Kirisimasi—O Fea o Agaʻi i Ai?

I LE 10 tausaga ua mavae i le masina lava lenei, na faasalalau ai i le amataga o le mekasini U.S.News & World Report le mataupu, “Saʻiliʻiliga mo le Kirisimasi.” Na faaautū le mataupu po ua agaʻi atu i se “tulaga mamā ma faaitiitia ai fefaatauaʻiga” e faia i le Kirisimasi. Po o le mea moni lenā o tupu?

Na faamalamalama i le mataupu māfuaaga e lē tatau ai ona tatou faatalitalia lenā mea. Ua taʻua ai: “E leai se faamaumauga o le faamanatuina aloaʻia o le fanau mai o Keriso seʻia oo i le senituri lona fā, ina ua avea Konesetatino ma . . . emeperoa o Roma.” Ua faaalia ai i inā sina vaega o “le mea moni e faapea, e leai se tasi na mautinoa le aso na fanau mai ai Iesu.” Na ioe le mataupu, e “leʻi taʻua e le ʻaufaievagelia le tausaga, le masina tonu po o le aso.” E tusa ai o le faamatalaga a se tusitala o talafaasolopito mai le Iunivesite o Texas, “e leʻi fiafia uluaʻi Kerisiano e faamanatu le fanau mai o Iesu.”

I le tamaʻi ulutala “Mataupu o Matematega,” na iloilo ai “pe na faapefea ona filifilia e le lotu le aso 25 o Tesema.” Ua taʻua ai: “O le manatu taatele, o le aso mālōlō o se faa-Kerisiano lea o le sauniga e taʻua o le Saturnalia, ma isi sauniga faapaupau.” “O le tuu o le Kirisimasi i le taufaaiʻuiʻuga o Tesema i le taimi ua leva ona masani tagata e faamanatu ai, ua faamautinoa ai e taʻitaʻi lotu ua lauiloa le faamanatuina o le fanau mai o le Faaola.” I le ogatotonu o le senituri lona 19, na toe suia ai le mea e faatāua o lea aso, i le faatau mai ma le avatu o meaalofa. “Na faapogaia e lenei tū fou o le Kirisimasi lea e avatu ai meaalofa, se tamaoaiga tele, ma na amata faasalalau ai loa e le ʻaufaatauʻoa ma le ʻaufaifaasalalauga le vaitau o le Kirisimasi.”

E pau le itu lea e agaʻi i ai le Kirisimasi, o le agaʻi ese atu ma le Faa-Kerisiano. E ui ua tele “fefaatauaʻiga eseese” o le Kirisimasi i aso nei, ae e lē taitai faatalitalia Kerisiano moni e faamanatu le fanau mai o Iesu. Na i lo lea, ua faatāua i le Tusi Paia le togiola na saunia e Iesu e ala i lona maliu ma le toe faatūina aʻe i le lagi. (Mataio 20:28) O le a tumau pea ona tāua lenā mea e faavavau.