E LĒ mafai ona faatusatusaina se laau olive e falala solo ona lālā, i le matagofie o le arasi mai i Lepanona. Ae e mataʻina le auala e ola ai le laau lenei o le olive. Ua faapea mai nisi o le umi e ola ai lenei laau e oo atu i le 1,000 tausaga. E maualalō le sosolo o ona aa, lea e mafai ona toe ola ai e tusa lava po ua tātuu le ogālaau. O le a toe tātupu le laau o le olive pe a ola pea ona aa.

Na mautinoa e Iopu, e tusa lava pe e oti o ia, ae e toe ola mai lava. (Iopu 14:13-15) Atonu na faaaogā e Iopu le laau olive e faaāta mai ai lona mautinoa, e mafai e le Atua ona toe faatūina mai o ia. Na ia faapea mai: “E oo lava i le laau e iai lona faamoemoe. Pe a tuu i lalo, ona toe tātupu mai lea.” Pe a maligi timuga i le vaitaimi mūgala, ona mafai lea ona toe ola mai aa o se ogālaau olive ua mago ma tātupu mai ai “lālā e pei o se laau fou.”​—Iopu 14:7-9.

E tulimataʻi e se faifaatoʻaga le toe ola mai o se laau olive ua tātuu i lalo. O loo faapea foʻi ona tulimataʻia e Ieova le taimi e toe faafoʻisia ai le ola i ana auauna ma isi ua maliliu. (Mata. 22:31, 32; Ioa. 5:28, 29; Galu. 24:15) Maʻeu le olioli i le faafeiloaʻi atu iā i latou o le a toetutū mai, ma vaaia lo latou fiafia i le toe mauaina o le ola!