Le Tāua o se Igoa

Ua fanau e se fafine Aitiope se pepe tama. Peitaʻi na suia lona fiafia i le faanoanoa ina ua vaai atu i lana pepe o taoto mai e lē minoi. Ina ua ave e le tinā o le tamā o le pepe, le pepe e galemulemu ma tino laʻitiiti e faataele, ae faafuaseʻi loa ona gaoioi le tamaitiiti, ua mānavanava ma tagi! O le uiga o le igoa o le tamā o le pepe o “Vavega,” ona tuufaatasi lea e mātua o le igoa lenā ma se isi upu o le gagana Amharic, ma faaigoa ai le tama, Ua Faia se Vavega.

I Burundi, na sola ese ai se tauleʻaleʻa mai i fitafita na mananaʻo e fasioti o ia. A o lafi i se togāvao, na ia tautō e faapea pe afai e laveaʻi o ia e le Atua, o le a ia faaigoa lana ulumatua o Manirakiza, o lona uiga “O le Atua o le Laveaʻi.” I le lima tausaga mulimuli ane ai, ona o le lotofaafetai i le faasaoina o lona ola, na ia faaigoa ai lona atalii ulumatua i le igoa lenā.

ATONU e lē o se faiga masani i nisi le faaigoaina o tamaiti i igoa e iai ni uiga patino, peitaʻi o le faiga lenei sa masani ai i aso anamua. O le mea moni, e faitau selau igoa faapena o loo iai i le Tusi Paia. O le malamalama i uiga o igoa o tagata eseese, o le a faaopoopo atu ai i aogā e te maua mai i lau faitauga Tusi Paia. Seʻi iloilo na o ni nai faaaʻoaʻoga.

O Igoa i Tusitusiga Eperu e Iai ni o Latou Uiga

O se tasi o igoa muamua o loo faamauina i le Tusi Paia, o Setu, o lona uiga “Ua Tofia.” Na faamatala e le tinā o Setu, o Eva, le māfuaaga na ia filifilia ai lenā igoa, e ala i le faapea mai: “Ua tofia mai e le Atua iā te aʻu le tasi tama o le sui o Apelu, o lē na fasiotia e Kaino.” (Kenese 4:25) Na faaigoa e lē na tupuga mai iā Setu, o Lameko, lona atalii iā Noa, o lona uiga o le “Mālōlōga” po o le “Faamaisega.” Na taʻua e Lameko e faapea na māfua ona ia faaigoa lona atalii i lenā igoa, ona “e faamāfanafanaina i tatou e ia i la tatou galuega ma le tigā o tatou lima, ona o le laueleele ua malaia iā Ieova.”—Kenese 5:29.

O nisi tagata matutua na suia e le Atua o latou igoa ina ia valoʻia ai se mea o le a tupu. O se faataʻitaʻiga, na suia e le Atua le igoa o Aperamo, o lona uiga “Ua Faaeaina le Tamā,” iā Aperaamo, o lona uiga “O le Tupuga o Nuu e Tele.” I le ōgatusa ai ma lona igoa, o le mea moni na avea Aperaamo ma tamā o nuu e tele. (Kenese 17:5, 6) Seʻi manatu foʻi i le avā a Aperaamo, o lona igoa o Sarai, atonu o lona uiga o le “Faamisa.” E mautinoa sa fiafia o ia ina ua suia e le Atua lona igoa iā “Sara,” o lona uiga “o le Purinisese,” e faasino atu i le avea o ia ma tupuaga o tupu.—Kenese 17:15, 16.

Sa filifilia totino foʻi e le Atua igoa o nisi o tamaiti. O se faataʻitaʻiga, na fetalai o ia iā Aperaamo ma Sara e faaigoa le la tama iā Isaako, o lona uiga o “ʻAtaʻata.” O lenā igoa o le a faamanatu atu ai pea i lenei ulugalii faatuatua, le auala na la tali atu ai i le tala e faapea o le a la fanauina se tama tama pe a matutua i laʻua. Ina ua  tuputupu aʻe Isaako ma avea ma auauna faamaoni a le Atua, atonu sa faaauau pea ona foliga ʻataʻata Aperaamo ma Sara ona o le igoa o Isaako, a o la faifaimea faatasi ma si a la tama pele.—Kenese 17:17, 19; 18:12, 15; 21:6.

Na faaigoa e le avā a le atalii o Isaako, o Rasela, lana uii, mo se māfuaaga ese. A o lata ina maliu o ia, na faaigoa e Rasela le tama iā Penani, o lona uiga “o le Tama o Loʻu Faavauvau.” Ae na toe liliu teisi e lana tane faavauvau, o Iakopo, le igoa iā Peniamina, o lona uiga “o le Tama o Loʻu Lima Taumatau.” O lenei igoa na faaalia ai se tulaga e lē gata o le faapelepele ae o le lagolagosua.—Kenese 35:16-19; 44:20.

