O Ai Moni o Loo Pulea le Lalolagi?

ATONU e te leʻi feiloaʻi muamua i taʻitaʻi o faalapotopotoga o tagata solitulafono. Po o le uiga la o lenā mea, e leai nisi faapena? E popoto tele ē e taʻitaʻia na faalapotopotoga e natia i latou lava, pe e latou te faatonutonuina foʻi le faia o isi solitulafono mai i totonu o falepuipui. Peitaʻi ua faamanatu mai iā i tatou e faamatalaga i le nusipepa e faatatau i faiga sauā ona o le fefaatauaʻiga o fualaau faasāina, faiga faatalitane, ma le faatauina atu faasolitulafono o tagata, ia taaʻiga faapiʻopiʻo ma iʻuga mataʻutia ua iai ona o nei soligatulafono. O aafiaga leaga ua iai i le fanau a tagata, ua tatou iloa ai o loo iai moni lava nisi o loo taʻitaʻia faiga faasolitulafono.

Ua faailoa mai i le Afioga a le Atua, le Tusi Paia, e iai moni lava Satani, ma e pei o sē e taʻitaʻia faiga faasolitulafono, e faataunuuina foʻi ana fuafuaga e ala i “faailoga pepelo” ma faiga “amiolētonu, ma mea taufaasesē.” O le mea moni, ua faapea mai le Tusi Paia, o loo “fai ma liua . . . o ia lava e avea ma agelu o le malamalama.” (2 Tesalonia 2:9, 10; 2 Korinito 11:14) E tatou te iloa e iai moni lava le Tiapolo pe a tatou vaaia aafiaga leaga o ana gaoioiga. Peitaʻi, e faigatā i le toʻatele ona talitonu i se agaga leaga e lē vaaia. A o leʻi iloiloina totoʻa le faamatalaga a le Tusi Paia e uiga i le Tiapolo, seʻi o tatou tagaʻi muamua i nisi o talitonuga sesē ma manatu taatele e feteenaʻi, lea ua lē talitonu ai nisi e iai moni lava le Tiapolo.

▪ “E faapefea i se Atua alofa ona foafoaina le Tiapolo?” Talu ai o loo taʻua i le Tusi Paia le Atua e tonu ma lelei atoatoa, e feteenaʻi la pe a manatu e faapea o ia na foafoaina se agaga e leaga, sauā, ma taufaaleaga. O le mea moni, e lē o taʻua i le Tusi Paia le foafoaina e le Atua o se agaga faapena. Ae o loo faapea mai e uiga i le Atua: “O le Papa, e atoatoa ona lelei ana gaoioiga, auā e tonu ona ala uma. O le Atua faamaoni, e lē o iā te ia se faiga lē tonu; e amiotonu ma amio saʻo o ia.”—Teuteronome 32:4; Salamo 5:4.

Seʻi tomānatu, pe e mafai e le Atua ona foafoaina sē e lelei atoatoa ina ia faia e tau lava o le mea saʻo, ae e lē taitai mafai ona faia se mea leaga? Nai lo o le foafoaina e pei o ni masini (robots), ua tuuina atu e le Atua le saʻolotoga ma le avanoa e faia ai a latou lava filifiliga. O lea la, e mafai e sē e lelei atoatoa ma atamai, ona filifili e faia le mea lelei po o le mea leaga. O le mea moni, e faatoʻā taulia gaoioiga a se foafoaga atamai e pei o tagata po o foafoaga agaga, pe afai e faia e tusa ma lana saʻolotoga e filifili ai.

E talafeagai la le faapea atu, e lē mafai e le Atua ona tuuina i ana foafoaga se saʻolotoga e filifili ai, ae i le taimi e tasi e taofia i latou mai le filifili e faia mea leaga. Na faasino atu Iesu i le Tiapolo, o lē na sesē le faaaogāina o lana saʻolotoga e filifili ai e faapea: “E leʻi tumau lava o ia i le upu moni.” (Ioane 8:44) Ua manino mai i lenā fuaiupu, a o leʻi avea lenei agaga ma Tiapolo, sa avea muamua o ia o se foafoaga agaga lelei atoatoa, ma na “tumau i le upu moni.” * Na foafoaina e Ieova le Atua ana foafoaga atamamai e avea ma ni ē e saʻoloto e filifili, ona e alofa ma e na te faatuatuaina  i latou.—Tagaʻi i le pusa “Pe e Mafai Ona Agasala se Foafoaga Lelei Atoatoa?” i le itulau e 6.

▪ “O le Tiapolo o se auauna a le Atua” Ua faapea mai nisi, o loo tau faaataata mai i le Tusi Paia lenei manatu i le tusi o Iopu. E tusa ai ma le manatu o se faitofā o le Tusi Paia, e faasino atu le faamatalaga na “fealualuaʻi i le lalolagi” le Tiapolo, i le matafaioi a sipai Peresia anamua o ē na auina atu e le tupu e feofeoaʻi ma suʻesuʻe ni mataupu, ma toe lipoti mai iā te ia. (Iopu 1:7) Pe afai o le Tiapolo o se sipai moni a le Atua, aiseā la na ia tau faamatala atu ai i le Atua o lea sa ia “fealualuaʻi i le lalolagi”? Nai lo o le faasino atu iā te ia o sē e faifaimea faatasi ma le Atua, ae o loo taʻua i le tusi o Iopu le Tiapolo i lona igoa o Satani, lea e uiga atu “o Lē e Tetee,” ma ua manino mai ai o ia o le Fili sili o le Atua. (Iopu 1:6) O fea la e māfua mai ai le manatu e faapea o le Tiapolo o se auauna a le Atua?

