O le Tusi Lona Lua o Samuelu 7:1-29
7 Ua nofo le tupu i lona lava fale,+ ma ua avatu e Ieova le mapusaga iā te ia mai i ona fili uma.
2 Ona fai atu lea o le tupu i le perofeta o Natano:+ “Vaai! o loo oʻu nofo i le fale arasi,+ ae o loo tuu le Atolaau a le Atua moni i totonu o se faleʻie.”+
3 Ona fai mai lea o Natano i le tupu: “O mea uma ua e finagalo i ai, inā alu ia ma fai, auā o loo faatasi Ieova ma oe.”+
4 I lenā lava pō, na oo mai ai le afioga a Ieova iā Natano e faapea:
5 “Inā alu ia ma fai atu i laʻu auauna o Tavita, ‘O le mea lenei na fetalai mai ai Ieova: “Pe e te faia ea se fale mo aʻu ou te nofo ai?+
6 Auā ou te leʻi nofo i se fale talu mai le aso na ou aveina aʻe ai le fanauga a Isaraelu mai i Aikupito e oo mai i le aso nei,+ ae sa ou fealuaʻi* pea i se faleʻie ma se fale‘ie paia.+
7 O aso uma na ou fealuaʻi ai faatasi ma le fanauga uma a Isaraelu,* pe na ou fai atu ea i se tasi o ituaiga o Isaraelu na ou tofia e leoleoina loʻu nuu o Isaraelu e faapea, ‘Aiseā na outou lē faia ai se fale arasi mo aʻu?’”’
8 O lenei, ia faapea ona e fai atu i laʻu auauna o Tavita, ‘O le mea lenei na fetalai mai ai Ieova o ʻau: “Na ou aumaia oe mai i le fanua e aai ai lafumanu, ma mai i le mulimuli atu i le lafu mamoe,+ ina ia avea ma taʻitaʻi i loʻu nuu o Isaraelu.+
9 Ou te faatasi ma oe i mea uma e te alu i ai,+ ou te faaumatia* foʻi ou fili uma i ou luma;+ ma ou te faia mo oe se igoa mamalu,+ e pei o igoa o alii sili i le lalolagi.
10 Ou te tofia foʻi se mea e nonofo ai loʻu nuu o Isaraelu ma faatumauina ai i latou, o le a latou nonofo ai i inā ma e lē toe atuatuvale i latou; e lē toe sauāina foʻi i latou e fanau a ē e amioleaga, e pei o aso ua mavae,+
11 e amata mai lava i le aso na ou tofia ai faamasino+ e pule i loʻu nuu o Isaraelu. Ou te avatu foʻi iā te oe le mapusaga mai i ou fili uma.+
“‘“Na taʻu atu foʻi e Ieova iā te oe, o le a faia e Ieova lou aiga ma aigātupu.*+
12 Pe a e oti,+ ona e taoto lea faatasi ma ou augātamā, ae ou te faatūina se tasi o lau fanau pe a mavae atu oe, o lou lava atalii,* ma ou te matuā faatumauina lona malo.+
13 O ia lava lenā e na te faia se fale mo loʻu igoa,+ ou te matuā faatumauina foʻi le nofoālii o lona malo seʻia oo i le faavavau.+
14 E fai aʻu ma ona tamā, e fai foʻi o ia ma oʻu atalii.+ Pe a ia faia se mea sesē, ou te faasaʻo o ia,* ma ou sasaina o ia e faasala ai e pei ona faia e tagata.+
15 E lē aveesea loʻu alofa faamaoni mai iā te ia, e pei ona ou aveesea mai iā Saulo,+ o lē na ou aveesea mai i ou luma.
16 E mausalī lou aiga ma lou malo i ou luma e faavavau; e matuā faatumauina foʻi lou nofoālii e faavavau.”’”+
17 Ua taʻu atu e Natano iā Tavita o nei upu uma ma lenei faaaliga atoa.+
18 Ona alu atu ai lea o le tupu o Tavita ma nofo i lalo i luma o Ieova, ua faapea atu: “Le Alii Pule Silisili Ese, Ieova e, o ai ea aʻu nei? O ai foʻi loʻu aiga ua e faia ai le tele o mea mo i matou?+
19 Le Alii Pule Silisili Ese, Ieova e, e pei ua lē lava lenei mea, ina ua e fetalai mai foʻi o le a faatumauina le aiga o lau auauna seʻia oo i se taimi e mamao lava i le lumanaʻi; le Alii Pule Silisili Ese, Ieova e, e leai lava se tagata e mafai ona ia suia.*
20 Le Alii Pule Silisili Ese, Ieova e, o le ā ea se isi upu e toe tautala atu ai Tavita iā te oe, auā ua e silafia lelei lau auauna?+
21 Ona o lau afioga ma e tusa ma lou lava finagalo, ua e faia ai nei mea tetele uma ma faailoa mai i lau auauna.+
22 O le mea lea ua sili ai oe,+ le Alii Pule Silisili Ese, Ieova e. E leai se tasi e tusa ma oe,+ e leai foʻi se isi Atua e na o oe lava;+ o mea uma lava ua faalogo i ai o matou taliga, ua faamaonia ai lenei mea.
23 O ai foʻi se isi atunuu i le lalolagi e pei o lou nuu o Isaraelu?+ Le Atua e, na e laveaʻiina i latou e avea ma ou nuu,+ ma faia ai mo oe se suafa+ e ala i le faia o mea tetele ma mataʻutia mo i latou.+ Na e tutuliesea atunuu ma o latou atua, ona o lou nuu lea na e lavea‘ia mo oe mai i Aikupito.
24 Na e faatumauina lou nuu o Isaraelu e fai ma ou nuu i aso uma lava;+ ua avea foʻi oe Ieova ma o latou Atua.+
25 “O lenei, Ieova le Atua e, ia e faataunuuina le folafolaga ua e fetalai mai ai e faatatau i lau auauna ma lona aiga e faavavau, ma ia e faia e pei ona e fetalai mai ai.+
26 Ia faamamaluina lou suafa e faavavau,+ ina ia faapea ane ai tagata, ‘O Ieova o ʻau, o ia o le Atua o Isaraelu,’ ma ia matuā faatumauina i ou luma le aiga o lau auauna o Tavita.+
27 Auā o oe Ieova o ʻau le Atua o Isaraelu, ua e faailoa mai se faaaliga i lau auauna e faapea, ‘Ou te faia lou aiga ma aigātupu.’+ O le mea lea, ua lototele ai lau auauna e tatalo atu iā te oe i lenei tatalo.
28 O lenei, le Alii Pule Silisili Ese, Ieova e, o oe o le Atua moni, e moni foʻi au fetalaiga,+ ma ua e folafola i lau auauna nei mea lelei.
29 Tau ina ia e faamanuia le aiga o lau auauna, ina ia iai pea i ou luma i aso uma lava;+ auā o oe lava na e folafola mai le Alii Pule Silisili Ese, Ieova e, o lau faamanuia foʻi e manuia ai le aiga o lau auauna e faavavau.”+
Faamatalaga Pito i Lalo
^ Epe., “savali.”
^ Epe., “atalii uma o Isaraelu.”
^ Epe., “tipiesea.”
^ Epe., “o le a faia e Ieova se aiga mo oe.”
^ Epe., “o lē e fanau mai i lou manava.”
^ Epe., “ou te aʻoaʻi iā te ia i le sasa a tagata.”
^ Epe., “o le tulafono lenei mo tagata uma lava.”
