Faateleina le Olioli ma le Mamalu o le Aso o Lau Faaipoipoga

NA FAAPEA mai Gordon, o lē ua toeitiiti atoa le 60 tausaga talu ona faaipoipo: “O le aso o laʻu faaipoipoga o se aso na sili ona tāua ma ou olioli ai i loʻu olaga.” Aiseā e tāua ai le aso o le faaipoipoga mo Kerisiano moni? O se aso ua latou faia ai se tautoga i ē ua alolofa faapelepele i ai—o lana paaga ma Ieova le Atua. (Mataio 22:37; Efeso 5:22-29) Ioe, o ē o loo fuafua e faaipoipo e mananaʻo ia fiafia i lo la aso, ma e mananaʻo foʻi e faamamaluina Lē na uluaʻi faavaeina le faaipoipoga.—Kenese 2:18-24; Mataio 19:5, 6.

E faapefea e le alii faaipoipo ona faateleina le mamalu o lenei faatasiga fiafia? E faapefea i le tamaʻitaʻi faaipoipo ona faaalia lona āva i lana tane ma Ieova? E faapefea i ē auai atu ona saosaolaumea i le fiafia o le aso o le faaipoipoga? O le tilofaʻia o ni mataupu silisili a le Tusi Paia o le a fesoasoani e taliina na fesili, ma o le faatatauina o na taʻiala, o le a faaitiitia ai ni faafitauli e ono tulaʻi mai i lenei aso.

O Ai e Ana le Tiute Tauave?

I le tele o atunuu, e ono faia ai e se faifeʻau a Molimau a Ieova ua lesitalaina le sauniga o le faaipoipoga. E oo lava i nofoaga ia e tatau ona faia e se tagata o le malo le faaipoipoga, ae e ono mananaʻo le ulugalii e faia se lauga e faavae mai le Tusi Paia. O na lauga, ua faamanatu atu ai i le alii faaipoipo ina ia mafaufau i lana matafaioi mai le Atua o se ulu o le aiga. (1 Korinito 11:3) O le alii faaipoipo, o ia lea e gafa ma tiute tauave o mea e fai i le faaipoipoga. O fuafuaga mo le sauniga o le faaipoipoga ma isi faatasiga e mulimuli mai, e tatau lava ona vave faatulagaina. Aiseā e avea ai lenei vala ma luʻi?

O se tasi o māfuaaga, o le mananaʻo lea a lē o le tamaʻitaʻi faaipoipo, po o lona aiga, ia po o le aiga foʻi o le alii faaipoipo e pulea fuafuaga o le faaipoipoga. Ua faapea mai Rodolfo, o lē sa tele ni faaipoipoga na ia faia: “I nisi taimi e fesagaʻi ai le alii faaipoipo ma omiga mai tauaiga, aemaise lava pe afai o loo fesoasoani tauaiga i le faatupeina o le ʻaiga o le faaipoipoga. E iʻu ai ina malolosi tele o latou taofi i mea e ao ona fai o le sauniga o le faaipoipoga faapea ma le ʻaiga. O lenei mea o le a oo ina lē amanaʻia ai le matafaioi faale-Tusi Paia a le alii faaipoipo, o lē e ana le tiute tauave mo lea aso.”

Na faapea mai Max, o se tasi foʻi o fai faaipoipoga mo le silia i le 35 tausaga: “Ua ou mātauina, ua fai ma masani i tamaʻitaʻi faaipoipo le taulamua i le faiga o tonu o mea e fai i le sauniga o le faaipoipoga ma le ʻaiga, ae tau leai se manatu o le alii faaipoipo e fai.” Ua faapea mai Tavita o se isi foʻi fai faaipoipoga: “O nisi alii faaipoipo e lē masani ona taʻimua i le faiga o tonu, ma ua lē atoatoa foʻi ona agavaa i le tele o tapenaga mo le faaipoipoga.” E faapefea la i le alii faaipoipo ona faatinoina lelei lona tiute tauave?

E Faateleina le Olioli i le Fetalanoaaʻi

Ina ia taulau manuia le alii faaipoipo i le tauaveina o lana tiute tauave i tapenaga o le faaipoipoga, e ao ona fetalanoaaʻi. Ua faapea mai le Tusi Paia: “E faalēaogāina mafaufauga pe a leai se filifiliga; a e faatumauina i le toʻatele o faipule.” (Faataoto 15:22) Ae peitaʻi, e tele ni faafitauli e ono foʻia pe afai e talanoa  muamua le alii faaipoipo e faatatau i tapenapenaga o le faaipoipoga i le tamaʻitaʻi faaipoipo, tauaiga ma isi e mafai ona aumaia se fautuaga lelei mai le Tusi Paia.

