Sa ou ola aʻe i se aai e taula ai vaa i Turku i Finilani, lea e itiiti le tamaoaiga ae e faigaluega mamafa tagata. Na siamupini loʻu tamā i fusuaga, ma sa ma fiafia ma loʻu uso laʻitiiti i fusuaga. E masani ona ou fusu i le aʻoga, ma ina ua ou talavou, sa ou auai ai i se kegi e lauiloa i mea leaga ma atili ai ona ou sauā. Sa ou fiafia foʻi i pese malomaloā, ma na ou moomoo e fia avea ma tama pese lauiloa.

Na ou faatau mai ni tagipalau ma amata ai se ʻau fāʻili, ma na avea aʻu ma taʻitaʻi o le ʻaupepese. Na matou faafiafia i luma o aofia tetele, ma sa lauiloa i matou i uiga soonafai ma lē pulea i luga o le pulelaa. Sa puʻe foʻi ni a matou lipine, ma na fiafia le toʻatele i le lipine mulimuli. I le vaitausaga o le 1980, na matou malaga atu ai i Amerika ina ia faalauiloa la matou ʻau fāʻili. Na matou faafiafia i Niu Ioka ma Los Angeles, ma sa matou fesootaʻi ma nisi o polofesa i musika, a o leʻi toe foʻi mai i Finilani.

E ui sa ou fiafia i le ʻau fāʻili, ae sa ou naunau lava ina ia ou maua se olaga e aogā. Na ou lē fiafia i uiga faatautavā ma lē faaaloalo a le ʻaufaimusika. Na ou ʻinoʻino foʻi i loʻu olaga leaga, ma sa ou fefe neʻi susunuina aʻu i seoli. O lea, sa ou taumafai ai e saʻili se fesoasoani mai i tusi faalelotu, ma tatalo faatauanau atu i le Atua mo se fesoasoani, e ui na ou iloa e lē mafai ona ou faafiafiaina o ia.

Na ou faigaluega foʻi i se fale meli, ma na ou iloa i se tasi o aso e iai se alii Molimau a Ieova o loo ma faigaluega faatasi. E tele aʻu fesili na fai atu iā te ia, ae o le manino o ana tali mai le Tusi Paia, na uunaʻia ai aʻu e ma te suʻesuʻe i le Tusi Paia. I nai vaiaso talu ona amata la ma suʻesuʻega, na maua ai e le matou ʻau fāʻili se avanoa e puʻe ai se lipine ma faasalalau atu i Amerika. Na ou manatu o se avanoa e lē laumaua lea i le olaga.

Na ou faapea atu i le Molimau lea na ma suʻesuʻe, e toe  tasi a le lipine lea e fia puʻe, ona ou taumafai loa lea e faatatau mataupu silisili o le Tusi Paia. E leʻi faailoa mai e le Molimau sona manatu, ae na ia fai mai ou te tago e faitau upu a Iesu o loo i le Mataio 6:24 e faapea: “E lē mafai ona pologa se tasi i ni matai se toʻalua.” Na faateʻia aʻu ina ua ou iloa uiga moni o na upu! Ae ina ua mavae ni nai aso, na matuā faateʻia foʻi le Molimau ina ua ou faailoa atu ua ou tuua le ʻau fāʻili.

Na pei le Tusi Paia o se faaata e faailoa mai oʻu sesē. (Iakopo 1:22-25) Na avea aʻu ma tagata sauā, faamaualuga, matapeʻapeʻa, manaʻo tele, tautala i upu masoā, fia misa, ulaula, ma inutele i le ʻava malosi. Na ou lagona le matuā faanoanoa ina ua ou iloa e taʻusalaina e le Tusi Paia na ituaiga o olaga. Ae ui i lea, na ou nofo sauni e faia so o se suiga e manaʻomia i loʻu olaga.​—Efeso 4:22-24.

Na ou lagona le nofosala ona o amioga sa ou faia. Ae na fesoasoani mai le Molimau sa ma suʻesuʻe, ma faailoa mai le manatu o loo i le Isaia 1:18: “E ui lava ina e pei o le ʻie mūmū sesega a outou agasala, ae o le a paʻepaʻe e pei o le kiona.” O lenei mau ma isi mau o le Tusi Paia, na fesoasoani iā te aʻu e iloa ai e alofa mutimutivale lo tatou Tamā i le lagi, ma e finagalo e aveesea faalogona nofosala mai i ē ua salamō moni.

Ina ua ou iloa lelei Ieova ma atiaʻe le alofa moni mo ia, na ou manaʻo ai loa e tuuina atu loʻu ola iā te ia. (Salamo 40:8) O lea na ou papatiso ai i le 1992, i le tauaofiaga faavaomalo a Molimau a Ieova lea sa faia i St. Petersburg, i Rusia.

Ua mafai ona ou maua ni uō moni i tagata tapuaʻi o Ieova. E masani ona matou faatasitasi ina ia ta musika e faaaogā ai le meaalofa mai i le Atua. (Iakopo 1:17) Ae o le faamanuiaga sili ua ou maua, o le faaipoipo atu lea i laʻu avā o Kristina. Ua mafai ona ou faasoa atu iā te ia le tele o mea, e pei o mea ou te fiafia ai, o luʻi ou te fesagaʻia, faapea foʻi oʻu faalogona loloto.

Ana lē avea aʻu o se Molimau a Ieova, atonu e faapenei ua ou oti., E tele faafitauli ma mala sa ou fesagaʻia i taimi ua teʻa, ae o lea ua iai se fuafuaga moni o loʻu olaga, ma ua ou lagona ua sologa lelei mea uma.