1. Aiseā e tatau ai ona tatou maufaatuatuaina le Tusi Paia?

A O LEʻI agavaa se tasi e avea ma tagata talaʻi, e tatau ona faamautinoa e talitonu lea tagata o le Tusi Paia o le Afioga a le Atua. * O le tulaga foʻi lenā e tatau ona talitonu i ai auauna uma a Ieova. E tatou te aʻoaʻoina isi e faatatau iā Ieova ma maua le faaolataga, pe a tatou maufaatuatuaina le Tusi Paia ma maua tomai e faaaogāina ai i le faiva.

2. Aiseā e tatau ai ona tatou tausisi pea i mea ua aʻoaʻoina?

² Na faatāua e Paulo le Afioga a le Atua. Na ia faapea atu iā Timoteo ina ʻia tausisi pea i mea ua ia aʻoaʻoina,’ po o upu moni mai le Tusi Paia lea e faamalosia ai lona faatuatua i le tala lelei. E ʻfaapotoina i tatou mo le faaolataga,’ ma faamalosia lo tatou faatuatua i mea e aʻoaʻoina mai le Tusi Paia. (2 Timo. 3:14, 15) Ua faapea mai le 2 Timoteo 3:16 (faitau), na foaʻiina mai e le Atua le Tusi Paia. Peitaʻi, o ā nisi lesona e tatou te aʻoaʻoina mai i lenā fuaiupu? Seʻi o tatou iloiloina lenā fuaiupu, ma maufaatuatuaina le “saʻo” aʻiaʻi o aʻoaʻoga a Ieova.​—Sala. 119:128.

3-5. (i) O le ā le tali mai a tagata sa faalogologo i le lauga a Peteru, ma aiseā? (ii) Na faapefea ona taliaina e tagata i Tesalonia le upu moni? (iii) O le ā ua mātauina e tagata i aso nei e faatatau i la tatou talaʻiga?

³ I le Mataio 23:34, na fetalai ai Iesu i le nuu o Isaraelu, o le a ʻaauina atu iā i latou o perofeta,  o tagata atamamai, ma faiaʻoga.’ Sa faasino atu Iesu i ona soo, o ē ua aʻoaʻoina e faaaogā Tusitusiga Paia i le faiva. O se faataʻitaʻiga, na faaaogā e Peteru le tele o mau mai Tusitusiga Eperu, i lana lauga i se motu o tagata i le Penetekoso 33 T.A. Na ʻtuia loto’ o le toʻatele ma salamō mai a latou agasala. Na latou talosaga foʻi iā Ieova mo le faamagaloga, ma e tusa ma le 3,000 i latou na papatisoina ai.—Galu. 2:37-41.

⁴ Sa talaʻi foʻi Paulo i fafo atu o Ierusalema. Sa ia talaʻi atu i tagata Iutaia sa tapuaʻi i le sunako i le aai o Tesalonia. E tolu Sapati o fefulisaʻi Paulo ma i latou i Tusitusiga Paia, e faamaonia ai sa tatau ona tigāina le Keriso ma toe faatūina mai i le oti. Sa talitonu nisi tagata Iutaia, faapea le toʻatele o tagata Eleni.​—Galu. 17:1-4.

⁵ Ua mātauina e le toʻatele lo tatou faaaogāina o le Tusi Paia, e faamaonia ai mea o loo tatou aʻoaʻoina atu. A o faitau e se tuafafine i Suisilani se mau o le Tusi Paia, na fesili atu le tamāloa e ona le fale po o le ā lana tapuaʻiga. Na tali atu le tuafafine o i laʻua ma lana paga o ni Molimau a Ieova. Na faapea mai le tamāloa sa lē tatau ona ia fesili, auā e na o Molimau a Ieova e faaaogāina le Tusi Paia pe a talaʻi.

6, 7. (i) E faapefea ona faaaogā le Tusi Paia pe a aʻoaʻo i le faapotopotoga? (ii) O le ā le tāua o le faaaogā o le Tusi Paia pe a faia se suʻesuʻega?

