Po o Iesu o le Atua?

O LE toʻatele o tagata e manatu i le Tolutasi o le “aʻoaʻoga autū a le lotu Kerisiano.” E tusa ai o lenei aʻoaʻoga, o le Tamā, le Alo, ma le agaga paia, e faapea le manatu o peresona e toʻatolu i le Atua e toʻatasi. Ua taʻua e Katinale John O’Connor e faatatau i le Tolutasi e faapea: “Tatou te iloa o se mea lilo e lē mafaamatalaina, lea e tatou te matuā lē malamalama lava i ai.” Aiseā e matuā faigatā tele ai ona malamalama i le Tolutasi?

Ua taʻu mai e le Illustrated Bible Dictionary se māfuaaga se tasi. I le faasino atu i le Tolutasi, ua ioe mai lenei lomiga e faapea: “E lē o se talitonuga faale-Tusi Paia, i le uiga faapea e leai ni mau o faamatala mai ai lea talitonuga i le Tusi Paia.” Ona o le Tolutasi “e lē o se talitonuga faale-Tusi Paia,” ua matuā saʻili ai ma le naunau tagata e talitonu i le Tolutasi, mo ni mau mai le Tusi Paia—ma oo ai ina mimilo sesē na mau—ina ia lagolagoina ai la latou aʻoaʻoga.

Po o Aʻoaʻoina i se Mau le Tolutasi?

O se tasi faataʻitaʻiga o se mau mai le Tusi Paia ua masani ona faaaogā sesē, o le Ioane 1:1. I le King James Version, o loo faitauina ai faapea lenā mau: “Sa i le amataga, le Upu, sa i le Atua [Eleni, ton the·onʹ] le Upu, ma o le Atua [the·osʹ] foʻi le Upu.” O loo aofia ai i lenei fuaiupu ituaiga e lua o le nauna Eleni o le the·osʹ (atua). O le nauna muamua o loo tomua mai i le ton (le), o se ituaiga muānauna mautinoa i le gagana Eleni, ma i lenei tulaga, o loo faasino atu le upu the·onʹ i le Atua e Ona le Malosi Uma Lava. Ae i le vaega lona lua, e lē o iai se muānauna mautinoa o le upu the·osʹ. Pe na sesē ona ua misi ona tuu i ai le muānauna mautinoa o le ton?

Sa tusia le Evagelia a Ioane i le gagana taatele Eleni, lea e iai ni tulafono patino e tusa ai o le faaaogāina o le muānauna mautinoa. Ua mātauina e le faitofā o le Tusi Paia, o A. T. Robertson  e faapea, pe afai e iai uma ni muānauna o le nauna ma le upu e faamatala ai le nauna, o lona uiga la “e mautinoa uma, e tutusa lelei, ma e mafai ona fesuiaʻi.” Ua manatu Robertson i le Mataio 13:38 e fai ma faataʻitaʻiga, lea e faitauina faapea: “O le fanua [Eleni, ho a·grosʹ] o le lalolagi [Eleni, ho koʹsmos] lea.” O le kalama ua mafai ai ona tatou malamalama e faapea, o le lalolagi o le fanua lava foʻi lea.

Ae faapefea pe afai e iai le muānauna mautinoa o le nauna ae leai se muānauna mautinoa o le upu e faamatala ai le nauna, e pei ona iai i le Ioane 1:1? E ala i le sii mai o lenā mau e fai ma faaaʻoaʻoga, ua faamamafa mai ai e le faitofā o le Tusi Paia o James Allen Hewett, e faapea: “E faavae i lenā faamatalaga, ua taʻua mai ai e lē tutusa le nauna ma le upu e faamatala ai le nauna.”

