Pe E te Manatua?

Pe na e fiafia i le faitauina o lomiga fou o Le Olomatamata? Seʻi taumafai pe e mafai ona e taliina fesili nei:

• O ā auala e fā e faaaogā ai e Tusitusiga Kerisiano Eleni le upu “faapotopotoga”?

O le faatatauga autū lava o Kerisiano faauuina uma (i isi tusitusiga e aofia ai ma Keriso). O isi taimi o le “faapotopotoga a le Atua” e faasino atu i Kerisiano o loo ola i se vaitaimi patino. O le faatatauga lona tolu e faasino atu i Kerisiano uma i se vaipanoa telē. O le lona fā e faasino iā i latou o loo faia aʻe ai se faapotopotoga.—4/15, itulau 21-23.

• O afea e muta ai le valaauina o Kerisiano e iai le faamoemoe mo le lagi?

E lē o maʻoti se tali o lenā fesili i le Tusi Paia. Na amata lenā valaauina i le 33 T.A. ma faaauau mai i aso nei. Ina ua mavae le 1935 ua liliu atu le faia o soo i le aoaoina o le motu o tagata e toʻatele. O nisi na papatiso ina ua mavae le 1935, na molimau i ai le agaga iā i latou e latou te maua le faamoemoe i le lagi, e lē mafai la ona tatou taʻua se vaitaimi patino e faamuta ai lenā valaauina. E lē faapea e tele atu le fesoasoani a le agaga paia i ē faauuina, ma latou te lē faatalitalia foʻi e auauna atu isi iā i latou. Po o le ā lava le faamoemoe, e manaʻomia e Kerisiano faamaoni ona tumau i le faia o le finagalo o le Atua.—5/1, itulau 30-31.

• Ina ua fai e Iefata lana tautoga, pe na ia sauni e avatu lona afafine o se taulaga mū i le Atua?

E leai. Na uiga atu le tala a Iefata o le a ia tuuina atu se tasi o le a faafeiloaʻi maia o ia e auauna i le Atua i le olaga atoa, o se faatulagaga sa aofia i le Tulafono a Mose. (1 Samuelu 2:22) Ina ia faataunuu le tautoga, na faaauau pea ona auauna le afafine o Iefata i le malumalu, o se taulaga telē ua fai, auā o lona uiga o le a lē faaipoipo o ia i lona olaga atoa.—5/15, itulau 9-10.

• O le ā le matafaioi a le codex na faia i le uluaʻi Faa-Kerisiano?

Na tele ina faaaogā e Kerisiano le tusi taai i le iʻuga o le uluaʻi senituri T.A. I le senituri lona lua T.A., na iai se feteenaʻiga i le va o tagata na mananaʻo e faaaogā le tusi e fai itulau, le codex, ma ē e mananaʻo e faaaogā pea le tusi taai. E talitonu tagata popoto o le faaaogā e Kerisiano o le codex, sa telē sona sao i le taliaina e le toʻatele.—6/1, itulau 14-15.

• O le ā lenei mea o le Kalena a Kasera?

O se tamaʻi papamaa na mauaina i le 1908 i le aai o Kasera. E toʻatele e manatu i ai o se tusitusiga a se tamaitiiti aʻoga e tusia pei o se solo. O lenei papamaa o loo iai tusitusiga faafaigofie o le faasologa o mea tau faatoʻaga i se tausaga lea e amata i le seleselega, lea e fetaui iā Setema/Oketopa ma o loo taʻua ai fua o faatoʻaga eseese ma isi galuega tau faatoʻaga.—6/15, itulau 8.

• O le ā le uiga o le agasala i le agaga paia?

E mafai ona agasala se tasi i le agaga paia o Ieova, o se agasala e lē faamagaloina. (Mataio 12:31) E filifilia e le Atua po ua tatou faia se agasala e lē faamagaloina, ma o ia e filifilia po ua tatau ona aveesea lona agaga mai iā i tatou. (Salamo 51:11) Afai e tatou te matuā faanoanoa i se agasala ua tatou fai, e ono uiga lenā mea ua salamō moni ma lē agasala ai i le agaga paia.—7/15, itulau 16-17.

• Talu ai o lea sa feutagaʻi muamua Saulo ma Tavita, ae aiseā la na fesili ai le tupu o Saulo po o Tavita ea o se atalii o ai? (1 Samuelu 16:22; 17:58)

E lē na o le igoa o le tamā o Tavita lea sa fia iloa e Saulo. Ona o le vaaia e Saulo o Tavita o se tagata e matuā telē lona faatuatua ma le loto tele, lea ua mafai ona ia faatoʻilaloina Koliata. Sa fia iloa la e Saulo, le ituaiga tamā na ia tausia aʻe lenei tama. Atonu pe na mafaufau Saulo, ua tatau foʻi la ona avatu Iese ma isi tagata o lona aiga i le ʻautau.—8/1, itulau 31.