Le Auala e Totō ai le Alofa i le Atua i le Loto o Lou Alo

I ASO nei, o se luʻi mo se tagata le taumafai e ati aʻe se faiā vāvālalata ma Ieova le Atua. (Salamo 16:8) E pei ona valoia, o loo tatou ola nei i “aso faigatā.” O le toʻatele o tagata, “ua tele le manaʻo i mea faafiafia a e leai se manaʻo i le Atua.” (2 Timoteo 3:1-5) Ua faigatā ona maua le alofa moni i le Atua i le lalolagi i aso nei.

O le tupu aʻe o le alofa i le Atua i le loto o se tamaitiiti, e lē o se mea e teʻi lava ua iai. E tatau ona totō i loto o a tatou fanau le alofa mo Ieova le Atua. E faapefea ona faia lea mea?

Talanoaga Māfana

E mafai ona tatou totōina le alofa i le Atua i loto o a tatou fanau, pe afai e faatumulia o tatou lava loto i le alofa iā te ia. (Luka 6:40) Ua faaalia i le Tusi Paia lenā tulaga i le faapea mai: “Ia e alofa atu iā Ieova lou Atua ma lou loto atoa, ma lou agaga atoa, ma lou malosi atoa. Ia i ai foʻi i lou loto o upu nei ou te fai atu ai iā te oe i le aso nei. Ia e matuā aʻoaʻo soo ai i lau fanau.”—Teuteronome 6:4-7.

E faapefea ona totō le alofa i le Atua i le loto o lau tama? Muamua lava, e ao ona tatou iloa le mea o loo i lona loto. O lona lua, e tatau ona faaalia le mea o loo i o tatou lava loto.

A o agaʻi atu Iesu i le ala i Emau ma ona soo e toʻalua, na ia faalaeiau muamua ona soo e faaali mai mea o loo la faamoemoe i ai, faapea ma mea o loo la popole ai. Sa faalogologo Iesu mo se taimi, a o leʻi faasaʻoina o la manatu i lona faamalamalamaina o mea o loo tusia i le Tusi Paia. Na la fetautalatalaaʻi mulimuli ane: “E leʻi mu ea o ta loto i totonu iā i taʻua, ina ua fetalai o ia iā te i taʻua?” O le faataʻitaʻiga lenā o se talanoaga māfana. (Luka 24:15-32) E faapefea ona tatou iloa lagona o se tamaitiiti?

Na fesiligia talu ai nei nisi o mātua, e faatatau i a latou talanoaga māfana ma a latou fanau ua matutua po ua agaʻi ina matutua, ma o loo avea ma faaaʻoaʻoga lelei i totonu o le faapotopotoga. O se faataʻitaʻiga i Mekisikō, o Glen e toʻafā lana fanau ua matutua. * Na ia faapea mai: “O talanoaga māfana a mātua ma fanau e lē o se mea e faafuaseʻi ona tupu. E itiiti le taimi ma te faaaogā i mea e lē tāua tele, ina ia tele se taimi ma te faatasitasi ai ma le ma fanau. A o laiti i le va o le 13 i le 19 o latou tausaga, matou te faaalu le afiafi atoa e talatalanoa ai po o ā lava mea e latou te mananaʻo ai. E faapena foʻi i le taimi matou te aai ai, o le ma faalogologo atu i a latou talanoaga e ma te iloa ai ni faalētonu i mea o mafaufau i ai, faapea ma a latou amio. Ona faasaʻo lea ma le agalelei se faanaunauga sesē o iai, ma o le tele o taimi e latou te lē iloa o lea e faasaʻoina i latou.”

E aofia ai foʻi i talanoaga māfana le faaalia o mea o loo i o tatou lava loto. Na fetalai Iesu: “Ua au mai mea lelei e le tagata amio lelei i mea lelei ua teu i lona loto; . . . auā o le tele o mea i le loto e tautala mai ai lona gutu.” (Luka 6:45) Ua faapea mai Toshiki e toʻatolu lana fanau e i le auaunaga faataimi atoa i Iapani: “E tele taimi ou te talanoa ai iā i latou i le māfuaaga ua ou faatuatua ai iā Ieova—le māfuaaga ou te talitonu atoatoa ai o loo soifua o ia, ma mea ua oo iā te aʻu ua ou talitonu ai i le moni o le Tusi Paia, ma o se taʻiala sili ona lelei i le olaga.” Ua faapea mai Cindy e nofo i Mekisikō: “E tatalo faatasi laʻu tane ma le fanau i taimi uma. Pe a latou faalogo i upu e sau mai i lona loto, e latou te iloa ai o loo soifua moni Ieova.”