Ina ia faataʻitaʻi, ua faaaogā e Hewett le 1 Ioane 1:5, lea e faapea mai: “O le Atua o le malamalama lea.” I le gagana Eleni, “o le Atua” o le ho the·os,ʹ o loo i ai la se muānauna mautinoa. Ae o le upu Eleni phos mo le “malamalama,” e lē o tomua maia i se muānauna. Ua taʻua e Hewett e faapea: “E mafai ona faapea atu se tasi e faatatau i le Atua, o Ia o le malamalama; ae lē mafai ona faapea atu o le malamalama o le Atua lea.” O isi faaaʻoaʻoga faapena o loo maua i le Ioane 4:24, e faapea “o le Atua o le agaga,” ma le 1 Ioane 4:16, e faapea “o le Atua o le alofa lava ia.” I fuaiupu nei e lua, o loo iai muānauna mautinoa o nauna ae e lē o iai ni muānauna mautinoa o upu e faamatala ai nauna, o le “agaga” ma le “alofa.” O lona uiga la e lē mafai ona fesuiaʻia nauna ma upu e faamatala ai nauna. E lē mafai ona uiga nei fuaiupu faapea “O le agaga o le Atua” ia pe “o le alofa o le Atua.”

O Ai “le Upu”?

O le toʻatele o tagata atamamai o Eleni ma le ʻaufaaliliu o le Tusi Paia ua faapea mai, o loo faamatilatila i le Ioane 1:1 se uiga o “le Upu,” ae lē o le mea e mātaulia ai. Ua taʻua e le tagata faaliliu o le Tusi Paia o William Barclay e faapea: “Ona e leʻi tuuina e [le aposetolo o Ioane] se muānauna mautinoa i luma o le upu theos, o lea ua avea ai o se faamatalaga . . . E lē o faapea mai Ioane i inei e tutusa le Upu ma le Atua. Pe a faafaigofie, e lē o faapea mai Ioane o Iesu o le Atua.” Ua taʻua foʻi e le tagata poto e igoa iā Jason David BeDuhn e faapea: “I le gagana Eleni, pe afai e te aveesea le muānauna i le upu theos i se fuaiupu e pei o lea e i le Ioane 1:1i, o le a manatu la lau ʻaufaitau e faapea o loo e faasino atu i ‘se atua.’ . . . O le mea moni a faapea e lē o iai se muānauna o le upu theos, ua matuā ese mai ai la nai lo le muānauna mautinoa o le ho theos, e pei ona ese ‘o se atua’ mai le ‘Atua.’” Ua fai mai atili BeDuhn: “I le Ioane 1:1, o le Upu, e lē o le Atua moni lea e toʻatasi, ae o se atua, po o sē e tauatua.” Ia pe faaupu foʻi i upu a Joseph Henry Thayer, o se tagata poto na galue i le American Standard Version, e faapea: “Sa tauatua le Lokou [po o le Upu], ae e lē o ia o le Atua.”

Pe tatau ona avea le Atua “o se mea lilo e lē mafaamatalaina”? E foliga mai e lē o le tulaga lenā o Iesu. I lana tatalo i lona Tamā, na faia e Iesu se faaeseesega manino i le va o ia ma lona Tamā, ina ua ia taʻua e faapea: “Ina ia maua le ola e faavavau, e tatau ona latou iloa lelei oe, le Atua moni e toʻatasi, atoa ma Iesu Keriso, o lē na e auina mai.” (Ioane 17:3) Pe afai tatou te talitonu iā Iesu ma malamalama i le aʻoaʻoga manino a le Tusi Paia, o le a tatou faaaloalo la iā te ia o le Alo tauatua o le Atua. O le a tatou tapuaʻi ai foʻi iā Ieova o “le Atua moni e toʻatasi.”

[Faamatalaga faaopoopo i le itulau 19]

Aiseā ua matuā faigatā tele ai ona malamalama i le aʻoaʻoga o le Tolutasi?

[Faamatalaga faaopoopo i le itulau 19]

Na faia e Iesu se faaeseesega manino i le va o ia ma lona Tamā

[Ē Ana le Ata i le itulau 19]

Church at Tagnon, France