O le Tusi Muamua o Tupu 6:1-38
6 I le 480 tausaga talu ona tuua e le fanauga a Isaraelu* le nuu o Aikupito,+ o le tausaga lona fā lea talu ona avea Solomona ma tupu o Isaraelu, i le masina o Sefa*+ (o le masina lona lua lea), na amata ai ona faia e Solomona le fale mo Ieova.*+
2 O le fale na faia e le tupu o Solomona mo Ieova e 60 kupita* le umi, e 20 kupita le lautele, ae 30 kupita le maualuga.+
3 O le faapaologa+ sa i luma o le malumalu,* e tutusa lona lautele ma le lautele o le fale: e 20 kupita. O le umi o le faapaologa e sefulu kupita, e faaopoopo i le umi o le fale.
4 Ua ia faia foʻi faamalama o le fale e lauiti faavaa.+
5 E lē gata i lea, ua ia fausia se vaega e sosoo i tua atu o puipui o le fale; na faataamilo* i puipui o le fale lea e iai le Mea Paia* ma le potu pito i totonu,*+ ma ua ia faia ai ni potu i autafa e faataamilo ai.+
6 O potu aupito i lalo e lima kupita le lautele, o potu ogatotonu e ono kupita le lautele, o potu i le fogāfale lona tolu e fitu kupita le lautele; auā na ia faia ni lagolago e faataamilo i fafo o le fale, ina ia aua neʻi pipii se mea i puipui o le fale.+
7 Na faia le fale i maa ua uma ona tipiina ma teuteuina lelei,+ ina ia lē lagona ai le pa‘ō o se samala, o se to‘i, po o se isi lava meafaigaluega uʻamea, a o faia le fale.
8 O le faitotoʻa o potu aupito i lalo sa tū i le itu i saute* o le fale,+ ma na iai se faasitepu faataamilo e oo atu ai i potu ogatotonu, ma e ui aʻe foʻi mai i potu ogatotonu e oo atu i potu i le fogāfale lona tolu.
9 Ua faaauau ona ia fauina le fale ma faamāe‘aina,+ ma fa‘alo totonu o le fale i laau faalava ma laupapa arasi.+
10 Ua ia faia potu i autafa e faataamilo i le fale,+ e lima kupita le maualuga o le potu e tasi, ma ua faapipii i le fale i laupapa arasi.
11 I le taimi lea, ua oo mai ai le afioga a Ieova iā Solomona, e faapea:
12 “A o le fale o loo e faia, afai e te savali i aʻu faatonuga ma faia aʻu faamasinoga, ma tausia aʻu poloaʻiga uma e ala i lou savali ai,+ ou te faataunuuina lava iā te oe laʻu folafolaga na fai iā Tavita lou tamā,+
13 o le a ou nofo foʻi faatasi ma le fanauga a Isaraelu,+ ou te lē tuua lava loʻu nuu o Isaraelu.”+
14 Ua faaauau ona faia e Solomona le fale ina ia faamāeʻaina.
15 Ua ia faia puipui i totonu o le fale i laupapa arasi. Ua ia ufitia puipui i totonu i laupapa e amata mai i le fola o le fale, e oo atu i laau faalava o le fa‘alo, ma ua ia ufitia le fola o le fale i laupapa perosi.+
16 Ua ia fuaina foʻi se vaega e 20 kupita i le pito i tua o le fale ma fai ai se potu i laupapa arasi, e amata mai i le fola e alu aʻe i laau faalava o le fa‘alo, ma faia ai i totonu* le potu pito i totonu,+ le Mea e Sili Ona Paia.+
17 E 40 kupita le telē o le malumalu,*+ o le vaega lea o le fale o loo i luma o le potu pito i totonu.
18 O laupapa arasi i totonu o le fale, na vaneina ai ata o le vine vao+ ma fugālaau.+ Ua faia nei mea uma i laupapa arasi, ina ia lē iloa atu ai se maa.
19 Na ia saunia foʻi le potu pito i totonu+ o le fale e tuu ai le atolaau o le feagaiga a Ieova.+
20 O le potu pito i totonu e 20 kupita lona umi, e 20 kupita lona lautele, ma e 20 kupita lona maualuga,+ ma ua ia ufiufi i le auro māoʻi; ua ia ufitia le fata faitaulaga+ i laupapa arasi.
