Atonio: Mālō le soifua Timo. E ā mai le aso?

Timo: Manuia a faafetai.

Atonio: Na ou sau ma aumai au lomiga fou o Le Olomatamata ma le Ala Mai! Ou te iloa e te fiafia e faitau i ai.

Timo: Faafetai lava. Ae, ua ou fiafia lava ua e sau ona e iai laʻu fesili lea e fia fai atu.

Atonio: O le ā lenā fesili?

Timo: Sa ou fai i le isi tama e ma te faigaluega i le manaia o aʻu tusi ia e aumai iā te oe, ae fai mai e aua neʻi ou toe faitau i tou tusi ona e tou te lē talitonu iā Iesu. E saʻo lenā tala?

Atonio: Faafetai a ua e fesili mai, auā e maua le tali pe a e fesili saʻo i se Molimau a Ieova i o latou talitonuga, nai lo o le fesili i isi.

Timo: O le mea tonu a lenā ua ou fesili atu ai iā te oe.

Atonio: O le mea moni, e talitonu Molimau a Ieova iā Iesu, ma o le faatuatua iā te ia e maua ai le faaolataga.

Timo: E saʻo a la loʻu mafaufau, ae ua ou toe fesili atu ona o le tala a le tama lea ma te faigaluega, ma e ta te leʻi talanoa foʻi i lenā mataupu.

Atonio: Ae ā la pe a ta tilofaʻia ni mau mai i le Tusi Paia e masani ona faaaogā e Molimau a Ieova, e faailoa mai ai le tāua o le faatuatua iā Iesu?

Timo: Manaia foʻi.

Atonio: Tagaʻi ane i le fetalaiga a Iesu o loo i le Ioane 14:6. I le mau lenei, o loo talanoa atu Iesu i se tasi o ona aposetolo. Fai mai le mau: “Ua fetalai atu Iesu: ʻO aʻu o le ala, o le upu moni ma le ola. E leai se tasi e alu atu i le Tamā pe a lē ui mai iā te aʻu.’” Mātau mai, o le ā le auala e faalatalata atu ai i le Tamā?

Timo: E ala iā Iesu.

Atonio: Saʻo lelei oe. O le manatu foʻi lenā o Molimau a Ieova. Seʻi ou fesili atu lava: Pe a tatalo se tasi, o le suafa o ai e tatau ona ala atu ai lana tatalo?

Timo: O le suafa o Iesu.

Atonio: Ioe, ma e faapena foʻi aʻu tatalo ma tatalo a tagata Molimau a Ieova uma lava.

Timo: Lelei la ua ou iloa atu lenā manatu.

Atonio: Seʻi o ta toe tilofaʻia se isi mau, o le Ioane 3:16. E tāua lenei mau ma e manatu le toʻatele o loo taaofaʻi ai i inei le feʻau o loo i tusi evagelia. E pei o loo aotele ai le olaga o Iesu ma lana talaʻiga a o iai i le lalolagi. E mafai ona e fofogaina mai mo i taʻua?

Timo: “Ona o le alofa tele o le Atua i le lalolagi, na ia foaʻi mai ai lona Atalii e toʻatasi, ina ia lē fano tagata uma e faatuatua iā te ia, a ia maua le ola e faavavau.”

Atonio: Faafetai lava. E masani ona e faalogo i lenei mau?

Timo: Ioe. E masani ona ou faalogo ai, ma e tele ina ou vaai foʻi o faapipii i taavale ma tusi i puipui o fale.

Atonio: E toʻatele e iloaina lenei mau. Pe a toe tagaʻi i le fetalaiga a Iesu, fai mai: O le alofa o le Atua e mafai ona maua ai e tagata le ola e faavavau. Peitaʻi, o le ā le mea e tatau ona fai?

Timo: Faaalia le faatuatua.

Atonio: Saʻo lelei. E tatau ona faatuatua iā Iesu Keriso ina ia maua ai le ola e faavavau, ma o le manatu lenā o loo taʻua i le itulau e 2 o le lomiga lenā na tuu atu iā te oe. O se tasi o fuafuaga o Le Olomatamata o loo taʻua ai, “ua uunaʻia e lenei mekasini tagata ia faatuatua iā Iesu Keriso, o lē na maliu ina ia tatou maua le ola e faavavau, ma ua avea nei o ia ma Tupu o le Malo o le Atua.”

Timo: Oi, o loo maua a la i tou tusi faamaoniga e tou te talitonu iā Iesu.

Atonio: Ioe, o lenā tonu a.

Timo: Ae aiseā la e fai mai ai tagata e tou te lē talitonu iā Iesu?

Atonio: E tele māfuaaga e manatu ai faapena tagata. Atonu e māfua ona o ni tala e faalogo ai mai i isi po o a latou faifeʻau foʻi.

Timo: Ae e lē iloa po o le isi māfuaaga ona o na e taʻu outou o Molimau a Ieova, ae e lē o ni Molimau a Iesu.

