O le Tusi Lona Lua o Nofoaiga a Tupu 15:1-19
-
Faia ni suiga e Asa (1-19)
15 Ua iai le agaga o le Atua iā Asaraia le atalii o Oteta.
2 Ona alu atu lea o ia e faafetaui Asa ma faapea atu iā te ia: “Asa e, ma Iuta uma, ma Peniamina, inā faalogo mai ia iā te aʻu! E ʻau Ieova ma outou pe afai e tou te ʻau ma ia;+ afai foʻi e tou te saʻili atu iā te ia, o le a outou maua o ia,+ ae afai e tou te tuua o ia, o le a ia tuua foʻi outou.+
3 Na umi se taimi* e leʻi toe auauna Isaraelu i le Atua moni pe aʻoaʻoina i latou e se ositaulaga, ma e latou te le‘i tausia le tulafono.+
4 Ae ina ua oo puapuaga iā i latou, ona latou toe foʻi atu lea iā Ieova le Atua o Isaraelu ma saʻili iā te ia, ona latou maua lea o ia.+
5 I na aso, sa leai se isi na mafai ona faimalaga ma le saogalemu,* auā sa leai se filemu i tagata uma o nuu.
6 Na faatoʻilaloina e le tasi nuu le isi nuu, ma na faatoʻilaloina e le tasi aai le isi aai, auā ua faafenuminumiaʻi e le Atua i latou i puapuaga eseese uma lava.+
7 A o outou, ia outou lototetele ae aua neʻi lotovaivai,*+ auā o le a tauia a outou galuega.”
8 Ina ua faalogo Asa i nei upu ma le valoaga a le perofeta o Oteta, ona lototele ai lea o ia ma ia aveesea ai tupua inosia mai i le nuu uma o Iuta+ ma Peniamina, ma aai na ia faoa mai i le vaega maugā o Efaraima, ma toe faafou le fata faitaulaga a Ieova sa i luma o le faapaologa a Ieova.+
9 Ua ia faapotopoto faatasi foʻi Iuta uma ma Peniamina, ma tagata ese o loo iā i latou mai i Efaraima, o Manase, ma Simeona,+ auā na sosola atu iā te ia le toʻatele o tagata mai i Isaraelu, ina ua latou iloa o loo faatasi Ieova lona Atua ma ia.
10 Ona latou faapotopoto faatasi ai lea i Ierusalema, i le masina lona tolu o le tausaga lona 15 o le nofoaiga a Asa.
11 Ua latou fai taulaga foʻi iā Ieova i lenā aso i le vete na latou aumaia, e 700 povi ma mamoe e 7,000.
12 Ua latou osia foʻi se feagaiga e saʻili iā Ieova le Atua o o latou augātamā, ma o latou lotoatoa ma o latou ola atoa.+
13 O so o se tasi e lē saʻili iā Ieova le Atua o Isaraelu, e fasiotia o ia, pe laʻitiiti, pe matua, po o se tane, po o se fafine.+
14 Ona latou tautō lea iā Ieova ma le leotetele, ma le alaga fiafia faatasi ma pū.*
15 Ua olioli Iuta uma ona o le tautoga, auā na latou tautō ma o latou lotoatoa, ma ua latou matuā saʻili atu iā te ia, ona latou maua lea o ia.+ Ua tuuina mai pea e Ieova iā i latou le mapusaga i itu uma.+
16 Na aveesea fo‘i e le tupu o Asa o Maaka+ le tinā o lona tinā, mai i lona tulaga maualuga,* auā na ia faia se tupua matagā e tapuaʻi ai i le pou paia.*+ Ona tā lea i lalo e Asa o lana tupua matagā, ua nutipala ma susunu i le vanu o Ketarono.+
17 Ae e leʻi aveesea mea maualuluga+ mai i Isaraelu.+ E ui i lea, sa atoatoa* le loto o Asa i lona olaga atoa.+
18 Ua ia aumaia foʻi i le fale o le Atua moni mea na la faapaiaina ma lona tamā, o siliva, o auro, ma isi ipu.+
19 E leʻi toe iai foʻi ni taua seʻia oo i le tausaga lona 35 o le nofoaiga a Asa.+
Faamatalaga Pito i Lalo
^ Epe., “E tele aso.”
^ Epe., “sa leai se filemu mo se tasi na alu atu ma toe sau.”
^ Epe., “aua neʻi faapaʻuʻū i lalo o outou lima.”
^ Epe., “pū ma seu o manu.”
^ Epe., “mai i lona tulaga o se masiofo.”
^ Tagaʻi i le Uiga o Upu.
^ Po o le “tuutoina atu atoatoa.”