Ioe, e ao i se alii ma se tamaʻitaʻi ua faamau, ona fetalanoaaʻi i fuafuaga ma mea e ono tutupu mai. Aiseā? Sei manatu i nisi o faamatalaga a Ivan ma lana avā o Delwyn, ua taulau le la faaipoipoga mo le tele o tausaga e ui e eseese aganuu ma olaga na ola aʻe ai. Na faapea mai Ivan, a o toe manatunatu i fuafuaga o le la faaipoipoga: “Sa i ai oʻu manatu i mea tonu sa ou manaʻo e fai mo laʻu faaipoipoga, ia aofia ai aʻu uō uma lava i le ʻaiga, o se keke faaipoipo ma laʻu teine e laʻeiina se ofu faaipoipo paʻepaʻe. A o Delwyn sa manaʻo i se faaipoipoga e laʻitiiti, faafaigofie ma e leai se keke faaipoipo. Sa ia mafaufau foʻi e laʻeiina se ofu e pei lava ona masani ai.”

Na faapefea la i lenei ulugalii ona foʻia o la feeseeseaʻiga? E ala i se talanoaga tuusaʻo ma agalelei. (Faataoto 12:18) Na faapea atili mai Ivan: “Sa ma suʻesuʻeina lomiga faale-Tusi Paia i mataupu e faatatau i faaipoipoga e pei ona lomia i le Olomatamata faa-Peretania o Aperila 15 1984. * Na fesoasoani lenā mataupu iā i maua ina ia iai se vaaiga faaleagaga mo lea sauniga. E ui i o ma eseesega i tū ma aganuu, ae na manaʻomia ona fetuutuunaʻi manaʻoga o le tagata lava ia ma o lea na mafai ai ona maua se maliega faatasi.”

O le auala lava lea e tasi na mulimuli ai Aret ma Penny. Na faapea mai Aret e faatatau i le aso o le la faaipoipoga: “Sa ma talatalanoa ma Penny e faatatau i o ma faanaunauga eseese mo le faaipoipoga, ma sa mafai ona ma malilie faatasi. Sa ma tatalo mo le faamanuiaga a Ieova i lea aso. Sa ou fesili foʻi i o ma mātua ma isi ulugalii e matutua faaleagaga i totonu o le faapotopotoga mo sa latou fautuaga. Na fesoasoani tele a latou fautuaga ma iʻu lelei ai lo ma aso.”

Tausia Pea le Mamalu i Laʻei ma Teuga

O se tulaga malamalama le fia mananaʻo o le tamaʻitaʻi ma le alii faaipoipo e laʻei lelei mo le faaipoipoga. (Salamo 45:8-15) E ono faaalu le taimi, taumafaiga ma tupe mo ni ofu talafeagai. O ā mataupu silisili o le Tusi Paia e mafai ona fesoasoani iā i laʻua e filifili ni laʻei mamalu ma matagofie?

Seʻi manatu i teuga a le tamaʻitaʻi faaipoipo mo lea faamoemoe. E ui ina eseese teuga mai lea atunuu i lea atunuu ma lea tagata i lea tagata, ae e aogā le fautuaga mai le Tusi Paia i so o se mea lava. O fafine “ia latou teuteu iā i latou i ofu e onomea, ma ia lē teuanoaʻi.” O lea fautuaga e faatatau i fafine po o  tamaʻitaʻi Kerisiano i taimi uma, ma e mautinoa e aofia ai le aso o le faaipoipoga. O le mea moni, e lē manaʻomia ni “ofu tau tele” pe taugatā mo se faaipoipoga fiafia. (1 Timoteo 2:9; 1 Peteru 3:3, 4) Maʻeu le faamalieina pe a faatatauina lenei fautuaga!

