O Loo Ola le Afioga a Ieova

Manatu Tāua Mai le Tusi o Faaaliga—II

O LE ā o taatia mai mo i latou o loo tapuaʻi iā Ieova le Atua, ma ē e lē tapuaʻi iā te ia? O le ā le mea o le a tupu iā Satani ma ana temoni? O ā faamanuiaga o le a maua e tagata usiusitaʻi a o faagasolo le Pulega o le Afe Tausaga? O loo maua tali o nei fesili ma nisi fesili tāua, i le Faaaliga 13:1–22:21. * O le a maua i mataupu nei ia vaaiga mulimuli e 9 mai vaaiga e 16, lea na vaaia e le aposetolo o Ioane a o lata ina faaiʻu le senituri muamua T.A.

Na tusi Ioane e faapea: “E fiafia lē e faitau, ma i latou e faalogo i upu o lenei valoaga, ma tausi i mea o tusia ai.” (Faaa. 1:3; 22:7) O le faitauina ma le faatatauina o mea e tatou te aʻoaʻoina mai le tusi o Faaaliga, e aafia ai o tatou loto, e faamalosia ai lo tatou faatuatua i le Atua ma lona Alo, o Iesu Keriso, ma maua ai se faamoemoe pupula mo le lumanaʻi. *—Epe. 4:12.

UA SASAAINA IPU E FITU O LE TOʻASĀ O LE ATUA

(Faaa. 13:1–16:21)

Ua faapea mai le Faaaliga e 11:18, “Ua ita foʻi nuu, ma ua oo mai ai lou [le Atua] toʻasā, ma le taimi atofaina . . . ma faafanoina ai i latou o loo faaleagaina le laueleele.” Ina ia iloa le māfuaaga o le oo mai o le toʻasā o le Atua, o loo faailoa mai e le vaaiga lona valu gaoioiga a le “manu feʻai ua alu aʻe mai le sami, e sefulu ona seu ma ona ulu e fitu.”—Faaa. 13:1.

I le vaaiga lona iva, na vaaia ai e Ioane o loo “tū mai le Tamaʻi Mamoe i le Mauga o Siona, ma o loo faatasi ma ia le selau fā sefulu ma le fā afe.” O i latou nei na “faatauina mai i tagata.” (Faaa. 14:1, 4) Ona sosoo ai lea ma faasilasilaga mai agelu. I le vaaiga o sosoo mai, na iloa ai e Ioane “agelu e toʻafitu ua iai mala e fitu.” E mautinoa lava o Ieova na faatonuina nei agelu, e sasaaina atu “ipu e fitu o le toʻasā o le Atua” i vaega eseese o le lalolagi a Satani. O nei ipu o loo iai faasilasilaga ma lapataʻiga o sala faafaamasinoga o le a faia e le Atua. (Faaa. 15:1; 16:1) O vaaiga nei e lua, o loo aumaia ai faamatalaga o isi faamasinoga a le Malo, lea e fesootaʻi atu i le auē lona tolu ma le iliina o le pū lona fitu.—Faaa. 11:14, 15.

Taliina o Fesili Faale-Tusi Paia

13:8—O le ā le “tusi tāʻai o le ola a le Tamaʻi Mamoe”? O se tusi tāʻai faafaatusa lea e na o igoa o i latou e pule faatasi ma Iesu Keriso i lona Malo faalelagi, o le a iai. E tusia ai foʻi ma igoa o Kerisiano faauuina lea o loo soifua pea i le lalolagi, o ē o loo faamoemoe e ola i le lagi.

13:11-13—E faapefea i le manu feʻai e lua ona seu, ona tautala e pei o se tarako ma faapogaia le afi e alu ifo mai le lagi? O le tautala e pei o se tarako o lenei manu feʻai e lua ona seu—malo fuifuilua malolosi o Amerika ma Peretania, e faailoa mai ai lona faaaogāina o faamataʻuga, o omiga, ma faiga sauā ina ia faamalosia ai tagata e talia lana pulega. E na te faapogaia le afi e alu ifo mai le lagi i le faafoliga mai, na ia faia le tiute o se perofeta moni, e ala i le faapea mai na ia faatoʻilaloina malosiaga leaga i le taimi o taua e lua a le lalolagi i le senituri lona 20, ma sa manumalo o ia i vaega faa-Komunisi.

16:17—O le ā le “ʻea” lea na sasaa atu i ai le ipu lona fitu? O lenei “ʻea” o loo faaāta mai ai mafaufauga faa-Satani, “o le agaga  [uunaʻiga faalemafaufau] lea o loo galue i fanau e lē usiusitai.” O loo mānavaina lenei ʻea oona e i latou uma o loo iai i le faiga o mea amioleaga a Satani.—Efe. 2:2.

