O le Tusi Muamua o Tupu 22:1-53
22 E tolu tausaga e le‘i iai se taua i le vā o Suria ma Isaraelu.
2 I le tausaga lona tolu, na alu ifo ai Iosefatu+ le tupu o Iuta i le tupu o Isaraelu.+
3 Ona fai atu lea o le tupu o Isaraelu i ana auauna: “Ua outou iloa o Ramota-kiliata+ o lo tatou aai. Ae o lea e tatou te faatalatū e ō atu e aveese mai i le tupu o Suria.”
4 Ona ia fai atu lea iā Iosefatu: “Pe e ta te ō i le taua i Ramota-kiliata?” Ua fai mai Iosefatu i le tupu o Isaraelu: “O aʻu nei e tutusa ma oe. O loʻu nuu e tutusa ma lou nuu. O aʻu solofanua e tutusa ma au solofanua.”+
5 Ae ua toe fai mai Iosefatu i le tupu o Isaraelu: “Faamolemole, seʻi fesili muamua atu+ lava i se fetalaiga mai iā Ieova.”+
6 Ona faapotopoto faatasi lea e le tupu o Isaraelu o le ʻauperofeta, pe e tusa ma le toʻa 400 tagata, ma fai atu iā i latou: “Po ou te alu atu ea e tau ma Ramota-kiliata, po ou te nofo?” Ae ua latou fai mai: “Inā maliu aʻe ia, auā e foaʻi mai lava e Ieova le aai i le lima o le tupu.”
7 Ae ua fai mai Iosefatu: “Pe e lē o iai ea i inei se perofeta a Ieova? Seʻi o tatou fesili atu i le Atua e ala iā te ia.”+
8 Ona fai atu lea o le tupu o Isaraelu iā Iosefatu: “O loo iai lava se tasi tagata e mafai ona ta fesili atu ai iā Ieova,+ ae ou te matuā ita lava iā te ia,+ auā e na te lē valoia ni mea lelei e faatatau iā te aʻu, ae e na o mea leaga.+ O ia o Mekaio le atalii o Imila.” Ae ua fai mai Iosefatu: “Aua neʻi fetalai mai le tupu i se mea faapena.”
9 Ona valaau atu lea o le tupu o Isaraelu i se tagata aloaʻia, ua faapea atu: “Ia aumai faavave Mekaio le atalii o Imila.”+
10 Ua taʻitasi le tupu o Isaraelu ma Iosefatu le tupu o Iuta, ma nonofo i o la nofoālii i le mea e soli ai saito i le faitotoʻa o Samaria, ua oofu foʻi i o la ofu tautupu, ma ua vavalo perofeta uma i o la luma.+
11 Ona faia lea e Setekaia le atalii o Kenaana mo ia o seu uʻamea, ma faapea atu: “O le mea lenei na fetalai mai ai Ieova, ‘O mea nei e te tatui* ai tagata Suria seʻia e faaumatia i latou.’”
12 Ua faapena foʻi valoaga ua faia e isi perofeta uma, ua faapea atu: “Ia e alu aʻe i Ramota-kiliata ma o le a e manumalo; e foaʻiina mai lava e Ieova le aai i le lima o le tupu.”
13 Ua fai atu iā Mekaio le avefeʻau na alu atu e aami o ia: “Faauta! E matuā logolelei lava i le tupu upu a perofeta. Faamolemole, seʻi faapea foʻi au upu e pei o a latou upu, ma ia e tautala atu i se upu lelei.”+
14 Ae ua fai mai Mekaio: “Ou te tautō iā Ieova le Atua soifua, o le mea e fetalai mai ai Ieova iā te aʻu, o le mea foʻi lea ou te tautala atu ai.”
15 Ua sau o ia i le tupu, ona fai atu lea o le tupu iā te ia: “Mekaio e, po ou te alu atu ea e tau ma Ramota-kiliata, po ou te nofo?” Ona ia tali mai lea iā te ia: “Inā alu aʻe ia ma o le a e manumalo; e foaʻiina mai lava e Ieova le aai i le lima o le tupu.”
16 Ona fai atu lea o le tupu iā te ia: “Po ua faafia ona ou faatautō oe e aua neʻi e toe tautala mai iā te aʻu i se tasi mea, ae na o le upu moni lava i le suafa o Ieova?”
