O Faalaeiauga “Mai i Gutu o Tamaiti”

Iā Tesema i le 2009, na lagolagoina ai e le Faamasinoga Maualuga i Rusia le faaiʻuga, ina ia faalēaogāina le faalapotopotoga o Molimau a Ieova i Taganrog i Rusia. Na aveesea ai le Maota o Sauniga mai Molimau a Ieova, ma e 34 a tatou lomiga na taʻuleagaina ai. Na faaalia lenei lipoti, faatasi ai ma ata o uso i Taganrog ma a latou fanau, i luga o le tuatusi aloaʻia a Molimau a Ieova.

Na maua mulimuli ane e le Ofisa Tutotonu o Molimau a Ieova i Rusia, se pusa o faamomoli ma se tusi mai se aiga i Kuiniselani i Ausetalia. Na faitau lenei aiga i le lipoti e faatatau i le faaiʻuga a le Faamasinoga i Rusia, i le tuatusi a Molimau a Ieova. Na faapea mai lenei tusi: “Uso Pelē, na matuā pāʻia loto o la ma fanau o Cody ma Larissa i le faatuatua o uō i Rusia, faapea tofotofoga o loo latou fesagaʻia. Na la tusia ni tusi, ae ma saunia se faamomoli o meaalofa mo fanau i Taganrog, e tau ina faailoa atu ai, e ui ina va i vasa, ae o loo iai isi tamaiti o loo auauna faamaoni iā Ieova, o loo mafaufau atu iā i latou. O loo momoli atu o la alofaaga mo i latou uma.”

Ina ua maua e tamaiti i Taganrog meaalofa, ona latou tusia lea o ni tusi ma ata e faafetai ai i le aiga i Ausetalia. Ona o le gaoioiga na fai e Cody ma Larissa, na uunaʻia ai se tasi o Molimau o loo i le lālā i Rusia e tusi e faapea: “Ua outou malamalama i faalogona o ē matutua ma fanau ina ua faasalaina fua i latou. E leʻi faia e uso ma tuafāfine i Taganrog se mea sesē, ae ua aveesea la latou Maota o Sauniga. Na latou matuā faanoanoa lava. E faalaeiauina i latou i le iloaina, o loo iai nisi i le isi itu o le lalolagi o loo mafaufau mai iā i latou.” Ona ia faafetaia lea o le alofa ma le agalelei na o latou faaalia.—Sala. 8:2.

O i tatou o se ʻauuso i le lalolagi aoao, ma ua fesoasoani le alofa o le tasi i le isi e tatou te fesagaʻia ai omiga ma faigatā. Ua tuuaʻia sesē Molimau a Ieova i le faatupuina o le feitagaʻi i tagata. Peitaʻi, ua faaalia e a tatou fanau mai atunuu ma aganuu eseese, le alofa ma le manatu mamafa o le tasi i le isi. Ua moni ai upu a Iesu: “O le mea lea e iloa ai e tagata uma o oʻu soo outou, pe afai ua outou alolofa o le tasi i le isi.”—Ioa. 13:35.

[Ata i le itulau 32]

O fanau i Rusia (agavale) lea na latou mauaina meaalofa mai fanau i Ausetalia (taumatau)