I le uluaʻi senituri T.A., na taʻua ai i tusi faa-apokerifa e pei o le “Book of Jubilees” ma le “Common Rule” a le vaega faalotu i Qumran e faapea, na iai se feutagaʻiga i le va o le Tiapolo ma le Atua, ma i le taimi e tasi o loo gauaʻi i le faia o le finagalo o le Atua. I lana tusi o le Mephistopheles, na taʻua ai e J.B. Russell o se tusitala o talafaasolopito, ia faamatalaga a lē na Toe Fuataʻiina le Lotu Porotesano o Matini Luteru e faapea, o le Tiapolo o se meafaigaluega a le Atua “e  pei o se suōtosina e faaaogā i lana faatoʻaga.” Ua faaopoopo atili mai Russell, o le uiga o le manatu, “e fiafia lenei suōtosina (Satani) e liaʻieseina vao (faaleagaina tagata),” ae e tumau pea i le aao malosi o le Atua ina ia faataunuuina ai lona finagalo. Na faateʻia le toʻatele o tagata i le aʻoaʻoga a Luteru, ae na mulimuli ane talia e Ioane Kalavini, o se tagata Falani e poto i mataupu faalelotu. E faapefea i se Atua alofa ona faataga mea leaga ma finagalo foʻi ia tupu nei mea? (Iakopo 1:13) O lenei aʻoaʻoga ma le tele o mea mataʻutia na tutupu i le senituri lona 20, e taofia ai tagata mai i le talitonu i le Atua ma le Tiapolo.

▪ “O le Tiapolo ua na o se uiga leaga” E faafaigatā ona malamalama i nisi o mau o le Tusi Paia pe a manatu i le Tiapolo ua na o se uiga leaga. O se faaaʻoaʻoga, i le Iopu 2:3-6, faamata o ai na talatalanoa ma le Atua? Pe sa ia talanoa atu i se uiga leaga o loo i totonu o Iopu, po o le mea sa talanoa o ia iā te ia lava? Pe sa viiviia e le Atua uiga lelei o Iopu, ae e toe faatagaina foʻi uiga leaga e tofotofoina ai Iopu? Afai e tatou te faapea o loo iai na uiga i le Atua, o lona uiga la o ia o Sē e amio piʻopiʻo ma lē saʻo. E feteenaʻi lenā manatu ma le manatu o le Tusi Paia e faapea, “e lē o iā te ia se amiolētonu.” (Salamo 92:15) O le mea moni, e leʻi ʻaapa atu le aao’ o le Atua ma faapogaia tigā o Iopu. O lea la, o le Tiapolo e lē o se uiga leaga po o se itu lē lelei o uiga o le Atua, ae o se foafoaga agaga na faia o ia lava ma Fili o le Atua.

O Ai Moni Lava o Pulea le Lalolagi?

I aso nei, e toʻatele e manatu ua lē o toe aogā le talitonu i le Tiapolo. E ui i na mau faamatalaga eseese, ae e pau le māfuaaga o le iai o le leaga, ona o loo iai le Tiapolo. O le mea moni, o taumafaiga ina ia faateʻa ese le manatu e iai le Tiapolo, ua māfua ai ona teena e tagata le Atua, e oo foʻi i tapulaa tau amio.

Na tusi Charles-Pierre Baudelaire, o se fatusolo o le senituri lona 19: “O le togafiti sili a le tiapolo, o le faatalitonuina lea o i tatou e faapea e lē iai o ia.” O le natia o ia lava, ua faatupuina ai e le Tiapolo masalosaloga e uiga i le iai moni o le Atua. Pe afai la e lē iai le Tiapolo, ona manatu lea o le toʻatele e tatau ona tuuaʻia le Atua mo mea leaga uma, ma lē toe faatuatua ai iā te Ia. Pe e lē o le mea tonu ea lenā o loo manaʻo iai le Tiapolo?

I le pei o se taʻitaʻi o tagata solitulafono, e natia e le Tiapolo o ia lava ina ia faataunuu lana fuafuaga. O le ā lenā fuafuaga? Ua faapea mai le Tusi Paia: “Ua faatauasoina manatu o i latou o ē e lē talitonu e le atua o lenei faiga o mea a le lalolagi, ina neʻi pupula atu iā i latou le tala lelei matagofie e uiga iā Keriso, o ia o le faatusa o le Atua.”—2 Korinito 4:4.

O loo iai pea se fesili tāua. O le ā o le a faia e le Atua i le faitogafiti sili o loo māfua ai mea leaga uma ma mafatiaga? O le a tatou iloiloina lea fesili i le mataupu o sosoo mai.

[Faaopoopoga i lalo]

[Ata i le itulau 5]

Po o le Tiapolo o se auauna a le Atua po o sē e tetee i le Atua?

[Pusa i le itulau 6]

Pe e Mafai Ona Agasala se Foafoaga Lelei Atoatoa?

E faatapulaa le tulaga lelei atoatoa lea na tuuina e le Atua i ana foafoaga atamamai. E ui lava ina lelei atoatoa Atamu, ae na manaʻomia pea ona ia usitaʻia mea na faatapulaaina e Lē na foafoaina o ia. O se faataʻitaʻiga, e afāina lona soifua mālōlōina pe a ia ʻaina le palapala, maamaa po o laupapa. E oti pe faamanuʻalia foʻi o ia, pe afai e lē amanaʻia le tulafono o le kalave ma puna i lalo i se tofē.

I se tulaga tutusa, e leai se foafoaga lelei atoatoa—o se tagata po o se agelu—e lē oo iai ni iʻuga leaga, pe a solia tapulaa tau amio a le Atua. O lea, pe a faaaogā sesē e se foafoaga atamai lana saʻolotoga e filifili ai, e faigofie lava ona oo atu ai i le faia o le mea sesē ma agasala ai.—Kenese 1:29; Mataio 4:4.