O le Tusi Muamua o Tupu 14:1-31
14 I lenā taimi, na maʻi ai Avia le atalii o Ierepoamo.
2 Ona fai atu lea o Ierepoamo i lana avā: “Faamolemole, inā tulaʻi ia, ia e faafoliga atu o se tagata ese ina ia o latou lē iloa ai o oe o le avā a Ierepoamo, ma ia e alu atu i Sailo. Faauta! O loo iai i inā le perofeta o Akia. O ia na taʻuina mai iā te aʻu, o le a fai aʻu ma tupu i lenei nuu.+
3 Ia e ave falaoa e sefulu, o keke, ma se fagu meli, ma ia e alu atu iā te ia. O le a ia faailoa mai iā te oe le mea o le a tupu i le tama.”
4 Ona faapea lea ona faia e le avā a Ierepoamo. Ua tulaʻi o ia ma alu atu i Sailo,+ ua oo atu i le fale o Akia. Ae ua lē mafai ona vaai Akia, auā ua pō lana vaai ona ua matua o ia.
5 Ua fetalai mai Ieova iā Akia: “O loo sau le avā a Ierepoamo e fesili atu iā te oe e faatatau i lana tama, auā o loo maʻi o ia. O le a ou ta‘uina atu iā te oe le tala e fai atu iā te ia.* Pe a taunuu mai o ia, o le a faatagā faafoliga mai o se tagata ese.”
6 Ina ua faalogo Akia i le paʻō o lana savali a o ulufale mai, ona faapea atu lea: “Inā ulufale mai ia oe le avā a Ierepoamo. Aiseā ua e faatagā faafoliga ai o oe o se tagata ese? Ua tofia aʻu e ta‘u atu iā te oe se feʻau mamafa.
7 Inā alu ia ma fai atu iā Ierepoamo, ‘O le mea lenei ua fetalai mai ai Ieova le Atua o Isaraelu: “Na ou faatūina oe mai i lou nuu, ina ia faia oe ma taʻitaʻi o loʻu nuu o Isaraelu.+
8 Ona ou sasaeese lea o le malo mai i le aiga o Tavita ma foaʻi atu iā te oe.+ Ae ua e lē pei o Tavita laʻu auauna, o lē na tausia aʻu poloaʻiga, ma mulimuli mai iā te aʻu ma lona lotoatoa. Na ia faia e na o le mea ua tonu i oʻu luma.+
9 Ae ua sili atu lou leaga nai lo o ē uma na muamua atu iā te oe, ua e faia foʻi mo oe se isi atua ma faatusa uʻamea* ina ia faatigā ai iā te aʻu,+ ma ua e fulitua mai iā te aʻu.+
10 O le mea lea ou te faaoo atu ai puapuaga i le aiga o Ierepoamo, ou te matuā faaumatia* foʻi tane uma* mai i le aiga o Ierepoamo, e aofia ai sē e leai se fesoasoani ma faatauvaa i Isaraelu, ma ou te matuā tafiesea le aiga o Ierepoamo,+ e pei ona tafiesea e se tasi o otaotavale ma lafoaʻi.
11 O so o se tasi o le aiga o Ierepoamo e oti i le aai, e ʻaina e taʻifau; a o se tasi e oti i le fanua, e ʻaina e manufelelei o le lagi, auā ua fetalai mai ai Ieova.”’
12 “Ia e tulaʻi ma e alu i lou fale. Pe a e oo i le aai, ona oti loa lea o le tama.
13 O le a faavauvau foʻi Isaraelu uma ona o ia ma tanu iā te ia, auā e na o ia o le aiga o Ierepoamo e tanu i se tuugamau, talu ai ua na o ia o le aiga o Ierepoamo ua maua ai e Ieova le Atua o Isaraelu se mea lelei.
14 O le a faatūina e Ieova mo ia lava se tupu o Isaraelu o lē e na te faaumatia* le aiga o Ierepoamo+ i lenā aso, ma afai e finagalo i ai o ia, e na te faia lava i le taimi nei.
15 E faaumatia lava e Ieova Isaraelu, e pei o le ū ua felafoaʻiina i le vai, e na te liaʻiina foʻi Isaraelu mai i lenei laueleele lelei na ia foaʻi atu i o latou augātamā,+ e na te faataapeapeina foʻi i latou i tala atu o le Vaitafe,*+ auā ua latou faia pou paia,*+ ma faatigā ai iā Ieova.
