1, 2. Aiseā na alofa ai Iesu iā Mareta, ae o le ā na faailoa mai ai lona tulaga lē lelei atoatoa?

O LE ā e tau i ai lou mafaufau pe a taʻua Mareta i le Tusi Paia? E ui e na o ia le fafine na taʻua lona igoa o sē na alofa i ai Iesu, ae e mautinoa foʻi na ia faaalia le alofa lē manatu faapito i isi fafine e pei o lona tinā o Maria, ma Maria le uso o Mareta. (Ioa. 11:5; 19:25-27) Aiseā ua taʻua ai Mareta i lenei auala i tusitusiga a Evagelia?

² Na alofa Iesu iā Mareta ona o lona galue mamafa ma lona agaga talimālō, ae faapea foʻi lona itu faaleagaga. Sa ia talitonu atoatoa i aʻoaʻoga a Iesu. Sa mataʻina foʻi le faatuatua o Mareta iā Iesu, o ia o le Mesia na folafola mai. (Ioa. 11:21-27) Peitaʻi, o ia foʻi o se tagata e lē lelei atoatoa e pei o i tatou. I se tasi taimi, na ia talimālō ai iā Iesu i lona fale, sa faailoa atu ai e Mareta iā Iesu se gaoioiga e tatau ona ia faia e faasaʻo ai se mea na sesē i lona manatu. Na faapea atu Mareta: “Le Alii e, e te lē manatu mai ea, auā ua tuu mai e loʻu uso na o aʻu e faia nei  mea uma? Seʻi e fai ane iā te ia e sau e fesoasoani mai iā te aʻu.” (Faitau le Luka 10:38-42.) O le ā se lesona e tatou te aʻoaʻoina mai i lenei tala?

3, 4. O le ā le itu na filifilia ai e Maria le “mea lelei,” ma o le ā le lesona na ave i fale e Mareta? (Tagaʻi i le ata i luga aʻe o le matua.)

³ Na tali atu Iesu i le agaga talimālō o Mareta ma Maria, e ala i le foaʻi atu o se meaalofa faaleagaga. Na faaaogā lelei e Maria le avanoa e aʻoaʻoina ai o ia e le Faiaʻoga Sili, ma ua nofo ʻi tafatafa o vae o le Alii ma faalogologo atu i ana fetalaiga.’ Sa mafai foʻi ona faia faapea e Mareta, ma semanū e faamālō atu foʻi Iesu i lona uaʻi atu atoatoa iā te ia.

⁴ Peitaʻi, sa pisi Mareta i le sauniaina o se ʻaiga faapitoa ma faia isi feʻau e talimālō ai iā Iesu. Ae o na galuega uma na matuā popole ai o ia, ma lē fiafia ai iā Maria. Na mātauina e Iesu le taumafai o Mareta e fai le tele o mea, o lea na ia faapea atu ai ma le agalelei: “Mareta, Mareta e, ua e popole ma atuatuvale i le tele o mea.” Na faailoa atu loa e Iesu e tasi lava se meaʻai e manaʻomia. Na sosoo ai ma le faamālō atu o Iesu iā Maria: “A ua filifilia e Maria le mea lelei, ma e lē aveesea mai iā te ia.” Atonu na galo iā Maria lana meaʻai sa ʻai i lenā faatasiga, ae e leʻi mafai ona galo iā te ia le faamālō a Iesu ma meaʻai susua faaleagaga na ia mauaina ona o lona uaʻi atoatoa atu iā Iesu. I le silia i le 60 tausaga mulimuli ane, na tusi mai le aposetolo o Ioane: “E alofa Iesu iā Mareta, ma lona uso.” (Ioa. 11:5) O nei upu faagaeeina na faailoa mai ai, na ave i fale e Mareta le faasaʻoga alofa a Iesu, ma taumafai e faamaoni iā Ieova i lona olaga atoa.

5. Ua faapefea ona faatusatusa faatosinaga i le lalolagi i aso nei ma taimi o le Tusi Paia, ma o le ā le fesili ua lāgā ai?

⁵ E faapefea i faatosinaga i le lalolagi i aso nei ona faatusatusa atu i taimi o le Tusi Paia? “E leai se isi vaitaimi i le talafaasolopito ua sili atu ai ona lelei auala o fesootaʻiga, o masini lomitusi, o mekasini felanulanuaʻi, leitiō, ata tifaga, televise. . . . Ua fetuleni mai faatosinaga fou i aso taʻitasi . . . E leʻi leva atu ona tatou mafaufau o lo tatou vaitau o le ʻVaitaimi o le Malamalama.’ Peitaʻi, ua faasolo ina manino mai o le ʻVaitaimi o Faatosinaga.’” O upu nei sa fai atu i se vaega o tagata aʻoʻoga i le Iunaite Setete i le silia i le 60 tausaga ua mavae. Ua taʻua i Le Olomatamata o Setema 15, 1958, “O le a faateteleina faatosinaga a o lalata atu lenei lalolagi i lona iʻuga.” Maʻeu le saʻo o lenā manatu! Peitaʻi, ua lāgā ai se fesili tāua: E faapefea ona tatou ʻalofia faatosinaga ma faaaʻoaʻo iā Maria i le uaʻi atu i mea faaleagaga?