Atonio: Ia atonu o se isi na māfuaaga.

Timo: Ae aiseā e tou te faatāua ai Ieova?

Atonio: E matou te talitonu e tāua le faaaogāina o le suafa o le Atua o Ieova, e pei foʻi ona faia e lona Alo o Iesu. Mātau upu o le tatalo a Iesu o loo i le Ioane 17:26. E mafai ona e faitauina mai mo i taʻua?

Timo: “Ua ou faailoa atu lou suafa iā i latou, ma saga faailoa atu, ina ia iā i latou le alofa lea na e alofa mai ai iā te aʻu, ma ou autasi ai ma i latou.”

Atonio: Mālō lava. Mātau, sa faapea mai Iesu ua ia faailoa atu le suafa o le Atua. Aiseā sa ia faia ai faapea?

Timo: Ia taʻilo.

Atonio: E manaia la pe a ta toe tilofaʻia se isi mau e faamalamalama ai lenā manatu. Tagaʻi ane i le Galuega 2:21. Fai mai le mau: “E faaolaina foʻi i latou uma o ē e valaau i le suafa o Ieova.” Ou te iloa e te ioe, afai e faalagolago le faaolataga i le valaau i le suafa o Ieova, e mautinoa la sa faia faapena e Iesu.

Timo: Ae saʻo a.

Atonio: Sa silafia lelei e Iesu, e tāua i ona soo le iloaina ma faaaogāina le suafa o Ieova ina ia maua ai le faaolataga. O se tasi lenā o māfuaaga autū e matou te talanoa ai i tagata e uiga i le suafa o Ieova. E matou te iloa e tāua le faailoa atu o le suafa o le Atua, ma fesoasoani i isi e valaau atu foʻi i lenā suafa.

Timo: Ou te iloa e tusa a pe e lē iloa ma lē faaaogāina e tagata le suafa o le Atua, ae e latou te malamalama a pe a talanoa e faatatau i le Atua.

Atonio: Manaia lou manatu. Peitaʻi, o lona faailoaina mai o lona suafa, e faigofie ai ona tatou faalatalata atu iā te ia.

Timo: O le ā le uiga o lau tala?

Atonio: Seʻi mafaufau i le mea lenei: E lē tau manaʻomia ona tatou iloa le igoa o Mose, auā e mafai a ona faaigoa o ia o lē na vaeluaina le Sami Ulaula, po o lē na tuuina ai Tulafono e Sefulu. E faapena foʻi Noa, e mafai a ona faaigoa o ia o lē na fauina le vaa ma faasao ai lona aiga ma manu. E oo foʻi la iā Iesu, na ono mafai a ona faaigoa o ia o lē na afio mai i le lagi ma maliu mo a tatou agasala, a ea?

Timo: Ae saʻo a.

Atonio: Peitaʻi, na faamautinoa e le Atua e tatou te iloa igoa o Mose, Noa, ma Iesu. O le iloaina o o latou igoa, e pei ai ua tatou iloa lelei ma masani iā i latou, e ui lava tatou te leʻi talanoa i ai.

Timo: Ou te leʻi mafaufau muamua faapena, ae e saʻo lou manatu.

Atonio: O le isi na māfuaaga e faaaogā ai e Molimau a Ieova le suafa o le Atua. E matou te mananao i tagata ia faatuatua ma iloa lelei Ieova le Atua, ma avea o ia o Sē e mafai ona latou faalatalata atu i ai. I le taimi e tasi, e matou te faatāuaina foʻi le matafaioi a Iesu mo le mauaina o le faaolataga. E manaia pe a ta toe faitau i le mau lenei e saga faamaonia atili ai lenā manatu.

Timo: Manaia foʻi.

Atonio: Sa ta faitau i le amataga i le Ioane 14:6 i upu a Iesu e faapea o ia “o le ala, o le upu moni ma le ola,” ae tagaʻi ane i le Ioane 14:1. Seʻi e faitau mai le fetalaiga a Iesu i le vaega mulimuli o le fuaiupu faamolemole?

Timo: “Ia faatuatua i le Atua, ma ia faatuatua mai foʻi iā te aʻu.”

Atonio: Mālō lava. O le ā sou manatu, pe e na o le faatuatua i le Atua e maua ai le faaolataga?

Timo: E leai. Na fetalai Iesu e tatau ona faatuatua iā te ia ma le Atua.

Atonio: Saʻo lelei oe, ma ou te iloa foʻi e te talitonu e lē lava le faapea mai o se tasi e faatuatua i le Atua ma Iesu. O le mea moni, e tatau ona atagia mai i le auala e tatou te ola ai e tatou te talitonu moni i lenā manatu.

Timo: Ou te ioe i lou manatu.

Atonio: Ae e faapefea la ona atagia mai i le olaga o se tagata o loo faatuatua i le Atua ma Iesu? E ā, e te fiafia e talanoa i le fesili lenā i se isi taimi? *

Timo: Ia manaia foʻi lenā tonu.