17 Ona fai mai lea o ia: “Ua ou vaaia tagata Isaraelu uma o taapeape i mauga,+ e pei o ni mamoe ua leai se leoleo mamoe. Ua fetalai mai Ieova: ‘O i latou nei ua leai so latou matai. Ia tuu atu i latou e taʻitasi ma toe foʻi atu ma le filemu i lona fale.’”
18 Ona fai atu lea o le tupu o Isaraelu iā Iosefatu: “Po ou te leʻi fai atu ea iā te oe, ‘E na te lē valoia ni mea lelei e faatatau iā te aʻu, ae e na o mea leaga’?”+
19 Ona faapea mai lea o Mekaio: “O le mea lea, inā faalogologo mai ia i le afioga a Ieova: Na ou iloa atu Ieova o loo afio i lona nofoālii,+ a o laulaututū ʻautau uma o le lagi i ona tafatafa, i lona itu taumatau ma lona itu tauagavale.+
20 Ua fetalai atu foʻi Ieova, ‘O ai e na te faavaleaina Aapo ina ia alu aʻe ai ma oti i Ramota-kiliata?’ Ona fai mai lea o le tasi e faapea, ae ua fai mai le isi e faapea.
21 Ona alu ane lea o se tasi agaga*+ ma tū i luma o Ieova ma faapea mai, ‘O le a ou faavaleaina o ia.’ Ua fesili atu Ieova iā te ia, ‘E faapefea?’
22 Ona ia tali mai lea, ‘O le a ou alu ma avea aʻu ma agaga taufaasesē i gutu o ana perofeta uma.’+ Ona ia fetalai atu lea, ‘O le a e faavaleaina o ia, ma o le a e taulau manuia. Inā alu ia ma fai lenā mea.’
23 O lenei, ua tuuina e Ieova se agaga taufaasesē i gutu o au perofeta uma;+ ae ua fetalai Ieova o le a oo puapuaga iā te oe.”+
24 Ona faalatalata mai lea o Setekaia le atalii o Kenaana, ma ua ia pō le alafau o Mekaio, ua faapea mai: “Pe e te manatu ua alu ese le agaga o Ieova mai iā te a‘u* ae tautala atu iā te oe?”+
25 Ona fai atu lea o Mekaio: “Faauta! O le a e iloa lava lenā mea i le aso e te ulu atu ai i le potu pito i totonu e te lafi ai.”
26 Ua faapea ane le tupu o Isaraelu: “Inā ave ia Mekaio ma avatu iā Amone le alii sili o le aai, ma Ioasa le atalii o le tupu.
27 E te faapea atu, ‘O loo faapea mai le tupu: “Ia outou tuuina lenei tagata i le falepuipui,+ ma ia faaitiitia ana meaʻai ma vai seʻia ou toe fo‘i mai ma le filemu.”’”
28 Ona fai mai lea o Mekaio: “Afai e te toe foʻi mai ma le filemu, e leʻi fetalai mai la Ieova iā te aʻu.”+ Ua ia toe faapea mai: “Le nuu e, ia manatua a‘u upu na.”
29 Ona ō aʻe lea o le tupu o Isaraelu ma Iosefatu le tupu o Iuta i Ramota-kiliata.+
30 Ua fai atu le tupu o Isaraelu iā Iosefatu: “Ou te ofu ese ma ou alu atu i le taua, a o oe, ia fai ou ofu tautupu.” Ona faia lea o ofu ese o le tupu o Isaraelu,+ ma ua alu atu i le taua.
31 Ae ua poloaʻi atu le tupu o Suria i alii e toʻa 32 o ē e pule i ana kariota,+ e faapea: “Aua neʻi outou tau ma ē e faatauvaa po o ē e sili, ae e na o le tupu lava o Isaraelu.”
32 Ina ua iloa atu Iosefatu e alii e pule i kariota, ona latou faapea ifo lea iā i latou: “O le tupu lava lea o Isaraelu.” Ona latou faasaga ane lea e tau ma ia; ma ua alaga atu foʻi Iosefatu mo se fesoasoani.
33 Ae ina ua iloa e alii e pule i kariota e lē o le tupu lea o Isaraelu, ona latou toe foʻi loa lea, ua lē toe mulimuli atu iā te ia.
