“Tausisi i Mea e Faatupu ai le Filemu”

ATONU e foliga mai e faigatā ona leaga se auala faatoʻā uma lava ona tanu maa ma faalamolemole. Peitaʻi, a o faagasolo taimi, e oo ina amata ona māvaevae ma omoomo. E ao ona toe faaleleia ina ia saogalemu ma lelei pea lenā auala.

E faapena foʻi la tatou faiā ma isi, e iai taimi e tulaʻi mai ai ni faafitauli ma oo ai ina faaleagaina. Sa faailoa mai e le aposetolo o Paulo se eseesega i manatu sa iai i le ʻau Kerisiano i Roma. Sa ia fautua atu e faapea: “Seʻi tatou tausisi i mea e faatupu ai le filemu, ma mea e atiaʻe ai e le tasi le isi.” (Roma 14:13, 19) Aiseā e tāua ai le “tausisi i mea e faatupu ai le filemu”? E faapefea ona tatou taumafai malosi e tausia le filemu?

Aiseā e Tausisi ai i le Filemu?

Pe afai e lē faaleleia ni nai māvaevae i le auala, e mafai ona avea ma omoomo sili ona leaga. E faapena foʻi ona leaga le tulaga e oo i ai ni nai feeseeseaʻiga laiti i le va o i tatou ma isi tagata, pe a lē foʻia. Na tusi le aposetolo o Ioane: “Afai e faapea mai se tasi: ‘Ou te alofa i le Atua,’ ae e ʻinoʻino i lona uso, o ia o le pepelo. Auā o lē e lē alofa i lona uso, o lē ua ia vaai atu i ai, e lē mafai ona ia alofa i le Atua, o lē ua ia lē vaai atu i ai.” (1 Ioa. 4:20) O le lē foʻiaina o se feeseeseaʻiga i le va ma se tasi, e ono faapogaia ai se Kerisiano e ita i lona uso.

Sa taʻua e Iesu Keriso e lē taliaina e Ieova la tatou tapuaʻiga iā te ia, pe afai tatou te lē faatupu le filemu i le va ma isi. Na faatonu e Iesu ona soo e faapea: “Pe afai foʻi e te avatu lau taulaga i le fata faitaulaga, ona e manatua ai lea o loo iai se mea e lē malie ai lou uso iā te oe, inā tuu ia o lau taulaga i luma o le fata faitaulaga, ae ia e alu e muaʻi faalelei ma lou uso, ona e sau ai lea ma avatu lau taulaga.” (Mata. 5:23, 24) Ioe, o le māfuaaga autū tatou te tausisi ai i le filemu, ona tatou te mananaʻo e faafiafia Ieova. *

O se mea na tupu i le faapotopotoga i Filipi, sa iloa ai se isi māfuaaga e tāua ai ona tausisi i le filemu. Sa iai se faafitauli e lē o faailoa maia, na tupu i le va o ni tuafāfine Kerisiano se toʻalua, o Evotia ma Sunetui, lea sa lamatia ai le filemu o le faapotopotoga atoa. (Fili. 4:2, 3) O le lē foʻiaina o feeseeseaʻiga i le va ma isi, e vave lava ona iloa e isi tagata. E mafai e se faanaunauga e faatumau pea le alofa ma le autasi o le  faapotopotoga, ona uunaʻia ai i tatou e tausia le filemu i le va ma o tatou uso.

Na fetalai Iesu: “E fiafia o ē faatupuina le filemu.” (Mata. 5:9) O le tausisia o le filemu, e maua ai le faamalieina moni. E lē gata i lea, e fesoasoani le filemu i le mauaina o le soifua mālōlōina lelei, auā o le “loto lelei, o le ola lea o le tino.” (Faata. 14:30) Ae i le isi itū, o le teuloto pea o le ita e tatou te ono mamaʻi ai.

E ui lava o le toʻatele o Kerisiano e ioe e faapea e tatau ona tausisia le filemu, ae atonu o loo e taumānatu pe faapefea ona foʻia se feeseeseaʻiga i le lua va ma se tasi. Seʻi o tatou iloiloina mataupu silisili faale-Tusi Paia e mafai ona fesoasoani iā i tatou.