Lesona mo i Tatou:

13:1-4, 18. O loo faaāta mai e “le manu feʻai” ia malo faaletagata lea ua “alu aʻe mai le sami,” lea e faaata mai ai le anoanoaʻi o tagata fesouaʻiina. (Isa. 17:12, 13; Tani. 7:2-8, 17) O lenei manu feʻai lea na faia ma tuu atu i ai e Satani le malosi, o loo iā te ia le numera 666, lea ua faamamafa mai ai lona tulaga matuā lē lelei atoatoa. O lo tatou malamalama i le manu feʻai, o le a fesoasoani iā i tatou ina ia aua le viiviia ma tapuaʻia o ia e pei ona faia e le toʻatele o tagata.—Ioa. 12:31; 15:19.

13:16, 17. E ui lava i le faigatā o loo tatou fesagaʻia i le faia o nei gaoioiga masani o aso uma, e pei o le “faatau mai pe e faatau atu,” e lē tatau ona tatou faataga le manu feʻai e pulea o tatou olaga. O le taliaina o le ‘⁠faailoga o le manu feʻai i o tatou lima po o tatou muāulu,’ o le a iʻu i lo tatou faatagaina o le manu feʻai e pulea a tatou gaoioiga ma o tatou mafaufau.

14:6, 7. Ua tatou aʻoaʻoina mai le faasilasilaga a le agelu, e tatau ona tatou folafola ma le faanatinati le tala lelei o le Malo o le Atua lea ua faavaeina. E ao ona tatou fesoasoani i a tatou tagata aʻoga o le Tusi Paia, ina ia atiaʻe se mataʻu tatau mo le Atua ma avatu le viiga iā te ia.

14:14-20. Pe a māeʻa le seleselega o “fuata o le lalolagi” o lona uiga o le aoaoina mai o ē o le a faaolaina, ona aoaoina lea e le agelu o “vine o le lalolagi” ma lafo “i le soligavine tele o le toʻasā o le Atua.” O lenei vine—faigāmalo fevaevaeaʻi leaga a Satani i tagata, faatasi ma ona “fuifui” o fua leaga—o le a faaumatia e faavavau. E ao ona tatou maumauaʻi e aua neʻi taaʻina i tatou e le vine o le lalolagi.

16:13-16. O “faamatalaga lē mamā” o loo faaāta mai e manatu faatemoni ia o loo fai ina ia faamautinoa e lē o taaʻina tupu o le lalolagi i le sasaaina mai o ipu e fitu o le toʻasā o le Atua, ae e faapogaia ai i latou ina ia tetee iā Ieova.—Mata. 24:42, 44.

16:21. A o lalata mai le iʻuga o lenei lalolagi, atonu o le a aofia i le folafolaina o sala faafaamasinoga a Ieova faasaga i le faiga o mea leaga a Satani, ia faamatalaga matuā malolosi o faamasinoga a le Atua, lea e faaāta e pei o ni uatoʻa. Ae ui i lenā, e toʻatele pea tagata o le a fai upuleaga i le Atua.

UA PULE LE TUPU MANUMALO

(Faaa. 17:1–22:21)

O “Papelonia Tele,” po o le emepaea o lotu sesē a le lalolagi, o se vaega inosia lea o le lalolagi amioleaga a Satani. I le vaaiga lona 11, o loo faaāta ai o ia i se “fafine talitane sili”—fafine amio lē mamā—“o loo tiʻetiʻe i luga o le manu feʻai e lanu mūmū sesega.” O le a faaumatia atoatoa o ia e “seu e sefulu” o le manu feʻai lea o loo tiʻetiʻe ai. (Faaa. 17:1, 3, 5, 16) I le faatusaina o le fafine talitane i se “aai tele,” o loo faasilasila ai i le vaaiga o sosoo mai lona paʻū ma aumaia ai se valaau faanatinati i tagata o le Atua ina ia “ō ese mai iā te ia.” Ua matuā faanoanoa le toʻatele ona o le lē toe iai o lenei aai tele. Ae peitaʻi, ua olioli le lagi ona o le “faaipoipoga a le Tamaʻi Mamoe.” (Faaa. 18:4, 9, 10, 15-19; 19:7) I le vaaiga lona 13, o loo taʻu mai ai le tagata tiʻetiʻe o “se solofanua paʻepaʻe” o loo alu atu e tau ma atunuu. O le a ia faaumatia atoatoa le lalolagi amioleaga a Satani.—Faaa. 19:11-16.

Ae o le ā o le a tupu i le “uluaʻi gata lea, o le Tiapolo ma Satani”? O afea o le a ‘lafo ai o ia i le lepa afi’? O se tasi lenā o mea o loo talanoaina i le vaaiga lona 14. (Faaa. 20:2, 10) O loo aumaia e vaaiga mulimuli e lua ni vaaiga pupuu o le olaga a o faagasolo le Meleniuma. A o lata ina faaiʻu le “faaaliga,” na vaaia ai e Ioane ‘se vaitafe o le vai o le ola, o loo tafe mai i le ogatotonu o le ala tele,’ ma faalogoina se valaaulia manaia o loo faasafua mai i “so o se tasi e fia inu.”—Faaa. 1:1; 22:1, 2, 17.

