INA UA fanau laʻu tama o Gary i le 1958, na ou iloa e iai se mea o faalētonu. Peitaʻi, e 10 masina faatoʻā iloa e fomaʻi, ae faatoʻā faamautinoa mai e se fomaʻi faapitoa mai Lonetona, ina ua mavae le 5 tausaga. Na fanau laʻu tama teine o Louise ina ua mavae le 9 tausaga. E faanoanoa ona sa sili atu ona aafiaga nai lo o Gary.

Na faapea mai le fomaʻi iā te aʻu: “E aafia uma lau fanau i le LMBB syndrome, ma e leai se vaifofō.” * Sa itiiti loʻu iloa i lea ituaiga maʻi i lenā taimi. O ona āuga e aofia ai le faalētonu o le vaai ma e iʻu lava i le tauaso, tino puta, e iai tamatamaʻivae ma tamatamaʻilima faaopoopo, faigatā ona gaoioi le tino, maʻi suka, gugu. Sa faigatā le tausiga o laʻu fanau. Na maua mai i suʻesuʻega, e 1 mai le 125,000 tagata i Peretania e maua i lenei maʻi, e ui o le toʻatele e lē aafia tele ai.

Na faatoʻā ou talanoa i se Molimau a Ieova ina ua uma ona ou faaipoipo, ma maua ai le upu moni. E lē fiafia laʻu tane ma sa faimalaga solo i lana galuega, na lē mafai ai ona ou auai i se faapotopotoga. E ui i lea, na ou faitau pea i le Tusi Paia, ma tatalo iā Ieova. Maʻeu se faamāfanafanaga o le iloa “e avea Ieova ma mauga e sulufaʻi i ai so o se tasi ua nutimomoia, o le mauga e sulufaʻi i ai i taimi o puapuaga.” E na te lē ʻtuua foʻi o ē saʻili iā te ia.’​—Sala. 9:9, 10.

Sa faalētonu le vaai a Gary. Na ave o ia i le aʻoga mo ē iai manaʻoga faapitoa i le itu i saute o Egelani, ina ua 6 ona tausaga. E vili mai iā te aʻu i mataupu e popole ai, ona ou fesoasoani lea iā te ia e malamalama i taʻiala o le Tusi Paia. Na toe foʻi mai Gary ina ua 16 ona tausaga. Sa faalētonu pea lana vaai, ma na tauaso i le 1975. E leʻi leva ona fanau Louise, ae ou aafia loa i maʻi faigatā o le multiple sclerosis ma le fibromyalgia. Peitaʻi, na sola laʻu tane i le 1977.

Ina ua toe foʻi mai Gary, ona matou auai loa lea i le faapotopotoga, ma na ou papatiso i le 1974. Na ou lotofaafetai ona o le fesoasoani a se tasi o toeaina iā Gary i lona tulaga talavou. Na fesoasoani mai nisi i le faapotopotoga i feʻau i le fale. Na faafaigaluega foʻi e le malo nisi o uso ina ia fesoasoani mai. O se faamanuiaga lenā vala.

Na agaʻigaʻi pea i luma faaleagaga Gary, ma papatiso ai i le 1982. Sa naunau o ia e paeonia lagolago. O lea na ou filifili ai e galulue faatasi ma ia, ma faaauau ai mo le te tele o tausaga. Na fiafia o ia ina ua fesiligia e le ovasia matagaluega i se tasi taimi, pe e lē fia avea  o ia ma paeonia sauatoa. Na faalaeiauina ai Gary, ma avea ai o ia ma paeonia sauatoa i le 1990.

E lua taotoga o le suilapalapa o Gary na faia i le 1999 ma le 2008, ae na sili atu ona faalētonu le soifua mālōlōina o Louise. Sa fanau mai o ia e tauaso, ma ina ua ou vaaia isi tamatamaʻivae faaopoopo, na ou iloa ai e aafia foʻi o ia i le LMBB syndrome. Na iloa i se suʻesuʻega le telē o se aafiaga i isi vaega o ona totoga. Na faia le tele o ona taotoga e aofia ai taotoga e lima i ona fatugaʻo. Na maua foʻi o ia i le maʻi suka.

Na iloa e Louise e faigatā ona taotoga. O lea, na ia talanoa ai i fomaʻi e faia taotoga, faapea ē faia tui gase ma le pulega o le falemaʻi, i māfuaaga e na te lē talia ai tuigātoto. O lea, na ia maua ai ni faauōga lelei ma ē na tausia o ia.

E faaautū uma fuafuaga a lo matou aiga i le tapuaʻiga iā Ieova. A o leʻi maua masini faaonapōnei, sa masani ona ou faitauina tusi iā Gary ma Louise ona sa pō la laʻua vaai. Ae i le taimi lenei, ua mafai ona faia suʻesuʻega faale-Tusi Paia a le tagata lava ia i vaiaso taʻitasi, faapea le faia o ni sao i sauniga, e ala i le fesoasoani o CD, DVD ma le www.jw.org.

O nisi taimi e tauloto e Gary ana tali i le sauniga, pe faia foʻi i ana lava upu ana lauga i le Aʻoga o le Faiva Faatiokarate. Na avea o ia ma Auauna o le Faiva i le 1995. E fiafia o ia e faafeiloaʻi sui o le faapotopotoga i le Maota mo Sauniga, ma galue i le faia o mea faaleoteleleo.

E fesoasoani uso e tulei le nofoa faataavalevale a Gary i le talaʻiga. Na fesoasoani se tasi uso iā te ia e faia le suʻesuʻega a se tagata fiafia. Na faalaeiau foʻi e Gary se tuafāfine ua 25 tausaga e lē o toe aufaatasi ma le faapotopotoga. Ua auai uma nei tagata i le sauniga i le taimi nei.

Na aʻoaʻoina e loʻu tinā Louise i le lalagaina o ofu i le vulu, ina ua 9 ona tausaga. Ae na ma aʻoaʻoina ma se tasi o teine na tausia o ia, i le auala e teuteuina ai ie ma mamanu. E fiafia o ia e fai ia galuega. E suʻi e Louise palanikeke mo pepe ma tagata matutua i le faapotopotoga. E fiafia foʻi o ia e fai ni card ma ave i isi, ma e talisapaia tele e tagata. Ina ua talavou o ia, sa amata ona ia faaaogā komepiuta faapitoa e fesootaʻi ai ma ana uō i le imeli. Sa papatiso o ia ina ua 17 ona tausaga. E ma te paeonia lagolago faatasi pe a fai tauiviga faapitoa. E tauloto foʻi e Louise mau e faaalia ai lona faatuatua i le folafolaga a Ieova ʻo le a faapupulaina mata o ē ua pō le vaai,’ ma “e lē fai mai foʻi se tasi ua nofo ai: ʻOu te maʻi.’”​—Isa. 33:24; 35:5.

Maʻeu lo matou talisapaia o upu moni o loo i le Tusi Paia, e lē gata i lea o le lagolago a la matou faapotopotoga. Ae e sili ai ona tāua le fesoasoani a Ieova, ua matou maua ai se olaga fiafia.