O le Tusi Muamua o Tupu 19:1-21
19 Ua taʻu atu e Aapo+ iā Iesepela+ o mea uma na faia e Elia, ma lona fasiotia o perofeta uma i le pelu.+
2 Ona auina atu lea e Iesepela o se avefeʻau iā Elia, ua faapea atu: “Ia matuā faasala a‘u e atua* pe afai e oo atu taeao i le taimi faapenei, ou te leʻi faia iā te oe e pei o i latou taʻitoʻatasi!”
3 Ona fefe ai lea o Elia ma ua sola ina ia faasaoina lona ola.+ Ua alu atu o ia i Peresepa,+ o le aai o Iuta,+ ma ua ia tuua ai lana auauna i inā.
4 Ua alu atu o ia i le toafa, ua atoa le aso o lana malaga, ona alu atu lea ma nofo i lalo o le laau o le ratami. Ua talosaga atu o ia ina ia oti, ua faapea atu: “Ua lava lea! Ieova e, ia e aveese loʻu ola,+ auā e lē sili atu aʻu i oʻu augātamā.”
5 Ona taoto lea o ia ma moe i lalo o le laau o le ratami. Faauta! ua paʻi mai se agelu iā te ia+ ma fai mai: “Nofo ia i luga e ʻai.”+
6 Ua vaai atu o ia, ona ia iloa atu lea i tafatafa o lona ulu, o loo iai se falaoa lapotopoto i luga o maa aasa, ma se faguvai. Ua ʻai o ia ma inu, ona ia toe taoto ai lea.
7 Mulimuli ane, ona sau faalua lea o le agelu a Ieova ma paʻi mai iā te ia, ua faapea mai: “Nofo ia i luga e ʻai, auā e matuā faigatā le malaga mo oe.”
8 Ona nofo lea o ia i luga, ua ʻai ma inu, ua maua lona malosi mai i na meaʻai, ma ua alu atu o ia mo ao e 40 ma pō e 40 se‘ia oo atu i Horepa, o le mauga o le Atua moni.+
9 Ua ulu atu o ia i se ana+ ma moe ai i le pō, ae faauta! ua oo mai le afioga a Ieova iā te ia, ua faapea mai: “Elia, o le ā lau mea o loo fai i inei?”
10 Ona ia fai atu lea: “Na ou matuā maelega mo Ieova le Atua o ʻau;+ ae ua tuua e le fanauga a Isaraelu lau feagaiga,+ ua latou talepe i lalo ou fata faitaulaga, ma ua latou fasiotia i le pelu au perofeta,+ ae e na o aʻu lava ua totoe. A o lenei ua latou saʻili foʻi e fasioti iā te aʻu.”+
11 Ae ua fetalai mai le Atua: “Ia e alu i fafo ma tū i luga o le mauga i luma o Ieova.” Faauta! ua afio ane Ieova,+ ma ua agi mai le matagi tele ma le malosi, ma ua lepetia ai mauga ma māvaevae ai papa i luma o Ieova,+ ae e leʻi iai Ieova i le matagi. Ua mavae le matagi, ona iai lea o le mafui‘e,+ ae e leʻi iai Ieova i le mafui‘e.
12 Ua mavae le mafui‘e, ona iai lea o le afi,+ ae e leʻi iai Ieova i le afi. Ua mavae le afi, ona iai lea o se leo itiiti e toʻafilemu.+
13 Ae ina ua faalogo i ai Elia, ona ia ufiufi loa lea o ona mata i lona ofu tele,+ ma alu atu i fafo ma tū i le gutu o le ana. Ona fesili mai lea o le leo iā te ia: “Elia, o le ā lau mea o loo fai i inei?”
14 Ona ia fai atu lea: “Na ou matuā maelega mo Ieova le Atua o ʻau; ae ua tuua e le fanauga a Isaraelu lau feagaiga,+ ua latou talepe i lalo ou fata faitaulaga, ma ua latou fasiotia i le pelu au perofeta, ae e na o aʻu lava ua totoe. A o lenei ua latou saʻili foʻi e fasioti iā te aʻu.”+
15 Ona fetalai mai lea o Ieova iā te ia: “Inā toe foʻi ia ma alu atu i le toafa o Tamaseko. Pe a e taunuu, ia e faauu Asaeli+ e fai ma tupu o Suria.
16 Ia e faauuina fo‘i Ieʻu+ le atalii o le atalii o Nimesi e fai ma tupu o Isaraelu, ma ia e faauuina Elisaia* le atalii o Safata mai i Apele-meola, e fai ma perofeta e sui iā te oe.+
17 O so o se tasi e sao mai i le pelu a Asaeli,+ e fasiotia e Ieʻu;+ ma o so o se tasi e sao mai i le pelu a Ieʻu, e fasiotia e Elisaia.+
18 O loo totoe fo‘i iā te a‘u tagata e to‘a 7,000 i Isaraelu,+ o i latou uma e leʻi tootutuli iā Paala+ ma e leʻi sogi atu iā te ia.”+
19 Ona alu atu lea o ia mai i inā ma maua Elisaia le atalii o Safata, o suatia le eleele i povi po‘a e 24 o loo muamua atu i ona luma. Na ta‘ito‘alua povi, ma o loo iai o ia ma povi e lua mulimuli. Ona alu atu lea o Elia iā te ia, ma lafo atu lona ofu tele+ i ona luga.
20 Ona ia tuua lea o povi ma tuliloa mai iā Elia, ua ia fai mai: “Faamolemole, ia tuu mai aʻu seʻi oʻu sogi i loʻu tamā ma loʻu tinā. Ona ou mulimuli atu lea iā te oe.” Ua fai atu Elia iā te ia: “Inā toe foʻi ia; auā o le ā se mea ua ou faia e taofia ai oe?”
21 Ona toe foʻi lea o ia, ua ave povi poʻa e lua ma fai ai le taulaga, ma ua ia faaaogā laau o le suōtosina ma le amo a povi, e tunu ai tino o povi ma avatu i le nuu, ma latou aai ai. Ona tulaʻi lea o ia, ua mulimuli atu iā Elia ma auauna iā te ia.+
Faamatalaga Pito i Lalo
^ Epe., “Ia faia e atua ma ia latou faaopoopo i ai.”
^ Lona uiga “O le Atua le Faaolataga.”