Ua faapea mai Tavita lea na taʻua muamua: “E toʻatele ulugalii e taumafai e mulimuli i mataupu silisili a le Tusi Paia, ma e ao ona faamālō iā i latou. Ae ua iai taimi e lē onomea ai ofu o le tamaʻitaʻi faaipoipo ma ana aumea mamae, a lē maulalo tele le ua o le ofu pe valavala foʻi.” I le uluaʻi feiloaʻiga a se toeaina Kerisiano ma le tamaʻitaʻi ma le alii faaipoipo, na ia fesoasoani ai iā i laʻua e faatumauina se vaaiga faaleagaga i laʻei ma teuga. E faapefea? E ala i le fesili atu iā i laʻua pe talafeagai a la teuga o loo mafaufau e fai, ma pe onomea ia laʻei pe a fai i sauniga faa-Kerisiano. E moni o le a ofuina ni ofu e ese mai ofu masani i sauniga, pe ofuina foʻi se ofu e faaata ai tū ma aganuu a lea vaipanoa, ae peitaʻi o le onomea e tatau ona fetaui ma tulaga faa-Kerisiano. E ui e manatu nisi tagata, e faasāsā naʻuā le Tusi Paia i tulaga tau amio, ae lotomalilie Kerisiano moni e teena le amio faatasi ma le lalolagi i tulaga tau laʻei ma teuga.—Roma 12:2; 1 Peteru 4:4.

Na faapea mai Penny: “Na i lo le vaai i laʻei ma le ʻaiga o se mea e sili ona tāua, ae sa ma taulaʻi atu ma Aret i le tāua o le sauniga faaleagaga. O le vaega pito sili lea ona tāua o le aso. O mea tāua ou te manatuaina e lē o oʻu ofu po o meaʻai, ae o i latou na auai, faapea ma oʻu lagona fiafia ina ua ou faaipoipo i le alii ua ou alofa i ai.” E lelei i alii ma tamaʻitaʻi Kerisiano o loo fuafua e faaipoipo ona teu i mafaufau nei manatu a o sauniuni le la faaipoipoga.

Le Maota mo Sauniga —O se Nofoaga Mamalu

E toʻatele Kerisiano e faanaunau e faia sauniga o a latou faaipoipoga i le Maota mo Sauniga pe a avanoa. Aiseā e mananaʻo ai e faia faapea? Ua faamatala mai e se tasi ulugalii a la māfuaaga: “Ua ma iloaina o le faaipoipoga o se faatulagaga tāua mai iā Ieova. O le faia o la ma faaipoipoga i le Maota mo Sauniga, o le nofoaga e avatu ai la tatou tapuaʻiga, na fesoasoani e faamalosia iā i maua le manatu, e tatau ona avea Ieova ma vaega o la ma faaipoipoga mai lava i le amataga. O le isi aogā o le faia o le sauniga i le Maota mo Sauniga na i lo le faia i se isi nofoaga, e faaali atu ai i o ma tauaiga e lē o ni Molimau na auai le tāua iā i maʻua o le tapuaʻi iā Ieova.”

Afai e faatagaina e toeaina o loo vaaia le Maota mo Sauniga le faia o le faaipoipoga i inā, e tatau i le alii ma le tamaʻitaʻi ona logo vave i latou i tapenapenaga o le a faia. O se tasi o auala e faaalia ai e le tamaʻitaʻi ma le alii faaipoipo le faaaloalo i a la valaaulia, o le maumaututū lea e taunuu i le Maota i le taimi faatulagaina. E la te faamautinoa foʻi e faia mea uma i se auala mamalu. * (1 Korinito 14:40) E la te ʻalofia foʻi faiga faaalialia vale e pei ona mātaulia ai faaipoipoga a i latou e lē o ni Kerisiano.—1 Ioane 2:15, 16.

E mafai foʻi e i latou e auai i le faaipoipoga ona faaalia o loo iā i latou le silafaga a Ieova i faaipoipoga. O se faaaʻoaʻoga, latou te lē faatalitalia le faaipoipoga ia sili atu i isi faaipoipoga faa-Kerisiano, e pei o se tauvaga po o ai e sili le manaia o lana faaipoipoga. O Kerisiano e matutua faaleagaga, latou te iloaina e sili atu ona tāua ma aogā lo latou auai atu i le lauga faale-Tusi Paia, na i lo le ʻaiga po o le faatasiga mulimuli ane. A faapea e na o le tasi le faatasiga e mafai ona auai ai se Kerisiano mai ia mea e lua, e sili la ona ia auai i le sauniga. Na faapea mai se toeaina e igoa iā Viliamu: “A faapea e tau leai nisi i le sauniga o le faaipoipoga ae toʻatele i le ʻaiga, e faaalia  mai ai le lē talisapaia mo le mamalu o le sauniga. E tusa pe e lē o valaaulia i tatou i le ʻaiga, ae e faaalia lo tatou lagolagosua i le tamaʻitaʻi ma le alii faaipoipo ma avatu se molimau lelei i tauaiga e lē o ni Molimau a Ieova o loo auai, e ala i le auai i le sauniga i le Maota mo Sauniga.”