16 E na te lafoaʻia foʻi Isaraelu ona o agasala a Ierepoamo na faia, ma faapogaia ai le agasala o Isaraelu.”+
17 Ona tulaʻi lea o le avā a Ierepoamo, ua alu i lona ala ma ua oo atu i Tiresa. E taunuu atu loa o ia i le faitotoʻa o lo latou fale, ae oti loa le tama.
18 Ua latou tanu iā te ia, ma ua faavauvau Isaraelu uma ona o ia e tusa ai ma le afioga a Ieova na ia fetalai mai ai e ala i lana auauna, le perofeta o Akia.
19 O le olaga uma foʻi o Ierepoamo, o taua na ia tauina+ ma lana pulega, ua tusia i le tusi o talafaasolopito o tupu o Isaraelu.
20 O le umi* foʻi na pule ai Ierepoamo e 22 tausaga. Mulimuli ane ua taoto o ia faatasi ma ona augātamā,+ ae ua pule Natapu lona atalii e sui iā te ia.+
21 O le taimi lea, ua avea Reopoamo le atalii o Solomona ma tupu i Iuta. E 41 tausaga o Reopoamo ina ua fai o ia ma tupu, ma e 17 tausaga na pule ai o ia i Ierusalema, i le aai na filifilia e Ieova+ mai i ituaiga uma o Isaraelu e tuu ai lona suafa.+ O le igoa o le tinā o Reopoamo o Naana, o le fafine Amonī.+
22 Ua faia pea e Iuta mea leaga i le silafaga a Ieova,+ ma o a latou agasala na matuā faatupuina ai lona to‘atama‘i, e sili atu i lo o agasala uma na faia e o latou augātamā.+
23 Ua latou faia pea foʻi mo i latou o mea maualuluga, o poutū paia ma pou paia*+ i luga o aʻega maualuluga uma,+ ma lalo ifo o laau lauolaola uma.+
24 Na iai foʻi i le nuu o tamāloloa talitane i le malumalu.+ Na latou faia mea inosia uma a nuu ese ia na tuliesea e Ieova mai i luma o le fanauga a Isaraelu.
25 O le tausaga lona lima o le nofoaiga a le tupu o Reopoamo, na alu aʻe ai Sesaka le tupu+ o Aikupito e faasagatau iā Ierusalema.+
26 Ua ia ave ʻoa o le fale o Ieova ma ʻoa o le fale o le tupu.+ Ua ia ave mea uma lava, e aofia ai talipupuni auro uma na faia e Solomona.+
27 Ona faia lea e le tupu o Reopoamo o talipupuni ʻapamemea e sui aʻi na mea, ma ua ia tuuina atu e pule ai alii sili o le ʻauleoleo,* o ē e leoleoina faitotoʻa o le fale o le tupu.
28 O taimi uma e alu atu ai le tupu i le fale o Ieova, e ave ai e le ʻauleoleo na mea, ona latou toe faafoʻi mai lea o na mea i le potu o le ʻauleoleo.
29 A o le olaga uma o Reopoamo, ma mea uma na ia faia, po ua lē o tusia ea i le tusi o talafaasolopito o tupu o Iuta?+
30 Na iai pea taua i le vā o Reopoamo ma Ierepoamo.+
31 Mulimuli ane, ua taoto Reopoamo faatasi ma ona augātamā, ma ua tanu faatasi ma ona augātamā i le Aai a Tavita.+ O le igoa o lona tinā o Naana le fafine Amonī.+ Ona avea lea o Aviama*+ lona atalii ma tupu e sui iā te ia.
Faamatalaga Pito i Lalo
^ Po o le “Ia faapea ona e fai atu iā te ia.”
^ Po o “faatagata ‘apamemea.”
^ Epe., “tipiesea.”
^ Epe., “so o se tasi e tulaʻi e fai sana feʻaulata i le pā.” O se faaupuga Eperu e faaalia ai le ʻinoʻino, e faasino atu i tauleleʻa ma tamāloloa.
^ Epe., “tipiesea.”
^ E faasino atu i le vaitafe o Eufirate.
^ Tagaʻi i le Uiga o Upu.
^ Epe., “O aso.”
^ Tagaʻi i le Uiga o Upu.
^ Epe., “o le ʻaufaafeao.”
^ E igoa foʻi iā Avia.