⁶ Ia faaaogā le Tusi Paia i se auala e pāʻia ai loto o tagata. Pe a tofia oe e faia se lauga po o se vaega i le sauniga, ia faaaogā ni mau patino. E tatau ona faitau saʻo mai mau autū mai le Tusi Paia. Ia faalaeiau foʻi le aofia e faaaogā a latou Tusi Paia. Ia faamatala atu uiga o fuaiupu ma le auala e faatatau ai, ina ia maua ai se faiā māfana ma Ieova. Ia ʻalofia le faaaogā o faataʻitaʻiga e faigatā ona malamalama i ai. E lē gata i lea, o le taumafai e fai ni faamatalaga e taliē ai le aofia. Nai lo lea, ia faamatala lelei manatu o le Tusi Paia.

⁷ Ae faapefea pe a faia suʻesuʻega faale-Tusi Paia? Ia faitau faatasi ma le tagata suʻesuʻe nisi mau o loo sii mai le palakalafa. A o e faamatalaina le mau, ia tuu le avanoa e faaali mai ai sona manatu. Ia faia ni fesili faatupu manatu, nai lo o le taʻu atu iā te ia o le auala e tatau ona gaoioi ai. O le a fesoasoani lea iā te ia e malamalama ai i aʻoaʻoga a le Tusi Paia. *

8. O le ā le feteenaʻiga sa feagai ma Paulo?

⁸ O le tiute tauave o toeaina le aʻoaʻia ma le faasaʻo o i latou e faia agasala. (1 Timo. 5:20; Tito 1:13) Peitaʻi, e manaʻomia foʻi ona tatou faasaʻo i tatou lava. Sa iai se feteenaʻiga na feagai ma Paulo, e ui sa lelei lona lotofuatiaifo. (2 Timo. 1:3) Na ia faapea mai: “Ua ou iloa i loʻu tino se isi tulafono, o loo feteenaʻi ma le tulafono a loʻu mafaufau, ma ua faapologaina ai aʻu i le tulafono a le agasala.” O lea, seʻi o tatou talanoaina pe na faapefea ona  manumalo Paulo mai i ona vaivaiga.​—Faitau le Roma 7:21-25.

9, 10. (i) O ā vaivaiga atonu na feagai ma Paulo? (ii) Na faapefea ona ia manumalo i na vaivaiga?

⁹ E leʻi taʻua patino mai e Paulo ona vaivaiga sa iai, ae na ia faapea mai o ia “o se tagata fiasili.” (1 Timo. 1:13) Sa ia matuā sauāina Kerisiano i le taimi muamua, ma na ia taʻutino lona “ita tele iā i latou.” (Galu. 26:11) E ui sa mafai ona ia pulea lona ita, ae sa manaʻomia ona ia galue pea e pulea ona faalogona ma faamatalaga. O le ā na fesoasoani iā te ia?—Galu. 15:36-39.

¹⁰ Na taʻua e Paulo i lana tusi muamua i Korinito, le auala sa ia faasaʻo ai o ia lava. (Faitau le 1 Korinito 9:26, 27.) Na ia iloilo lona tulaga ma faia ni faaleleiga. Na ia saʻili foʻi i Tusitusiga Paia, ma tatalo iā Ieova mo le fesoasoani e faatatau ai na fautuaga. * O se faaaʻoaʻoga lelei lenā mo i tatou, auā o loo tatou tauivi foʻi ma o tatou vaivaiga.

11. E faapefea ona ʻtofotofoina pea’ i tatou lava, po o tatou savavali i le ala o le upu moni?

¹¹ Aua neʻi o tatou manatu e lē manaʻomia ona tatou tauivi pea ma o tatou vaivaiga. E tatau ona ʻtofotofoina pea’ i tatou, po o tatou savavali i le ala o le upu moni. (2 Kori. 13:5) Pe a tatou faitau i mau e pei o le Kolose 3:5-10, ia manatunatu i fesili nei: ʻPo o oʻu taumafai malosi e manumalo i oʻu vaivaiga? Po ua amata ona ou fiafia i mea e inosia e Ieova? Pe a faafuaseʻi ona oso aʻe i le Initaneti ni tuatusi o faiga lē mamā, pe e faaauau pea ona ou matamata i ai?’ E tatou te “mataala ma faaauau ona mafaufau lelei,” pe a faatatau i o tatou olaga fautuaga mai le Tusi Paia.​—1 Tesa. 5:6-8.