6. Ua faapefea ona faaaogā e tagata o Ieova tomai faaonapōnei o le lalolagi?

⁶ Ua faaaogā lelei e le vaega faalelalolagi o le faalapotopotoga a le Atua, tomai faaonapōnei o le lalolagi e faaauiluma ai le tapuaʻiga moni. O se faaaʻoaʻoga, seʻi manatu i le “Photo-Drama of Creation,” o se tuufaatasiga o ata felanulanuaʻi e lē gaoioi ma ata gaoioi e iai ma leo. A o leʻi amata ma faagasolo le Taua Muamua a le Lalolagi, na maua e le faitau miliona o tagata faamāfanafanaga mai i lenei ata, lea na faaiʻuina i le faamatalaina o le filemu i le Pulega a Iesu Keriso i le Afe Tausaga. Mulimuli ane, sa faasalalau atu le feʻau o le Malo i leitiō ma na faalogo ai le faitau miliona o tagata i le lalolagi aoao. I aso nei, ua faaaogāina i  se auala lelei komepiuta ma le Initaneti e folafola atu ai le tala lelei, e oo atu i motu maotua ma tulimanu uma o le lalolagi.

7. (a) Aiseā e mataʻutia ai le soona faaaogāina o mea a le lalolagi? (e) O le ā e tatau ona tatou faaeteete i ai? (Tagaʻi i le faaopoopoga.)

⁷ Ae ua lapataʻi mai le Tusi Paia, e iai le lamatiaga o le soona faaaogāina o mea ua ofoina mai e le lalolagi. (Faitau le 1 Korinito 7:29-31.) E mafai ona faaalu e se Kerisiano le tele o le taimi i ni mea e lē leaga e pei o le faia o mea e fiafia ai, faitau tusi, matamata TV, matamata i vaaiga matagofie, faia o faatau, ma le taumafai e maua masini fou faaonapōnei. O le faaaogāina o tuatusi e faauō ai ma isi i le Initaneti, faia o feʻau tusitusia, lafoina o imeli, ma faia ma masani le siakiina o tala fou ma tala o taaloga, e mafai ona tatou pupū i taimi uma i na mea, ma maʻimau ai le taimi. * (Fai. 3:1, 6) Pe a lē pulea le taimi e faaalu i mea e leai se tāua, e mafai ona tatou lafoaʻia ai le mea e sili ona tāua, o la tatou tapuaʻiga iā Ieova.​—Faitau le Efeso 5:15-17.

8. Aiseā e tāua ai le fautuaga e aua le manaʻo i mea a le lalolagi?

⁸ Ua fuafua e Satani lana lalolagi e faatosina ma faalavelavea ai i tatou. O le mea lenā sa tupu i le uluaʻi senituri, ma ua faatupulaʻia foʻi i aso nei. (2 Timo. 4:10) O lea, e manaʻomia ai ona tatou utagia le fautuaga lenei: ʻAua le manaʻo i mea o iai i le lalolagi.’ O le faia e lē aunoa o fetuunaʻiga ina ia tatou ola ai e tusa ma lenā fautuaga, o le a faamalosia ai lo tatou “alofa [i] le Tamā” ma ʻalofia ai le tosina ese. O le iʻuga, o le a faigofie ai ona tatou faia le finagalo o le Atua, ma maua ai lona finagalo malie seʻia oo i le faavavau.​—1 Ioa. 2:15-17.

9. O le ā le fetalaiga a Iesu e faatatau i la tatou vaai, ma na faapefea ona ia faataatia le faaaʻoaʻoga?

⁹ Na ōgatusa le fautuaga alofa a Iesu iā Mareta ma ana aʻoaʻoga faapea lana faaaʻoaʻoga. Na ia faalaeiauina ona soo ina ia “faafaigofie, [fpl.]” la latou vaai, ina ia faamuamua ai pea manaʻoga o le Malo e aunoa ma le faalavelaveina. (Faitau le Mataio 6:22, 33.) E leʻi tele ni meafaitino a Iesu, auā e leʻi iai sona fale po o sona fanua.​—Luka 9:58; 19:33-35.