O nisi taimi e faaigoa ai le tagata i se igoa e ōgatusa ma foliga o le tagata. O se faaaʻoaʻoga, na fanaua e Isaako ma Repeka se tama tama e enaena mūmū lona tino e pei o se ofu fulufulu, ona la faaigoa lea iā te ia o Esau. Aiseā? I le faa-Eperu, o le uiga o lenā igoa o le “Taufulufulua.” (Kenese 25:25) E pei ona faamauina i le tusi o Ruta, e toʻalua le fanau tama a Naomi na iai. O le isi na faaigoa iā Maalona, o lona uiga o le “Aumaʻia po o le Maʻi,” ae o le isi na faaigoa iā Kiliona, o lona uiga o le “ʻAuvaivai.” E ui lava e lē o taʻua mai pe na avatu i ai nei igoa i le taimi na fananau mai ai pe i se taimi mulimuli ane, ae foliga mai na talafeagai lelei na igoa, ona na vave ona feoti nai nei tauleleʻa.—Ruta 1:5.

O se isi faiga masani sa iai o le toe sui lea o igoa. Ina ua toe foʻi atu Naomi i Peteleema, ua mativa o ia ina ua mavae ona maliliu lana tane ma lana fanau tama, sa lē toe manaʻo Naomi e faaigoa o ia i lenā igoa, o lona uiga o le “Loʻu Fiafia.” Nai lo lea, na ia fai atu ma le maumauaʻi: “Aua tou te taʻua aʻu o Naomi, a ia taʻua aʻu o Mara [o lona uiga o le “Oona”]; auā ua matuā oona mea ua faia iā te aʻu e Lē ona le malosi uma lava.”—Ruta 1:20, 21.

O le isi masani sa iai o le faaigoa lea o se tamaitiiti i se mea faapitoa na tupu. O se faataʻitaʻiga, o le igoa o le perofeta o Hakai, o lona uiga “Na Fanau i se Taimi o le Tausamiga.” *

O Igoa Tāua i le Vaitaimi o le Faa-Kerisiano

E iai le uiga sili faavaloaga o le igoa o Iesu. A o leʻi fanau mai o ia, sa faatonuina e le Atua ona mātua e faapea: “E te faaigoa iā te ia o Iesu,” o lona uiga “o Ieova o le Faaolataga.” Aiseā? Na taʻua e le agelu lea na tautala atu iā Iosefa,  “O le a ia laveaʻiina ona tagata mai a latou agasala.” (Mataio 1:21) Ina ua mavae le faauuina o Iesu i le agaga paia i lona papatisoga, sa tuufaatasi lona igoa ma le taʻu faa-Eperu o le “Mesia.” I le faa-Eleni, ua faaliliuina ai le taʻu lenei i le “Keriso.” O nei taʻu uma e lua e faauigaina “o Lē ua Faauuina.”—Mataio 2:4.

Sa filifilia e Iesu igoa mo nisi o ona soo e faamatala ai o latou uiga. O se faaaʻoaʻoga, sa ia faaigoa Simona i le igoa faa-Arama, o Kefa, o lona uiga “o le Papa.” Sa sili ona iloa Kefa i le uiga faa-Eleni o lenei igoa, lea e faaliliuina “o Peteru.” (Ioane 1:42) Sa faaigoa e Iesu le ʻauso maelega o Iakopo ma Ioane o “Poaneki,” o lona uiga “o Atalii o le Faititili.”—Mareko 3:16, 17.

Sa faaauau e soo o Iesu le faiga o le fai o ni igoa faaopoopo e talafeagai. O se tasi o faataʻitaʻiga o le soo o Iosefa, lea na faaigoa e le ʻauaposetolo iā Panapa, o lona uiga “o le Atalii o Faamāfanafanaga.” Sa ola Panapa e tusa ai ma lona igoa, e ala i le avatu o meaalofa faaletino faapea ma le faaleagaga e fai ma faamāfanafanaga i le toʻatele.—Galuega 4:34-37; 9:27; 15:25, 26.

E Tāua Lou Igoa

E lē o i tatou na filifilia igoa ia ua faaigoa ai i tatou mai le taimi na tatou fananau mai ai. Peitaʻi, tatou te filifilia le ituaiga talaaga tatou te mauaina. (Faataoto 20:11) Aiseā e lē fesili ifo ai iā te oe lava, ‘Pe afai na filifilia e Iesu po o le ʻauaposetolo se igoa mo aʻu, o le ā le igoa o le a latou filifilia? O le ā se igoa talafeagai e faamatala ai loʻu uiga autū po o loʻu talaaga?’

