O se Laau ‘e Lē Toʻulu Ona Lau’

PO UA e vaai i se nuu i tua o loo tele ai laau lauusiusi ma lanu meamata? Atonu e te ioe mai e faapea o se vaaiga e sili ona faafiafiaina ai. Pe afai e te vaai i le tele o laau tetele ma tauluulu, po o le a e manatu e faapea o loo iai se lāmala i lea vaipanoa? E leai, ua e iloa e tele le vai o loo iai lea e ola lelei ai ma tutupu malolosi laau.

Ua talafeagai ai la ona faatusa e le Tusi Paia i latou o ē malolosi faaleagaga, i laau tetelē ma lauolaola. O se faaaʻoaʻoga, seʻi mātau lenei mau manaia mai i uluaʻi fuaiupu e tolu o le Salamo muamua:

“Amuia le tagata e lē savali i le filifiliga a ē amio leaga, e lē tū foʻi o ia i le ala o ē agasala, e lē nofo foʻi i le nofoa o ē tauemu; a e naunau o ia i le tulafono a Ieova; e mafaufau foʻi o ia i lana tulafono i le ao atoa ma le pō. O ia foʻi e faapei o le laau ua totō i tafatafa ane o vaitafe, e fua mai ona fua i ona lava tau; e lē toʻulu foʻi ona lau; e manuia foʻi mea uma na te faia.”

I se tulaga tutusa, i le Ieremia 17:7, 8, tatou te faitau ai e faapea: “Amuia le tagata o lē faatuatua iā Ieova, o lē ua fai Ieova mona faatuatuaga. Auā o ia e faapei o le laau ua totō i tafatafa ane o le vai, ua sosolo atu ona aa i tafatafa ane o le vaitafe, na te lē iloa foʻi pe a oo mai le vevela, a e lauolaola ona lau; e lē atuatuvale i le tausaga o le la mala, e fua mai pea lava ona fua.”

I mau uma nei e lua, o loo faaaogā ai laau e fai ma talafaatusa e faaalia ai le mea e tupu i se tagata e na te faia le mea saʻo, e fiafia i tulafono a le Atua, ma faatuatua atoatoa atu iā te ia. Ona o lea, e tatou fesili ai e faapea, O ā auala ua faatusa ai lenā ituaiga tagata i se laau e lauolaola? Seʻi o tatou iloilo totoʻa nei fuaiupu.

“Ua Totō i Tafatafa Ane o Vaitafe”

O laau o loo taʻua i mau ua faamatalaina, o loo totō “i tafatafa ane o vaitafe” po o “tafatafa ane o le vai,” ae lē na o le tasi se vaitafe po o se alāvai o loo totō ai. E faapena foʻi le talafaatusa o loo i le Isaia 44:3, 4, lea e fetalai ai Ieova e faatatau i le auala e na te tausia ai tagata Iutaia ua salamō, na toe foʻi ane mai le ave faatagataotauaina i Papelonia. Na fetalai Ieova e ala mai i le perofeta o Isaia, e faapea: “Ou te liligi atu le vai i le nuu naumati, ma vaitafe i le eleele mātūtū. . . . E tutupu aʻe i latou i totonu o le mutia, e pei o garava i auvai o vaitafe.” O loo taʻua i inei “vaitafe” ma “auvai o vaitafe,” ina ia mafai ai ona tutupu aʻe i latou e faamanuiaina, e pei o ni garava lauusiusi.

E oo lava foʻi i aso nei i nofoaga o loo fai ai faatoʻaga, e mafai ona e vaaia ai autu po o alāvai o loo tafe mai i se nofoaga o loo puna tele mai ai le vai, e pei o se vaieli loloto, se vaitafe, se vaituloto, po o se faatanoa vai. E masani lava, o na mea sa faaaogā o ni vaega e faaoo atu ai le vai i ni laufanua po o ni faatoʻaga. O nisi taimi e taʻi atu ai ni alāvai i se togālaau ʻaina. Ae i nisi tulaga, o le isi itu o le fanua o  loo tafe atu i ai alāvai ae o le isi itu o loo iai se laina o laau tetele, atonu ina ia faailoga ai le tuaoi o le fanua.

