Fesili Mai le ʻAufaitau

Pe e mafai ona faateʻaina se tasi mai i le faapotopotoga Kerisiano, ona o le fai ma ana masaniga le matamata i ata matagā tau feusuaʻiga?

▪ Ioe e mafai. O le māfuaaga lenā e tāua tele ai ona ʻalofia so o se ituaiga o ata matagā tau feusuaʻiga. E aofia ai tusi, mekasini, ata tifaga, vitiō, ma tuatusi i le Initaneti, lea e faamatalaina pe faaalia ai ata matagā tau feusuaʻiga.

O so o se vaega lava o le lalolagi ua maua ai ata matagā tau feusuaʻiga. Ua faatupulaʻia le fuainumera o tagata e matamata i ata matagā tau feusuaʻiga, ona ua faigofie ona matamata i ai i luga o le Initaneti. O nisi o tagata e faafuaseʻi lava ona vaaia ata matagā tau feusuaʻiga i nisi o tuatusi i le Initaneti. Ae o isi e fai lava ma le iloa, e ala i le saʻilia o tuatusi i le Initaneti o loo faaalia ai ia ituaiga o ata. Atonu e latou te lē o manatu mamafa i lea tulaga, ona e leai se isi o iloa atu o loo latou matamata faalilolilo i na ata i le fale po o le ofisa. Aiseā e mataʻutia ai le matamata o se Kerisiano i ata matagā tau feusuaʻiga?

E tatou te maua se tasi o māfuaaga tāua i le lapataʻiga lenei a Iesu: “Ai se tasi e vaavaai pea i se fafine ma manaʻonaʻo i ai, ua uma ona mulilua ma ia i lona loto.” (Mata. 5:28) E moni, o feusuaʻiga e patino i ulugalii faaipoipo, ma o se mea e la te maua uma ai le fiafia. (Faata. 5:15-19; 1 Kori. 7:2-5) Ae o loo faaalia i ata matagā tau feusuaʻiga ia feusuaʻiga lē mamā, ma o le a sesē ai manatu o tagata e pei lava  o le mea sa lapataʻi mai ai Iesu. O lea la, o le faitauina po o le matamata i ata matagā tau feusuaʻiga, e tutusa lenā ma le lē usitaʻia o le poloaʻiga lenei a le Atua: “O le mea lea, ia fasiotia tuʻinanauga i o outou itutino, o le faitaaga, o amioga lē mamā, le tuʻinanau i feusuaʻiga, o tuʻinanauga leaga ma le manaʻo tele, o le ifo i tupua lava lea.”—Kolo. 3:5.

O le ā le mea e mafai ona tupu i se Kerisiano, pe afai e faatasi pe faalua ona ia matamata i ata matagā tau feusuaʻiga? O loo ia tuuina o ia i se tulaga lamatia e pei lava o le faisalamo o Asafo, o lē na faapea mai: “A o aʻu, na toetoe ina a liliuese oʻu vae, na toetoe foʻi ina a see oʻu vae.” Pe afai sa matamata se Kerisiano i ata o tamāloloa ma fafine o loo telenonoa po o faia feusuaʻiga, e lē mafai ona ia maua se lotofuatiaifo mamā, aemaise se leleiga ma le Atua. O le a oo iā te ia lagona e pei ona sa oo iā Asafo, o lē na faapea mai: “Ua taia aʻu i mala i le aso atoa, ma ua faasaʻoina foʻi aʻu i taeao uma.”—Sala. 73:2, 14.

E tatau i se Kerisiano ona iloa, o le matamata i ata matagā tau feusuaʻiga, o le a aafia ai le la faiā ma Ieova, ma ua manaʻomia ai ona ia saʻili mo se fesoasoani. E na te mauaina lenā fesoasoani mai i toeaina o le faapotopotoga: “E ui lava ina uia e se tagata se laasaga sesē ae e na te leʻi iloaina, o outou o ē ua agavaa faaleagaga, ia taumafai e faasagatonu lenā tagata i le agaga o le agamalu, ma ia taʻitasi ma faaeteete.” (Kala. 6:1) E mafai e se toeaina Kerisiano e toʻatasi pe e toʻalua ona avatu le fesoasoani e manaʻomia e lenā Kerisiano, lea e aofia ai ʻtatalo e faia i le faatuatua lea e malosi ai le tagata maʻi, ma faamagaloina ai ana agasala.’ (Iako. 5:13-15) Sa maua e Asafo aogā mai i le faalatalata atu i le Atua. O i latou e mauaina le fesoasoani ina ia lē toe matamata i ata matagā tau feusuaʻiga, o le a maua aogā, lea o le a atili faaleleia ai la latou faiā ma Ieova.—Sala. 73:28.