34 Sa lolo‘u e le tasi tagata ma lona lē iloa le ʻaufana, ae ua lavea ai le tupu o Isaraelu i le sooga o lona ofutau, ona ia fai atu lea i lē o loo aveina lana kariota: “Inā liliu ia ma aveese aʻu mai i le taua,* auā ua ou manu‘a leaga lava.”+
35 Ua faateteleina pea le taua i lenā aso, ma ua faatū e nisi le tupu i totonu o le kariota e feagai ma tagata Suria. Ua sisina ifo pea le toto mai i lona manu‘a i totonu o le kariota o le taua, ma iʻu ai ina oti o ia i le afiafi.+
36 Ona oo atu lea o le alaga i ‘autau pe tusa o le goto ifo o le lā, ua faapea atu: “Ia taʻitasi ma alu i lona aai, ia taʻitasi ma alu i lona nuu!”+
37 Ua oti le tupu. Ona aumai lea o ia i Samaria, ma ua latou tanu le tupu i Samaria.
38 Ina ua latou fufulu le kariota o le taua i le vai tāʻele o Samaria, ona etoeto ai lea e taʻifau o lona toto ma na tā‘eele ai foʻi fafine talitane i inā,* e tusa ai ma le afioga a Ieova na ia fetalai mai ai.+
39 A o le olaga uma o Aapo, o mea uma na ia faia, o le fale nifo elefane+ na ia faia, ma aai uma na ia fausia, po ua lē o tusia ea i le tusi o talafaasolopito o tupu o Isaraelu?
40 Ona taoto lea o Aapo faatasi ma ona augātamā;+ ua avea fo‘i Aasaia+ lona atalii ma tupu e sui iā te ia.
41 A o Iosefatu+ le atalii o Asa, na fai o ia ma tupu o Iuta i le tausaga lona fā o le nofoaiga a Aapo le tupu o Isaraelu.
42 E 35 tausaga o Iosefatu ina ua fai o ia ma tupu, ma e 25 tausaga na ia pule ai mai i Ierusalema; o le igoa o lona tinā o Asopa le afafine o Seleki.
43 Na savali pea o ia i ala uma o Asa+ lona tamā. E leʻi liliuese mai ai lava o ia, ma na ia faia le mea tonu i le silafaga a Ieova.+ Ae e leʻi aveeseina mea maualuluga, ma na faia pea e le nuu taulaga ma faamū taulaga i luga o mea maualuluga.+
44 Sa tausia foʻi e Iosefatu le filemu ma le tupu o Isaraelu.+
45 A o le olaga uma o Iosefatu, o lona malosi ma taua na ia tauina, po ua lē o tusia ea i le tusi o talafaasolopito o tupu o Iuta?
46 O tamāloloa talitane uma o le malumalu+ na totoe mai i aso o Asa lona tamā,+ na ia tafiesea uma mai i le nuu.
47 Sa leai se tupu i Etoma;+ ae sa avea se pule lagolago ma tupu.+
48 Na faia foʻi e Iosefatu vaa Tasesa* e folau atu i Ofeira ina ia aumai ai auro;+ ae e leʻi ō atu vaa i inā auā na matuā faaleagaina vaa i Esiokape.+
49 O le taimi lea na fai atu ai Aasaia le atalii o Aapo iā Iosefatu: “Seʻi ō atu aʻu auauna e ō ma au auauna i vaa,” ae e leʻi malie i ai Iosefatu.
50 Ona taoto lea o Iosefatu faatasi ma ona augātamā,+ ua tanu foʻi o ia faatasi ma ona augātamā i le Aai a Tavita lona augātamā; ua avea foʻi Ioramo+ lona atalii ma tupu e sui iā te ia.
51 A o Aasaia+ le atalii o Aapo, na fai o ia ma tupu o Isaraelu i Samaria i le tausaga lona 17 o le nofoaiga a Iosefatu le tupu o Iuta, ma na pule o ia i Isaraelu mo tausaga e lua.
52 Ua faia pea e ia o mea leaga i le silafaga a Ieova, ma ua savali foʻi o ia i ala o lona tamā+ ma lona tinā,+ faapea le ala o Ierepoamo le atalii o Nepata, o lē na faapogaia Isaraelu e agasala.+
53 Ua ia auauna pea iā Paala+ ma ifo iā te ia, ma faatigā pea iā Ieova le Atua o Isaraelu,+ e pei lava ona faia e lona tamā.
Faamatalaga Pito i Lalo
^ Po o le “tūlei.”
^ Po o “se agelu.”
^ Epe., “O fea na ui ane ai le agaga o Ieova i oʻu luma.”
^ Epe., “togālauapi.”
^ Pe atonu “i le mea e tāʻeele ai fafine talitane, na etoeto e taʻifau lona toto.”
^ Tagaʻi i le Uiga o Upu.
