O le Tusi Muamua o Tupu 8:1-66
8 Ua faapotopoto mai e Solomona+ o toeaina o Isaraelu, o taʻitaʻi uma o ituaiga, ma alii sili o aiga o tamā o le fanauga a Isaraelu.+ Ua latou ō mai i le tupu o Solomona i Ierusalema, ina ia ave aʻe le atolaau o le feagaiga a Ieova mai i le Aai a Tavita,+ o Siona lea.+
2 Ua faapotopoto tane uma o Isaraelu i luma o le tupu o Solomona i le tausamiga,* i le masina o Etanima,* o le masina lona fitu lea.+
3 Ua ō mai toeaina uma o Isaraelu, ma ua ave aʻe e ositaulaga le Atolaau.+
4 Ua latou ave aʻe le Atolaau a Ieova, o le faleʻie o le feiloaʻiga,+ ma ipu paia uma sa i le faleʻie. Ua ave aʻe e le ʻauositaulaga ma sa Levī na mea uma.
5 Ua iai i luma o le Atolaau le tupu o Solomona ma le faapotopotoga uma o Isaraelu, o ē na poloaʻia e faapotopoto mai iā te ia. Ua faia taulaga+ i mamoe ma povi e lē mafaitaulia ona o le tele.
6 Ua ave aʻe e ositaulaga le atolaau o le feagaiga a Ieova i le mea e tuu ai,+ i le potu pito i totonu o le fale, o le Mea e Sili Ona Paia, i lalo ifo o apaʻau o kerupi.+
7 Auā ua faaloloa atu apaʻau o kerupi i luga o le mea o iai le Atolaau, ina ia faamalumalu ifo kerupi i le Atolaau ma ona amo.+
8 Ae ua uumi amo,+ ua iloa atu pito o amo mai i le Mea Paia lea e i luma o le potu pito i totonu, ae e lē iloa atu mai i fafo. Ua iai pea i inā seʻia oo mai i aso nei.
9 E leai se mea sa i totonu o le Atolaau, seʻi vaganā ai papamaa e lua+ na tuuina ai e Mose+ i Horepa, ina ua osia e Ieova le feagaiga+ ma le fanauga a Isaraelu, a o latou ō ese mai i le nuu o Aikupito.+
10 Ina ua ō mai i fafo ositaulaga mai i le mea paia, ona faatumuina ai lea o le fale o Ieova+ i le ao.+
11 Ua lē mafai ona tutū ai i inā ositaulaga e auauna ona o le ao, auā ua tumu le fale o Ieova i le mamalu o Ieova.+
12 Ona faapea atu lea o Solomona: “Na fetalai mai Ieova, e afio o ia i le ao pogisa mafiafia.+
13 Ua uma ona ou faia se fale, o se afioaga maualuga mo oe, o se nofoaga tumau mo oe e te afio ai e faavavau.”+
14 Ona liliu atu lea o le tupu, ma faamanuia i le faapotopotoga uma o Isaraelu, a o laulaututū mai le faapotopotoga uma o Isaraelu.+
15 Ua faapea atu o ia: “Ia viia Ieova le Atua o Isaraelu, o lē na folafola mai i lona lava fofoga iā Tavita loʻu tamā, ma ua faataunuu e lona lava aao, e faapea,
16 ‘E mai lava i le aso na ou aumaia ai loʻu nuu o Isaraelu mai i Aikupito, ou te leʻi filifilia se aai mai i ituaiga uma o Isaraelu, e faia ai se fale mo loʻu igoa ina ia faamamaluina ai i inā;+ ae ua ou filifilia Tavita ina ia pule i loʻu nuu o Isaraelu.’
17 Sa naunau le loto o Tavita loʻu tamā e fausia se fale mo le suafa o Ieova le Atua o Isaraelu.+
18 Ae ua fetalai mai Ieova i loʻu tamā o Tavita, ‘Ua naunau lou loto e fausia se fale mo loʻu igoa, ma ua lelei le mea ua naunau i ai lou loto.
19 Peitaʻi, e te lē faia le fale, a o lou atalii o lē e fanau mai iā te oe,* o ia e na te faia le fale mo loʻu igoa.’+
20 Ua faataunuu e Ieova lana folafolaga na ia fetalai mai ai, auā ua ou suitulaga i loʻu tamā o Tavita ma nofo i le nofoālii o Isaraelu, e pei ona folafola mai e Ieova. Ua ou faia fo‘i se fale mo le suafa o Ieova le Atua o Isaraelu,+
21 ma ou saunia ai i inā se mea e tuu ai le Atolaau, o loo iai le feagaiga+ na osia e Ieova ma o tatou augātamā ina ua ia aumaia i latou mai i le nuu o Aikupito.”
