Ia Tumau Pea Lou Uiga Faanatinati
Ia Tumau Pea Lou Uiga Faanatinati
“Ia talaʻi atu le upu, ia maelega.”—2 TIMO. 4:2.
PE E MAFAI ONA E FAAMATALA?
Aiseā na apoapoaʻia ai Timoteo e aʻoaʻo atu ma le faanatinati?
E faapefea ona tatou faatumauina lo tatou uiga faanatinati?
O le ā le māfuaaga ua sili ai ona faanatinati i le taimi nei le talaʻia o le Malo, nai lo o se isi lava taimi?
1, 2. Ina ua timaʻi atu le aposetolo o Paulo ina ia talaʻi ma le “maelega,” o le ā na uiga atu i ai, ma o ā fesili ua lāgā ai?
E MASANI lava ona gaoioi ma le faanatinati tagata e galulue i galuega e faasao ai ola. O se faataʻitaʻiga, e nanati atu le ʻaufuimū i se faalavelave faafuaseʻi, ona e latou te iloa o loo iai ni ola i se tulaga lamatia.
2 I le avea ai ma Molimau a Ieova, e tatou te naunau e fesoasoani i tagata ina ia faasaoina. O le māfuaaga lea e tatou te manatu mamafa ai i lo tatou tofiga, o le talaʻia o le tala lelei o le Malo. O le mea moni, e lē faapea e tatou te soona pisi vale ai. Na avatu e le aposetolo o Paulo le timaʻiga lenei: “Ia talaʻi atu le upu, ia maelega.” (2 Timo. 4:2) O le uluaʻi upu i le gagana Eleni mo le “maelega,” e uiga atu i le “faia o mea ma le faanatinati.” O lea la, e faapefea ona tatou talaʻi ma le faanatinati? Aiseā e faanatinati ai la tatou galuega?
AISEĀ E FAANATINATI AI LA TATOU TALAʻIGA?
3. O ā iʻuga e mafai ona maua, pe a talia pe teena foʻi e tagata le feʻau o le Malo?
3 Pe a e manatu i la tatou talaʻiga o se galuega faasao ola, atonu o le a iai iā te oe se lagona o le faanatinati e taʻu atu i isi le tala lelei. (Roma 10:13, 14) Ua taʻua i le Afioga a le Atua: “Pe a ou fai atu i lē ua amioleaga: ʻE te oti lava,’ ae ua liliuese mai i lana agasala ma tausisi i le faia o mea tonu ma le amiotonu, . . . e ola pea o ia. E lē oti lava o ia. E lē toe teulotoina so o se agasala na ia agasala ai.” (Eseki. 33:14-16) O le mea moni, ua taʻu atu e le Tusi Paia i ē o loo aʻoaʻo atu le feʻau o le Malo e faapea: “E faaolaina ai oe lava atoa ma i latou o faalogo iā te oe.”—1 Timo. 4:16; Eseki. 3:17-21.
4. Aiseā na manaʻomia ai e Timoteo ona faatumauina se uiga faanatinati?
4 Ina ia iloa le māfuaaga na apoapoaʻi atu ai Paulo iā Timoteo ina ia faatumauina se uiga faanatinati, seʻi tatou mātau manatu o loo siʻomia ai le mau autū. E tatou te faitau ai e faapea: “Ia talaʻi atu le upu, ia maelega [faanatinati] i taimi e sologa lelei ai, ma taimi e lē sologa lelei ai, ia aʻoaʻi atu, ia matuā faatonu atu, ia apoapoaʻi atu ma le faapalepale ma le tomai e aʻoaʻo atu. Auā e iai le taimi e latou te lē toe taliaina ai aʻoaʻoga aogā, ae e tusa ai ma o latou lava tuʻinanauga, e latou te aoaoina aʻoaʻo mo i latou ina ia faalogo o latou taliga i mea e logolelei iā i latou lava; e liliuese foʻi o latou taliga mai i le upu moni, ae e liliu atu i tala sesē.” (2 Timo. 4:2-4) Sa valoia e Iesu o le a aliaʻe mai ē e liliuese mai i le upu moni. (Mata. 13:24, 25, 38) A o lata mai lenā vaitaimi, sa manaʻomia ai ona faanatinati Timoteo ina “ia talaʻi atu le upu,” e oo lava i totonu o le faapotopotoga, ina ia lē taaʻina ai Kerisiano i aʻoaʻoga taufaasesē. Sa iai i se tulaga lamatia ola o tagata i na aso. Ae faapefea aso nei?
