O le Tusi Lona Lua a Ioane 1:1-13
1 O aʻu o le toeaina, ua ou tusi atu i le tamaʻitaʻi ua filifilia ma lana fanau o ē ou te alofa faapelepele i ai, e lē gata iā te a‘u, ae faapena foʻi i latou uma ua iloa le upu moni,
2 ona o le upu moni o loo tumau pea iā i tatou, ma e tumau e faavavau iā i tatou.
3 O le a iai pea iā i tatou le agalelei faifua, le alofa mutimutivale, ma le filemu mai i le Atua le Tamā ma Iesu Keriso, le Alo o le Tamā, faatasi ma le upu moni ma le alofa.
4 Ua ou matuā olioli ina ua ou iloa o loo savavali nisi o lau fanau i le upu moni,+ e pei ona poloaʻia ai i tatou e le Tamā.
5 O lenei, le tamaʻitaʻi e, ua ou talosaga atu iā te oe, ina ia tatou alolofa o le tasi i le isi. (Ua ou tusi atu iā te oe, e lē o se poloaʻiga fou, a o le poloaʻiga na iā i tatou mai i le amataga.)+
6 O le alofa lava lenei, ia faaauau ona tatou savavali e tusa ai ma ana poloaʻiga.+ O le poloaʻiga lenei e pei ona outou faalogo ai mai i le amataga, e tatau ona outou faaalia pea le alofa.
7 Auā e toʻatele tagata taufaasesē ua ō atu i le lalolagi,+ e latou te leʻi taʻutino atu na afio mai Iesu Keriso o se tagata.+ O le taufaasesē lea ma le anetikeriso.*+
8 Ia outou faaeteete ina neʻi maʻimau mea na matou tautigā ai, ae ia outou maua le taui atoatoa.+
9 O lē e sopo tapulaa i aʻoaʻoga a le Keriso ma e lē tumau foʻi i ai, e lē autasi o ia ma le Atua.+ A o lē e tumau i lenei aʻoaʻoga, ua autasi o ia ma le Tamā atoa ma le Alo.+
10 Afai e sau se tasi iā te outou ae na te lē faailoaina mai lenei aʻoaʻoga, aua lava tou te taliaina o ia i o outou fale,+ pe faatalofa atu foʻi iā te ia.
11 Auā o sē e faatalofa atu iā te ia, ua aufaatasi atu o ia i ana galuega leaga.
12 E ui lava e tele ni mea ou te fia taʻu atu iā te outou, ae ou te lē manaʻo e tusi atu i se tusi, ae ou te faamoemoe e alu atu iā te outou ma tatou talatalanoa faatasi, ina ia atoatoa ai lo outou olioli.
13 O loo alolofa atu iā te oe le fanau a lou uso, o lē ua filifilia.
Faamatalaga Pito i Lalo
^ E faasino atu i lē e tetee iā Keriso.
