O le Tusi Muamua o Tupu 16:1-34
16 Ua oo mai le afioga a Ieova iā Ieʻu+ le atalii o Hanani,+ e faatatau iā Paasa e faapea:
2 “Na ou faaeaina oe mai i le eleele ma tofia oe e fai ma taʻitaʻi o loʻu nuu o Isaraelu,+ ae ua e savali pea i le ala o Ierepoamo, ma faapogaia ai loʻu nuu o Isaraelu e agasala ma faatigā mai ai iā te aʻu i a latou agasala.+
3 O le mea lea ou te matuā tafiesea ai Paasa ma lona aiga, ma ou te faia foʻi lona aiga ia pei lava o le aiga o Ierepoamo+ le atalii o Nepata.
4 O so o se tasi o le aiga o Paasa e oti i le aai, e ʻaina e taʻifau; a o se tasi o lona aiga e oti i le fanua, e ʻaina e manufelelei o le lagi.”
5 A o le olaga uma o Paasa, o mea na ia faia, ma lona malosi, po ua lē o tusia ea i le tusi o talafaasolopito o tupu o Isaraelu?
6 Ona taoto lea o Paasa faatasi ma ona augātamā ma ua tanu o ia i Tiresa;+ ua avea foʻi Ele lona atalii ma tupu e sui iā te ia.
7 O Ieʻu le perofeta, o le atalii o Hanani, na oo mai ai le afioga a Ieova e faatatau iā Paasa ma lona aiga, ona o mea leaga uma na ia faia i le silafaga a Ieova, e ala i le faatigā iā te ia i galuega a ona lima ma avea ai e pei o le aiga o Ierepoamo, faapea lona fasiotia o Natapu.+
8 O le tausaga lona 26 o le nofoaiga a Asa le tupu o Iuta, na fai ai Ele le atalii o Paasa ma tupu o Isaraelu mai i Tiresa, mo tausaga e lua.
9 Ua taupulepule lana auauna o Semeri le pule o le ʻafa o ana kariota e foua o ia, a o iai o ia i Tiresa o loo inu ma ua onā i le fale o Arasa, o lē na vaaia le aiga o le tupu i Tiresa.
10 Ona alu atu ai lea o Semeri, ua fasi iā te ia+ ma ua oti ai i le tausaga lona 27 o le nofoaiga a Asa le tupu o Iuta, ma ua avea foʻi Semeri ma tupu e sui iā te ia.
11 Ina ua avea Semeri ma tupu ma ua nofo i lona nofoālii, ona ia fasiotia lea o le aiga uma o Paasa. E na te leʻi faatotoe foʻi se tane,* e tusa po o ni ona tauaiga* po o ana uō.
12 Ua faaumatia e Semeri le aiga uma o Paasa, e tusa ai ma le afioga a Ieova na ia fetalai mai ai e ala i le perofeta o Ieʻu, e faatatau iā Paasa.+
13 Na tupu lenei mea ona o agasala uma na faia e Paasa ma lona atalii o Ele, lea na faapogaia ai Isaraelu e agasala, e ala i le faatigā iā Ieova le Atua o Isaraelu i a latou tupua e lē aogā.+
14 A o le olaga uma o Ele, ma mea uma na ia faia, po ua lē o tusia ea i le tusi o talafaasolopito o tupu o Isaraelu?
15 O le tausaga lona 27 o le nofoaiga a Asa le tupu o Iuta, na fai ai Semeri ma tupu i Tiresa mo aso e fitu, a o tolauapi le ‘autau e siitaua iā Kipetonu,+ o le aai o Filisitia.
16 Mulimuli ane, ua faalogo le ‘autau o loo tolauapi i le tala e faapea: “Ua fouvale Semeri, ma ua ia fasiotia foʻi le tupu.” Ona tofia lea e Isaraelu uma o Omeri+ le taʻitaʻiʻau, e fai ma tupu o Isaraelu i lea aso i le togālauapi.
