1, 2. O le ā le eseesega o le auala e silasila mai ai fofoga o Ieova iā i tatou, ma le auala o loo faaaogā ai meapuʻeata?

UA FAAAOGĀ i faletupe meapuʻeata e iloa ai mea o loo tutupu i totonu o faletupe. Pe a maua i meapuʻeata ata o se gaoi, e fesoasoani na ata e iloa ai e leoleo le tagata gaoi ma taofia i le ofisa o leoleo. Ua avea lea faiga ma itu ua faafaigatā ai i ē solitulafono, ona ʻalo mai i a latou mea sesē.

² Ua taʻua i le Faataoto 15:3 e silasila fofoga o Ieova i “mea uma lava.” Po o lona uiga e matuaʻi vaʻiliʻili e Ieova mea uma e uiga iā i tatou, ina ia iloa ai po o tatou solia ana tulafono? Po o faatalitali Ieova o le taimi lava e tatou te faia ai se mea sesē, ona ia faasalaina loa lea o i tatou? (Iere. 16:17; Epe. 4:13) E leai. E silasila mai fofoga o Ieova ona o le alofa iā i tatou, ma e finagalo ia tatou maua le fiafia ma le saogalemu.​—1 Pete. 3:12.

3. O ā auala e lima e iloa ai le manatu mamafa mai o Ieova iā i tatou?

³ E faapefea ona faalolotoina lo tatou malamalama i le alofa o Ieova mo i tatou? O le a tatou iloiloina ni auala se lima e iloa ai le manatu mamafa mai o Ieova iā i tatou. (1) E muaʻi lapataʻia i tatou e Ieova pe a iā i tatou se faanaunauga sesē. (2) E na te  aumaia faasaʻoga pe a tatou uia se ala sesē. (3) E na te taʻitaʻia i tatou i mataupu silisili faale-Tusi Paia. (4) E fesoasoani mai iā i tatou pe a fesagaʻi ma faigatā. (5) E na te tauia i tatou pe a faia le mea saʻo.

4. Aiseā na muaʻi lapataʻia ai e Ieova Kaino a o ia leʻi faia le agasala?

⁴ Muamua, seʻi o tatou iloiloina auala o loo lapataʻia ai i tatou e Ieova, pe a amata ona iā i tatou se faanaunauga sesē. (1 No. 28:9) O se faataʻitaʻiga, na “matuā ita” Kaino ina ua ia lē maua le finagalo malie o Ieova. (Faitau le Kenese 4:3-7.) Na lapataʻia e Ieova Kaino afai e lē ʻsuia ona ala ma faia le mea lelei,’ e peiseaʻī ʻo loo faatalitali mai le agasala iā te ia i le faitotoʻa.’ Na fesili atu le Atua iā Kaino: “Pe e te pule ea i ai?” Na finagalo Ieova ia utagia e Kaino le lapataʻiga, ma mafai ai ona Ia “taliaina” o ia. Pe ana usitaʻia e Kaino le lapataʻiga, semanū o loo ia maua pea se faiā lelei ma le Atua.

5. O ā auala e lapataʻia ai i tatou e Ieova?

⁵ Ae faapefea i tatou i aso nei? E lē mafai ona natia se mea mai iā Ieova, auā e na te silafia lelei i tatou, faapea o tatou manatunatuga ma faanaunauga. E finagalo lo tatou Tamā alofa ia tatou faia le mea saʻo, ae e na te lē faamalosia i tatou. O lea, e aumaia e Ieova lapataʻiga pe afai e silasila mai ua amata ona iā i tatou se faanaunauga sesē. E faapefea? E tatou te maua lapataʻiga mai iā Ieova, pe a faitau le Tusi Paia i aso taʻitasi, faapea a tatou lomiga ma auai i sauniga. Pe sa e faalogo pe faitau foʻi i se manatu na fesoasoani iā te oe e taulima ai se faafitauli, lea e na o Ieova o loo silafiaina? E saunia e Ieova lapataʻiga e tatou te manaʻomia i le taimi tatau.

