Ia Mafuta Atu i le Atua

O le Faamasino e Faia Pea le Mea Tonu

Kenese 18:22-32

FAAMASINOTONU. E fai mea tonu. E lē faailogatagata. Pe e te lē tosina atu ea i nei uiga lelei? E tatou te fananau mai ma le faalogona ia tausia i tatou ma le lē manatu faapito. E faanoanoa ona ua tele le lē faamasinotonu i le lalolagi i aso nei. E ui i ia tulaga, e iai se Faamasino e tatau ona tatou talitonuina, o Ieova le Atua. E na te faia le mea tonu i taimi uma. Na atagia mai lenā tulaga i feutagaʻiga a Ieova ma Aperaamo, e pei ona tusia i le Kenese 18:22-32. *

Ina ua fetalai atu Ieova iā Aperaamo i lana faaiʻuga o le a iloiloina le tulaga o Sotoma ma Komoro, sa popole Aperaamo i le saogalemu o se tagata amiotonu na nofo i inā, e aofia ai ma le atalii o lona uso o Lota. Sa fesili atu Aperaamo iā Ieova: “E te faaumatia ea ē ua amiotonu faatasi ma ē amio leaga? Pe afai o i le aai tagata e toʻalimagafulu o ē amiotonu, e te faaumatia ea ae lē faasaoina le nuu ona o le toʻalimagafulu o ē amiotonu o i ai?” (Fuaiupu e 23, 24) Na fetalai mai le Atua, o le a ia lē faaumatiaina aai pe afai e toʻalimagafulu ni tagata amiotonu o loo iai. E faalima ona toe ʻaiʻoi atu Aperaamo iā Ieova, ma oo ina faaitiitia le fuainumera na ia taʻu atu seʻia oo lava i le sefulu. O na taimi uma, na fetalai mai le Atua o le a ia lē faaumatiaina aai pe afai o iai ni tagata amiotonu faapena.

Pe na finau Aperaamo ma le Atua? E leai! O lona uiga, e iloa ai i inā lona faamaualuga. Ae na atagia mai i le leo o Aperaamo lona āva ma lona migao. Na ia taʻua o ia o le “efuefu ma le lefulefu.” (Fuaiupu e 27, 30-32) E lē gata i lea, na atagia mai i upu a Aperaamo lona faatuatuaina o le tonu o Ieova. E “mamao lava [ma le Atua]” se manatu e faaumatia faatasi tagata amiotonu ma tagata amioleaga, e lē faatasi ae faalua ona ia faapea atu iā Aperaamo. Sa faaalia mai e le augātamā faamaoni lona mautinoa i le faia e le “[Faamasino o] le lalolagi uma” le “faamasinoga tonu.”—Fuaiupu e 25.

Pe na saʻo mea na taʻua e Aperaamo? E saʻo toe sesē foʻi. Sa ia sesē i lona manatu a itiiti e toʻasefulu tagata amiotonu na iai i Sotoma ma Komoro. Ae sa ia saʻo i lona faapea atu e lē taitai ona ia ‘faaumatia ē amiotonu faatasi ma ē amio leaga.’ Ina ua mulimuli ane faaumatia e le Atua na aai amioleaga, na mafai ona sosola ese Lota ma ona afafine ona o le fesoasoani a se agelu.—2 Peteru 2:7-9.

O le ā se mea e tatou te aʻoaʻoina e faatatau iā Ieova mai lenei tala? I Lona faailoa atu iā Aperaamo o lona faanaunauga e asiasi atu i aai, e tusa ua ia valaaulia se manatu o Aperaamo. Ona ia faafofoga lelei lea i lana uō o Aperaamo, a o sasaa atu ona faalogona mai lona loto. (Isaia 41:8) O se lesona matagofie lea mo i tatou e iloa ai le agamalu o le Atua, o lē faamamaluina ana auauna i le lalolagi! O lea la, ua ālagātatau ona tuu atu o tatou faatuatuaga iā Ieova, o ia o le Faamasino e faia le mea tonu i taimi uma.

[Faaopoopoga i lalo]

[Ata i le itulau 24]

Sa fesili atu Aperaamo iā Ieova e faatatau iā Sotoma ma Komoro