17 Ona ō aʻe lea o Omeri ma Isaraelu uma na faatasi ma ia mai i Kipetonu, ma latou osofaʻia Tiresa.
18 Ina ua iloa e Semeri ua faatoʻilaloina le aai, ona ia alu lea i le ʻolo o le fale o le tupu, ma susunu le fale a o iai o ia i totonu, ma oti ai.+
19 Na tupu lenei mea ona o ana agasala na faia, e ala i lona faia o mea leaga i le silafaga a Ieova, i lona savali i le ala o Ierepoamo, ma lana agasala lea na faapogaia ai Isaraelu e agasala.+
20 A o le olaga uma o Semeri ma lana fouvalega, po ua lē o tusia ea i le tusi o talafaasolopito o tupu o Isaraelu?
21 O le taimi lea na vaeluaina ai le nuu o Isaraelu. O le tasi vaega o le nuu na mulimuli atu iā Tipeni le atalii o Kinati, ma manana‘o e fai o ia ma tupu, a o le isi vaega na mulimuli atu iā Omeri.
22 Ae ua faatoʻilaloina e le nuu na mulimuli iā Omeri, le nuu na mulimuli iā Tipeni le atalii o Kinati. Ona oti ai lea o Tipeni, ae ua avea Omeri ma tupu.
23 O le tausaga lona 31 o le nofoaiga a Asa le tupu o Iuta, na fai ai Omeri ma tupu o Isaraelu i tausaga e 12. E ono tausaga na pule ai o ia mai i Tiresa.
24 Ua ia faatau le mauga o Samaria mai iā Semeri i taleni* siliva e lua, ma ua ia faia se aai i luga o le mauga. Ua ia faaigoa le aai na ia faia, o Samaria,*+ ona o le igoa o Semeri le pule* o le mauga.
25 Ua faia pea e Omeri mea leaga i le silafaga a Ieova, ma ua sili atu foʻi lona leaga i ē uma na muamua atu iā te ia.+
26 Ua savali pea o ia i ala uma o Ierepoamo le atalii o Nepata, ma le agasala a Ierepoamo lea na faapogaia ai Isaraelu e agasala, e ala i le faatigā iā Ieova le Atua o Isaraelu i a latou tupua e lē aogā.+
27 A o le olaga uma o Omeri, o mea na ia faia ma lona malosi, po ua lē o tusia ea i le tusi o talafaasolopito o tupu o Isaraelu?
28 Ona taoto lea o Omeri faatasi ma ona augātamā ma ua tanu o ia i Samaria; ua avea foʻi Aapo+ lona atalii ma tupu e sui iā te ia.
29 Na fai Aapo le atalii o Omeri ma tupu o Isaraelu i le tausaga lona 38 o le nofoaiga a Asa le tupu o Iuta, ma na pule Aapo le atalii o Omeri iā Isaraelu mai i Samaria,+ mo le 22 tausaga.
30 Na sili atu ona leaga Aapo le atalii o Omeri i le silafaga a Ieova, nai lo o ē uma na muamua atu iā te ia.+
31 Na peiseaʻī o se mea faatauvaa iā te ia lona savali i agasala a Ierepoamo+ le atalii o Nepata, ua ia faiavā fo‘i iā Iesepela+ le afafine o Etepaala le tupu o Saitonu,+ ma ua auauna iā Paala+ ma ifo iā te ia.
32 E lē gata i lea, na ia faatū se fata faitaulaga o Paala i le fale* o Paala+ lea na ia faia i Samaria.
33 Na faia fo‘i e Aapo le pou paia.*+ Na faia e Aapo mea e sili atu e faatigā ai iā Ieova le Atua o Isaraelu, nai lo o tupu uma o Isaraelu na muamua atu iā te ia.
34 O ona aso, na toe fausia ai Ieriko e Ieli le Peteli. Na oti le ulumatua a Ieli o Apiramo a o ia toe faia le faavae, na oti foʻi lana uii o Sekupo a o ia toe faatutūina ona faitotoʻa, e tusa ai ma le afioga a Ieova na ia fetalai mai ai e ala iā Iosua le atalii o Nuno.+
Faamatalaga Pito i Lalo
^ Epe., “so o se tasi e tulaʻi e fai sana feʻaulata i le pā.” O se faaupuga Eperu e faaalia ai le ʻinoʻino, e faasino atu i tauleleʻa ma tamāloloa.
^ Po o “ni ē e tauimasui i lona toto.”
^ Epe., “alii.”
^ Lona uiga “O le Aiga o Semeri e Ana.”
^ Po o le “malumalu.”
^ Tagaʻi i le Uiga o Upu.
