Māfuaaga e Lima e Matataʻu ai i le Atua Nai lo Tagata

SA MATUĀ faateʻia se tane talavou i le mea na tupu. Ona e na te leʻi faatalitalia. Sa ia aʻoaʻoina se mea fou mai le latou talanoaga ma Molimau a Ieova e toʻalua. Ua tele tausaga o ia fia iloa pe aiseā e lē taofia ai e le Atua puapuaga, a o lea ua taliina ma le manino mai le Tusi Paia. E na te leʻi iloaina e tele faamatalaga tāua ma le faamāfanafanaloto o loo i le Tusi Paia.

E leʻi leva ona tuua e Molimau a Ieova le fale, ae alu atu le fafine e pule i le fale ma le ita tele ma fesili atu, “O ai la tagata?”

Ona ua faateʻia lenei alii talavou, sa lē mafai ona ia tali atu.

Sa ʻeʻē mai le fafine, “Ou te iloa tagata la, a e toe talia loa i latou, ona tapena loa lea o lau ato ma suʻe se isi fale e te nofo ai!”

Ona ia matuā tapunia lea o le faitotoʻa ma alu ese.

E Faatalitalia e Soo Moni o Keriso Teteega

E leʻi faatoʻā tupu lea o lenei tulaga. O loo faamatala mai e le Tusi Paia: “E sauāina i latou uma e naunau e ola ma le faamaoni i le Atua ma aufaatasi ma Keriso Iesu.” (2 Timoteo 3:12) E masani lava o Kerisiano moni e lē o ni tagata e alofagia pe taʻutaʻua foʻi. Aiseā? Na taʻu atu e le aposetolo o Peteru i ana aumea Kerisiano, e faapea: “Ua tatou iloa e tatou te tupuga mai i le Atua, ae o le lalolagi atoa o loo nofo toʻilalo i le pule a lē o loo leaga.” O loo faaata mai Satani le Tiapolo ‘o se leona o loo tagi leotele, ma o loo ia saʻilia se  tasi e na te foloina.’ (1 Ioane 5:19; 1 Peteru 5:8) O se tasi o metotia e sili ona aogā a Satani o le fefe lea i tagata.

E oo foʻi iā Iesu Keriso, o lē na tele mea lelei na ia faia ma e leʻi agasala foʻi, sa taʻu faatauvaa ma sauāina o ia. Sa ia fetalai mai: “Ua latou ʻinoʻino mai fua iā te aʻu.” (Ioane 15:25) I le pō a o leʻi oo i lona maliu, sa ia sauniunia ai ona soo i upu nei: “Afai ua ʻinoʻino mai le lalolagi iā te outou, ia outou iloa ua ʻinoʻino muamua mai iā te aʻu nai lo o outou. Ia outou manatua upu na ou fai atu ai iā te outou, E lē sili le pologa i lona matai. Afai na latou faasauā mai iā te aʻu, e latou te faasauā foʻi iā te outou.”—Ioane 15:18, 20.

Ona o lenei lapataʻiga, e toʻatele na mumusu e lagolagoina le tapuaʻiga moni. Na iai se taimi na faapea mai ai le Tusi Paia e faatatau iā i latou na saʻilia Iesu: “A ua leai se tasi ua fai atu se tala e ʻau ai iā te ia, ona o le fefefe i tagata Iutaia.” (Ioane 7:13; 12:42) Sa faamataʻu ane taʻitaʻi lotu e latou te faateʻaese mai le malumalu se tagata e faatuatua iā Keriso. O lea la, o le fefe i tagata na taofia ai le toʻatele mai le avea ma Kerisiano.—Galuega 5:13.

Mulimuli ane ina ua faavaeina le faapotopotoga Kerisiano, ua tatou faitau ai i “sauāga e tele” i le faapotopotoga i Ierusalema. (Galuega 8:1) O le mea moni, e tele sauāga na fesagaʻia e Kerisiano na aumau i le Emepaea o Roma. Sa faapea atu nisi tane taualoa i Roma i le aposetolo o Paulo: “Ua salalau solo tala lē lelei e faatatau i lenei lotu.” (Galuega 28:22) Ioe, na tele ina teena Kerisiano faamaoni.

