Faauuga Lona 127 o le Aʻoga Kiliata

Auina Atu Misionare i “Tuluʻiga Uma o le Lalolagi”

NA TOFIA e Iesu ona soo ina ia molimau atu i “tuluʻiga uma o le lalolagi.” (Galuega 1:8) E tāua tele lenā tofiga i Molimau a Ieova.

I le silia ma le 65 tausaga ua tuanaʻi, ua taulamua ai misionare o ē na aʻoʻoga i le Aʻoga Faale-Tusi Paia a le Olomatamata o Kiliata i le galuega talaʻi, i le silia ma le 200 atunuu. I le Aso Toonaʻi, Setema 12, 2009, e toʻa 56 i latou ua lava le poto masani i le galuega talaʻi na faauu ina ua mavae le lima masina o aʻoaʻoga i le aʻoga faamisionare i Patterson, i Niu Ioka i Amerika.

Aafiaga o Mea e Mafaufau i Ai

Na lauga se sui o le Vaega Pule o Molimau a Ieova ma o le taʻitaʻifono o le polokalame, o Stephen Lett, i le matua “Ia Faaaogā ma le Poto o Outou Mafaufau.” Muamua lava, na ia lapataʻia le ʻaufaauu i vala e fā e lē tatau ona mafaufau i ai. O vala muamua e tolu: (1) Aua neʻi mafaufau e maua se puipuiga tumau mai mea faitino; (2) aua le mafaufau i amioga lē mamā; ma (3) ʻalofia le soona popole i le mafaufau i faafitauli e ono tutupu mai. (Faataoto 18:11; Mataio 5:28; 6:34) E tusa ai ma le vala lona tolu, na taʻua e le failauga o le tagata e popole naʻuā, e tuu faatasi popolega o ananafi ma le asō, ma faaopoopo i ai ma popolega o taeao. Na fai mai le uso o Lett, “O lea mea, o se avega e mamafatū.” Ae o le ā le vala lona fā? Ia aua neʻi mafaufau na sili atu le olaga na iai a o leʻi avea ma misionare. O le a latou lē maua ai le olioli i o latou tofiga fou.

Ona faalaeiau lea e le uso o Lett le vasega i auala aogā e fā e faaaogā ai o latou mafaufau. Na ia taʻua: (1) Ia vave ona iloa tulaga e lamatia ai faaleagaga pe faaletino, ma ʻalofia; (2) pe a e faitauina le Tusi Paia, ia faaata i lou mafaufau e pei lava o loo e iai i mea o e faitauina; (3) ia manatu i so o se isi e talaʻi i ai i le tofiga fou, o sē e ono avea ma tagata e tapuaʻi iā Ieova; ma (4) ia atiaʻe le tigāalofa mo isi i le tuu o oe i tulaga o tagata e talaʻi i ai.—Faataoto 22:3.

Le Aogā o le Toleni o Isi

Na lauga David Splane, o se sui o le Vaega Pule i le matua e faavae i le 2 Timoteo 2:2, ‘Ia Tuuina Atu na Mea i Tane Faamaoni.’ Ina ua faatonuina e Paulo Timoteo e toleni tane faamaoni, na manaʻo ia lē gata i le aʻoaʻoina o i latou i le upu moni, a ia faalaeiauina i latou ia toleni foʻi isi. Na taʻua e le failauga le manaʻomia tele o uso agavaa e taʻimua i galuega faa-Kerisiano. O le ā le taimi e toleniina ai i latou, ma e faapefea? Na faalaeiau e le uso o Splane le vasega, ia amata ona toleni i le taimi e amata ai le suʻesuʻega faale-Tusi Paia.

E faapefea ona toleni e misionare tagata suʻesuʻe ia avea ma faaaʻoaʻo o le faatuatua i isi? Na taʻua e le failauga nisi o auala. E ao i misionare ona toleniina i latou ia sauni lelei mo a latou suʻesuʻega. A oo ina auai i sauniga, ia iloa suʻesuʻe mataupu e faavae mai le Tusi Paia o le a talanoaina. Na taʻua e le failauga, “Afai e lē iloa e le tagata ona  suʻesuʻe ma sauniuni, o le a lē iloa ona fesoasoani i isi.” Na taʻua foʻi e le uso le fesoasoani o misionare i tagata fou ina ia tausisi i le taimi, ia lagolago le galuega talaʻi e ala i tupe, ma ia gauaʻi i ē o taʻimua. Ma o le auala sili e aʻoaʻo ai isi i nei vala, o le avea lea ma faaaʻoaʻoga lelei iā i latou.

Le Faaeaga o le Avea ma Molimau

Na lauga Guy Pierce, o se isi foʻi sui o le Vaega Pule, i le matua e faavae mai fetalaiga a Iesu i le Galuega 1:8, ‘Ia Fai Outou ma Molimau iā te Aʻu.’ Na ia faamanatu i le vasega e faapea, i le uluaʻi senituri T.A., na aveesea ai mai iā Isaraelu le faaeaga o le avea ma molimau a Ieova, ae tuuina atu i se nuu e fuaina mai fua o le Malo. (Mataio 21:43) O i latou ia o le faapotopotoga o Kerisiano faauuina. Na taʻua e le failauga upu a le aposetolo o Peteru e faapea, o le a “faalauiloa atu” e le “nuu paia” uiga e silisili ona lelei o Ieova. (1 Peteru 2:6-9) E lē o faapea mai Iesu, e na o ia e molimau i ai Kerisiano, ae aua le toe molimau iā Ieova, ona o loo taʻua o ia o “le Molimau Faamaoni.” (Faaaliga 1:5; 3:14) O ia o le Molimau sili a Ieova ma e tatou te mulimuli i lana faaaʻoaʻoga.—1 Peteru 2:21.