5, 6. O ā aʻoaʻoga taatele atonu e tatou te faalogo ai i la tatou faiva?
5 Ua faatupulaʻia ma taatele i latou e liliuese mai i le tapuaʻiga moni. (2 Tesa. 2:3, 8) O ā aʻoaʻoga e logolelei i tagata i aso nei? I le tele o vaipanoa, e matuā faatāua ai e tagata le aʻoaʻoga o le evolusione. E ui ina faaaogā faaupuga faasaienisi e faamatala ai le evolusione, ae ua tai pei o se aʻoaʻoga faalotu, lea ua taaʻina ai le auala e manatu ai isi i le Atua ma tagata. O le isi aʻoaʻoga taatele, o le faapea lea e lē o manatu mai le Atua iā i tatou; o lea la, e leai se māfuaaga e tatau ai fua ona tatou fiafia iā te Ia. Aiseā ua faigofie ai i nei aʻoaʻoga ona taaʻina le faitau miliona o tagata, ma iʻu atu ai i le momoe faaleagaga? E tasi lava le feʻau o loo aumaia ai, ʻFai so o se mea e te loto i ai, auā e leai se isi e faasalaina oe.’ Ua logolelei i le toʻatele o tagata lenā feʻau.—Faitau le Salamo 10:4.
6 Peitaʻi, e iai foʻi isi auala ua aumaia ai aʻoaʻoga e logolelei i tagata. E fiafia ē o loo auai pea i lotu pe a fai atu taʻitaʻi lotu iā i latou, ʻE alofa lava le Atua iā te oe, e tusa po o le ā lau mea e fai.’ E faia e patele ma faifeʻau faamatalaga e logolelei i nisi, e ala i le faatalitonuina o i latou e faapea, o sauniga faalotu, aso faamanatu, Misasā ma faatusa, e maua ai faamanuiaga a le Atua. Peitaʻi, e lē iloa e nei tagata lotu ua latou iai i se tulaga lamatia. (Sala. 115:4-8) Ae o le a mafai e i latou ona maua aogā mai i le Malo o le Atua, pe afai e tatou te fafaguina i latou faaleagaga, ina ia mafai ona malamalama i le feʻau moni o le Tusi Paia.
O LE Ā LE UIGA O LE TALAʻI MA LE FAANATINATI I ASO NEI?
7. O le ā le auala e tatou te faaalia ai le iai o se uiga faanatinati?
7 E tatau i se fomaʻi tipitipi ona matuā uaʻi atoatoa atu i le faatinoga o lana galuega, ona o loo faalagolago iā te ia ola o tagata. I la tatou faiva faa-Kerisiano, e tatou te faaalia se uiga faanatinati i le uaʻi atu lea i la tatou galuega, e ala i le mafaufau i mataupu, fesili, po o faamatalaga e ono faaosofia ai le fiafia o tagata e tatou te feiloaʻi i ai. O le iai foʻi o se uiga faanatinati, atonu o le a uunaʻia ai i tatou e toe fetuutuunaʻi a tatou faasologa, ina ia asia tagata i taimi e talafeagai ma i latou.—Roma 1:15, 16; 1 Timo. 4:16.
8. O le ā e masani ona aofia ai i le gaoioi ma le faanatinati?
8 O le iai o se uiga faanatinati, e aofia ai foʻi le faatulaga o mea e tatau ona faamuamua. (Kene. 19:15) O se faaaʻoaʻoga, seʻi faapea ua lua talanoa ma le fomaʻi e faatatau i iʻuga o saʻiliʻiliga na maua mai e faatatau i lou maʻi, ma ua ia faapea atu: “Vaai! E tugā lava lou gasegase, e manaʻomia ona vave saʻili se vaifofō.” E mautinoa e te lē alu ese faanatinati mai i le ofisa o le fomaʻi, e pei o se tagata fuimū o loo nanati atu i se faalavelave faafuaseʻi. Peitaʻi, e te faalogo atu pea i ana fautuaga, ma pe a e toe foʻi i lou aiga, ona e mafaufau loloto lea i mea e tatau ona faamuamua.