E faapefea ona ola lelei laau pe a totō i tafatafa o na vaitafe? O loo faasino atu le Salamo i se laau “e fua mai ona fua i ona lava tau.” I nofoaga o loo taʻua i le Tusi Paia, e ola ai mati, rimoni, ma apu, faapea foʻi pama ma olive. Talu ai e mafai ona oo atu le maualuga o le mati i le 30 futu ma ona lālā e falala solo, ae o le tele o isi laau ʻaina e lē tutupu uumi faapena. Peitaʻi, e mafai ona lauolaola na laau ma ola lelei, ma fuaina mai le tele o fua i le taimi talafeagai.

I aso anamua, sa ola garava i auvai o vaitafe ma ālia i Suria ma Palesitina. I faamatalaga e faatatau i garava i taimi o le Tusi Paia, e masani lava ona taʻua faatasi ma puna o vai po o “ālia.” (Levitiko 23:40) Sa maua foʻi sapasapa, o se tasi o ituaiga o garava, e ola i nofoaga e tele ai le vai. (Esekielu 17:5) Ua faaāta mai ai e nei laau tetelē ma lauolaola, le manatu sa mananaʻo le faisalamo ma Ieremia e faailoa mai: O i latou o ē saʻili e mulimuli i tulafono a le Atua ma faatuatua atoatoa atu iā te ia, o le a malolosi faaleagaga ma ‘e manuia foʻi mea uma latou te faia.’ Pe lē o le mea ea lenā tatou te mananaʻo ai, ia taulau manuia i le olaga?

Ia Fiafia i le Tulafono a Ieova

E tele auala o loo taumafai i ai tagata ina ia taulau manuia ai. Ua alu uma lo latou malosi i le tuliloaina o mea e aumaia ai iā i latou le taʻutaʻua ma le tamaoaiga, ma o le tele o taimi e lē taulau ai nei sini ma iʻu ai ina lē fiafia. O le ā la e mafai ona aumaia ai le faamalieina moni ma le fiafia tumau i le olaga? Ua aumaia le tali i upu a Iesu i le Lauga i luga o le Mauga. Na ia fetalai: “E fiafia o ē naunau i mea faaleagaga, auā e fai mo i latou le malo o le lagi.” (Mataio 5:3) O lea la, e lē maua se fiafia moni i le mauaina o le tele o mea faitino, ae e maua mai le iloaina ma le faamalieina o o tatou manaʻoga faaleagaga, ona tatou ola mālōlōina ai lea faaleagaga, e pei o laau lauolaola lea e fua mai o latou fua i o latou lava tau. E mafai faapefea ona tatou tutupu lauolaola faaleagaga?

Muamua, e pei ona taʻua e le faisalamo, e iai mea e tatau ona tatou ʻalofia. Sa ia taʻua “le filifiliga a ē amio leaga,” “le ala o ē agasala,” ma “le nofoa o ē tauemu.” Ina ia maua le fiafia, e manaʻomia ona tatou ʻalofia i latou o ē tauemu pe e lē amanaʻia tulafono a le Atua.

Lona lua, e ao ona tatou naunau pe fiafia i le tulafono a Ieova. Pe a tatou naunau i se mea po o se galuega, pe e lē moni ea e tatou te saʻilia avanoa uma ina ia auai ai i lenā galuega? O le naunau la i tulafono a le Atua, o lona uiga o le iai lea o se talisapaia loloto o le Afioga a le Atua, o se faanaunauga ia aʻoaʻoina atili e faatatau i le Tusi Paia ma ia malamalama atili i ai.

Ma le manatu mulimuli, e manaʻomia ona tatou faitau i ai “i le ao atoa ma le pō.” O lona uiga ia faitau e lē aunoa le Tusi Paia i aso taʻitasi ma ia manatunatu loloto i mea ua faitauina. E tatau ona iā i tatou lagona e faatatau i le Afioga a le Atua, e pei o lagona o le faisalamo lea na pese e faapea: “Ua tele lava loʻu naunau i lau tulafono; ou te mafaufau i ai i le aso atoa.”—Salamo 119:97.

Ioe, pe a tatou maua le poto saʻo ma le malamalama e faatatau iā Ieova le Atua, ma atiaʻe le mautinoa atoatoa iā te ia ma ana folafolaga, e mautinoa o le a tatou malolosi faaleagaga. I lenā tulaga, o le a pei ai i tatou o le tagata fiafia lea na faamatala e le faisalamo e faapea—“e manuia foʻi mea uma na te faia.”