6, 7. (a) O ā faamaoniga e iloa ai e manatu mamafa mai Ieova iā i tatou? (e) E faapefea ona tatou maua aogā mai i lapataʻiga a Ieova?

⁶ O lapataʻiga uma o loo i le Tusi Paia, e faamaonia ai le alofa ma le manatu mamafa mai o Ieova iā i tatou. E faitau miliona tagata ua latou maua aogā mai i le Tusi Paia, lomiga, ma sauniga. Peitaʻi, e finagalo Ieova ia e uaʻi totoʻa atu i ana lapataʻiga o loo i le Tusi Paia, ina ia mafai ai ona e faia le mea saʻo. O le faamaoniga lenā o le manatu mamafa mai o Ieova iā te oe.

⁷ E faapefea ona tatou maua aogā mai i lapataʻiga a Ieova? Muamua, e tatau ona tatou talitonu e manatu mamafa moni mai lava o ia, ona faatatau lea o lana Afioga i o tatou olaga. Pe a iā i tatou se manatu e feteenaʻi ma le finagalo o le Atua, e tatau ona vave liaʻi ese. (Faitau le Isaia 55:6, 7.) O le a tatou ʻalofia le tele o tigā pe a vave ona utagia lapataʻiga. Ae faapefea pe afai e tatou te lē faalogo? Po o le a manatu mamafa mai pea Ieova iā i tatou?

8, 9. Pe a fautuaina i tatou e se tasi mai i le Tusi Paia, e faapefea ona faamaonia ai e manatu mamafa mai Ieova iā i tatou? Aumai se faataʻitaʻiga.

⁸ Pe a faasaʻo i tatou e Ieova, e iloa ai i inā lona manatu mamafa mai iā i tatou. (Faitau le Eperu 12:5, 6.) E mautinoa e tatou te lē fiafia pe a aumai se fautuaga, aʻoaʻiga po o se faasaʻoga. (Epe. 12:11) Peitaʻi, pe a fautua mai se tasi iā i tatou mai i le Tusi Paia, e tāua tele ona tatou malamalama i le māfuaaga ua ia faia ai faapea. E lē ina ia faatigā i o tatou faalogona, ae ona ua ia mātauina se gaoioiga ua tatou faia e aafia ai la tatou faiā ma Ieova. Ua ia lotomalie e faaaogā lona taimi ma fai taumafaiga uma, ina ia faailoa mai i le Tusi  Paia le auala e suia ai o tatou ala, ma faafiafiaina le Atua. E tatau ona tatou talia lenā fautuaga auā e mai iā Ieova.

⁹ Seʻi o tatou iloiloina se faataʻitaʻiga i le auala e faaatagia mai ai e se tagata o loo avatua se fautuaga, le manatu mamafa mai o le Atua. Sa iai se uso na pulea i le matamata i ata matagā taufeusuaʻiga, a o leʻi sau i le upu moni. Na ia tuua lea masaniga leaga ina ua ia aʻoaʻoina le upu moni. Peitaʻi, e na te leʻi matuaʻi liaʻi ese atoatoa na faanaunauga. O lea, ina ua faatau sana telefoni feaveaʻi fou, sa toe amata ona ia matamata i ata matagā taufeusuaʻiga i le Initaneti. (Iako. 1:14, 15) I se tasi aso, na ia avatu ai lana telefoni e faaaogā e se toeaina. Na faafuaseʻi ona oso aʻe vaaiga o ata matagā taufeusuaʻiga. Sa vave ona fautua atu le toeaina i le uso, ma na talia e le uso le fautuaga ma mafai ai ona ia manumalo mai lea faanaunauga leaga. E silafia e Ieova agasala faalilolilo e tatou te faia, ma e na te faasaʻoina i tatou a o leʻi aafia la tatou faiā ma ia. E tatou te talisapaia le manatu mamafa mai o Ieova iā i tatou.