E ao ona mafaufau loloto i lenei fesili. Aiseā? Auā na tusi le tupu poto o Solomona e faapea, “Ia sili le manaʻo ina ia taʻuleleia i le manaʻo i le oloa e tele.” (Faataoto 22:1) O le mea moni, pe afai tatou te maua se igoa lelei, po o se talaaga lelei i le lautele, ua iā i tatou la se mea e tāua. Ae sili ai ona tāua, pe afai tatou te faia se igoa lelei ma le Atua, o le a tatou mauaina ai se oloa tāua e faavavau. I le ā le itu? Ua folafola mai e le Atua o le a ia tusia i lana “tusi e faamanatu,” igoa o i latou e matataʻu iā te ia, ma tuuina atu iā i latou le faamoemoe o le ola e faavavau.—Malaki 3:16; Faaaliga 3:5; 20:12-15.

[Faaopoopoga i lalo]

[Faamatalaga faaopoopo i le itulau 15]

O le ā se igoa talafeagai e faamatala ai loʻu talaaga?

[Pusa/Ata i le itulau 14]

O Ai Emanuelu?

O nisi igoa o tagata i le Tusi Paia sa iai se uiga faavaloaga, ma e faamatala mai ai le galuega o le a fai e le tagata. O se faataʻitaʻiga, sa faagaeeina le perofeta o Isaia e tusi e faapea: “Faauta, e tō le taupou, ma fanau mai se tama tane; na te faaigoa foʻi iā te ia o Emanuelu.” (Isaia 7:14) O le uiga o lenei igoa, “Ua iā te i Tatou le Atua.” Ua taumafai nisi tagata fai manatu o le Tusi Paia e faafesootaʻi le faataunuuga muamua o lenei valoaga ma se tasi o tupu o Isaraelu, po o se tasi o atalii o Isaia. Peitaʻi, na faaalia e le tusitala o le Evagelia a Mataio e faapea, o le faataunuuga atoatoa o le valoaga a Isaia, sa faataunuuina iā Iesu.—Mataio 1:22, 23.

O nisi ua faapea mai pe afai e faatatau atu le igoa o Emanuelu iā Iesu, o lona uiga la ua aʻoaʻo e le Tusi Paia e faapea o Iesu o le Atua lea. Peitaʻi, pe afai o lo tatou manatu lenā, o lona uiga la o lē na ia faamāfanafanaina ma faasaʻoina Iopu, o Eliu, o ia foʻi o le Atua. Aiseā? O le uiga o lona igoa, “O Ia o Loʻu Atua.”

E leʻi faapea mai Iesu o ia o le Atua. (Ioane 14:28; Filipi 2:5, 6) Peitaʻi sa atoatoa ona ia faaalia mai uiga o lona Tamā, ma na ia faataunuuina folafolaga uma a le Atua e faatatau i le Mesia. (Ioane 14:9; 2 Korinito 1:20) O le igoa Emanuelu ua faamatalaina lelei ai le matafaioi a Iesu o le Fanau Faa-Mesia, o sē tupuga mai iā Tavita, o lē ua ia faamaonia mai le faatasi o le Atua iā i latou o ē tapuaʻi atu iā te ia.

[Ata]

EMANUELU “Ua iā te i Tatou le Atua”

[Pusa/Ata i le itulau 15]

Le Igoa e Sili Ona Tāua

E tusa ma le 7,000 taimi o loo taʻua ai le suafa o le Atua i le Tusi Paia. O lenei suafa, e pei ona suia i mataʻitusi Eperu e fā יהוה, ua faaliliuina i le tele o taimi i le gagana Samoa o “Ieova.” O le ā le tāua o lenā suafa? Ina ua fesili Mose e faatatau i le suafa o le Atua, na tali mai Ieova e faapea: “E avea aʻu ma mea ou te loto i ai.” (Esoto 3:14, The Emphasised Bible a J. B. Rotherham) O lea la, o le suafa o le Atua, ua faamautinoa mai ai o le a avea o ia ma so o se mea e manaʻomia ina ia faataunuu ai ana fuafuaga. (Isaia 55:8-11) Pe a faia e le Atua se folafolaga, e mafai ona faalagolago i ai o tatou ola ma a tatou fuafuaga. Aiseā? Auā o lona suafa o Ieova.

[Ata i le itulau 13]

APERAAMO “O le Tupuga o Nuu e Tele”

[Ata i le itulau 13]

SARA “O le Purinisese”