9. Aiseā e mafai ai ona tatou faapea atu, na talaʻi ma le faanatinati Paulo a o iai i Efeso?
9 E mafai ona tatou malamalama i le uiga faanatinati na iā Paulo, i le mātauina lea o lana faamatalaga na faia i toeaina mai i Efeso, e uiga i lona talaʻia o le tala lelei i le itumalo o Asia. (Faitau le Galuega 20:18-21.) E foliga mai o le aso muamua lava na taunuu ai Paulo, na faaalu le tele o lona taimi i le talaʻi atu o le tala lelei mai lea fale i lea fale. E lē gata i lea, e lua tausaga sa ia pipiimau ai i se faasologa masani, o le faia lea o “lauga . . . i aso uma i le faleaʻoga o Turano.” (Galu. 19:1, 8-10) E manino mai, sa iai le aafiaga i le faasologa masani a Paulo ona o lona uiga faanatinati. O le fautuaga ina ia ʻfaanatinati i la tatou faiva,’ e lē faapea e faapopoleina ai i tatou i lo tatou tofiga. Ae ui i lea, e tatau ona faamuamua i o tatou olaga le galuega talaʻi.
10. Aiseā e tatou te lotofaafetai ai ona o gaoioiga faanatinati sa faia e Kerisiano, pe tusa o le 100 tausaga ua mavae?
10 A o leʻi oo i le 1914, na ō atu ai se vaega toʻaitiiti o Tagata Aʻoga o le Tusi Paia e amata le galuega talaʻi, ma ua faaalia mai i a latou faaaʻoaʻoga le iai o se uiga faanatinati. E ui lava e leʻi toʻatele i latou, ae na latou talia le tulaga faanatinati ua iai le taimi, ma sa latou maelega i le talaʻia o le Malo. Na lomia lauga na latou faia i le silia ma le 2,000 nusipepa, ma sa faaalia ni ata felanulanuaʻi e lē gaoioi ma ata gaoioi, lea na taʻua o le “Photo-Drama of Creation.” O lenei auala na mafai ai ona oo atu le tala lelei i le faitau miliona o tagata. Pe ana faapea e leʻi iai iā i latou se uiga faanatinati, faamata e toʻafia i tatou e faalogo i le feʻau o le Malo?—Faitau le Salamo 119:60.
IA FAATUMAUINA PEA LOU UIGA FAANATINATI
11. Aiseā ua mou atu ai le uiga faanatinati o nisi?
11 E mafai e mea e lē tāua tele, ona taaʻina ese ai le mafaufau o se tagata mai i le tāua o le galuega talaʻi. Ua uunaʻia i tatou e lenei lalolagi a Satani ina ia saʻilia mea e fiafia ai le tagata lava ia, ma mea e lē aogā. (1 Pete. 5:8; 1 Ioa. 2:15-17) Na iai nisi sa faamuamua le auaunaga iā Ieova, na mou atu lo latou uiga faanatinati. O se faaaʻoaʻoga, o se Kerisiano i le uluaʻi senituri e igoa iā Tema, o lē sa “galulue faatasi” ma Paulo, na iʻu ina taaʻina o ia i le faiga o mea o le lalolagi e lē matataʻu i le Atua. Nai lo o le faaauau pea e Tema ona faamuamua le faamalosiau atu iā Paulo i taimi o faigatā, ae na ia tuulafoaʻia Paulo.—File. 23, 24; 2 Timo. 4:10.
12. O le ā le avanoa o loo maua i le taimi lenei, ma o ā avanoa o le a tatou maua pe a ola e faavavau i le lumanaʻi?
12 Pe afai e tatou te mananaʻo e faatumauina pea lo tatou uiga faanatinati, e manaʻomia ona tatou teena le manaʻo tele i mea faafiafia o lenei olaga. E ao ona tatou galulue ina ia “taofimau i le ola moni.” (1 Timo. 6:18, 19) E mautinoa lava e te talitonu, o le a tele avanoa e te maua e faia mea e te fiafia i ai, pe a e ola e faavavau i le lalolagi i le pulega a le Malo o le Atua. Ae mo le taimi lenei, o se avanoa e lē toe maua, le fesoasoani lea i isi ina ia faasaoina mai iā Amaketo.