O Talanoaga Filemu, e Faatumau ai le Filemu

E masani ona faaleleia ni nai māvaevae i le auala e ala i le toe tanu o le vaega lea ua faaleagaina. Pe e mafai ona tatou faamagalo ma ufiufi ni nai masei laiti o o tatou uso? Atonu o le a aogā lenei auala i le tele o feeseeseaʻiga i le va ma uso, auā na tusi le aposetolo o Peteru “o le alofa e ufiufi ai le anoanoaʻi o agasala.”—1 Pete. 4:8.

Ae i nisi taimi, e lē faigofie ona faagalo ni faafitauli tugā. Seʻi mātau le mea na tupu i tagata Isaraelu a o faatoʻā uma lava ona latou maua le tofi o le Nuu o le Folafolaga. A o leʻi ō atu le “fanauga a Reupena, ma le fanauga a Kato, ma le tasi vaega o le itu aiga o Manase” i le isi itu o le vai o Ioritana, na latou faia se “fata faitaulaga tele e iloagofie.” Sa manatu isi ituaiga o Isaraelu, o lea fata faitaulaga sa faaaogā e tapuaʻi ai i tupua, ma ua tatau ona foʻia le faafitauli ua tulaʻi mai. Sa latou sauni loa e siitaua atu.—Iosua 22:9-12.

Atonu sa manatu isi ituaiga o Isaraelu ua iai se faamaoniga o la latou mea sesē ua fai, ma pe afai latou te faia se osofaʻiga faalilolilo, o le a toʻalaiti ni o latou tagata e maliliu. Peitaʻi, nai lo le vave gaoioi, sa aauina atu e ituaiga i le itu i sisifo o Ioritana nisi e fai ma o latou sui, ina ia talanoa le mataupu ma o latou uso. Na latou fesili atu: “Se a lenei mea leaga ua outou agaleaga ai i le Atua o Isaraelu e liliu ese i le aso nei, neʻi outou mulimuli atu iā Ieova?” Peitaʻi, e leʻi agaleaga le isi ituaiga lea na faia le fata faitaulaga. Sa faapefea la ona latou tali mai i lea tuuaʻiga? Po o le a latou faia ni faamatalaga faatigā i o latou uso pe mumusu foʻi e toe talanoa iā i latou? Sa latou tali mai ma le filemu, i le faamatala mai ma le manino, o la latou gaoioiga sa fai na uunaʻia e lo latou faanaunauga e fia auauna iā Ieova. Ona o lo latou tali mai ma le filemu, sa tumau ai la latou faiā ma le Atua ma faasaoina ai o latou ola. Ioe, o talanoaga filemu, sa foʻia ai le faafitauli ma faatumauina ai le filemu.—Iosua 22:13-34.

A o leʻi vave ona gaoioi isi ituaiga o Isaraelu, sa lelei le auala na latou talanoaina ai le faafitauli faatasi ma le ituaiga o Reupena ma Kato, ma  le isi ʻafa o le ituaiga o Manase. O loo taʻua i le Afioga a le Atua e faapea, “Aua le faataalise ona ita o lou loto; auā e tumau le ita i loto o ē valelea.” (Fai. 7:9) O le auala faale-Tusi Paia e taulima ai feeseeseaʻiga tugā i le va o uso, o le talanoa lea i se auala filemu ma faaali saʻo atu manatu. Pe tatou te faatalitalia faamanuiaga a Ieova, pe afai tatou te teuloto le ita ma lē mafai ai ona tatou talanoa i le tagata lea na faatigā mai iā i tatou?

I le isi itu, e faapefea ona tatou tali atu pe a talanoa mai se uso po o se tuafafine iā i tatou e uiga i se faafitauli, po o le tuuaʻia sesē foʻi o i tatou? O loo taʻua i le Tusi Paia, “O le tali filemu e liliueseina ai le ita.” (Faata. 15:1) Sa tali mai ituaiga o Isaraelu ia na faatigā i ai isi ituaiga, i se auala filemu ma faamalamalama lo latou tulaga, ma na foʻia ai le feeseeseaʻiga na fesagaʻi ma o latou uso. E tusa lava pe tatou te tausolomua e talanoa atu i so tatou uso pe talanoa mai le uso e uiga i se faafitauli, atonu e lelei ona tatou fesili ifo iā i tatou lava, “O ā upu, ma le ituaiga leo, ma uiga e ao ona ou faaalia ina ia tausisia ai pea le filemu?”

