O le Aai o Korinito—“Na Pulea Uafu e Lua”

PE A e matamata i le faafanua o Eleni, o le a e mātauina ai e faia aʻe le vaega autū o le atunuu i se penisula, ma le vaega telē o le motu i le itu i saute. E sosoo na laueleele e lua i se laufanua, e tusa ma le fā maila (6 kilomita) le lautele o lona vaega e pito i lauiti. E taʻua lea vaipanoa o le Laufanua o Korinito, lea e fesootaʻi ai le penisula o Peloponesia i le itu i saute ma le vaega autū o le atunuu i le itu i mātū.

E tāua foʻi lea laufanua i se isi itu. Ua taʻua o le auala laupapa o le sami ona i lona itu i sasaʻe e iai le Fagaloa o Saronic, lea e faasaga atu i le Sami o Aegean ma le Metitirani i sasaʻe, ma i le itu i sisifo o le Fagaloa o Korinito, lea e oo atu ai i le Sami o Ionian, le Sami o Adriatic, ma le Metitirani i sisifo. Ae i le lotolotoi o nei mea uma o loo iai le aai o Korinito, o se nofoaga tāua na taʻutaʻua i aso anamua i lona tamaoaiga, le tele o oloa taugatā, ma le olaga lē mamā, ma sa fai ma mālōlō i ai faigāmalaga a le aposetolo o Paulo.

Se Aai e Tāua Lona Tulaga

E tū le aai o Korinito e latalata i le taufaasiʻusiʻuga o le itu i sisifo o lenei laufanua tāua. E lua ni uafu e tau atu i ai, e taʻitasi i itu vaiti o le laufanua, o Lechaeum i le itu i sisifo ma Kenikerea i le itu i sasaʻe. Ona o lenā māfuaaga, na faamatala ai e le tagata Eleni e suʻesuʻe i laufanua o Strabo ia Korinito, “na ia pulea uafu e lua.” Ona o le lelei o lona tulaga, sa avea ai  Korinito ma taulaʻiga o fefaatauaʻiga faavaomalo, ma sa ia pulea fefaatauaʻiga i le itu i mātū i saute i le laueleele, ma le itu i sasaʻe i sisifo o fefaatauaʻiga i le vasa.

Talu mai aso anamua, o vaa mai sasaʻe (Asia Itiiti, Suria, Foinie, ma Aikupito) ma sisifo (Italia ma Sepania) na laʻu mai a latou oloa ma tuu i le isi uafu, ona laʻu atu lea i le isi itu i le mea o ai le isi uafu e lē mamao tele. Ona toe uta lea i luga o isi vaa ma faaauau ai le folauga. O vaa laiti, sa tulei i le isi itu o le laufanua i se auala e taʻua o le diolkos.—Tagaʻi i le pusa i le itulau e 27.

Aiseā na sili ai i seila le auala e sopo ai i le isi itu o lea laufanua? Ona sa latou ʻalofia ai lamatiaga pe a folau i le sami sousou mo le 200 maila (320 kilomita) i le itu i saute o Peloponese. Sa sili ona ʻalofia e tagata folau le Tolotolo i Malea, lea na taʻua e faapea: “A e ui atu i le Tolotolo i Malea, e mautinoa e te lē toe oo i lou aiga.”

Kenikerea, o se Uafu ua Toe Maua

O le uafu o Kenikerea, e tusa ma le fitu maila (11 kilomita) i le itu i sasaʻe o Korinito, o le uafu mulimuli lea e tau i ai folauga i Asia. I aso nei, ua magoto le ʻafa o le uafu i lalo o le sami ona o mafuiʻe mataʻutia na lūlū e tusa ma le faaiʻuga o le senituri lona fā T.A. Sa faamatala e Strabo ia Kenikerea o se uafu e pisi ma tamaoaiga, ae na taʻua e le faifilosofia Roma o Lucius Apuleius o se “toomaga telē ma le malosi e avea ma lafitaga o vaa mai le tele o atunuu.”