Le Olioli e Tumau Pea pe a Mavae le Aso o le Faaipoipoga

O faiga tau i fefaatauaʻiga ua avea ai sauniuniga o faaipoipoga ma pisinisi e maua ai alaga tupe lelei. E tusa ai ma se lipoti lata mai nei e faatatau i faaipoipoga, e pe ā ma le $22,000 Amerika e faaalu i se faaipoipoga, po o le ʻafa lea o le tupe maua a se aiga i Amerika i le tausaga. O aafiaga mai faasalalauga faapisinisi, ua toʻatele ai ulugalii fou ma o latou aiga, ua mafatia i aitalafu na faia mo lenā aso e tasi, lea o le a alu ni tausaga o tau totogi. Faamata o se auala poto lea e amata ai se faaipoipoga a se isi? Atonu e filifilia e i latou e lē iloa pe lē manatu mamafa i mataupu silisili o le Tusi Paia, ni faaipoipoga tetelē ae maʻeu le eseese ma Kerisiano moni.

O le faaitiitia o le numera o le ʻauvalaaulia i se aofaʻiga e talafeagai ma mafai ona gafatia, ae taulaʻi atu i le tāua faaleagaga o le sauniga, ua toʻatele ulugalii Kerisiano ua mafai ona faaaluina o latou taimi ma meatotino i la latou auaunaga i le Atua. (Mataio 6:33) Sei manatu i le faaaʻoaʻoga a Lloyd ma Alexandra, o ē o loo faaauau pea ona auauna faataimi atoa mo le 17 tausaga talu ona uma ona faaipoipo. Sa faapea mai Lloyd: “O nisi sa manatu faatauvaa i la ma faaipoipoga, ae na ma fiafia lava ma Alexandra. Na ma manatu o la ma faaipoipoga e lē o se aso e mafatia ai e tau totogi ni tupe faaalu, ae o se faatulagaga a Ieova ina ia maua ai e tagata se toʻalua le fiafiaga tele.”

Sa faaopoopo atili mai Alexandra: “Sa fai laʻu paeonia ae ma te leʻi faaipoipo, ma ou te leʻi fia manaʻo e tuua lenei faaeaga tau lava ina ia faia ai se faaipoipoga telē. O la ma faaipoipoga o se aso sa tāua tele. Ae peitaʻi, ua na o se amataga o aso e tele o lo ma olaga faaipoipo. Sa ma faatatauina le fautuaga ina ia aua le popole naʻuā i sauniuniga o le faaipoipoga, ae ia taulaʻi atu la ma vaai i taʻiala a Ieova i o ma olaga faaipoipo. O le mea lea ua mautinoa ai lo ma mauaina o faamanuiaga mai iā Ieova.” *

Ioe, o le aso o lau faaipoipoga o se aso e tāua tele. O uiga ma gaoioiga o le a faaalia i lenā aso, o le a avea ma taʻiala i le lua olaga faaipoipo mo tausaga a sau. O lea la, ia faalagolago iā Ieova mo le taʻitaʻiga. (Faataoto 3:5, 6) Ia teu pea i le mafaufau le tāua faaleagaga o lenā aso. Ia felagolagomaʻi le tasi i le isi i lua tofiga mai le Atua. O le a mafai ai ona faataatia se faavae mautū i le lua faaipoipoga, faatasi ai ma le faamanuia a Ieova, o le a tumau ai pea le olioli pe a mavae le aso o le lua faaipoipoga.—Faataoto 18:22.

[Faamatalaga pito i lalo]

[Ata i le itulau 29]

E tatau i se ulugalii ona talanoa tuusaʻo i se auala faaaloalo a o faia tapenapenaga o le la faaipoipoga

[Ata i le itulau 31]

Ia tumau pea i lua mafaufau le tāua faaleagaga o le aso o le lua faaipoipoga