieova iā te aʻu e faapea:
2 “Le atalii e o le tagata, ia faasaga atu ou mata i Ierusalema ma faia se valoaga faasaga i mea paia, ma ia faia se valoaga faasaga i le laueleele o Isaraelu.
3 Ia e fai atu i le laueleele o Isaraelu, ‘O le fetalaiga lenei a Ieova: “O aʻu lenei ou te faasagatau iā te oe, ou te seʻi aʻe laʻu pelu mai i lona faamoega+ ma fasiotia ai le tagata amiotonu ma le tagata amioleaga ua iā te oe.
4 Ona o le a ou fasiotia le tagata amiotonu ma le tagata amioleaga ua iā te oe, o le mea lea o le a seʻi aʻe ai laʻu pelu mai i lona faamoega e faasagatau i tagata uma, e mai i le itu i saute e oo atu i le itu i mātū.
5 O le a iloa ai e tagata uma o aʻu o Ieova, o lea ua seʻi aʻe laʻu pelu mai i lona faamoega. E lē toe foʻi i lona faamoega.”’+
6 “O oe foʻi le atalii e o le tagata, ia mapuea a o e gatete.* Ia e mapuea ma le faanoanoa i o latou luma.+
7 Pe a latou faapea mai iā te oe, ‘Aiseā ua e mapuea ai?’ ia e tali atu, ‘Ona o se tala.’ Auā o le a faataunuuina lava, ma e liusuāvai ai loto uma ona o le fefefe, e tautau ai i lalo lima uma, e vaivai ai agaga uma ma sisina ifo ai le vai i tuli* uma.+ ‘Faauta foʻi! E oo mai lava ma e taunuu lava,’ ua fetalai mai ai le Alii Pule Silisili Ese o Ieova.”
8 Ua oo mai foʻi le afioga a Ieova iā te aʻu e faapea:
9 “Le atalii e o le tagata, ia fai valoaga ma faapea atu, ‘O le mea lenei ua fetalai mai ai Ieova: “Ia fai atu, ‘O se pelu!+ Ua faamaʻaiina se pelu ma ua faaiilaina.
10 Ua faamaʻaiina ina ia fasiotia ai le toʻatele; ma ua faaiilaina ina ia feʻilafi e pei o le emo o le uila.’”’”
“Pe e lē tatau ea ona tatou olioli?”
“‘Pe e lē teena ea e le pelu* le tootoo a loʻu lava atalii,+ e pei ona faia e le pelu i laau uma?
11 “‘Ua avatu le pelu ina ia faaiilaina ma faaaogā. O lenei pelu ua faamaʻaiina ma faaiilaina, ina ia avatu i le lima o le tagata e faaooina atu le faasalaga.+
12 “‘Le atalii e o le tagata, ia e alaga atu ma auē,+ auā ua sau le pelu e faasagatau i loʻu nuu; ua faasagatau i taʻitaʻi uma o Isaraelu.+ O le a faaumatia i latou e le pelu faatasi ma loʻu nuu. O lea, ia pōpō lou ogāvae ona o le faavauvau.
13 Auā ua faia se iloiloga,+ ae e faapefea la pe afai e teena e le pelu le tootoo? O le a lē toe iai le tootoo,’+ ua fetalai mai ai le Alii Pule Silisili Ese o Ieova.
14 “O oe foʻi le atalii e o le tagata, ia fai valoaga ma pati ou lima, ia faatolu ona faapea atu, ‘O le pelu!’ O le pelu o le a fasiotia ai tagata, o le pelu o le a fasiotia ai le toʻatele, o le pelu lea e siʻomia ai i latou.+
15 O le a liusuāvai o latou loto ona o le fefefe+ ma e toʻatele o le a fasiotia i o latou faitotoʻa o le aai; o le a ou faaoo atu se fasiotiga e ala i le pelu. Ioe, e feʻilafi le pelu e pei o le emo o le uila, ma ua faaiilaina mo le fasiotiga!
16 Ia e maʻai, ma ia sasau atu i le itu taumatau, ma sasau atu i le itu tauagavale! Ia e alu atu i so o se mea e faatonuina oe e faasaga i ai!
17 E pati foʻi oʻu lima ma faamalie loʻu ita tele.+ O aʻu o Ieova, ua ou fai atu ai.”
18 Ua oo mai foʻi le afioga a Ieova iā te aʻu e faapea:
19 “O oe foʻi le atalii e o le tagata, ia e tusi i lalo ala e lua e oo mai ai le pelu a le tupu o Papelonia. E ō atu ala e lua mai i le atunuu e tasi, ma ia faatū se faailoilo* i le mea e magalua ai le ala e agaʻi atu i aai e lua.