Peitaʻi, na faapea mai le aposetolo o Paulo, e iai nisi sa agasala ae e leʻi faaalia le salamō mai “i a latou amioga lē mamā, ma le faitaaga, ma amioga matagā.” * (2 Kori. 12:21) Na tusi le polofesa o Marvin R. Vincent e faatatau le upu Eleni lea na faaaogā e Paulo mo “amioga lē mamā.” Sa ia faapea mai e faasino atu i le matuā matagā lava. O loo faaalia i ata matuā matagā lava tau feusuaʻiga, ia faiga faatauatane ma le tauafafine, feusuaʻiga e faia e se vaega o tagata, feusuaʻiga ma manu, ata matagā e faaaogā ai tamaiti i feusuaʻiga po o ata o tamaiti telenonoa, o vaega po o se kegi e faamalosia se tasi e faia feusuaʻiga, faileagaina o fafine, o feusuaʻiga e faia ma le sauā, po o le saisai o se tasi a o faia iai nei faiga. O nisi o tagata sa iai i vaitaimi o Paulo, sa “pogisa pea o latou mafaufau,” ma “ua lē toe lagona e i latou le mā, ua latou faia ai amioga matagā, ma amioga lē mamā uma ona o le manaʻo tele.”—Efe. 4:18, 19.

Sa taʻua foʻi e Paulo ʻamioga lē mamā’ i le Kalatia 5:19. Na taʻua e se tagata atamai mai i Peretania, o loo faasino atu le faaupuga lea o ʻamioga lē mamā’ i tuʻinanauga matuā sili ona leaga, ma e lē masani ai. E mautinoa lava e talitonu Kerisiano uma, o ituaiga uma o ata matagā tau feusuaʻiga lea na taʻua e matuā matagā lava. O nei ituaiga o ata, e uunaʻia ai tagata ina ia iai ni tuʻinanauga matuā sili ona leaga. I le Kalatia 5:19-21, ua faapea mai Paulo “o ē o loo faia” na amioga lē mamā, “e lē fai le malo o le Atua mo o latou tofi.” O le ā le mea e tupu i se tagata ua fai ma ana masani, pe atonu mo se taimi umi, o matamata i ata matagā tau feusuaʻiga, e aofia ai ma ata e matuā sili ona matagā? Pe afai e na te lē faaalia le salamō ma taofia lenā masaniga, o le a faateʻaina o ia mai i le faapotopotoga, ina ia puipuia ma faatumauina ai pea le tulaga mamā o le faapotopotoga.—1 Kori. 5:5, 11.

O se mea lelei le iloaina, sa maua e nisi na matamata i ata matagā tau feusuaʻiga le fesoasoani mai i toeaina, ma faia suiga i o latou olaga. Na ʻaiʻoi atu Iesu i Kerisiano i Sarataisa e faapea: ʻIa faamalosia mea o totoe o le a feoti, ia manatunatu pea i mea ua e maua ma mea ua e faalogo i ai, ma ia e tausi i ai, ma ia salamō. O le mea moni, afai e te lē ala i luga, e te matuā lē iloa foʻi po o lē fea itula ou te oo atu ai iā te oe.’ (Faaa. 3:2, 3) E mafai lava ona faaalia le salamō, ma ʻalofia ai āuga mataʻutia o le matamata i ata matagā tau i feusuaʻiga.—Iuta 22, 23.

E sili atu ona lelei mo i tatou le lē oo atu i se tulaga e lamatia ai faaleagaga, ona o ata matagā tau feusuaʻiga. O lea la, seʻi o tatou maumauaʻi e faia taumafaiga uma, ina ia ʻalofia ai so o se ituaiga o ata matagā tau feusuaʻiga!

[Faaopoopoga i lalo]

[Faamatalaga faaopoopo i le itulau 30]

E tatau i se Kerisiano ona iloa, o le matamata i ata matagā tau feusuaʻiga, o le a aafia ai le la faiā ma Ieova ma ua manaʻomia ai ona ia saʻili mo se fesoasoani