E oo lava foʻi i aso nei, o loo faaaogā pea e Satani le mailei o le fefe i tagata, e taofia ai le toʻatele mai le avea ma soo faamaoni o Keriso. O tagata loto faamaoni o loo suʻesuʻeina le Tusi Paia ma Molimau a Ieova, e oo iā i latou teteega ma tauemuga i aʻoga, galuega, i nuu, pe mai uō foʻi. Atonu latou te fefefe ina neʻi lē toe faaaloalogia i latou, lē toe iai ni uō, po o tausiga faaletino. I nisi nuu maotua, ua fefefe le ʻaufaifaatoʻaga ina neʻi lē toe fesoasoani tuaoi i le vaaiga o le faatoʻaga ma a latou lafu manu. E ui i na tulaga, e faitau miliona i latou ua filifili ma le mautinoa e faalagolago atu i le Atua, ma ola e tusa ma le Afioga a le Atua i le faaaʻoaʻo atu iā Iesu Keriso. Ua faamanuiaina e Ieova i latou ona o lo latou faia faapea.

Aiseā e Mataʻu ai i le Atua, Nai lo Tagata

Ua timaʻi mai le Tusi Paia, ia tatou matataʻu i le Atua nai lo tagata. Ua faapea mai: “O le mataʻu iā Ieova, o le amataga lea o le poto.” (Salamo 111:10) O lenei mataʻu e lē o le fefe, ae o se mataʻu talafeagai ina neʻi lē fiafia mai le finagalo o Lē foaʻi ola. O se faaupuga e fesootaʻi atu i le alofa. Ae aiseā e tatau ai ona tatou matataʻu i le Atua nai lo tagata? Seʻi o tatou iloiloina ni māfuaaga e lima.

1 O Ieova le Silisili Ese. E aupito i malosi lava Ieova nai lo se isi lava tagata. O lo tatou matataʻu i le Atua, ua tatou lagolagoina ai le itu a Lē ona le malosi uma lava, o lē ua avea nuu e pei o si “mea e sisina ifo nai le pakete.” (Isaia 40:15) Ona o le Atua e ou le malosi uma lava, ua iā te ia la le mana e faatoʻilalo ai “auupega uma e faia e tau” mai iā i latou e faamaoni iā te ia. (Isaia 54:17) Ona ua iā te ia le filifiliga po o ai ua tatau i ai le ola e faavavau, e atamai la ona tatou lē faatagaina se mea e taofia ai i tatou mai le mauaina o le poto e faatatau iā te ia ma lona finagalo.—Faaaliga 14:6, 7.

2 E puipui ma fesoasoani mai le Atua iā i tatou. Ua faapea mai le Faataoto 29:25, “O le fefe i tagata e tupu ai le mailei; a o lē faatuatua iā Ieova e faamamaluina o ia.” O le fefe i tagata o se mailei auā e taofia ai i tatou mai le faatuatua atu i le Atua. Ua faamautinoa mai e le Atua iā i tatou lona mana e faasao ai i lona fetalai mai: “Aua e te fefe, auā ou te iā te oe; aua le fetepatepaʻi, auā o aʻu o lou Atua; ou te faamalosia oe; e moni, ou te fesoasoani iā te oe; e moni, ou te taofia oe i loʻu lima taumatau e i ai le amiotonu.”—Isaia 41:10.

3 E alofa le Atua iā i latou e faalatalata atu iā te Ia. Sa tusia e Paulo nei upu faagaeeloto: “Ua ou mautinoa, e lē mafai e  le oti, po o le ola, po o agelu, po o malo, po o mea ua iai nei, po o mea e oo mai, po o ē malolosi, po o le maualuga, po o le loloto, po o se isi lava foafoaga, ona faateʻaeseina i tatou mai le alofa o le Atua ua iā Keriso Iesu, lo tatou Alii.” (Roma 8:37-39) Pe a oo ina tatou iloa faatuatua ma usiusitai i le Atua, o le a tatou tofo i le alofa e lē mavae o le Pule Silisili Ese. Maʻeu lenei faaeaga ua tatou maua!

4 E tatou te talisapaia mea uma na faia e le Atua. O Ieova o Lē na faia i tatou, o lē na faia mea uma e iai le ola. E lē gata i lea, ua ia aumaia foʻi mea e manaʻomia i le olaga ma mea e maua ai le fiafia. E mautinoa la, o ia o le Puna o mea lelei uma. (Iakopo 1:17) Na tusi Tavita o se tagata e faamaoni ma na ia talisapaia le alofa mutimutivale o le Atua: “Ieova e, loʻu Atua, e tele lava mea ua e faia, o ou vavega ma ou manatu iā te i matou . . . a e lē mafaitaulia lava.”—Salamo 40:5.