12, 13. (i) O le ā le uiga o le faaupuga e “faasaʻo ai mea,” ma e faapefea ona tatou faaaʻoaʻo iā Iesu i lenā vala? (ii) O le ā e lē tatau ona faia pe a avatu faasaʻoga?

¹² I le Tusi Paia, e faasino atu le faaupuga e “faasaʻo ai mea” i le toe faaleleia o se mea. E iai taimi e manaʻomia ai ona faasaʻo se tasi pe a ia faauigasesē a tatou faamatalaga ma gaoioiga. Ina ua faitio taʻitaʻi lotu Iutaia i le agalelei o Iesu i le “ʻauaolafoga ma tagata agasala,” na ia tali atu, “e lē manaʻomia e tagata malolosi se fomaʻi, ae na o ē mamaʻi. Ia outou ō ma aʻoaʻoina le uiga o nei upu, ʻOu te loto i le alofa mutimutivale, ae lē o le taulaga.’” (Mata. 9:11-13) Sa faasaʻo foʻi e Iesu i se auala agalelei manatu sesē o tagata e faatatau i le Atua. Na ia aʻoaʻo i latou o Ieova “o le Atua e alofa mutimutivale ma alofa fua, e telegese lona toʻasā ae e tele lona alofa faamaoni ma fai mea moni.” (Eso. 34:6) O le iʻuga, na talitonu tagata lotomaulalo i le tala lelei.

¹³ E tatau ona tatou faaaʻoaʻo iā Iesu i le auala e fesoasoani ai i isi. E lē o fautuaina i tatou i le 2 Timoteo 3:16, e avatu faasaʻoga i se auala e faatigā ai isi. E lē mafai ona tatou fesoasoani i le  tagata pe a tatou faia tala faatigā, e pei o le “tutuʻi o le pelu.”​—Faata. 12:18.

14-16. (i) O le ā le auala e avatu ai e toeaina faasaʻoga? (ii) Aiseā e tāua ai i mātua ona faaaogā le Tusi Paia pe a avatu faasaʻoga?

¹⁴ E faapefea ona avatu faasaʻoga i se auala agalelei? Seʻi faapea ua saʻilia e se ulugalii e misa soo se fesoasoani mai se toeaina. Nai lo o le faaituʻau, e faaaogā e le uso le Tusi Paia e fefulisaʻi ai ma le ulugalii. E lē gata i lea, o mataupu silisili o loo i le mataupu e 3 o le tusi o Le Ala e Maua ai le Fiafia i le Aiga. A o faagasolo le talanoaga, atonu e mātau e le ulugalii e tatau ona laʻua faia ni suiga. E toe fesili i ai le toeaina i se isi taimi po ua faaleleia le faafitauli, ma toe avatu i ai le fesoasoani pe a manaʻomia.

 ¹⁵ Ae faapefea pe a avatu faasaʻoga i fanau? Seʻi faapea e iai se aumea a lou alo teine e lē o se taaʻiga lelei. E tatau ona e malamalama lelei i lenā tagata. Pe afai lava e te lagona le lē mautonu, e mafai ona oulua talatalanoa ma lou alo, atonu i ni manatu mai i Ala Mai! o Ianuari 8, 2006, itulau e 25-27, ma Aperila 8, 2005, itulau e 3-12. Ia faaalu se taimi e faifaimea faatasi ai, ma mātau ona uiga pe a auai i le talaʻiga faapea totonu o le aiga. O le a iloa e lou alo lou alofa moni iā te ia, pe afai e te faaalia le onosaʻi ma le agalelei. E fesoasoani lea iā te ia e utagia ai au fautuaga, ma ʻalofia le faia o filifiliga sesē.

