Talu mai le taimi a o ou laʻitiiti, ou te fiafia lava i le siʻomaga faalenatura. E masani ona ō lo matou aiga e tafafao i vaomatua matagofie ma vaituloto o loo iai i lo matou aai o Jyväskylä i Central Finland. Ou te fiafia foʻi i meaola, auā talu mai lava loʻu laʻitiiti ou te fiafia i pusi ma taʻifau. A o ou tuputupu aʻe, ou te leʻi fiafia i le auala e sauāina ai e tagata meaola. O lea, sa ou galue ai i se faalapotopotoga e puipuia meaola.

E masani ona matou tufaina atu pepa o faamatalaga e faatatau i le puipuiga o meaola, ma faatulaga solo tetee agaʻi i faleoloa o loo faatauina ai fulufulu o manu, faapea kamupani e faaaogāina meaola e fai ai a latou suʻesuʻega ma faataʻitaʻiga. Na iʻu lava ina matou amataina se faalapotopotoga fou e puipuia meaola. E masani ona molia i matou i le tulafono, ona o auala eseese e matou te faaaogāina e faailoa atu ai lo matou tetee. O le tele o taimi e faafalepuipuiina ai aʻu, ma molia i luma o le faamasinoga.

Sa ou popole foʻi i faafitauli o loo tutupu i le lalolagi. E leʻi umi, ae ou auai i le tele o faalapotopotoga, e aofia ai le Amnesty International ma le Greenpeace. Sa alu uma loʻu malosi i le lagolagoina o nei faalapotopotoga. Sa fai aʻu ma sui o tagata matitiva ma ē lē tagolima, e faaleo atu o latou popolega, ma puipuia o latou aiā tatau.

Peitaʻi, a o faagasolo taimi, na ou iloa ai e lē mafai ona ou aveesea faafitauli o loo tutupu i le lalolagi. E na o le faateteleina o le leaga o le lalolagi, e ui lava sa mafai e nisi o faalapotopotoga sa ou galue ai ona foʻia nisi o faafitauli. E pei ua aafia le lalolagi atoa i le leaga, ma e leai se isi e popole i ai. Na ou lagona le lē taulau, ona e lē mafai ona ou aveesea faafitauli o loo tutupu i le lalolagi.

O na lagona na amata ai loa ona ou suʻesuʻe e faatatau i le Atua ma le Tusi Paia. Sa  ou suʻesuʻe muamua le Tusi Paia ma Molimau a Ieova. E ui lava sa agalelei ma naunau mai iā te aʻu, ae ou te leʻi nofosauni i lenā taimi e suia loʻu olaga.

Na pei o se vai mālū i oʻu manuʻa ina ua amata ona ou naunau e faitau le Tusi Paia. E tele mau o le Tusi Paia ua aʻoaʻoina ai i tatou e tausia lelei meaola. O se faaaʻoaʻoga, ua faapea mai le Faataoto 12:10: “E tausia faapelepele e le tagata amiotonu le ola o lana manu lata.” Na ou aʻoaʻoina foʻi, e lē o le Atua le pogai o faafitauli o loo tutupu i le lalolagi. Ua faateteleina le leaga o le tulaga o le lalolagi ona o le lē usitaʻia e tagata o Ana tapulaa. Sa sili ona pāʻia loʻu loto ina ua ou aʻoaʻoina e faatatau i uiga alofa ma faapalepale o Ieova.​—Salamo 103:8-14.

O le taimi lava lea, na ou faatumuina ai se kuponi mo le tusi O ā Aʻoaʻoga Moni a le Tusi Paia? ma lafo loa i Molimau a Ieova. E leʻi umi ae asia aʻu e se ulugalii Molimau a Ieova, ma na ou taliaina se suʻesuʻega faale-Tusi Paia. Sa amata foʻi ona ou auai i a latou sauniga. O lea, na amata ona ou fiafia i mea na ou aʻoaʻoina mai i le Tusi Paia.

Ou te talisapaia le fesoasoani a le Tusi Paia, ona ua mafai ai ona ou faia le tele o suiga, e pei o le tuu o le ulaula ma le inu tele. Sa suia foʻi le auala ou te lāʻei ma tautala ai, faapea oʻu uiga faaalia i faipule silisili. (Roma 13:1) Sa tuua le olaga lē mamā sa ou ola ai, lea sa lē mafai ona ou pulea.

O le suiga sili ona faigatā mo aʻu, o le iai lea o se vaaiga saʻo i faalapotopotoga e puipuia aiā tatau o tagata faapea faalapotopotoga e puipuia meaola. E leʻi faigofie ona faia lenei suiga. Sa masani ona ou manatu, afai ou te faamavae mai nei faalapotopotoga, o lona uiga ua ou lē faamaoni iā i latou. Peitaʻi, sa ou aʻoaʻoina le mea moni, ua na o le Malo o le Atua e mafai ona aumaia se faamoemoe pupula mo le lalolagi. O lea, sa faaaluina ai loa loʻu malosi ma loʻu ola i le lagolagoina o lenā Malo, ma aʻoaʻoina isi e faatatau i lenā Malo.​—Mataio 6:33.

I le avea ai o sē e tetee malosi i suiga e tulaʻi mai, sa masani ona ou manatu, e iai tagata e lelei ma tagata leaga, ma e tatau ona tetee atu i tagata sa ou manatu e leaga. Ae ona o le fesoasoani a le Tusi Paia, e lē o toe iai iā te aʻu ni lagona ita iā i latou. Nai lo lea, ua ou taumafai e atiaʻe le alofa faa-Kerisiano mo tagata uma. (Mataio 5:44) O le auala sili ou te faaalia ai lenā alofa, o le taʻu atu i isi o le tala lelei e faatatau i le Malo o le Atua. Ou te lagona le olioli, ona o loo faaauiluma e lenei galuega faasaoola, le filemu ma le fiafia, faapea le faamoemoe moni mo le fanau a tagata.

O le tuuina atu o se mataupu e taulimaina e Ieova, ua ou lagona ai le filemu o le mafaufau. Ua ou talitonu, ona o ia o Lē na foafoaina mea, e na te lē faatagaina le faaauau pea ona faileagaina o tagata, sauāina meaola, po o le faaleagaina o lo tatou lalolagi. Nai lo lea, ua toe o se aga ona ia faaleleia lea o mea uma ua faaleagaina, e ala i lona Malo. (Isaia 11:1-9) O le iloaina o nei upu moni, faapea le fesoasoani i isi ina ia talitonu i ai, ua ou maua ai le fiafia moni. Ou te lē o toe mafaufau e suia mea o loo tutupu i le lalolagi.