Ua Fesili Mai le ʻAufaitau . . .

O le ā le Manatu o Molimau a Ieova i Lotu Tuufaatasi?

▪ Ua taʻua i le World Christian Encyclopedia, e tusa ma le “10,000 lotu o loo iai i le lalolagi aoao.” O le feeseeseaʻi o nei lotu ua māfua ai le tele o mafatiaga, ma ua manatu ai le toʻatele o tagata lotu e sili pe a tuufaatasi lotu, ina ia maua ai le filemu ma le autasi i se lalolagi fevaevaeaʻi.

O loo uunaʻia e le Tusi Paia le autasi. Na faatusa e Paulo le faapotopotoga Kerisiano i le tino o se tagata, o itutino uma “ua faia ina ia felagolagomaʻi.” (Efeso 4:16) Sa uunaʻia foʻi e Peteru ona uso talitonu: “Ia autasi outou uma.”—1 Peteru 3:8.

Na soifua uluaʻi Kerisiano i se lalolagi na iai tagata mai i atunuu eseese ma lotu eseese. Ae ina ua tusi e faatatau i le tuufaatasia o lotu eseese, na fesili Paulo: “E faapefea ona tofusia le tagata faamaoni ma lē ua lē talitonu?” Ona ia lapataʻia lea o Kerisiano e ‘ō ese mai iā i latou.’ (2 Korinito 6:15, 17) O lea, sa taʻusalaina e Paulo lotu tuufaatasi. Aiseā?

Na faamatala e le aposetolo, o le tapuaʻi faatasi o le Kerisiano moni ma lē e lē o se Kerisiano moni, ua pei o se amo faalēgatasi. (2 Korinito 6:14) E mautinoa e iʻu ina afāina ai le faatuatua o le Kerisiano. O popolega na iā Paulo e tutusa ma popolega o se tamā e na te iloa e iai tamaiti ulavavale i lona vaipanoa. O ia o se matua alofa ma e na te faatapulaa tamaiti e ao ona tafao i ai lona atalii. Atonu o le a lē fiafia isi i ana faasāsāga. Ae a fua i ai, o le a puipuia lona atalii mai i taaʻiga leaga pe a lē tafafao ma tamaiti ulavavale. Sa iloa foʻi e Paulo o le a puipuia Kerisiano mai i faiga e leaga ai pe a lē auai faatasi ma isi lotu.

O lenā mea na faataʻitaʻi ai Paulo iā Iesu. E ui ina faataatia e Iesu le faaaʻoaʻoga sili o le faatupuina o le filemu, ae e leʻi auai o ia i lotu tuufaatasi. Sa iai le tele o vaega faalotu e pei o le ʻau Faresaio ma le ʻau Satukaio, i le taimi o le auaunaga a Iesu i le lalolagi. O le mea moni na aufaatasi nei vaega faalotu e tetee iā Iesu, ma oo lava ina taupulepule e fasiotia o ia. Ae na faatonu e Iesu ona soo ia “faaeteete i aʻoaʻoga a le ʻau Faresaio ma le ʻau Satukaio.”—Mataio 16:12.

Ae ā aso nei? Po o aogā pea le lapataʻiga a le Tusi Paia e uiga i lotu tuufaatasi? Ioe. Ona e lē mafai ona autasi ni talitonuga eseese faalotu pe a tuufaatasi lotu, e pei ona lē mafai ona fefiloi faatasi le suāuu ma le vai pe a tuufaatasi i se fagu. O se faataʻitaʻiga, a tatalo faatasi tagata o lotu eseese mo le filemu, o lē fea atua o le a tatalo i ai? O le Atua Tasitolu o lotu ua taʻua o Kerisiano? O le Atua o Hinitū o Brahma? O Puta? Po o se isi atua?

Na valoia e le perofeta o Mika e faapea, i “aso e gata ai” o le a fai mai tagata mai i nuu uma: “Ō mai ia outou, ma tatou ō aʻe i le mauga o Ieova, i le fale o le Atua o Iakopo; e na te aʻoaʻo mai iā i tatou i ona ala, ma tatou savavali ai i ona ala.” (Mika 4:1-4) O le a iʻu ai i le filemu ma le autasi i le lalolagi aoao, e lē ona ua tuufaatasi lotu, ae ona ua talia e tagata uma le tapuaʻiga moni e tasi.

[Ata i le itulau 27]

O sui o lotu autū o le lalolagi i se fonotaga a lotu tuufaatasi i le 2008

[Ē Ana le Ata]

REUTERS/Andreas Manolis