20 E ao ona e tusi se ala e oo mai ai le pelu faasaga iā Rapa+ o le fanauga a Amoni, ma le isi e faasaga i le aai malupuipuia o Ierusalema+ i Iuta.
21 Auā ua tū le tupu o Papelonia i le fetaulaʻiga o ala, i le mea e magalua ai le ala, ina ia faia ni valovaloga faataulāitu. Ua ia lūlū aū. Ua ia fesili atu i ona tupua;* ma ua ia iloilo i le ate.
22 O le valovaloga faataulāitu i lona lima taumatau, ua faasino atu iā Ierusalema, ina ia faatū ai meatau e lepetia ai, ia faatonuina ai le fasiotiga, ia ili le pū mo le taua, ia faatulaga meatau e lepetia ai i luma o faitotoʻa o le aai, ia tanu se mea maupuʻepuʻe, ma ia fausia se pā mo le taua.+
23 Ae o le a avea e pei o se valovaloga pepelo i manatu o ē* na faia tautoga iā i latou.*+ E na te manatuaina foʻi a latou solitulafono ma o le a ia puʻea i latou.+
24 “O lea, o le fetalaiga lenei a le Alii Pule Silisili Ese o Ieova: ‘O outou lava ua manatua ai a outou mea sesē e ala i le faaalialia o a outou solitulafono, ma faaalia a outou agasala i mea uma ua outou faia. Talu ai o lea ua manatua outou, o le a puʻea lava faamalosi outou.’*
25 “Le taʻitaʻi amioleaga o Isaraelu+ o lē ua manuʻa leaga, ua oo mai lou aso, o le taimi lea o lou faasalaga mulimuli.
26 O le fetalaiga lenei a le Alii Pule Silisili Ese o Ieova, ‘Ia aveese le pulou o le tupu ma aveese le palealii.+ O le a lē toe tutusa le tulaga o mea.+ Ia faaeaina lē ua maulalo,+ ae e faamaulaloina lē ua maualuga.+
27 O se faafanoga, o se faafanoga, o se faafanoga lea o le a ou faia i ai.* E lē tuuina atu foʻi le palealii i se tasi seʻia afio mai lē ua iai le aiā faaletulafono,+ ona ou tuuina atu lea iā te ia.’+
28 “O oe le atalii e o le tagata, ia fai valoaga ma faapea atu, ‘O le fetalaiga lenei a le Alii Pule Silisili Ese o Ieova e faatatau i le fanauga a Amoni ma a latou taufaifaiga.’ Ia fai atu, ‘O se pelu! Ua seʻi aʻe se pelu mo le fasiotiga; ua faaiilaina ina ia faatamaʻia ai ma ina ia fe‘ilafi e pei o le emo o le uila.
29 E ui i faaaliga pepelo ma valovaloga pepelo e faatatau iā te oe, ae o le a faaputuina ou tagata i luga o ē ua fasiotia,* o tane amioleaga ia o ē ua oo mai lo latou aso, o le taimi lea o lo latou faasalaga mulimuli.
30 Ia toe faafoʻi le pelu i lona faamoega. O le a ou faamasinoina oe i le mea na e tupuga mai ai, i le laueleele na e fanau ai.
31 O le a ou sasaa ifo loʻu ita i ou luga. O le a ou feulaina atu iā te oe le afi o loʻu ita tele, ma ou te tuuina atu oe i lima o tamāloloa e matuā sauā, o ē e atamamai i le faafanoina o tagata.+
32 O le a fai oe ma fafie i le afi;+ o le a faamasaaina lou toto i le laueleele, ma o le a lē toe manatuaina oe, auā o aʻu o Ieova ua ou fai atu ai.’”
Faamatalaga Pito i Lalo
^ Epe., “a o gatete ou puimanava.”
^ E faasino atu i le alu o le feʻau vai ona o le mataʻu.
^ E faasino atu i le pelu a Ieova.
^ Epe., “lima.”
^ Epe., “i le terafimi.”
^ E faasino atu i tagata o loo nonofo i Ierusalema.
^ E foliga mai o tagata Papelonia.
^ Po o le “puʻea outou e lima o o outou fili.”
^ Po o le “i le palealii.” E foliga mai e faasino atu i le tulaga tautupu.
^ Epe., “o ua o ē ua fasiotia.”