I vaitaimi o Roma, na iai i le taulaga uafu e lua na foliga i se seevae o le solofanua e ʻosoʻoso agaʻi i le sami, ma e 450 i le 600 futu le lautele o le avanoa e ulu atu ai vaa. Sa mafai ona ofi atu ai vaa e oo atu i le 130 futu le umī. O eliga mea i le itu i saute i sisifo o le aai na maua ai vaega o se malumalu, lea e faapea na tapuaʻia ai le atua fafine o Isis. Ae o toēga o fale i le isi itu o le uafu, atonu o se malumalu o le atua fafine o Aphrodite. O nei atua fafine e toʻalua, sa talitonu i ai e la te puipui le ʻau folau i le vasa.

Atonu na māfua ona avea le aposetolo o Paulo ma lē faia faleʻie i Korinito, ona o femalagaaʻiga ma fefaatauaʻiga a vaa laʻu oloa tetele i lenā uafu. (Galuega 18:1-3) Ua faapea mai le  tusi e tusa o mea na iai Paulo, In the Steps of St. Paul: “O le ʻau fai faleʻie i Korinito, e latou te faia foʻi la o vaa, ma a o taulalata atu i le tau malūlū, e foliga mai e latou te tau lē gafa taulimaina le mau galuega e ao ona fai. Ona ua faatumulia uma uafu e lua i vaa ona o le tau mālūlū, na naunau ona ʻauvaa e toe faaleleia ma toe uta a latou vaa manū o tapunia alāvaa, o lea, e lē taumatea, o so o se isi lava e mafai ona suʻiina ʻie e fai ai lā o vaa, sa maua sana galuega i na uafu i Lechæum ma Kenikerea.”

I le māeʻa ona iai Paulo i Korinito mo le silia ma le 18 masina, ona ia folau lea i Efeso mai Kenikerea pe tusa o le 52 T.A. (Galuega 18:18, 19) A o faagasolo le isi fā tausaga, sa faavaeina ai loa se faapotopotoga Kerisiano i Kenikerea. Ua faapea mai le Tusi Paia na talosaga Paulo i Kerisiano i Roma e fesoasoani atu i se fafine Kerisiano e igoa iā Fipe “i le faapotopotoga i Kenikerea.”—Roma 16:1, 2.

I aso nei, e taeele tagata asiasi atu i le fagaloa o Kenikerea i se sami e mamā ma manino, i le nofoaga o loo iai toega o le uafu ua magoto. E toʻalaiti lava i latou e iloa, i senituri muamua atu na olaola ai faiga faa-Kerisiano ma faiga faapisinisi i lenā vaipanoa. E faapena foʻi le tulaga na iai le isi uafu o Korinito, le uafu o Lechaeum, i le itu i sisifo o lea laufanua.

Lechaeum, le Auala i le Itu i Sisifo

O se auala tanu e taʻua o le Auala o Lechaeum, sa ui atu i le maketi i Korinito ma agaʻi atu i le uafu o Lechaeum i le itu i sisifo, lea e 1.5 maila (2 kilomita) le mamao. Sa faalolotoina e inisinia se vaega o le matafaga ina ia fausia ai se uafu, ma faaputu le oneone i le matafaga e puipuia ai vaa o loo taula ai mai matagi malolosi i le fagaloa. Na iai le taimi na avea ai lenā uafu ma uafu aupito i telē i le Metitirani. Ua maua e tagata suʻesuʻe o le eleele ia toega o se molī o le ava, o se faatagata o Poseidon le atua Eleni o le sami, o loo uuina se molī.

I autafa o le Auala o Lechaeum, lea sa puipui i pa e lua, sa iai auala savali, fale o le malo, malumalu, ma fale tetele e iai faleoloa. Atonu na feiloaʻi ai i inā Paulo ma tagata e pisi e fai faatau, tagata e faitatala solo, o faatauoloa, o pologa, o tagata faipisinisi, ma isi, ma e talafeagai lana talaʻiga mo nei tagata uma.