Na taʻua e le failauga, i aso nei, ua sili atu ona tāua upu a Iesu o loo i le Galuega 1:8. Aiseā? Ona ua faataunuuina se valoaga e sili ona tāua o loo i le Faaaliga 11:15! Ua faavaeina le Malo Faa-Mesia o le Atua. I aso nei, ua faia le galuega talaʻi i “tuluʻiga uma o le lalolagi.” (Galuega 1:8) Na faamamafa e le uso o Pierce i misionare, ia avea ma molimau iā Ieova ma lona Malo, ae lē o i latou lava, i olaga ma aganuu ma atunuu e ō mai ai. Na faalaeiauina i latou ia aʻoaʻoina “le tele o tagata i le taimi o loo totoe.”

Isi Manatu Tāua o le Polokalame

Na lauga Alex Reinmueller, o sē e fesoasoani i le Komiti Lomitusi i le matua, “E Foaʻi Atu e Ieova le Lototele.” Na ia taʻua, afai e faalagolago misionare i le mana o Ieova, o le a Ia fesoasoani iā i latou ia iloa mea e latou te lelei ai, faapea o latou vaivaiga ma popolega, ma ia avatu le mea sili i le Atua.

Na fai foʻi lauga a Sam Roberson ma William Samuelson, o ni faiaʻoga o le Matagaluega o Aʻoga Faatiokarate. O le matua a le uso o Roberson, “Ou te Faatasi ma Oe,” mai le Isaia 41:10. Na ia taʻua o le a tele mea e olioli ai misionare. Ae e tele foʻi ma faafitauli. Peitaʻi, o le a mafai ona onosaia pe a faaaʻoaʻo i le tupu o Tavita, o lē na tatalo faatauanau atu i le Tamā alofa. (Salamo 34:4, 6, 17, 19) Na faamamafa i le lauga a le uso o Samuelson le tāua o le atiaʻe pea o le mafaufau lelei. O misionare e faia faapea, e lē itaitagofie pe tali ita atu i upu ma faamatalaga lē alofa.—Faataoto 2:10, 11.

O sē e fesoasoani i le Komiti o Tusitusiga o Jim Mantz, na ia faatalanoa se sui o le Komiti o le Lālā mai le malo o Georgia, ma se sui mai Honduras, faapea se sui o le Komiti o le Atunuu mai le malo o Tajikistan. Na fautua mai nei uso ua iai le poto masani i le auala e faauō ai ma ē e ono tetee mai, e ala i le ‘⁠faatoʻilaloina pea o le leaga i le lelei.’ (Roma 12:21) Ona faia lea o se talanoaga olaola e le faiaʻoga o Mark Noumair, ma le ʻaufaauu e uiga i mea na tutupu i le galuega talaʻi a o faagasolo le aʻoga i Kiliata. O lana matua, “E te Manaʻomia se Fesoasoani?”

Na faaiʻu e le taʻitaʻifono le polokalame i le faitau mai o upu o se tasi o pese fou, “See Yourself When all Is New” (Pe a E Iai i le Taimi e Fou ai Mea Uma). Na tuumuli le aofia e 6,509 ma le lagona maumauaʻi ia faaauau ona molimau e uiga iā Ieova ma lona Alo i “tuluʻiga o le lalolagi.”

 [Siata/Faafanua i le itulau 31]

FAAMAUMAUGA O LE VASEGA

8 atunuu o loo auai o latou sui

56 le ʻauaʻoʻoga

28 ulugalii

33.6 faatatauga o tausaga

18.3 faatatauga o tausaga talu ona papatiso

13.6 faatatauga o tausaga i le galuega faataimi atoa

[Faafanua]

(Tagaʻi i le lomiga mo le ata atoa)

Ua taʻua i lalo atunuu e 22 e galulue ai le ʻaufaauu

ATUNUU UA TOFIA I AI MISIONARE

JAMAICA

NICARAGUA

COSTA RICA

PANAMA

PERU

SILI

HAITI

CURAÇAO

GUYANA

CÔTE D’IVOIRE

POLIVIA

PARAGUAY

SERBIA

ALEPANIA

CONGO, DEM. REP.

MOLDOVA

UGANDA

BURUNDI

TANZANIA

MOZAMBIQUE

NEPALE

CAMBODIA

[Ata i le itulau 31]

Vasega Faauu Lona 127 o le Aʻoga Faale-Tusi Paia a le Olomatamata o Kiliata

I le lisi o i lalo, e faanumera laina mai i luma i tua, ma o suafa e lisi mai i le agavale i le taumatau.

(1) Marshall, T.; Prudent, L.; Mashburn, A.; Rosenström, S.; Testa, A.; Takeyama, M.; Sisk, M.

(2) Grooms, K.; Miura, S.; Camacho, M.; Rozas, S.; Burch, M.; Meza, I.; Young, G.; Geraghty, S.

(3) Bonilla, C.; Knaller, D.; Parrales, R.; Hotti, S.; Takada, A.; Tournade, M.; Sopel, C.

(4) Miura, Y.; Parrales, K.; Prudent, K.; Colburn, S.; Willis, L.; Vääränen, A.; Sisk, B.; Takada, R.

(5) Grooms, J.; Vääränen, M.; Geraghty, B.; Stackhouse, R.; Wilson, A.; Bonell, E.; Camacho, D.; Meza, R.; Bonell, M.

(6) Takeyama, S.; Testa, G.; Colburn, T.; Mashburn, C.; Willis, W.; Tournade, L.; Burch, J.; Stackhouse, J.

(7) Wilson, J.; Young, J.; Marshall, E.; Rozas, M.; Knaller, J.; Hotti, N.; Rosenström, A.; Sopel, J.; Bonilla, O.