22 Ona tū lea o Solomona i luma o le fata faitaulaga a Ieova, i luma o le faapotopotoga uma o Isaraelu, ma ua sisii aʻe ona lima i le lagi,+
23 ua ia faapea atu: “Ieova e, le Atua o Isaraelu, e leai se Atua e pei o oe+ i le lagi i lugā po o le lalolagi i lalo nei, ua e tausia le feagaiga, ma ua e alofa faamaoni+ i au auauna o ē e savavali i ou luma ma o latou lotoatoa.+
24 Ua e tausia lau folafolaga na fai i lau auauna o Tavita loʻu tamā. Na e faia le folafolaga e ala mai i lou fofoga, ma ua e faataunuuina i lou aao i le aso nei.+
25 O lenei, Ieova e, le Atua o Isaraelu, ia e tausi i lau folafolaga na faia i lau auauna o Tavita loʻu tamā, ina ua e fetalai: ‘E lē motu lou gafa mai i le nofoālii o Isaraelu, tau lava ina ia faaeteete lau fanau i le auala e ola ai, e ala i le savavali i oʻu luma e pei ona e savali i oʻu luma.’+
26 O lenei, le Atua e, o Isaraelu, faamolemole ia taunuu lau folafolaga na faia i lau auauna o Tavita loʻu tamā.
27 “Ae pe e afio moni ea le Atua i le lalolagi?+ Faauta! O le lagi, ioe, o le lagi o lagi e te lē ofi ai;+ e sili atu la ona e lē ofi i lenei fale ua ou faia!+
28 Ieova e, loʻu Atua, ia e liuliualo mai i le tatalo a lau auauna ma lana talosaga atu mo lou finagalo malie, ia e faafofoga mai i le ʻaiʻoi atu mo se fesoasoani, ma le tatalo ua tatalo atu ai lau auauna i ou luma i le aso nei.
29 Ia silasila mai ou fofoga i lenei fale i le ao ma le pō, i le fale na e fetalai mai ai, ‘E iai loʻu igoa i inā,’+ ina ia e faafofoga i le tatalo e tatalo atu ai lau auauna a o faasaga mai i lenei nofoaga.+
30 Ia e faafofoga mai i le talosaga a lau auauna mo lou finagalo malie, ma le talosaga a lou nuu o Isaraelu lea ua latou tatalo atu ai a o faasasaga mai i lenei nofoaga, ma ia e faafofoga mai i le mea o e afio ai, o le lagi+ lea; ia e faafofoga mai ma ia faamagalo mai.+
31 “Pe a tuua‘ia se tagata i lona faia o se mea sesē i lona uso a tagata, e faatautō o ia e lona uso i se tautoga.* Pe afai e sau lea tagata i luma o lou fata faitaulaga i lenei fale, ona o le tautoga na ia tautō ai,+
32 ia e faafofoga mai i le lagi, ia e faamasino i au auauna i le taʻusalaina o lē e amioleaga, ma taui atu iā te ia e tusa ma le mea na ia faia, ae ia e taʻuamiotonuina lē ua amiotonu, ma taui atu iā te ia e tusa ai o lana amiotonu.+
33 “Pe a faatoʻilaloina lou nuu o Isaraelu e o latou fili, ona o lo latou agasala pea iā te oe,+ ae ua latou toe foʻi mai iā te oe, ma vivii i lou suafa,+ ma tatalo, ma ʻaiʻoi atu mo lou finagalo malie i lenei fale,+
34 ia e faafofoga mai i le lagi, ma e faamagalo le agasala a lou nuu o Isaraelu, ia e toe faafoʻi mai i latou i le laueleele na e foaʻi mai i o latou augātamā.+
35 “Pe a punitia le lagi ua leai se timu,+ ona ua latou agasala pea iā te oe,+ ma ua latou tatalo atu a o faasasaga mai i lenei fale, ma vivii atu i lou suafa, ma latou liliuese mai i a latou agasala auā ua e faapuapuagatia i latou,+
36 ia e faafofoga mai i le lagi, ma faamagaloina le agasala a au auauna, o lou nuu o Isaraelu, auā e te aʻoaʻoina i latou+ i le ala lelei latou te savavali ai; ia e foaʻi mai foʻi le timu i lou laueleele+ na e foaʻi mai i lou nuu e fai ma o latou tofi.
