O le Tusi Lona Lua o Tupu 12:1-21
12 I le tausaga lona fitu o le nofoaiga a Ieʻu,+ na avea ai Ioasa+ ma tupu, ma e 40 tausaga na pule ai o ia mai i Ierusalema. O le igoa o lona tinā o Sevi mai i Peresepa.+
2 Ua faia pea e Ioasa le mea ua tonu i le silafaga a Ieova, i aso uma na avea ai Ioiata le ositaulaga ma ana faufautua.
3 Peitaʻi, e leʻi aveesea mea maualuluga,+ ma na faia pea e le nuu taulaga ma faamū taulaga i luga o mea maualuluga.
4 Ona fai atu lea o Ioasa i ositaulaga: “Ia ave tupe uma ua aumaia i le fale o Ieova mo taulaga paia,+ o tupe e tatau ona totogi e tagata taʻitoʻatasi,+ o tupe ua maua mai i tagata o ē na faia tautoga, ma tupe uma ua foaʻi e tusa ma mea ua manatu i ai tagata taʻitoʻatasi e aumai i le fale o Ieova.+
5 Ia ave e ositaulaga nei tupe mai i ē na avatuina,* ma ia faaaogā e faaleleia ai le fale, i so o se vaega e maua ai se mea ua faaleagaina.”*+
6 E oo ane i le tausaga lona 23 o le nofoaiga a le tupu o Ioasa, e leʻi faaleleia lava e le ʻauositaulaga mea ua faaleagaina o le fale.+
7 Ona aami lea e le tupu o Ioasa o Ioiata+ le ositaulaga, ma isi ositaulaga ma fai atu iā i latou: “Aiseā ua outou lē faaleleia ai mea ua faaleagaina o le fale? O lenei, aua neʻi outou toe aveina ni tupe mai i ē e avatuina, seʻi vaganā ua faaaogā e faaleleia ai le fale.”+
8 Ona malilie lea o le ʻauositaulaga e latou te lē toe taliaina ni tupe mai i le nuu, ma e latou te lē toe faaleleia le fale.
9 Ua ave e Ioiata le ositaulaga se pusa+ ma faapū lona ufiufi, ma tuu i tafatafa o le fata faitaulaga, i le itu taumatau o se tasi e sau i le fale o Ieova. O i inā na tuu ai e le ʻauositaulaga o ē e leoleo faitotoʻa, tupe uma na aumaia i le fale o Ieova.+
10 O so o se taimi e latou te vāai atu ai ua matuā tele tupe i le pusa, ona ō aʻe lea o le failautusi a le tupu ma le ositaulaga sili, ua ao* ma faitau tupe na aumaia i le fale o Ieova.+
11 Ua la avatu tupe na faitauina, i tagata na tofia e vaavaaia le galuega na faia i le fale o Ieova. Ona latou totogi lea o le ʻaukamuta, ma le ʻaufaufale o ē na galulue i le fale o Ieova,+
12 faapea ma ē e ati maa, ma tufuga e tipiina maa. Ua latou faatau mai foʻi laupapa ma maa ua tipiina e faaleleia ai mea ua faaleagaina o le fale o Ieova, ma faaaogā tupe e totogi ai isi mea uma na avatu e faaleleia ai le fale.
13 Ae e leʻi faaaogāina tupe na aumaia i le fale o Ieova, e faia ai ni tanoa siliva, o seleulu, o ipu faaofuofu, o pū,+ po o so o se mea e faia i le auro ma le siliva mo le fale o Ieova.+
14 Ae ua na o tagata na faia le galuega, na la avatu i ai le tupe, ma na latou faaaogāina e faaleleia ai le fale o Ieova.
15 Ua la lē faamasinosino foʻi i tagata na tuu atu i ai tupe e avatu i ē na faia le galuega, auā na maufaatuatuaina i latou.+
16 A o tupe mo taulaga o le nofosala,+ ma tupe mo taulaga o agasala, e leʻi aumaia i le fale o Ieova ae na ave mo ositaulaga.+
17 O le taimi lenā na alu aʻe ai Asaeli+ le tupu o Suria, ua siitaua i le aai o Kata+ ma faatoʻilaloina. Ina ua uma, ona filifili lea o ia e osofaʻia* Ierusalema.+
18 Ona ave lea e Ioasa le tupu o Iuta, o taulaga paia uma na faapaiaina e ona augātamā o Iosefatu, o Ioramo, ma Aasaia, o tupu ia o Iuta, faapea ma ana lava taulaga paia, ma auro uma na maua i ʻoa o loo i le fale o Ieova ma le fale o le tupu, ma aauina atu iā Asaeli le tupu o Suria.+ Ona alu ese lea o ia mai i Ierusalema.
19 A o le olaga uma o Ioasa ma mea uma na ia faia, po ua lē o tusia ea i le tusi o le talafaasolopito o tupu o Iuta?
20 Peitaʻi, ua ʻau faatasi ana auauna ma taupulepule e fouvale+ ma fasiotia Ioasa i le fale o le Mea Maupuʻepuʻe,*+ i le ala e alu ifo i Sila.
21 O ana auauna o Iosaka le atalii o Semea, ma Iosapa le atalii o Someli, na la fasi iā te ia ma ua oti ai.+ Ua latou tanuina o ia faatasi ma ona augātamā i le Aai a Tavita; ona avea ai lea o Amasia lona atalii ma tupu e sui iā te ia.+
Faamatalaga Pito i Lalo
^ Po o “i a latou uō.”
^ Po o le “maua ai ni vetevete.”
^ Po o le “tuu i ato.” Epe., “fusifusi.”
^ Epe., “ona faasaga atu lea o Asaeli o le a alu a‘e e tau ma.”
^ Po o “i Petemilo.”