 Taliina o Fesili Faale-Tusi Paia:

17:16; 18:9, 10—Aiseā o le a faanoanoa ai ‘tupu o le lalolagi’ i se aai na latou faaumatiaina? E matuā manatu faapito le māfuaaga ua latou faanoanoa ai. Pe a māeʻa ona faaumatia Papelonia Tele, o le a iloa e tupu o le lalolagi sa aogā o ia iā i latou. Sa ia faia auala e talia ai a latou faiga piʻopiʻo. Sa fesoasoani foʻi Papelonia Tele iā i latou i le faamalosia o talavou e ō i taua. E lē gata i lea, sa ia faia se sao tele i le faapogaia o tagata e gauaʻi atu iā i latou.

19:12—Aiseā e na o Iesu ai e silafia lona suafa e lē o taʻua? E foliga mai o lenei suafa, e faaāta mai ai le tulaga ma tofiga faapitoa, e pei o suafa o loo taʻua i le Isaia 9:6, lea na maua e Iesu a o faagasolo le aso o le Alii. E leai se tasi na te iloa lenei suafa ua na o Iesu lava, auā o nei tofiga e tutasi, ma ua na o ia lava e malamalama i le tāua o lenā faaeaga mamalu. Peitaʻi, o loo faatino e Iesu nei tofiga faatasi ai ma sui o lana vasega faatoʻānofotane, auā o le a ia ‘tusia foʻi i luga o i latou lona suafa fou.’—Faaa. 3:12.

19:14—O ai o le a tiʻetiʻe faatasi ma Iesu iā Amaketo? O le “ʻautau o le lagi” lea o le a faatasi ma Iesu i le taua a le Atua, o le a aofia ai agelu faapea ma le ʻaufaauuina manumalo o ē ua maua lo latou taui faalelagi.—Mata. 25:31, 32; Faaa. 2:26, 27.

20:11-15—O igoa o ai o loo tusia i le “tusi tāʻai [po o le “tusi”] o le ola”? O le tusi tāʻai lenei o loo iai igoa o i latou uma o le a mauaina le ola e faavavau, lea e aofia ai Kerisiano faauuina, le motu o tagata e toʻatele, ma auauna faamaoni a le Atua o ē o le a ‘toetutū mai o tagata amiotonu.’ (Galu. 24:15; Faaa. 2:10; 7:9) O i latou o le a toe soifua mai i le ‘toetutū o tagata amiolētonu,’ o le a tusia o latou igoa i le “tusi tāʻai o le ola” pe afai latou te gaoioi e tusa ai ma “mea na tusia i tusi tāʻai” o faatonuga, lea ua tatalaina a o faagasolo le Meleniuma. Peitaʻi, e lē o tusiaina o latou igoa i se vaitusi tumau. O le a tusiaina tumau igoa o le ʻaufaauuina pe afai latou te faamaoni pea seʻia oo i le oti. (Faaa. 3:5) O le a tusiaina tumau igoa o ē ola i le lalolagi i lea tusi, pe afai latou te sao mai le tofotofoga mulimuli i le faaiʻuga o le afe tausaga.—Faaa. 20:7, 8.

Lesona mo i Tatou:

17:3, 5, 7, 16. E fesoasoani le “poto mai lugā” iā i tatou ina ia malamalama ai i le “mea lilo i le fafine ma le manu feʻai o loo tiʻetiʻe ai o ia.” (Iako. 3:17) Sa faaāta mai e lenei manu feʻai ia Malo Sosoo i le taimi muamua, ma sa mulimuli ane faaāta mai ai Malo Aufaatasi. Po ua lē avea ea le iloaina o lenei mea lilo, ma mea e uunaʻia ai i tatou ina ia maelega i le talaʻia o le tala lelei o le Malo o le Atua, ma folafola atu pea le aso o le faamasinoga a Ieova?

21:1-6. Ia tatou talitonu maumauaʻi o le a tutupu moni faamanuiaga lea na folafola mai i lalo o le pulega o le Malo. Aiseā? Ona sa taʻua, o na faamanuiaga: “Ua Taunuu!”

22:1, 17. O loo faaataina mai e le “vaitafe o le vai o le ola” sauniuniga a Ieova, mo le toe faafoʻisia i se tulaga lelei ia tagata usiusitai, ona o le agasala ma le oti. O loo maua se vaega o lenei vai i le taimi nei. Seʻi tau ina lē gata e tatou te talisapaia atoatoa le valaaulia ia ō mai ma “ave fua le vai o le ola,” ae ia tatou naunau foʻi e tufa atu i isi lenā vai o le ola!

[Faaopoopoga i lalo]

[Ata i le itulau 5]

Maʻeu le ofoofogia o faamanuiaga o le a maua e tagata usiusitai i lalo o le pulega o le Malo!