37 “Pe afai e oo mai i le nuu se oge,+ se faamaʻi, se lāmala, o polopologā,*+ o sē akerise e matuā tele; pe afai fo‘i e siʻosiʻomia i latou e o latou fili i so o se aai o le nuu, pe tupu foʻi so o se mala po o so o se faamaʻi,+
38 o tatalo uma, o talosaga uma mo lou finagalo malie+ e faia e so o se tagata, po o lou nuu uma o Isaraelu pe a faaloaloa mai o latou lima agaʻi i lenei fale, auā ua taʻitasi i latou ma iloa le tigā o lona loto,+
39 ia e faafofoga mai i le lagi i lou afioaga,+ ia e faamagalo mai,+ ma ia e faia e tusa ma lou finagalo, ma tauia tagata taʻitoʻatasi e tusa ma ona ala+ uma, auā ua e silafia lona loto (e na o oe e silafia lelei loto o tagata uma),+
40 ina ia latou matataʻu ai iā te oe i aso uma latou te ola ai, i le laueleele na e foaʻi mai i o matou augātamā.
41 “O le tagata ese foʻi, e lē o se tagata o lou nuu o Isaraelu, ae ua sau mai i se nuu mamao ona o lou suafa*+
42 (auā o le a latou faalogo i lou suafa mamalu,+ o lou aao malosi, ma lou aao faaloaloa), ma ua sau o ia ma tatalo a o faasaga mai i lenei fale,
43 ia e faafofoga mai i le lagi i lou afioaga,+ ma faia mea uma lava ua talosaga atu ai le tagata ese iā te oe, ina ia iloa ai e tagata uma o le lalolagi lou suafa ma ia matataʻu iā te oe,+ e pei foʻi ona faia e lou nuu o Isaraelu, ma latou iloa ai ua taʻua lou suafa i lenei fale ua ou fausia.
44 “Po o fea lava e te auina atu ai lou nuu+ e tau ai ma o latou fili, ma afai e latou te tatalo+ atu iā te oe Ieova, a o faasasaga mai i le aai na e filifilia+ ma le fale na ou faia mo lou suafa,+
45 ia e faafofoga mai i le lagi i a latou tatalo ma a latou talosaga mo lou finagalo malie, ia e faia foʻi le faamasinoga mo i latou.
46 “Afai latou te agasala iā te oe (auā e leai lava se tagata e lē agasala),+ ma ua e toʻatamaʻi iā i latou ma tuulafoaʻi i latou i le fili, ma ua ave faapagota i latou e ē na puʻea i latou i le nuu o le fili, pe mamao pe latalata;+
47 ma afai e toe atamamai i latou i le nuu na ave faapagota i ai,+ ma toe foʻi atu iā te oe+ ma ʻaiʻoi atu mo lou finagalo malie mai i le nuu o ē na puʻea i latou+ e faapea, ‘Ua matou agasala, ua matou sesē, ua matou faia amioga leaga,’+
48 afai foʻi latou te toe foʻi mai iā te oe ma o latou lotoatoa+ ma lo latou malosi atoa, mai i le nuu o o latou fili na aveina faapagota i latou, ma afai latou te tatalo atu iā te oe a o faasasaga i lo latou laueleele na e foaʻi mai i o latou augātamā, o le aai na e filifilia, ma le fale na ou faia mo lou suafa,+
49 ia e faafofoga mai i le lagi i lou afioaga+ i la latou tatalo, ma la latou talosaga mo lou finagalo malie, ia e faia foʻi le faamasinoga mo i latou
50 ma faamagalo lou nuu ua agasala iā te oe, atoa ma a latou solitulafono uma na faia faasaga iā te oe. Ia e faia foʻi i latou ina ia alolofa mutimutivale i ai o ē na puʻea i latou, e latou te alolofa mutimutivale foʻi iā i latou+
51 (auā o lou nuu ma lou tofi+ i latou, o ē na e aumaia mai i Aikupito+ mai i totonu o le ogaumu e tunu ai uʻamea).+
52 Ia silasila mai ou fofoga i le talosaga a lau auauna mo lou finagalo malie,+ ma le talosaga a lou nuu o Isaraelu mo lou finagalo malie, e ala i lou faafofoga mai i so o se taimi e latou te valaau atu ai iā te oe.*+
53 Auā o oe Ieova e, le Alii Pule Silisili Ese, na e vavaeeseina i latou mai i nuu uma o le lalolagi+ e fai ma ou tofi, e pei lava ona e fetalai mai ai e ala mai i lau auauna o Mose, ina ua e aumaia o matou augātamā mai i Aikupito.”
