Talu mai anamuā, ua moomoo tagata ia ola i se olaga talavou ma soifua mālōlōina e faavavau. Peitaʻi, e faanoanoa ona e tatou te feoti uma lava. Ua silia i le tolu afe tausaga talu ona tusia upu a Iopu o loo taʻua i luga, ma o loo moni pea i aso nei.

O loo iai pea i tagata le faanaunauga ia ola e faavavau, ma o se faanaunauga e iai i tagata uma lava. Ua taʻua i le Tusi Paia na tuu e le Atua le faavavau i o tatou loto, ma se faanaunauga ia malamalama i le ola e faavavau. (Failauga 3:11) Pe afai o lea, pe e te manatu la e talafeagai i le Atua alofa ona tuu i totonu o i tatou se faanaunauga e lē mafai ona taunuu? E saʻo pe afai e te faapea mai e leai. Ua taʻua i le Afioga a le Atua o le oti o se fili, ma ua folafola mai o le a “faaumatia.”​—1 Korinito 15:26.

E moni o le oti o se fili, auā e leai se tagata e fiafia i ai. Pe a tulaʻi mai ni tulaga lamatia, e tatou te lalafi, sosola pe ʻalo ese mai ai. Pe a tatou mamaʻi, e tatou te saʻili ni auala ina ia toe malolosi ai. E tatou te faia so o se mea ina ia ʻalofia ai le oo mai o le oti.

E iai se māfuaaga e tatou te talitonu ai o le a faaumatia lenei fili ua leva ona iai. O Ieova le Atua o Lē na foafoaina mea, e na te leʻi faia tagata ina ia ola mo na o ni nai tausaga ona toe feoti lea. Na finagalo o ia e ola e faavavau tagata i le lalolagi, ma e so o se mea ua ia finagalo i ai, e na te faataunuuina lava.​—Isaia 55:11.

O le a faapefea la ona faaumatia le oti? Ua tele tausaga o taumafai tagata ia foʻia le oti, ae e lē o taulau. Ua faia e saienitisi tui ma fualaau ina ia foʻia ai nisi o faamaʻi, ma ua latou suʻesuʻeina sela o tagata. I se fua faatatau, o le tele o vaipanoa ua umi atu ola o tagata i aso nei nai lo o le senituri ua mavae. Peitaʻi, e lē o aveesea ai lava le oti. Ua taʻua i le Failauga 3:20 ʻe toe foʻi atu tagata uma i le efuefu.’

O le mea e fiafia ai, e tatou te lē faalagolago i le atamai faaletagata e foʻia ai lenei faafitauli ua leva ona iai. Ua uma ona faatulaga e Ieova le laveaʻiina po o le faasaoina o i tatou mai i le oti, ma o lē e autū i ai lenā faatulagaga, o Iesu Keriso.