Ua Fesili Mai le ʻAufaitau

Pe e Talitonu Molimau a Ieova, e na o i Latou Lava o le a Faasaoina?

Ua manatu Molimau a Ieova e faapea, ua latou maua le tapuaʻiga moni. Pe ana latou lē manatu faapena, po ua suia o latou talitonuga. E pei o tagata o le tele o isi lotu, e faamoemoe foʻi Molimau a Ieova ia faasaoina. Peitaʻi, e latou te talitonu foʻi e faapea, e lē o sa latou tiute le faamasino po o ai o le a faasaoina. O lea la, o le Atua ua na o ia o le Faamasino. O ia e filifilia po o ai e faasaoina.—Isaia 33:22.

Ua faaalia mai i le Afioga a le Atua e faapea, e tatau iā i latou o le a faasaoina ona lē gata e mananaʻo i le faaolataga, ae ia gauaʻi foʻi i le Faaola po o Lē e faasaoina i latou. O se faataʻitaʻiga: Seʻi faapea ua sē se tagata savali i se togāvao. Ua fia manaʻo lava e maua le auala e toe foʻi ai. Po o le a oti ai o ia, po o le a faasaoina? E fua lava le iʻuga i le auala e tali mai ai i le fesoasoani o le a avatu iā te ia. Ona o lona faamaualuga, atonu e na te teena ai le fesoasoani a se tagata laveaʻi po se tagata faaola. Ae i le isi itu, o lona lotomaulalo o le a ia talia ai le fesoasoani ma faasaoina ai.

I se tulaga tutusa, o le faaolataga e mo i latou o ē gauaʻi i le Laveaʻi o tagata, o Ieova le Atua. O le faaolataga o se meaalofa mai le Atua, peitaʻi, e lē o tagata uma o le a latou mauaina. Na fetalai le Alo o le Atua, o Iesu, e faapea: “E lē ulu atu i le malo o le lagi i latou uma o ē fai mai iā te aʻu, ‘Le Alii e, le Alii e,’ ae na o lē na te faia le finagalo o loʻu Tamā o i le lagi.”—Mataio 7:21.

E talitonu Molimau a Ieova e faapea, e na o i latou lava o ē faaalia le faatuatua i le taulaga togiola a Iesu ma mulimuli i ana aʻoaʻoga, o le a laveaʻi e le Atua. (Galuega 4:10-12) Seʻi o tatou iloilo mea tāua e tolu e manaʻomia mo le faaolataga, lea o loo faaalia manino mai i le Afioga a le Atua.

(1) Na taʻu atu e Iesu i ona soo e faapea, “O le mea lea e iloa ai e tagata uma o oʻu soo outou, pe afai tou te fealofani.” (Ioane 13:35) Ua faamamafa mai i le faaaʻoaʻoga a Iesu i le foaʻiina mai o lona ola e sui aʻi isi, le tāua o le alofa. O i latou o ē alolofa i isi ua latou faaalia ai se uiga e tāua tele mo le faaolataga.

(2) Na taʻua e Iesu i le tatalo i lona Tamā e faapea, “Ua ou faailoa atu lou suafa iā i latou.” (Ioane 17:26) Na silafia e Iesu e tāua tele i lona Tamā lona suafa, o Ieova. Na tatalo Iesu mo le suafa o lona Tamā ina ia “faapaiaina.” (Mataio 6:9) O le faapaiaina o le suafa o le Atua e aofia ai le iloaina o lenā suafa, ma ia manatu i ai e tāua tele ma e paia. I le pei o Iesu, o i latou o loo saʻili mo le faaolataga e manaʻomia ona faaaogā le suafa o le Atua. E manaʻomia foʻi ona latou aʻoaʻo isi e faatatau i le suafa o le Atua ma ona uiga. (Mataio 28:19, 20) O le mea moni, e na o i latou lava e valaau atu i le suafa o le Atua o le a faasaoina.—Roma 10:13.

(3) Na faapea atu Iesu iā Ponotio Pilato, “O loʻu malo e lē mai le lalolagi lenei.” (Ioane 18:36) E toʻaitiiti lava tagata i aso nei o loo faaalia le faatuatua i le Malo o le Atua, po o le pulega lea e avea ai Iesu ma Tupu. Ae o le isi toʻatele, ua tuu atu lo latou faatuatuaga i faalapotopotoga faaletagata. E ese mai lenā, e lagolago ma le faamaoni e i latou o ē o le a faasaoina, le Malo o le Atua ma aʻoaʻo isi e faatatau i le auala o le a faasaʻolotoina ai e le Malo o le Atua tagata faamaoni uma.—Mataio 4:17.

Ina ua uma ona aʻoaʻoina nisi o mea e manaʻomia mo le faaolataga, ona faapea atu lea o soo o Iesu: “O ai moni la e mafai ona faasaoina?” Na tali Iesu e faapea: “O mea e lē mafaia e tagata, e mafaia ia e le Atua.” (Luka 18:18-30) Ua taumafai ma le filigā Molimau a Ieova, e tausia nei mea e manaʻomia mo le faaolataga. Ua latou taumafai malosi foʻi e fesoasoani i isi ina ia faasaoina.