Ua Fesili Mai le ʻAufaitau . . .

Pe e Talia e Molimau a Ieova Togafitiga Faafomaʻi?

▪ Na fetalai Iesu “e lē manaʻomia e tagata malolosi se fomaʻi, ae na o ē mamaʻi.” (Mataio 9:12) Na ia taʻua i inei, e lē o teena i le Tusi Paia le saʻilia o se fesoasoani mai i fomaʻi. O lea la, e talia ma le fiafia e Molimau a Ieova vailaau ma togafitiga faafomaʻi. E latou te mananaʻo ia tumau le soifua mālōlōina lelei ma umi le ola. O nisi Molimau a Ieova o ni fomaʻi, e pei foʻi o le Kerisiano o Luka i le uluaʻi senituri.—Kolose 4:14.

Peitaʻi, e lē talia e Molimau a Ieova togafitiga e feteenaʻi ma tulafono a le Tusi Paia. O se faaaʻoaʻoga, e latou te lē talia tuigātoto, ona o loo faasā i le Tusi Paia le taliaina o le toto ina ia tausia ai le tino. (Kenese 9:4; Levitiko 17:1-14; Galuega 15:28, 29) O loo faasā foʻi i le Afioga a le Atua togafitiga faafomaʻi e aofia ai “faiga faataulāitu,” po o faiga faaagaga.—Isaia 1:13; Kalatia 5:19-21.

E toʻatele tagata ua iai tomai e saunia togafitiga faafomaʻi, ia e lē feteenaʻi ma tulafono a le Tusi Paia. O na togafitiga e talia e le toʻatele o Molimau a Ieova, ma e masani ona sili atu ona lelei i lo togafitiga ia e feteenaʻi ma le finagalo o le Atua.

E moni e eseese manatu o tagata pe a oo mai i mataupu tau soifua mālōlōina. O le mea e lelei i le isi atonu e lē aogā i le isi. O lea, e ono saʻili atu nisi i se isi fomaʻi ina ia maua se faamatalaga ma se togafitiga saʻo e uiga i lona maʻi.—Faataoto 14:15.

E eseese togafitiga e talia e Molimau a Ieova. O loo faataga i le Afioga a le Atua Kerisiano e filifili e tusa ma lona lotofuatiaifo, i togafitiga e lē o iai se tulafono a le Tusi Paia e faasā ai. (Roma 14:2-4) O lea la, e tatau i tagata taʻitoʻatasi ona iloilo lelei so o se togafitiga e fautuaina mai, ma faamautinoa e lē o feteenaʻi ma lona lotofuatiaifo ua aʻoaʻoina i le Tusi Paia.—Kalatia 6:5; Eperu 5:14.

O le vaaiga a se Molimau a Ieova i le faia o filifiliga, e tai pei o loo ia aveina se taavale e lata i se magāala e pisi tele. Pe afai e na ona mulimuli i taavale o loo muamua i luma ma alu atu saoasaoa i le magāala, e na te faatupuina se faalavelave mataʻutia. Ae o se avetaavale tomai, e na te faalemu ma vaavaai solo i isi taavale ona faatoʻā alu ai lea. E faapena foʻi Molimau a Ieova, e lē vavevave i le faia o ni faaiʻuga i togafitiga faafomaʻi, pe mulimuli pogisa i manatu o isi. Nai lo lea, a o leʻi faia se faaiʻuga e latou te iloilo togafitiga eseese ma taʻiala a le Tusi Paia.

E talisapaia e Molimau a Ieova galuega fitā ma le faataulagaina a ē o loo saunia tausiga faafomaʻi. E latou te matuā lotofaafetai foʻi i le mapusaga mai i maʻi, lea e saunia mai e na tagata.