10, 11. (a) E faapefea ona tatou “manatua” fautuaga a Ieova? (e) Faamatala se mea na tupu i se aiga na mulimuli ma le atamai i le taʻitaʻiga a Ieova.

¹⁰ Na pese le faisalamo iā Ieova e faapea: “E te taʻitaʻia aʻu i lau fautuaga.” (Sala. 73:24) E tatou te “manatua” fautuaga mai iā Ieova, pe a suʻesuʻeina lana Afioga. (Faata. 3:6) O le faia faapea, o le a tatou iloa ai lana silafaga, mulimuli i lana taʻitaʻiga ma iai pea se faiā lelei ma ia. O le faatatauina o mataupu silisili o le Tusi Paia, e lē gata e aogā mo lo tatou itu faaleagaga, ae e fesoasoani foʻi i le auala e tausia ai o o tatou manaʻoga faaletino.

¹¹ O se faataʻitaʻiga, e iai se uso faifaatoʻaga sa nofo lisi ma lana avā ma le la fanau e toʻatele i se faatoʻaga i Filipaina. Sa avea i laʻua ma lana avā o ni paeonia sauatoa. I se tasi aso, na faateʻia i latou ina ua aumai se tusi mai i lē e ana le fanua, e aveese faamalosi ai i latou. Na latou iloa mulimuli ane, na faia e se tagata ni tuuaʻiga sesē e faapea, o i latou o ni tagata e lē faamaoni. E ui na popole le uso po o fea o le a latou ō e nonofo ai, ae na ia maufaatuatuaina pea Ieova. Na ia faapea atu i lona aiga: “O le a saunia e Ieova se mea e tatou te nonofo ai. E tusa po o le ā  le tulaga ae e manatu mamafa mai lava o ia.” E ui i na tuuaʻiga sesē, ae na mulimuli pea le aiga i mataupu silisili o le Tusi Paia, ma faaalia pea le faaaloalo ma tausia le filemu. I nai aso mulimuli ane, na faapea atu ai lē e ana le fanua e aua neʻi ō ese, ona sa maofa o ia i le auala na tali atu ai le aiga i tuuaʻiga, ma suia ai lona mafaufau. Sa ia tuu atu foʻi i ai se isi fanua e fai ai a latou faatoʻaga. (Faitau le 1 Peteru 2:12.) O lea, pe a tatou mulimuli i mataupu silisili o le Tusi Paia, o le a taʻitaʻia i tatou e Ieova i taimi faigatā.

12, 13. O le ā le taimi e faigatā ai ona e talitonu, e manatu mamafa mai Ieova iā i tatou?

¹² I le avea ai ma auauna a Ieova, e tatou te feagai ma le tele o faigatā. Atonu o nisi taimi o faigatā faaumiumi, e pei o maʻi, sauāga po o teteega mai i aiga. O se tasi o mea e sili ona faigatā ona onosaia, o ni feeseeseaʻiga matuiā ma se isi i le faapotopotoga ona o le eseese o uiga.

¹³ O se faataʻitaʻiga, atonu e faia e se uso se tala e sili ona e tigā ai. E te ono mafaufau: ʻE lē tatau ona tupu lenei mea i le faalapotopotoga a le Atua.’ O le isi itu, ua maua e lenā uso nisi faaeaga i le faapotopotoga ma e manatu isi o ia o se uso lelei. E te ono tuufesili: ʻE faapefea ona tupu lenei mea? Pe e lē o silafia mai e Ieova lana mea na fai, ma fai i ai se gaoioiga?’​—Sala. 13:1, 2; Sapa. 1:2, 3.