10. O le ā le faaaʻoaʻoga na faataatia e Iesu i lana faiva?

 ¹⁰ E tele mea na tutupu a o faagasolo le faiva a Iesu ia na ono tosina ese ai, ae e leʻi lolo i ai o ia. I le amataga o lana faiva, ina ua māeʻa ona ia aʻoaʻoina le motu o tagata ma faia faamālōlōga i Kapanaumi, na tauanau o ia e tagata e aua neʻi alu ese mai i le aai. Na faapefea ona tali atu Iesu i lenā talosaga? Na ia faapea atu: “E tatau ona ou folafola atu le tala lelei o le malo o le Atua i isi foʻi aai, auā o le mea lea na auina mai ai aʻu.” (Luka 4:42-44) Na savali Iesu e tusa ma ana fetalaiga, auā na ia fesavaliaʻi i Palesitina e talaʻi ma aʻoaʻo atu. E ui i lona tulaga lelei atoatoa, ae sa iai ona manaʻoga masani faaletagata ma o nisi taimi sa ia vaivai tele ai ona o lana auaunaga i le Atua.​—Luka 8:23; Ioa. 4:6.

11. O le ā le fetalaiga a Iesu i se tamāloa na iai se fefinauaʻiga i lona aiga, ma o le ā le lapataʻiga na ia avatuina?

¹¹ I se tasi taimi, a o aʻoaʻo e Iesu ona soo i le auala e feagai ai ma teteega, na fesili ane se tamāloa iā te ia: “Le Aʻoaʻo e, ia e fetalai atu i loʻu uso ina ia vaelua mai le tofi iā te aʻu.” Peitaʻi, na teena e Iesu le faia o sana vaega i lea finauga. Na ia tali atu: “Sole, o ai na tofia aʻu e faamasinoina pe vaevaeina o outou tofi?” Na toe faaauau ona aʻoaʻo atu Iesu, ma lapataʻia lana ʻaufaalogologo e faatatau i le mataʻutia o le tosina ese mai i le auaunaga i le Atua, ona o le tuʻinanau atu i meafaitino.​—Luka 12:13-15.

12, 13. (a) Aiseā na maofa ai nisi tagata Eleni na liulotu i nai aso a o leʻi maliu Iesu? (e) Na faapefea ona taulimaina e Iesu se mea na ono faalavelave ane?

¹² Na matuā pagatia Iesu i lona vaiaso mulimuli i le lalolagi. (Mata. 26:38; Ioa. 12:27) Sa tele ana galuega e fai, ma na ia sauni foʻi e fesagaʻia lona faamasinoga e faalumaina ai ma lona maliu tigā. O se faaaʻoaʻoga, seʻi mafaufau i le mea na tupu i le Aso Sa o Nisani 9 i le 33 T.A. E pei ona valoia, na ulufale atu Iesu i Ierusalema i se asini, ma na viiviia e le motu o tagata o ia o “Lē ua maliu mai o se Tupu i le suafa o Ieova.” (Luka 19:38) I le aso na sosoo ai, na ulufale atu Iesu i le malumalu ma tutuli i fafo ma le lototele tagata faipisinisi matapeʻapeʻa, sa faaaogāina le fale o lona Tamā e faia ai a latou pisinisi faatogafalea.​—Luka 19:45, 46.

¹³ Sa aofia ai i lenā motu o tagata i Ierusalema nisi o tagata Eleni na liulotu sa matuā maofa iā Iesu. Na latou talosaga atu iā Filipo ina ia faatulaga sa latou feiloaʻiga ma Iesu. Peitaʻi, e leʻi taaʻina ese Iesu mai i le mea e sili ona tāua o le a ia faia. E leʻi fia lauiloa o ia ina ia ʻalofia ai lona maliu faataulaga i lima o fili o le Atua. O lea, ina ua uma ona ia faamatala atu ua toeitiiti oo i le taimi e maliu ai, ona ia faapea atu lea iā Aneterea ma Filipo: “O lē e faapelepele i lona ola, e faaumatia ai, a o lē e ʻinoʻino i lona ola i lenei lalolagi, e faasaoina ai mo le ola e faavavau.” Nai lo o le taliaina o le talosaga a nei tagata Eleni, ae na ia faalaeiauina i latou e faaaʻoaʻo i lona agaga faataulaga ma folafola atu: “Afai e auauna mai se tasi iā te aʻu, e viia o ia e le Tamā.” E mautinoa na faaoo atu e Filipo lenā feʻau i ē na talosaga ane iā te ia.​—Ioa. 12:20-26.