Se Taaʻiga Malosi o a Tatou Faaaʻoaʻoga

O le auala o loo tatou ola ai e sili atu ona malosi taaʻiga na i lo upu, ona e faaalia ai i a tatou fanau le tele o lo tatou alofa i le Atua. O le mātauina o le usiusitaʻi o Iesu Keriso iā Ieova, na iloa ai e tagata le tele o lona alofa i le Atua. Na  fetalai Iesu: “Ina ia iloa e le lalolagi, ou te alofa i le Tamā faapei ona poloaʻi mai foʻi o le Tamā iā te aʻu, e faapea lava ona ou faia.”—Ioane 14:31.

Na faapea mai Gareth, o ia o se Molimau a Ieova i Uelese: “E tatau ona iloa e la ma fanau e ma te alolofa iā Ieova, ma o loo ma taumafai e fai mea i lana auala. Mo se faataʻitaʻiga, e iloa e le fanau, ou te taʻu atu mea ou te sesē ai ona o loʻu usiusitaʻi i mea o loo fetalai mai ai le Atua e fai. Ma o loo faia foʻi faapena e la ma fanau.”

Ua taʻua e Greg, e nofo i Ausetalia: “E ma te mananaʻo e iloa e la ma fanau, e ma te faatāua le upu moni i o ma olaga. Pe a fai sa ma filifiliga i se galuega e fai po o ni evaevaga, e ma te mafaufau muamua po le ā le aafiaga o le a iai i o ma tiute faa-Kerisiano. O se fiafiaga iā i maʻua le vaai atu o loo faia foʻi e la ma tama teine e 19 ona tausaga, le mea lava lea e tasi i lana auaunaga paeonia lagolago o loo fai.”

Fesoasoani i a Tatou Fanau ia Malamalama i le Atua

E lē mafai ona tatou alolofa pe faatuatuaina se tasi e tatou te lē malamalama i ai. Ina ua manaʻo Paulo ina ia tutupu aʻe Kerisiano i Filipi i le alofa iā Ieova, na ia tusi e faapea: “O laʻu tatalo foʻi lenei, ia faatuputeleina pea lava lo outou alofa, ma le iloa lelei, atoa ma le faautauta uma.” (Filipi 1:9) Ua faamatalaina e Falconerio, o loo tausia aʻe lana fanau e toʻafā i Peru e faapea: “O le faitau, faapea ma le suʻesuʻeina o le Tusi Paia e lē aunoa ma i latou, ua faamalosia ai lo latou faatuatua. Pe a ou lē taulau e suʻesuʻe ma i latou, ou te iloa atu ua vaivai lo latou alofa i le Atua.” Na taʻua e Gary mai Ausetalia: “Ou te faailoa i le tele o taimi i laʻu fanau faamaoniga o le faataunuuina o valoaga o le Tusi Paia. Ou te taʻu atu foʻi iā i latou aogā, o le faatatauina o mataupu silisili o le Tusi Paia i o latou olaga. O le faia e lē aunoa e le matou aiga o le suʻesuʻega faale-Tusi Paia, o le vala tāua lea i le atiina aʻe o lo latou faatuatua.”

O le a sili ona oo le poto i le loto o se tamaitiiti pe a aʻoaʻoina i se siʻomaga toʻafimālie, ae o loo iai pea le feāvataʻi lea e olioli ai. (Iakopo 3:18) Na taʻua e Shawn ma Pauline mai Peretania e toʻafā le la fanau: “Pe a faia le suʻesuʻega faale-Tusi Paia a lo matou aiga, e ma te taumafai e ʻalofia le otegiaina o la ma fanau, e tusa lava po  ua fai si o latou vaogatā. E eseese lava auala e faia ai la matou suʻesuʻega. O nisi taimi e ma te tuu atu i tamaiti e filifili e i latou se mataupu e suʻesuʻe. E matou te faaaogā se ata vitiō mai le faalapotopotoga a Molimau a Ieova. O nisi taimi e toe faaali ai se vaega o le ata po o le taofi foʻi ina ia talanoaina ni manatu o loo iai.” Ua faapea mai foʻi se tinā mai Peretania e igoa iā Kim: “Ou te sauniuni lelei lava mo le suʻesuʻega a lo matou aiga, ina ia ou fai atu ni fesili e mafaufau ai laʻu fanau. E matou te fiafia lava i la matou suʻesuʻega, ma e iai foʻi taimi matou taliē ai.”