14. Aiseā e ono faataga ai e Ieova o tatou uso e aumai se fautuaga malosi?

¹⁴ E loloto atu le silasila a Ieova i mea nai lo o i tatou, ma atonu e na te faataga se mea e tupu mo se māfuaaga tatau. O se faataʻitaʻiga, atonu e aumai e se tasi se fautuaga e tatou te manatu e lē fetaui iā i tatou, ma tigā ai o tatou faalogona. Peitaʻi, i le silafaga a Ieova atonu o i tatou lea e sesē, ma e ui e tigā le fautuaga, ae e tatau ona tatou manatunatu i ai. Na faamatala e le uso o Karl Klein e faapea, na ia maua se aʻoaʻiga malosi mai i le uso o Rutherford. Mulimuli ane, na faafeiloaʻi ma le fiafia o ia e Rutherford e faapea: “Mālō Karl!” Peitaʻi ona o le aʻoaʻiga na ia maua, sa tali atu ai Karl i se auala e pei e lē o fia tali atu. Ina ua iloa e Rutherford o loo tigā pea Karl i le aʻoaʻiga na avatu, ona ia lapataʻia lea o ia e faaeteete mai i le mailei a le Tiapolo. Sa telē se aafiaga lelei o lenā fautuaga iā Karl. Mulimuli ane, ina ua avea le uso o Karl ma sui o le Vaega Pule, na ia taʻua ai o loo iai i uso le aiā e fautuaina ai i tatou, ma pe a tatou feita iā i latou i lenā mea, o le a maileia i tatou e le Tiapolo. *

15. O le ā e tatau ona tāmau i o tatou mafaufau pe a feagai ma tulaga faigatā?

¹⁵ E iai taimi atonu e lē lava ai lo tatou onosaʻi, ma mananaʻo e vave faamuta se tulaga faigatā. O le ā e fesoasoani iā i tatou? Seʻi faapea o loo poloka lau taavale i se laina umī o taavale i se auala pisi. E te lē o iloa po o le ā le umi o le a poloka ai. Peitaʻi ona o lou lē onosaʻi, ua e filifili ai e te ui i se isi auala, ma iʻu ai ina e sē solo ma tuai ai ona e taunuu i le nofoaga na e fia alu i ai. Pe ana faapea e te onosaʻi pea i le auala sa e iai, semanū e te taunuu i le taimi tonu e tatau ona e taunuu ai. I se tulaga talitutusa, pe a tatou onosaʻi pea ma mulimuli i mataupu silisili o le Tusi Paia, o le a fesoasoani mai Ieova ina ia tatou tumau i tulaga faigatā.

16. O le ā se māfuaaga atonu e lē taofia ai e le Atua mafatiaga?

¹⁶ Atonu e lē taofia e Ieova mafatiaga e oo iā i tatou, ona e finagalo ia tatou maua ni toleniga tāua. (Faitau le 1 Peteru 5:6-10.)  E lē tatau ona tatou mafaufau o le Atua le pogai o faigatā. (Iako. 1:13) O loo faapogaia e ʻlo tatou fili o le Tiapolo,’ le tele o mafatiaga. Peitaʻi, e tāua ona tatou iloa e silafia e Ieova o tatou mafatiaga, ma e alofa iā i tatou. E faamautinoa e Ieova e lē faavavau ona tatou mafatia. O le a iai faigatā mo na o “sina taimi.” Peitaʻi, ia mautinoa e manatu mamafa mai Ieova iā te oe, ma o le a ia foaʻi mai le malosi e te onosaʻi ai seʻia oo i le iʻuga.​—2 Kori. 4:7-9.

17. Aiseā e suʻesuʻe ai e Ieova loto o tagata uma?

¹⁷ E suʻesuʻe e Ieova loto o tagata uma, ina ia iloa ai lē e alofa moni iā te ia. Na taʻu atu e le perofeta o Hanani i le tupu o Asa e faapea: “E silasila solo fofoga o Ieova i le lalolagi uma, ina ia faaali atu lona malosi iā i latou e atoatoa o latou loto iā te ia.” (2 No. 16:9) O le a ʻfaaali atu e Ieova lona malosi’ iā te oe, e ala i le puipuia ma tauia o oe pe a e faia pea le mea saʻo.