14. E faapefea ona iloa sa faaalia e Iesu le paleni, e ui sa ia faamuamua le galuega talaʻi?

¹⁴ E ui na teena e Iesu mea na faalavelave ane i lana galuega autū o le talaʻia o le tala lelei, ae e lē faapea sa ia mafaufau i taimi uma i galuega. Sa ia talia le valaaulia i se faaipoipoga, ma liua le vai e avea ma uaina ina ia maua ai pea le fiafia i lea faatasiga. (Ioa. 2:2, 6-10) Sa ia taliaina foʻi valaaulia  a nisi o ana aumea vavalalata ma nisi na ono avea ma ona soo, ina ia latou faiʻaiga. (Luka 5:29; Ioa. 12:2) Ae e sili atu ona tāua, na faaaogā e Iesu le tele o le taimi e tatalo, manatunatu loloto, ma mālōlō ai.​—Mata. 14:23; Mare. 1:35; 6:31, 32.

15. O le ā le fautuaga na aumai e le aposetolo o Paulo, ma na faapefea ona ia faataatia se faaaʻoaʻoga mataʻina?

¹⁵ Na tusi le aposetolo o Paulo, ʻseʻi o tatou tuu ese mea mamafa uma.’ Sa ia faatusa le olaga faa-Kerisiano i se tuuga. (Faitau le Eperu 12:1.) Sa faatatau e Paulo mea na ia aʻoaʻo atu, sa ia tuua se lumanaʻi lelei i le faiga o mea faa-Iutaia, lea na ono mafai ona ia mauʻoa ma lauiloa ai. Sa ia uaʻi atu i “mea e sili ona tāua” ma pologa i le auaunaga i le Atua, faimalaga solo i Suria, Asia Itiiti, Maketonia ma Iutaia. Na tusi Paulo e faatatau i lona faamoemoe o le ola e faavavau i le lagi, “o le faagalo lea o mea ua tuanaʻi, ae tepa taulaʻi atu i mea o i le lumanaʻi. Ua ou tausinio i le sini, o le taui lea.” (Fili. 1:10; 3:8, 13, 14) Sa faaaogā lelei e Paulo lona tulaga nofofua, ma na ia taulau i le “auauna e lē aunoa i le Alii, e leai se mea e faalavelavea ai.”​—1 Kori. 7:32-35.

16, 17. Pe e tatou te nofofua pe faaipoipo, e faapefea ona tatou mulimuli i le faaaʻoaʻoga a Paulo i le avea ma soo o Keriso? Faamatala se mea na tupu.

¹⁶ E pei o Paulo, e iai nisi auauna a le Atua ua filifili e nofofua ina ia lē tele ai ni o latou tiute tauave i le aiga, ma tuutoina atu ai i le auaunaga o le Malo. (Mata. 19:11, 12) E tele tiute tauave faaleaiga a auauna a Ieova ua faaipoipo. Ae pe e tatou te nofofua pe faaipoipo, e mafai ona tatou ʻtuu ese mea mamafa uma’ ma fai taumafaiga e auauna iā Ieova e aunoa ma le faalavelavea. O lenei vala, atonu e aofia ai le faaitiitia o le taimi i mea e lē tāua, ae ia faataatia se sini o le faatele o le taimi i le auaunaga i le Atua.

¹⁷ Seʻi mafaufau i le ulugalii mai Uelese o Mark ma Claire, sa la auai i le auaunaga paeonia ina ua uma a la aʻoga, ma faaauau ona paeonia ina ua uma ona faaipoipo. Ua faapea mai Mark: “Sa faafaigofie o maʻua olaga e ala i le faatau ese o lo matou fale e tolu potu moe, ma tuua a ma galuega faavaitaimi sa iai ina ia auai ai i faugāfale faavaomalo.” I le 20 tausaga ua mavae, sa laʻua faimalaga ai i le atu Aferika e fesoasoani i le fausiaina o Maota mo Sauniga. E iai le taimi sa na o le 15 tala la laʻua tupe sa iai. Peitaʻi, na tausia i laʻua e Ieova. Ua faapea mai Claire: “Sa matuā faamalieina i maʻua i le auauna iā Ieova i aso uma. Sa ma maua ni uō se tele, ma e leai se mea na ma matitiva ai. E lē mafai ona faatusa ni nai mea itiiti na maʻua tuua i le fiafia ua ma maua mai i le auaunaga faataimi atoa iā Ieova.” Ua tofo foʻi le toʻatele o auauna faataimi atoa i na faalogona. *

18. O ā fesili e manaʻomia ona tatou iloiloina?

¹⁸ Ae faapefea oe? O le ā e te faia pe a e iloa ua e lē toe tuliloaina ma le maelega manaʻoga o le Malo ona ua e tosina ese? Atonu e manaʻomia ona faaleleia atili lau faasologa o le faitauina o le Tusi Paia ma au lava suʻesuʻega. E faapefea ona e faia lenā mea? O le a faamatalaina lenā vala i le mataupu o loo sosoo mai.