Filifilia o Uō

O le alofa iā Ieova ma le faatāuaina o le tapuaʻiga moni, e faigofie ona tupu aʻe i a tatou fanau pe a siʻomia e tagata o loo avea ma uō a le Atua. O le faatulaga o ni aumea e aogā i le fanau e latou te talanoa ma latou taaalo faatasi, e manaʻomia ai ni taumafaiga. Ma o se taumafaiga aogā tele le faia faapea! E lē gata i lea, e aogā tele le faafeiloaʻi atu o a tatou fanau i Molimau a Ieova, o loo avea le auaunaga faataimi atoa ma a latou galuega i le olaga. O le toʻatele o ē ua latou filifilia lea galuega, ona na latou auaumea ma auauna maelega a le Atua. Ua faapea mai se tamaʻitaʻi misionare: “E tele taimi na valaaulia ai e oʻu mātua paeonia mo se taumafataga. E iloa atu lo latou fiafia i la latou auaunaga, lea na ou manaʻo ai foʻi e auauna i le Atua i le auala lava lea e tasi.”

O le mea moni, e taaʻina uiga o a tatou fanau i le lelei po o le leaga foʻi. O lea la, o le lamatiaga o fanau i aumea leaga, e tofotofoina ai le tomai o mātua e aʻoaʻo atu ai. (1 Korinito 15:33) E manaʻomia se tomai faapitoa e aʻoaʻoina ai fanau laiti e ʻalofia le auaumea faatasi ma ē e lē alolofa iā Ieova, pe lē iloa foʻi o ia. (Faataoto 13:20) Ua faapea mai Shawn, lea na taʻua muamua: “E ma te aʻoaʻoina la ma fanau laiti ia mafuta lelei ma tamaiti i le aʻoga, ae ia gata ai lava i le aʻoga. E malamalama le ma fanau i le māfuaaga e lē auai atu ai i gaoioiga, po o taaloga faaopoopo i le aʻoga.”

Aogā o Toleniga

O le toleniina o a tatou fanau e faamatala atu o latou talitonuga i isi, ua tatou fesoasoani ai iā i latou ia fiafia e faailoa atu lo latou alofa i le Atua. Ua faapea mai Mareko e nofo i le Iunaite Setete: “E ma te mananaʻo e lagona e la ma fanau tama, e mafai foʻi ona la talanoa atu i o la talitonuga i isi i so o se taimi, ae lē na o le taimi e ō ai i le talaʻiga. O lea la, pe a matou ō e tafafao, e pei o le ō i le paka, matāfaga po o le togāvao foʻi, e matou te ō lava ma ave Tusi Paia ma lomiga faale-Tusi Paia, ma matou talanoa i tagata i mea e matou te talitonu i ai. E ese le fiafia o la ma fanau e matou te molimau atu faapena i se tulaga lē fuafuaina. E auai foʻi i laʻua i le talanoaga ma taʻu atu o la talitonuga.”

Na fesoasoani le aposetolo matua o Ioane i le toʻatele o tagata, ina ia tupu aʻe lo latou alofa i le Atua. Na ia tusi atu iā i latou e faapea: “E leai soʻu fiafia e sili i lenei, pe a ou faalogo ua savavali laʻu fanau [faaleagaga] i le upu moni.” (3 Ioane 4) Pe a tatou totō le alofa i le Atua i loto o a tatou fanau, o le a tatou maua le fiafia lava lea e tasi e pei o Ioane.

[Faaopoopoga i lalo]

[Ata i le itulau 9]

O talanoaga māfana i mataupu e faatatau i o tatou talitonuga, e lē teʻi lava ua tupu

[Ata i le itulau 10]

Ia toleni lau fanau e faailoa atu lo latou alofa i le Atua

[Ē Ana le Ata]

Courtesy of Green Chimneys Farm