¹⁶ Ia avatu faalaeiauga i se auala agalelei, iā i latou o loo popole i le  soifua mālōlōina, mafatia ona ua leai ni galuega, po o le lē mautonu foʻi i nisi o aʻoaʻoga a le Tusi Paia. E tele faamanuiaga e tatou te maua, pe a faaaogā le Afioga a le Atua e avatu ai faasaʻoga.

17. Aiseā e tatau ai ona tatou taliaina aʻoaʻiga?

¹⁷ E lē taliagofie aʻoaʻiga, ae e mafai ona avea i tatou ma ē e amiotonu pe a talia ma faatatauina. (Epe. 12:11) E ioe le toʻatele na ola aʻe i le upu moni, i le aogā o aʻoaʻiga a o latou mātua. O le a tatou tumau i le ala i le ola, pe a tatou talia foʻi aʻoaʻiga mai iā Ieova e ala mai i toeaina.​—Faata. 4:13.

18, 19. (i) Aiseā e tāua ai le fautuaga o loo i le Faataoto 18:13? (ii) O le ā le iʻuga pe a avatu e se toeaina le aʻoaʻiga i se auala alofa?

¹⁸ Ua fautuaina Kerisiano ina ia faia aʻoaʻiga “i le amiotonu,” pe ia ōgatusa ma mataupu silisili o le Tusi Paia. (2 Timo. 3:16) O se faaaʻoaʻoga, ua faapea mai le Faataoto 18:13, “pe a tali atu se tasi i se mataupu ae e leʻi faalogo i ai, o lona lava valea lea ma le faamāina.” Pe a faia e se Kerisiano se agasala matuiā, e tatau i toeaina ona faia se iloiloga māeʻaeʻa o le mataupu. (Teu. 13:14) A māeʻa lenā ona faatoʻā faia lea o le aʻoaʻiga “i le amiotonu.”

¹⁹ O loo faatonuina toeaina ina ia avatu aʻoaʻiga “ma le agamalu.” (Faitau le 2 Timoteo 2:24-26.) Pe a faia e se tasi se agasala, e lē gata e taʻuleagaina ai Ieova ae e faatigā ai foʻi i isi. Ae atonu e uunaʻia o ia e salamō pe afai e avatu e se toeaina le aʻoaʻiga i se auala alofa, nai lo le otegia o ia.​—Roma 2:4.

20. O ā mataupu silisili e tatau ona utagia e mātua pe a avatu aʻoaʻiga?

²⁰ E tatau i mātua ona faatatau mataupu silisili o le Tusi Paia, pe a aʻoaʻia a latou fanau. (Efe. 6:4) Pe a faia e le tamaitiiti se mea sesē, e tatau i le tamā ona iloilo le mea na tupu a o leʻi avatu le aʻoaʻiga. E lē tatau ona iai ni faiga sauā i totonu o se aiga Kerisiano. E tatau i mātua ona faaaʻoaʻo iā Ieova o lē e “alofa faapelepele ma alofa mutimutivale,” pe a avatu aʻoaʻiga i a latou fanau.​—Iako. 5:11.

21, 22. O ā faaupuga o loo i le Salamo 119:97-104, e faamatala ai ou lagona e faatatau i le Tusi Paia?

²¹ Na faailoa mai e se auauna a Ieova le māfuaaga na ia naunau ai i tulafono a Ieova. (Faitau le Salamo 119:97-104.) Sa faamalieina o ia i mea sa ia suʻesuʻeina, na ia maua le atamai, tofā mamao faapea le malamalama. Na ia maumauaʻi e faatatau fautuaga sa ia mauaina i lona olaga atoa. O le faia faapea, sa ia ʻalofia ai le faia o mea sesē sa faia e isi, ma ʻaeʻae ai i le tele o faamanuiaga.

²² Pe e te faatāuaina le Afioga a le Atua? O le faia faapea, e faamalosia ai lou faatuatua o le a faataunuu e Ieova lona finagalo, ma puipuia oe mai āuga o le agasala. E mafai ai foʻi ona e fesoasoani i isi ina ia iai ma tumau i le ala i le ola. O lea, ia faaaogā lelei le Tusi Paia, a o tatou auauna ai i lo tatou Atua atamai ma alofa o Ieova.