E lē gata o Lechaeum o se uafu mo fefaatauaʻiga, ae na avea foʻi ma uafu e faamautū ai fuāvaa tau. Ua faapea mai nisi e tusa ai ma le vaa tau e taʻua o le trireme, o se tasi ia o vaa tau aupito i taulau i taua, sa fuafua ma fausia i fale fai vaa i Lechaeum e le tagata fau vaa o Korinito o Ameinocles i le pe ā ma le  700 T.L.M. Sa faaaogā e tagata Atenai vaatau nei ma na latou manumalo ai i fuāvaa o Peresia i Salamis i le 480 T.L.M.

O se taulaga na avea muamua ma uafu pisi, ae o lea ua na o “aloalo nenefu ma auleaga” o loo iai. E leai ma se mea e iloa ai, na avea lenei uafu ma uafu aupito i telē i le Metitirani i senituri ua mavae.

Fesagaʻi Kerisiano i Korinito ma Luʻi

E lē gata i le avea ma uafu mo fefaatauaʻiga, ae na avea foʻi Korinito ma uafu e auala atu ai taaʻiga na matuā aafia ai tagata o le aai. Sa tosina atu le tele o fefaatauaʻiga ma le tamaoaiga i na uafu. Na tele le ʻoa a Korinito na maua e ala i le aoina o tupe mo le faaaogāina o le uafu, aemaise foʻi tupe e laʻu ai vaa ma oloa e sopo atu i le isi uafu. Sa aoina foʻi e le aai lafoga mo i latou e ui i le laueleele. A o taulalata atu i le faaiʻuga o le senituri lona fitu T.L.M., ua matuā tele lava tupe a le Setete mai tiute ona o le faaaogāina o maketi ma uafu, ma na mafai ai ona latou faalēaogāina le lafoga a tagatānuu!

Sa maua foʻi e Korinito se isi alagātupe mai le ʻaufai oloa na nonofo i inā. O le toʻatele o i latou na ola i se olaga tamaoaiga ma le faia o patī soonafai. Sa maua foʻi tupe a le aai mai tagata folau na lolofi ane i Korinito. E pei ona taʻua e Strabo, na faaalu ai le tele o a latou tupe i inā. E tele auaunaga na faia e tagatānuu o le aai, e aofia ai ma le faaleleia o vaa.

I vaitaimi o Paulo, e tusa ma le 400,000 tagata na nonofo i le aai, ma e na o Roma, Alesania, ma Anetioka o Suria na sili atu o latou tagata. O tagata mai Eleni, Roma, Suria, Aikupito, ma Iutaia sa nonofo ai i Korinito. Sa ui atu i o latou uafu tagata asiasi, o tagata asiasi i taaloga afeleti, o tagata tusi ata, o le ʻaufaifilosofia, tagata faipisinisi, ma isi. Sa faia e na tagata meaalofa i malumalu ma faia taulaga i atua. Na avea ai Korinito ma taulaga olaola ma le tamaoaiga, ae na iai aafiaga leaga o nei mea uma.

O loo taʻua i le tusi In the Steps of St. Paul: “Ona o Korinito e i le va o nei uafu e lua, sa toʻatele ituaiga o tagata eseese na nonofo ai ma sosolo atu ai uiga lē mamā mai na atunuu, ona sa taula ai i inā a latou vaa.” Na ō atu tagata mai le itu i Sasaʻe ma le itu i Sisifo i Korinito, ma avatu a latou masaniga lē lelei. O le iʻuga na oo i ai, na matuā paʻū maulalo tulaga tau amio i Korinito, ma faaalialia i lona tamaoaiga, ma na avea ma taulaga e aupito i taatele ai faiga lē mamā i Eleni anamua. O le ola e tusa ma ala o tagata Korinito, ua talitutusa ma le ola i se olaga soonafai ma le lē mamā.