13. I le avea ai o i tatou o ni Kerisiano, e mafai faapefea ona faatumauina lo tatou uiga faanatinati?
13 Talu ai o le toʻatele o tagata i le lalolagi o loo momoe faaleagaga, o le ā e mafai ona fesoasoani iā i tatou ina ia ʻalofia le mou atu o lo tatou uiga faanatinati? E mafai ona tatou toe tomānatu i le taimi sa tatou pogisa faaleagaga ai, ma leai se faamoemoe mo le lumanaʻi. Peitaʻi, na fafaguina i tatou, ma e pei ona taʻua e Paulo, sa susulu mai le malamalama o Keriso iā i tatou. O lea ua tatou maua le faaeaga o le avea o ni ē e faasusulu atu le malamalama. (Faitau le Efeso 5:14.) Ina ua uma ona taʻua e Paulo lenā tulaga, ona ia tusi lea: “Ia outou matuā faautauta ina neʻi outou savavali e pei o ē e vālea, ae ia pei o ē e atamamai, ia outou faaaogā tatau le taimi, auā o aso nei ua leaga.” (Efe. 5:15, 16) E ui lava i na tulaga leaga, ae tatau pea ona tatou “faaaogā tatau le taimi” mo gaoioiga e mafai ona mataala ai pea faaleagaga.
O LOO TATOU OLA I VAITAIMI E SILI ONA TĀUA
14-16. O le ā le māfuaaga ua sili ai ona faanatinati i le taimi nei le talaʻiga o le Malo, nai lo o se isi lava taimi?
14 Ua leva ona iai i se tulaga faanatinati le faiva faa-Kerisiano, ae o lea ua sili atu ona tāua nai lo o se isi lava taimi. Talu mai le 1914, ua matuā manino mai le faailoga lea na taʻua i le Afioga a le Atua. (Mata. 24:3-51) Ua sili atu ona lamatia i le taimi nei le soifua o tagata, nai lo o se isi lava taimi. E ui lava i maliega sa faia e malo malolosi o le lalolagi talu ai nei, ae o loo iai pea pe tusa ma le 2,000 pomu faaniukilia, o loo latou faaagaga e faaaogā. Ua tele ina lipotia mai e taʻitaʻi o malo, le tele o meatau faaniukilia ua “leiloloa.” Pe faamata na ave e tagata faatupu faalavelave? Ua taʻua e nisi, e faigofie lava ona fasiotia ai tagata uma i se taua e faatupuina e se tagata faatupu faalavelave. Peitaʻi, e lē na o faiga taua lea o loo lamatia ai soifua o tagata.
15 Ua taʻua i se lipoti o le 2009 mai i le The Lancet ma le University College London e faapea: “O aafiaga o fesuiaʻiga i le tau, o le a aafia ai le toʻatele o tagata i le tele o tausaga a sau, aemaise le lamatia ai o ola o le faitau piliona o tagata.” E mafai ona telē se aafiaga, lea e aofia ai le siisii aʻe o le suāsami, mugālā, lologa, faamaʻi, afā, ma fetauaʻiga ona ua utiuti punaʻoa faalenatura. O le mea moni, ua lamatia soifua o tagata ona o faiga taua ma mala faalenatura.
16 E manatu nisi tagata atonu o le a faataunuu vala o “le faailoga” pe a amata se taua faaniukilia. Peitaʻi, e lē o malamalama le toʻatele i le uiga o le faailoga. Ua leva ona amata le faataunuuga o isi vala o le faailoga, lea ua faaalia ai o se mea moni lava le faatasi mai o Keriso, ma ua lata tele mai le iʻuga o lenei faiga o mea. (Mata. 24:3) O le taimi lenei ua sili ona manino mai ai le tele o vala o le faailoga. O lea la, e ao i tagata ona feala mai faaleagaga. E mafai e la tatou faiva ona fesoasoani iā i latou ina ia faia faapea.
17, 18. (a) O le ā le aafiaga iā i tatou ona ua tatou ola i taimi o le iʻuga? (e) O le ā e ono uunaʻia ai tagata ina ia suia o latou manatu i le feʻau o le Malo?
17 E lē o toe umi se taimi o totoe e faamaonia ai lo tatou alofa mo Ieova, ma faamāeʻa lo tatou tofiga o le galuega talaʻi i nei aso e gata ai. Ua sili atu ona tāua i aso nei upu a Paulo sa fai atu i Kerisiano i Roma i le uluaʻi senituri: “Ua outou iloa le taimi, ua oo mai le itula e tou te feala ai, auā o lea ua latalata mai lo tatou faaolataga nai lo o le taimi na tatou faatoʻā talitonu ai.”—Roma 13:11.