54 Ina ua uma ona ofoina atu e Solomona iā Ieova lenei tatalo atoa, ma lana talosaga mo le finagalo malie, ona ia tulaʻi lea mai i luma o le fata faitaulaga a Ieova, lea sa tootuli ma faaloaloa aʻe ai ona lima i le lagi.+
55 Ua tū o ia ma faamanuia atu i le faapotopotoga uma o Isaraelu, ua faapea atu ma le leotele:
56 “Ia viia Ieova, o lē na tuuina mai le mapusaga mo lona nuu o Isaraelu, e tusa ai ma lana folafolaga.+ E leai se upu e tasi e leʻi taunuu o ana folafolaga lelei uma,+ na ia folafola mai e ala i lana auauna o Mose.
57 Ia faatasi Ieova lo tatou Atua ma i tatou, e pei ona ia faatasi ma o tatou augātamā.+ Aua neʻi tuua e ia i tatou pe lafoaʻiina i tatou.+
58 Ia faaliliuina e ia o tatou loto iā te ia+ ina ia tatou savavali i ona ala uma, ma tausi i ana poloaʻiga, o tulafono, ma iʻuga o ana faamasinoga, ia na poloaʻi mai ai o ia i o tatou augātamā e tausia.
59 Tau ina ia manatua e Ieova lo tatou Atua i le ao ma le pō, o aʻu upu nei ua ou ʻaiʻoi atu ai iā Ieova mo lona finagalo malie, ina ia faia e ia le faamasinoga mo lana auauna ma lona nuu o Isaraelu, e pei ona manaʻomia i aso taʻitasi,
60 ina ia iloa ai e nuu uma o le lalolagi o Ieova o le Atua moni.+ E leai se isi Atua!+
61 Ia atoatoa* foʻi o outou loto+ iā Ieova lo tatou Atua i le savavali i ana tulafono, ma tausia ana poloaʻiga e pei ona faia i lenei aso.”
62 Ua faia e le tupu ma Isaraelu uma o loo faatasi ma ia se taulaga tele i luma o Ieova.+
63 Ua ofoina atu e Solomona taulaga faifaatasi+ iā Ieova: Na ia ofo atu povi e 22,000 ma mamoe e 120,000. O lea, ua faapaia ai e le tupu ma le fanauga uma a Isaraelu le fale o Ieova.+
64 O le aso lenā na faapaia ai e le tupu le ogatotonu o le lotoā o loo i luma o le fale o Ieova, auā o i inā na ia ofoina ai taulaga mū, o taulaga i meaʻai,* ma gaʻo o taulaga faifaatasi, auā ua laʻitiiti tele le fata faitaulaga ʻapamemea+ o loo i luma o Ieova, na lē ofi ai taulaga mū, o taulaga i meaʻai, ma gaʻo+ o taulaga faifaatasi.
65 Ona faia lea i lenā taimi e Solomona ma Isaraelu uma, o se tausamiga+ i luma o Ieova lo tatou Atua, o se faapotopotoga na matuā toʻatele lava, e ō mai e amata mai i Lepo-amato* e alu ifo i le ālia* o Aikupito,+ e 7 aso ma le isi 7 aso, e 14 ia aso.
66 Ona ia tuu atu lea o le nuu e ō i le aso na sosoo ai,* ua latou faamanuia foʻi i le tupu ma ō atu i o latou fale, ua olioli ma fiafia o latou loto i mea lelei uma+ na faia e Ieova mo Tavita lana auauna, ma lona nuu o Isaraelu.
Faamatalaga Pito i Lalo
^ E faasino atu i le Tausamiga o Fale Lauvao.
^ Epe., “lou atalii, o lē e sau mai i lou suilapalapa.”
^ Po o le “e fetuu o ia e lona uso.” E faasino atu i se tautoga, lea e aofia ai se faasalaga o se fetuu pe afai e lē tausia le tautoga.
^ E faasino atu i se faamaʻi o laau.
^ Po o le “talaaga.”
^ Po o le “faafofoga mai iā i latou i so o se mea e latou te talosaga atu ai.”
^ Po o le “tuutoina atu atoatoa.”
^ Po o “taulaga i fatu.” Tagaʻi i le faamatalaga pito i lalo o le Levitiko 2:1.
^ Po o “le mea e ulu atu ai i Amato.”
^ Tagaʻi i le Uiga o Upu.
^ Epe., “lona valu,” e faasino atu i le aso e sosoo ma le fitu aso mulimuli.
