O se Tusi Mai Nouē

O se Asiasiga i se Vaipanoa Telē e Ufitia i le Kiona

O LOO ma autilo atu i le faamalama i se tasi o taeao o le tau mālūlū, e vaai po o le a faapeʻī le tau. O se fiafiaga le vaaia e lagi lelei le aso! E tolu aso o le a ma talaʻi ai i Finnmarksvidda—o se mauga laugatasi e telē i le itu i mātū o Nouē.

E ma te lagona le popole e ō i le itu i mātū o loo iai se vaipanoa lea e ufitia i le kiona, ona o le matuā mālūlū o Nouē. Ae o le tulaga e fiafia ai, ona o loo matou ō faatasi ma ni Molimau a Ieova se toʻatolu e nonofo i lenā vaipanoa. E latou te malamalama lelei i mea e faatalitalia, ma aumaia fautuaga lelei.

E tau leai ni auala i lenei vaipanoa. O le auala sili e oo ai i tagata o loo nonofo i vaipanoa maotua, o le ō lea i pasika e alu i luga o le ʻaisa. Ua uta o matou lavalava, meaʻai, ma nisi fagu penisini e faaleoleo i luga o pasika ma taavale toso e alu i luga o le ʻaisa. E iloa mamao atu lava le paʻepaʻe mai o le kiona i le mauga laugatasi telē, ma e feʻilafi mai e pei o ni taimane pe a suluia i le lā. O se vaaiga e matuā maofa ai!

E maua i Finnmarksvidda ituaiga o manufeʻai eseese, ae e lē tele ni urosa. O le mea sa sili ona matou fiafia i ai o le oo atu i tagata o loo nonofo i vaipanoa maotua. E sili ona matou tulimataʻia le taimi e feiloaʻi ai i tagata e tautatala i le gagana Sami, o ē e maua mea e ola ai e ala i le tausia o ʻaila, po o le faigaluega i faletalimālō.

I fafo o se tasi o faletalimālō, na matou feiloaʻi ai ma le toʻatele o talavou o loo faasee ma tafafao. Sa matou talatalanoa, ma na fesilisili mai i le galuega o loo matou faia, ona matou faamatala lea i ai ma le fiafia. Na faapea mai se tasi o talavou a o matou ō ese: “Ia manuia lava le talaʻiga!” Ina ua māeʻa lenā, ona matou ō lea i ā matou pasika e alu i luga o le ʻaisa, ma uia vaituloto aisā, ma vaipanoa e ufitia i le kiona. Pe faamata o le a matou vaaia se lafu ʻaila?

Na faafeiloaʻia ma le māfana i matou e se tamāloa, a o matou agaʻi atu i se tamaʻi fale laupapa. O ia o se tasi o tagatānuu o loo totoe o lenā vaipanoa. Ina ua ia iloa ua leaga la matou taavale toso, ona ofo mai lea ma le agalelei e na te toe faaleleia. E faifaimālie lava ona uiga e pei o olaga masani o tagata o lenā vaipanoa, ma o ona uiga faaalia na matou lagona ai foʻi le toʻafilemu. Ina ua uma ona faaleleia la matou taavale toso, ona matou faafetai atu lea iā te ia ma talatalanoa i ai i nisi o manatu mai i le Tusi Paia, i le māfuaaga ua lē taofia ai e le Atua puapuaga. Sa faalogologo  lelei o ia, ma ae matou te leʻi ō ese, na ia talia le tusi O ā Aʻoaʻoga Moni a le Tusi Paia? ma mekasini o le Olomatamata ma le Ala Mai! Na ataata o ia ma faapea mai: “Faafetai lava mo le asiasi mai.”

E māeʻa ane asiasiga ua amata ona pogisa, o lea na matou agaʻi ai loa i le tamaʻi fale laupapa e momoe ai i le pō. Na faafuaseʻi ona matou vaaia se alope, ma na iila ma tu ese mai lona fulufulu mūmū mai i le kiona paʻepaʻe. E na o sina taimi lava na tu ma tilotilo mai ai iā i matou. Ua amata ona toʻulu le kiona, ma ua faafaigatā ai ona iloa atu le mea o loo agaʻi i ai. Maʻeu lo matou fiafia ina ua vaaia le tamaʻi fale laupapa! Na tafu la matou ogaumu, ma ua amata ai ona māfanafana totonu o le fale. E ui lava ua matuā vaivai mai i le femalagaaʻi i pasika i le aso atoa, ae na matou lagona pea le fiafia.

Ua vave ona oo mai le isi aso. Ua toe uta la matou pasika, ma e matou te ui i autafa o se vaitafe e agaʻi i nofoaga maualalalo, ma faasolo atu i se isi faletalimālō. O i inā na matou feiloaʻi ai ma se alii talavou, ma na matou talatalanoa i nisi o manatu faalaeiau mai i le Tusi Paia. Na agalelei o ia ma toe faasino mai le auala faigofie e toe foʻi ai i le auala na matou ō mai ai.

Ua oo nei i le aso mulimuli o la matou asiasiga. A o matou ulu atu i le Stabbursdalen National Park, na matou vaaia ai se laufanua e sili ona matagofie, faatasi ai ma mauga e ufitia i le kiona lea e feʻilafi pe a suluia i le lā. E leʻi leva ae matou vaaia se lafu ʻaila tele! O loo aai ma le fifilemu, ma faaaogā o latou atigivae e eli aʻe ai limulimu o loo ufitia i le kiona. E mamao ese atu le mea na matou vaaia ai se tamāloa Sami, o saofaʻi i lana pasika ma vaavaaia lana lafu ʻaila. O loo leoleoina ma le faaeteete e lana taʻifau le lafu, ma faamautinoa e lē sē ese se ʻaila. E na o sina taimi lava na tū ai le taʻifau ma sosogi e agaʻi mai i le mea o loo matou tutū ai, ona toe foʻi lea i le leoleoina o le lafu. Na taʻu atu la matou feʻau i lē na vaavaaia ʻaila, ma na ia faaalia uiga faaleuō ma faalogologo lelei mai.

A o toe foʻi atu i o matou aiga, na matou toe mafaufau i tagata eseese sa feiloaʻi i ai a o faagasolo lenei faigāmalaga e 200 maila (300 km) le umi. O se faaeaga iā i matou le faia o se sao itiiti, ina ia talatalanoa ma tagata o lenā vaipanoa telē e ufitia i le kiona.

[Ē Ana le Ata i le itulau 15]

© Norway Post