5 E ono suia nisi e tetee mai. E mafai ona e fesoasoani iā i latou e tetee mai, e ala i le lē lolo atu, ae tutumau i lou mataʻu ma le alofa i le Atua. Seʻi tagaʻi i tauaiga o Iesu. E latou te leʻi faatuatua iā te ia, ae na latou faapea mai: “Ua faalētonu lona mafaufau.” (Mareko 3:21; Ioane 7:5) I le mavae o le maliu ma le toetū o Iesu, e toʻatele i latou na avea ma ē talitonu. Na avea foʻi ʻafa uso o Iesu o Iakopo ma Iuta ma tusitala o le Tusi Paia. Sa iai foʻi le tagata sauā o Saulo, lea na mulimuli ane avea o le aposetolo o Paulo. O nisi sa avea ma faafitauli, ua latou iloa o loo iā i tatou le upu moni o le Tusi Paia ona o lo tatou lototetele ma tutumau.—1 Timoteo 1:13.

O se faaaʻoaʻoga o Aperila, o se fafine i Aferika, o lē sa tatalo pea mo le upu moni. Ina ua amata ana lesona i le Tusi Paia e Molimau a Ieova, sa malosi teteega mai ona aiga ma taʻitaʻi lotu. O nisi o ona tauaiga sa faia a latou lesona, ua lolo atu i le fefe i tagata. Ae sa ia ʻaiʻoi atu i le Atua mo le malosi ma le lototele, ma na papatiso o ia ma avea ai ma Molimau a Ieova. O le ā le iʻuga na oo i ai? E toʻavalu ona tauaiga na toe faaalia le lototetele ma toe faaauau ai a latou lesona o le Tusi Paia, ma o loo lelei pea lo latou agaʻigaʻi i luma faaleagaga.

E Mafai Ona E Manumalo Mai le Fefe i Tagata

Ina ia ʻalofia lou lolo atu i le fefe i tagata, ia e faia taumafaiga uma e faaloloto ai lou alofa i le Atua. E mafai ona e faia lenei mea e ala i le suʻesuʻeina o le Tusi Paia ma mafaufau loloto i mau e pei o le Eperu 13:6, lea e faapea mai: “O Ieova o loʻu fesoasoani ia; ou te lē fefe lava. O le ā la se mea e mafai ona faia e tagata iā te aʻu?” Aua neʻi galo māfuaaga e tonu ai ma atamai lo tatou matataʻu i le Atua nai lo tagata.

Ia manatua foʻi le tele o faamanuiaga e maua ona o le faatatauina o mea na tatou aʻoaʻoina mai le Tusi Paia. E mafai ona maua tali faamalieloto i fesili tāua o le olaga. E mafai foʻi ona e mauaina le poto e aogā e feagai ai ma luʻi o le olaga. E mafai ona e mauaina le faamoemoe matagofie e ui i tulaga faigatā i aso nei. E mafai foʻi ona e faalatalata atu i so o se taimi i le Atua e ona le malosi uma lava, e ala i le tatalo.

Na tusi le aposetolo o Ioane: “E mavae atu foʻi le lalolagi faapea ma ona tuʻinanauga, a o lē e faia le finagalo o le Atua e tumau e faavavau.” (1 Ioane 2:17) O le taimi lenei e tū mausalī ai ma savavali ma le mataʻu i le Atua. Nai lo le lolo atu i le fefe i tagata, e mafai ona e tali atu i le timaʻiga mai le Atua: “Loʻu atalii e, ia poto oe, ma e faafiafia loʻu loto; ona ou mau tali ai lea i lē faifai mai.” (Faataoto 27:11) O se faaeaga tautele lea mo i tatou!

Ia manatua, e lē mafai e tagata ona avatu iā te oe le mea o le a tuuina mai e le Atua iā i latou e matataʻu iā te ia: “O le taui o le faamaulalo ma le mataʻu iā Ieova, o le oloa lea, ma le viiga, ma le ola.”—Faataoto 22:4.

[Ata i le itulau 14]

Ona o le lototele o Aperila, e toʻavalu ona tauaiga o loo faaauau ma le fiafia a latou lesona o le Tusi Paia