21 Ua ufitia foʻi e Solomona totonu o le fale i le auro māoʻi,+ ma faalava se filifili auro i luma o le potu pito i totonu,+ lea e ufitia i le auro.
22 Ua ia ufitia le fale atoa i le auro, seʻia soo ai le fale atoa; ua ia ufitia foʻi i le auro le fata faitaulaga+ atoa lea sa lata ane i le potu pito i totonu.
23 I le potu pito i totonu, na ia faia ai ni kerupi+ se lua i laupapa o le olive vao, e ta‘isefulu kupita le maualuluga o kerupi.+
24 E lima kupita le umi o le tasi apaʻau o le kerupi, e lima foʻi kupita le umi o le isi apaʻau. E mai i le tasi tumutumu o lona apaʻau e oo atu i le isi tumutumu o lona apaʻau, e sefulu kupita.
25 O le kerupi lona lua, e sefulu foʻi kupita. E tutusa lelei le fua ma foliga o kerupi uma e lua.
26 O le maualuga o le tasi kerupi e sefulu kupita, e faapena foʻi le isi kerupi.
27 Ona ia tuu lea o kerupi+ i le potu pito i totonu.* Ua faaloloa apaʻau o kerupi ina ia papaʻi le apaʻau o le tasi kerupi i le puipui, faapea foʻi ona papaʻi le apaʻau o le isi kerupi i le isi puipui, ma ua faaloloa o la apaʻau i le ogatotonu o le fale ina ia fepaʻiaʻi o la apaʻau.
28 Ua ia ufitia foʻi kerupi i le auro.
29 O puipui uma ua faataamilo i le fale i le Mea Paia ma le Mea e Sili Ona Paia,* ua ia vaneina ai ata o kerupi,+ o laau o le pama,+ ma fugālaau.+
30 Ua ia ufitia i le auro le fola o le fale i le Mea Paia ma le Mea e Sili Ona Paia.
31 O le mea e ulufale ai i le potu pito i totonu, na ia faia ai ni faitoto‘a i laupapa o le olive vao, o poutū i tafatafa, ma pou o faitotoʻa, o se vaega lona lima.*
32 O faitotoʻa e lua na faia mai i laupapa o le olive vao, ua ia vane ai i luga ata o kerupi, o laau o pama, faapea fugālaau, ma ua ia ufitia na mea i le auro; ona ia tu‘itu‘i lea o auro i luga o ata o kerupi ma ata o laau o pama.
33 O le auala foʻi lea na ia faia ai le mea e ulufale ai i le malumalu:* na faia pou o le faitotoʻa i laupapa o olive vao, o se vaega lona fā.*
34 Ua ia faia faitotoʻa e lua i laupapa perosi. O itu e lua o le tasi faitotoʻa e feliua‘i, ma o itu e lua o le isi faitotoʻa e feliua‘i+ foʻi.
35 Ua ia vaneina ai foʻi o kerupi, o laau pama faapea ma fugālaau, ma ufitia i le auro mea na vaneina.
36 Ua ia faia le pā o le lotoā+ pito i totonu i atu maa e tolu ua tipiina, ma le atu laau faalava o arasi.+
37 O le tausaga lona fā na faataatia ai le faavae o le fale o Ieova, i le masina o Sefa;*+
38 a o le tausaga lona 11 i le masina o Pula* (o le masina lona valu lea), na māeʻa ai ona fausia le fale e tusa ai ma faamatalaga uma ma lona ata atoa;+ o lea, e fitu tausaga na ia fausia ai le fale.
Faamatalaga Pito i Lalo
^ Epe., “e atalii o Isaraelu.”
^ Epe., “malumalu o le fale.”
^ E faasino atu i itu e tolu.
^ Epe., “malumalu,” atonu e faasino atu i le Mea Paia.
^ E faasino atu i le Mea e Sili Ona Paia.
^ Epe., “taumatau.”
^ E faasino atu i totonu o le fale.
^ E faasino atu i le Mea Paia lea o loo i luma o le Mea e Sili Ona Paia.
^ E faasino atu i le Mea e Sili Ona Paia.
^ Epe., “i totonu ma fafo.”
^ Atonu e faasino atu i le auala na fausia ai pou o faitotoʻa po o le tetelē o faitotoʻa.
^ O loo faasino atu i le Mea Paia.
^ Atonu e faasino atu i le auala na fausia ai pou o faitotoʻa po o le tetelē o faitotoʻa.