Ona o le taatele o le matapeʻapeʻa ma amioga lē mamā, na lamatia ai le itu faaleagaga o Kerisiano. Sa manaʻomia e soo o Iesu i Korinito ia apoapoaʻiga ina ia tausia pea se talaaga lelei i le silafaga a le Atua. Sa talafeagai la ona matuā taʻusalaina e Paulo le matapeʻapeʻa, faiga faagaoi, ma amioga lē mamā i ana tusi na tusiaina mo Kerisiano i Korinito. Pe a e faitau i na tusi faagaeeina, o le a e iloa ai le malolosi o taaʻiga ma aafiaga leaga na fesagaʻi ma nei Kerisiano.—1 Korinito 5:9, 10; 6:9-11, 18; 2 Korinito 7:1.

E ui i ia tulaga, ae sa iai foʻi le aogā o le tele o ituaiga o tagata eseese na nonofo i inā. Sa tele ia manatu eseese na ofi atu i le aai. Sa sili atu ona fetuutuunaʻi mafaufau o ona tagatānuu nai lo isi aai na asiasi atu ai Paulo. Na faapea mai se tagata atamai o le Tusi Paia, “sa taulaʻi atu tagata mai sasaʻe ma sisifo i lenei taulaga anamua e tū i le sami, ma na mafai la ona aafia ona tagatānuu i manatu fou, filosofia, ma lotu eseese na iai i le lalolagi.” O le iʻuga na oo i ai, sa talia le tele o lotu, ma na mafai ai ona faaauau le talaʻiga a Paulo i inā.

O uafu e lua o Korinito, o Kenikerea ma Lechaeum, na fesoasoani i le taʻutaʻua ma le tamaoaiga o le aai. Sa avea foʻi na uafu ma tulaga na iai ma luʻi i Kerisiano sa nonofo ai i Korinito. E tai faapena foʻi o tatou vaitaimi. O taaʻiga lē lelei e pei o le matapeʻapeʻa ma amioga lē mamā, ua lamatia ai le itu faaleagaga o i latou e matataʻu i le Atua. O lea la, ia tatou teulotoina ia apoapoaʻiga faagaeeina a Paulo na tusiaina mo Kerisiano i Korinito.

[Pusa/Ata i le itulau 27]

O LE DIOLKOS—FELAʻUAʻIGA I LUGA O LE ʻELEʻELE

I le faaiʻuiʻuga o le senituri lona fitu T.L.M., ina ua lē taulau fuafuaga mo le fausiaina o se alāvaa, sa fauina ai e Periander, o le taʻitaʻi o Korinito, se mea mataʻina mo le felaʻuaʻiina o oloa i se ogāeleele vaiti. * Sa faaigoa lenā faiga o le diolkos, o lona uiga “e toso atu i le isi itu,” o se auala e fola i maa mafolafola ma laupapa e faalalava ai e faagaʻo. E laʻu ese mai oloa mai vaa sa taula i se uafu, ma tuu i luga o taavale e toso, ona toso atu lea e pologa i luga o le auala ma avatu i le isi uafu. O nisi taimi sa toso foʻi ma vaa laiti o loo iai ni a latou uta.

[Faaopoopoga i lalo]

[Faafanua i le itulau 25]

(Tagaʻi i le lomiga mo le ata atoa)

ELENI

Fagaloa o Korinito

Le Taulaga o Vaa i Lechaeum

Korinito Anamua

Kenikerea

Laufanua i Korinito

Fagaloa o Saronic

Peloponesia

SAMI O IONIAN

Tolotolo i Malea

SAMI O AEGEAN

[Ata i le itulau 25]

O loo faaaogā pea e vaa laʻu oloa le alāvaa i Korinito i aso nei

[Ata i le itulau 26]

Le uafu i Lechaeum

[Ata i le itulau 26]

Le uafu i Kenikerea

[Ē Ana le Ata i le itulau 25]

Todd Bolen/Bible Places.com