Faaaogā ma le Atamai le Laulaufaiva

E silafia lelei e Ieova e manaʻomia ona tatou faaali atu o tatou popolega. Pe afai tatou te lē taulau i le foʻiaina o ni feeseeseaʻiga i le va ma isi, atonu la o le a tatou manatu e talanoa atu i se tasi e uiga i le faafitauli. O le teulotoina o le ita e faigofie lava ona taʻitaʻia atu ai i le taufaaleaga. E tusa ai ma le faaaogāina sesē o le laulaufaiva, o loo taʻua i le Faataoto 11:11 e faapea: “A o gutu o ē amio leaga, e lepetia ai [le aai].” I se tulaga tutusa, pe a lē pulea faamatalaga e lafo i se uso Kerisiano, e mafai ona saveʻuina ai le filemu o le faapotopotoga lea e pei o se aai.

Peitaʻi, o le tausisia o le filemu, e lē faapea ai o le a ʻalofia talanoaga uma e faatatau i o tatou uso ma tuafāfine. Na faalaeiau e Paulo uso talitonu e faapea: “Ia aua neʻi alu atu se upuleaga mai i o outou gutu.” Na ia toe faapea mai: “A ia fai atu ni upu lelei e atiaʻe ai i taimi e tatau ai, ina ia aogā i ē o faalogologo i ai. . . . Ia agalelei le tasi i le isi, ia māfana lo outou alofa, ma ia fefaamagaloaʻi ma le lotoatoa.” (Efe. 4:29-32) Pe afai e faalatalata atu se uso iā te oe ona ua lē fiafia i sau tala na fai po o sau amio foʻi, aiseā e te lē faatoese atu ai ma faatupu le filemu pe afai na te leʻi talanoa atu i isi e uiga iā te oe? O le faaaogā o faamatalaga e atiaʻe ai pe a talanoa e faatatau i o tatou uso Kerisiano, o le a faigofie ai ona tatou faatumau le filemu pe a tulaʻi mai ni feeseeseaʻiga.—Luka 6:31.

Ia Auauna i le Atua ma le “Loto Gatasi”

O le tulaga masani o tagata lē lelei atoatoa, o le faamamao lea mai iā i latou na faatigā iā i tatou, ma faaesea i tatou. Peitaʻi, e lē atamai lenā auala. (Faata. 18:1) I le avea ai o i tatou ma tagata autasi o ē valaau i le suafa o Ieova, e tatou te taumafai e “auauna iā te ia ma le loto gatasi.”—Sefa. 3:9.

E lē tatau ona faavaivaia lo tatou maelega i le tapuaʻiga moni, ona o se faamatalaga po o se amio lē talafeagai a se isi. A o leʻi oo i le aso na ofo atu ai e Iesu lona ola e suia ai taulaga uma na faia i le malumalu, ma e leʻi leva foʻi ona ia taʻusalaina le ʻautusiupu, sa ia silafia se fafine mativa ua oti lana tane o loo “lafo uma tupe ua iā te ia e ola ai,” i totonu o le mea e teu ai tupe. Pe sa taumafai Iesu e taofi o ia? E leai, sa ia taʻuleleia le faamaoni o lea fafine ona o le lagolagoina o le faapotopotoga a Ieova i lenā taimi. (Luka 21:1-4) E leʻi avea amioga lē lelei a isi e taofia ai o ia mai le lagolagoina o le tapuaʻiga iā Ieova.

E ui lava e tatou te lē fiafia i se gaoioiga lē lelei pe lē saʻo a se uso po o se tuafafine e faaali mai iā i tatou, ae o le a faapefea ona tatou gaoioi? Po o le a avea lenā mea e faavaivaia ai i tatou mai le auauna ma le lotoatoa iā Ieova? Po o le a tatou lototetele e foʻia nisi o feeseeseaʻiga i le va ma isi, ina ia faatumau ai pea le filemu o le faapotopotoga a le Atua i aso nei?

O loo fautua mai le Tusi Paia: “Afai e mafai iā te outou, ia nonofo filemu ma tagata uma.” (Roma 12:18) Tau ina ia tatou taulau i le faia o lea tulaga, ma ia tumau pea i le ala o le ola.

[Faaopoopoga i lalo]

[Ata i le itulau 17]

Sa tatau ona tausisia e Evotia ma Sunetui le filemu

[Ata i le itulau 18]

O ā upu, ma le ituaiga leo, ma uiga e ao ona ou faaalia ina ia tausisia ai le filemu?