Ia Aʻoaʻo Lau Fanau

“Ua Pipii Pea o Ia iā Ieova”

PE NA fai atu se tasi iā te oe e te pipii atu pe e tumau i se mea?— * E ono fai atu mātua ma faiaʻoga i tamaiti ia tumau i le faia o a latou meaaʻoga. O lona uiga ia faatāuaina le faia o meaaʻoga. Seʻi o tatou talanoa i se tasi o loo taʻua i le Tusi Paia na ʻpipii atu iā Ieova,’ le Atua moni. O lona igoa o Esekia. Seʻi o tatou vāai po o le ā e tatou te aʻoaʻoina mai iā te ia.

Sa lē fiafia le olaga o Esekia a o laʻitiiti. Na lē toe tapuaʻi iā Ieova lona tamā o Aasa, le tupu o Isaraelu. Na tausolomua Aasa i le tapuaʻi i atua sesē a o laʻitiiti Esekia. E oo lava i se tasi o atalii o Aasa, o se uso o Esekia, sa fasiotia e Aasa ma ofo atu i atua sa tapuaʻi i ai!

E ui lava na faia pea e Aasa mea leaga, ae na usitaʻi pea Esekia iā Ieova. Pe e te manatu na faigatā lenei mea iā te ia?— E mautinoa na faigatā, ae e leʻi faavaivai Esekia. Seʻi o tatou aʻoaʻoina le auala na pipii atu ai o ia iā Ieova, ma le auala e mafai ai ona tatou faia foʻi faapea.

Na aʻoaʻoina e Esekia ni mea e uiga i nisi sa pipii atu iā Ieova. O Tavita o se tasi o i latou na. E ui lava ua mavae le faitau selau o tausaga talu ona maliu Tavita, ae atonu na faitau Esekia i Tusitusiga Paia e uiga iā te ia. Na tusi Tavita: “E tusa pe tuua aʻu e loʻu lava tamā ma loʻu tinā, ae e talia lava aʻu e Ieova.”

Pe e te iloa le mea na fesoasoani iā Tavita e usitaʻi ai iā Ieova?— O lona faatuatua! Na mautinoa e Tavita, o le a fesoasoani mai Ieova iā te ia pe afai e usiusitaʻi. E leʻi masalosalo Tavita!  E mautinoa, o le mafaufau o Esekia iā Tavita na fesoasoani ai iā te ia ina ia pipii atu pea ma usitaʻi iā Ieova. E mafai foʻi ona e mautinoa o le a fesoasoani Ieova iā te oe, pe afai e te pipii atu pea ma usitaʻi iā te ia.

Ae faapefea pe a lē tapuaʻi lou tamā po o lou tinā iā Ieova?— Na faatonu e le Atua tamaiti ina ia usiusitaʻi i o latou mātua, o lea la e tatau ai iā te oe ona e usitaʻi. Peitaʻi, pe a faatonu oe e ou mātua e fai se mea e lē manaʻo le Atua e te faia, e mafai la ona e faamatala atu le māfuaaga e te lē faia ai. E lē tatau ona e pepelo, gaoi, pe e faia foʻi se mea leaga e fai mai le Atua e sesē, e tusa lava po o ai e fai atu iā te oe e fai. O loo e faia le mea saʻo e usitaʻi atu ai i le Atua!

E iai faaaʻoaʻoga lelei e mafai ona tatou mulimuli i ai. E lē gata na iloa e Esekia le faaaʻoaʻoga a Tavita, ae na ia iloa foʻi le faaaʻoaʻoga a Iotama, le tamā o lona tamā. E ui na maliu Iotama a o leʻi fanau Esekia, ae sa aʻoaʻoina lava e Esekia mea e uiga iā te ia, e pei foʻi ona tatou iloa mea i aso nei e ala i le Tusi Paia. Pe e mafai ona e mafaufau i nisi faaaʻoaʻoga lelei e mafai ona tatou mulimuli i ai?—

E moni e tatou te iloa mai i le Tusi Paia nisi o mea sesē sa faia e Esekia, Tavita, Iotama, ma isi tagata lē lelei atoatoa. Ae na alolofa na tagata iā Ieova, taʻutino a latou agasala, ma taumafai e faia le mea saʻo. Ia manatua, e na o le Alo o le Atua, o Iesu, e lelei atoatoa. Seʻi o tatou iloiloina lana faaaʻoaʻoga ma taumafai e mulimuli i ai.

Faitau i Lau Tusi Paia

2 Tupu 18:6; 2 Nofoaiga a Tupu 28:1-3

Salamo 27:10; Efeso 6:1; Kolose 3:20

2 Nofoaiga a Tupu 27:1, 2; 1 Peteru 2:21

[Faaopoopoga i lalo]