18 O mea na valoia o le a tutupu i nei aso e gata ai, e mafai ona nofouta ai tagata i o latou manaʻoga faaleagaga. E faatoʻā fiafia nisi o tagata e talia le feʻau o le Malo, pe a latou mātauina le lē taulau o faigāmalo faaletagata. E lē mafai e na malo ona foʻia le tulaga faalētonu o le tamaoaiga, faamataʻu mai o taua faaniukilia, faiga sauā, po o le faatamaʻia o le siʻosiʻomaga. Ae o isi e faatoʻā amanaʻia o latou manaʻoga faaleagaga, pe a iai ni mea e tutupu i o latou aiga, e pei o le faalētonu o le soifua mālōlōina, o se talagā faaipoipoga, po o le maliu o sē e pele. O le faia o so tatou sao i le faiva i le fanua, o le a mafai ai ona tatou avatu se fesoasoani i na tagata.
UUNAʻIA E GAOIOI ONA O SE UIGA FAANATINATI
19, 20. Ua faapefea ona uunaʻia le toʻatele o Kerisiano ina ia suia o latou olaga, ona o le iai o se uiga faanatinati?
19 O le iai o se uiga faanatinati, ua uunaʻia ai le toʻatele o Kerisiano ina ia faateleina lo latou sao i le faiva i le fanua. O se faaaʻoaʻoga, na filifili se ulugalii talavou mai Ecuador e faafaigofie o la olaga, ina ua māeʻa ona la auai i le polokalame o le aso faapitoa o fonotaga i le 2006, lea na faaulutalaina “Ia Lelei Ou Mata.” Na la faia se lisi o mea e la te lē manaʻomia, ma i totonu o le tolu masina, na la ō ese mai ai i se fale e tolu potu moe, ae nonofo i se fale e tasi le potu moe, faatau ese nisi o mea, ma totogi uma ai la aitalafu. E leʻi umi ae avea i laʻua o ni paeonia lagolago, ma sa la talia le fautuaga a le ovasia o le matagaluega, ina ia auauna i se faapotopotoga o loo tele ai le manaʻoga.
20 Na tusi se uso mai i Amerika i Mātū e faapea: “Ina ua ma auai ma laʻu avā i se tasi o fonotaga matagaluega i le 2006, o le taimi lenā ua 30 tausaga talu ona ma papatiso. A o ma agaʻi atu i le fale i le māeʻa ai o le polokalame, na ma talatalanoa ai i auala e faatatauina ai le fautuaga, ia faafaigofie o ma olaga. (Mata. 6:19-22) Sa iai ma fale, o lo ma fanua, o taavale taugatā, o se vaa, ma se kalaveni. Na ma manatu ua pei i maʻua o ni Kerisiano e leai se faautauta, o lea na ma filifili ai e fai ma o ma sini le auaunaga faataimi atoa. I le 2008, na amata ai ona matou galulue faatasi ma la ma tama teine o ni paeonia sauatoa. O se tulaga e olioli ai le galulue soosootauʻau ma le ʻauuso! Sa mafai ona ma auauna i le mea sa tele ai le manaʻoga. Aemaise, ua mafai ona ma mafuta vavalalata atu iā Ieova, ona o le tele o mea e faia i le auaunaga iā te ia. Peitaʻi, o le taui sili, o le vaaia lea o le fiafia o tagata pe a latou faalogo ma malamalama, i aʻoaʻoga moni mai i le Afioga a le Atua.”
21. O le ā le malamalamaga lea e uunaʻia ai i tatou ina ia talaʻi ma se uiga faanatinati?
21 Ua tatou iloa e lē o toe umi, ona oo mai lea o le “aso faamasino ma le faaumatiaga o tagata faalēmataʻu,” o lenei faiga amioleaga o mea. (2 Pete. 3:7) O lo tatou malamalamaga i le Afioga a le Atua, e uunaʻia ai i tatou ina ia faalauiloa atu ma le maelega le lata mai o le puapuaga tele ma le lalolagi fou. Ia faaauau pea ona iai se uiga faanatinati e taʻu atu le faamoemoe moni i tagata. O le faia o so tatou sao atoatoa i lenei galuega faanatinati, ua faaalia ai lo tatou alofa moni i le Atua ma o tatou uso a tagata.
[Fesili mo le Suʻesuʻega]
