O le Agaga Paia—Aiseā ua Fenuminumiaʻi ai Tagata?

O LE ā le agaga paia? E foliga mai e faigofie le fesili, ae atonu e faigatā ona maua se tali faigofie. Na faapea atu Pope Penetito XVI i se aofia i Ausetalia: “Ailoga a mafai ona tatou malamalama lelei e faatatau i le Agaga.”

O le mea moni, e tele manatu ma le lē mautinoa e faatatau i lenei fesili, O le ā le agaga paia? O nisi nei o tali masani a tagata:

• O se tagata moni o loo iai i totonu o soo o Keriso.

• O le faatasi mai lea o le Atua i le lalolagi.

• O le peresona lona tolu o le Tasitolu.

Aiseā ua fenuminumiaʻi ai tagata? Na amata mai i le senituri lona fā T.A. ina ua faapea mai nisi aʻoaʻo o lotu, o le agaga paia o se peresona e taitutusa ma le Atua. Ae e leʻi aʻoaʻoina lenā aʻoaʻoga e le Tusi Paia po o uluaʻi soo o Keriso. Ua faamatala e le New Catholic Encyclopedia e faapea: “E manino lava e lē o faaataina mai i le Feagaiga Tuai le agaga o le Atua, o se tagata . . . o le agaga o le Atua, o le mana lea o le Atua.” Na toe faapea mai lenā lava tusi: “Ua faaalia i le tele o mau i le Feagaiga Fou, o le agaga o le Atua e lē o se peresona; ma e iloa lenā tulaga pe a faatusatusa le agaga ma le mana o le Atua.”

O lea, e faigatā i tagata ona mafaufau e faapea o le mana o se tagata. I se suʻesuʻega talu ai nei i Amerika na faaalia ai na teena e le toʻatele o tagata le manatu e faapea, o le agaga paia o se peresona po o se “tagata ola.” Pe e saʻo i latou? Pe e tatau ona tatou talitonu i aʻoaʻo lotu o loo fai mai o le “Agaga Paia o se peresona, e ese mai i le Tamā, ma le Alo”?

E maua le tali maufaatuatuaina e ala i le iloilo o le Afioga a le Atua, o loo faamatala auʻiliʻili mai ai le agaga paia. Na faapea mai le aposetolo o Paulo: “O Tusitusiga Paia uma e mai i le agaga o le Atua ma e aogā e aʻoaʻo ai le upu moni ma faasaʻo ai mea sesē.”—2 Timoteo 3:16, Today’s English Version.

Aiseā e tatau ai ona e saʻili ia iloa le mea moni e uiga i le agaga paia? Ona e mafai ai ona e maua le fesoasoani mai i le Atua. Po o e lagona i nisi taimi e lē mafai ona e faia mea i lou lava malosi? Na folafola e Iesu i ona soo e faapea: “Ia talosaga atu pea, ona foaʻiina mai lea iā te outou. . . . Afai tou te avatu i a outou fanau meaalofa lelei, e sili atu la ona foaʻi mai e le Tamā o i le lagi le agaga paia iā i latou o ē ōle atu iā te ia!”—Luka 11:9, 13.

I mataupu o loo mulimuli mai, o le a faamatala mai e le Tusi Paia le uiga o le agaga paia. Ma o le a tatou iloa ai le auala e aogā ai le agaga paia i o tatou olaga.

[Faamatalaga faaopoopo i le itulau 3]

Ua faamatala mai e le Tusi Paia le uiga o le agaga paia