18. Aiseā e tatau ai ona tatou mautinoa, o le a tauia i tatou e Ieova pe a faia mea lelei? (Tagaʻi i le ata i luga aʻe o le matua.)

¹⁸ E finagalo Ieova e faaali mai lona “alofa” iā i tatou, e ala i le tauia o i tatou. O lea, pe a tatou mananaʻo e maua ana faamanuiaga, e manaʻomia ona tatou “saʻili i le lelei,” “naunau i le lelei,” ma “fai le mea lelei.” (Amo. 5:14, 15; 1 Pete. 3:11, 12) E tauia e Ieova tagata amiotonu, e tusa pe e lē o iloa atu e isi a latou gaoioiga lelei. (Sala. 34:15) O se faaaʻoaʻoga, seʻi manatu i fafine faatosaga e toʻalua i Isaraelu, o Sepela ma Puʻa. Na faatonu i laʻua e Farao ia fasiotia pepe tama uma o Isaraelu faatoʻā fananau mai. Peitaʻi, na usiusitaʻi nei fafine i le Atua nai lo o Farao, ma la faasaoina ai ola o pepe. Sa silafia e Ieova a la gaoioiga lelei ma tauia i laʻua, e ala i le maua o ni a laʻua fanau. (Eso. 1:15-17, 20, 21) Atonu e tatou te manatu i nisi taimi e lē o amanaʻia mai e isi mea lelei o loo tatou faia. Peitaʻi, e silasila mai Ieova i mea lelei uma e tatou te faia ma tauia i tatou.​—Mata. 6:4, 6; 1 Timo. 5:25; Epe. 6:10.

19. Faamatala mai se mea na tupu i se tuafafine, e iloa ai e silafia e Ieova a tatou galuega lelei.

¹⁹ E iai taimi atonu e tatou te manatu ai, e lē o silasila mai Ieova i a tatou taumafaiga i le galuega talaʻi. Peitaʻi, e leai se mea e lilo i Lana silafaga. Na maua e se tuafafine Hagakeri e nofo i Oseteria, se tuatusi o se fafine e tautala i le gagana Hagakeri. Na vave ona asiasi atu i ai le tuafafine, ae e leʻi maua atu se isi i le fale. E tasi ma le ʻafa tausaga o tuu alu pea le tuafafine i le fale o le fafine, ma tuu i ai lomiga, o tusi ma le numera o lana telefoni. O nisi taimi e manatu le tuafafine o loo iai se isi i le fale, ae e lē o fia tatalaina mai le faitotoʻa. I se tasi aso na toe alu atu ai, na tatala mai e se fafine e uiga faaleuō le faitotoʻa ma faapea mai: “Susū mai i totonu. Na ou faitau i mea uma na e tuuina mai, ma sa ou faatali mo oe.” Sa feagai lenei fafine ma se togafitiga mo le kanesa (chemotherapy), ma sa leʻi fia talanoa i se tagata. Na talia e le fafine se suʻesuʻega faale-Tusi Paia. Na lagona e le tuafafine na tauia e Ieova ana taumafaiga fitā.

20. O le ā sou lagona e faatatau i le manatu mamafa mai o Ieova iā te oe?

²⁰ E silafia e Ieova mea uma e tatou te faia, ma e suʻesuʻe i loto o tagata uma. E lē tatau ona tatou manatu o loo silasila mai o ia e saʻili ni o tatou sesē. Nai lo lea, seʻi o tatou vavalalata atu pea iā Ieova, auā ua tatou iloa e manatu mamafa mai o ia. E finagalo foʻi e fesoasoani mai ma tauia i tatou, ona o mea lelei e tatou te faia.