Saʻilia o se Olaga Fiafia

I NI nai tausaga ua mavae, na fesiligia ai tagata i Falani, Siamani, Peretania ma le Iunaite Setete e faapea, “O le ā e manaʻomia ina ia maua ai le fiafia?” O i latou uma na faatalanoa, e 89 pasene na faapea mai o le soifua mālōlōina lelei; e 79 pasene na taʻua se faaipoipoga taulau manuia; e 62 pasene na faasino atu i faamanuiaga o mātua; ma le 51 pasene na manatu e manaʻomia se galuega lelei mo le mauaina o le fiafia. E ui ina aʻoaʻoina le toʻatele o tagata o le tupe e lē maua ai le fiafia, ae o le 47 pasene o i latou na fesiligia na talitonu e mafai. O le ā ua faaalia e mea moni?

Muamua, tagaʻi i le sootaga o le tupe ma le olaga fiafia ua manatu ai tagata e ao ona iai. Na faaalia i se suʻesuʻega na faia i tagata mauʻoa i le Iunaite Setete e faapea, e lē sili ona fiafia tagata mauʻoa i lo isi tagata. E lē gata i lea, e tusa ai ma tagata atamamai tau gasegase o le mafaufau e ui ina toetoe faaluaina mea faitino a le toʻatele i le Iunaite Setete i le tolu sefulu tausaga ua mavae, ae ua lē sili ai ona latou fiafia i lo le taimi muamua. O le mea moni, ua faamatalaina e se tasi lipoti: “I le vaitaimi lava lenā, ua faateleina le aofaʻi o tagata ua maua i le lotomafatia. Ua faatoluina le aofaʻi o talavou e pule i ola. Ua faaluaina tatalaga o faaipoipoga.” Pe tusa ma le 50 atunuu eseese, o tagata suʻesuʻe o ē na suʻesuʻeina le sootaga o le tupe ma le olaga fiafia na latou faia ai se faaiʻuga, e lē mafai e tupe ona maua ai se olaga fiafia.

Lona lua, o le ā le tāua o vala e pei o le soifua mālōlōina lelei, faaipoipoga manuia ma se galuega lelei i le mauaina o le fiafia? O le mea moni, afai e manaʻomia nei vala ina ia maua ai le fiafia, ae faapefea la le faitau miliona o tagata o ē e lē o maua le soifua mālōlōina lelei ma i latou e lē manuia faaipoipoga? Ae faapefea ulugalii faaipoipo e aunoa ma ni fanau, o tane ma fafine e aunoa ma ni galuega lelei? Po o lona uiga la e ao ona latou lē fiafia i o latou olaga atoa? Pe e mou atu le fiafia o i latou o loo olioli i le soifua mālōlōina lelei ma faaipoipoga manuia pe a suia o latou tulaga?

Po o Saʻo le Puna o Tatou Saʻilia ai le Fiafia?

E mananaʻo tagata uma lava ina ia fiafia. E lē o se mea e ofo ai ona o Lē na Faia le tagata o ia o le “Atua manuia” po o le Atua fiafia ma sa faia le tagata i lona faatusa. (1 Timoteo 1:11; Kenese 1:26, 27) O lea, o se mea masani i tagata le saʻilia o le fiafia. Ae peitaʻi, ua iloa e le  toʻatele o le mauaina o le fiafia, ua pei o le uuina o oneone i le lima e vave ona mou atu.

Ae peitaʻi, faamata o galulue mamafa nisi ina ia maua le fiafia? O le manatu lenā o se tasi o faifilosofia o Eric Hoffer. Na ia mātauina: “O le saʻilia o le fiafia o le tasi lenā o pogai autū o le lē fiafia.” E moni lenā pe afai e sesē le puna o tatou saʻilia ai le fiafia. I lenā itu, e mautinoa tatou te feagai ai ma faanoanoaga ma le lē mautonu. E lē maua se olaga fiafia i le taumafai ina ia mauʻoa, taʻutaʻua pe lauiloa, saʻilia o sini faalemalo, mataupu fai a tagata po o tau tamaoaiga, po o le faamalieina o ou lava manaʻoga. E lētioa manatu nisi e pei ona fai mai ai lenei tusitala: “Pe afai e taofia le taumafai ina ia fiafia e mafai ona tatou maua le fiafia”!

O le mea e iloga ai, o le suʻesuʻega e pei na taʻua i le amataga o lenei mataupu na faaalia ai, o le toʻa 4 mai i tagata e toʻa 10 na manatu e faapea, e maua le fiafia mai le faia o mea lelei ma fesoasoani i isi. Ae o le toʻa 1 mai le toʻa 4 tagata na aofia i na suʻesuʻega na faamamafa e faapea, ua faia e le faatuatua ma talitonuga faalotu se vaega autū i le mauaina o le fiafia. E manino, e manaʻomia ona tatou vaai totoʻa po o le ā e manaʻomia ina ia maua ai le fiafia moni. O le a fesoasoani iā i tatou le mataupu o mulimuli mai ina ia faia faapea.

[Ata i le itulau 3]

E toʻatele ua manatu o tupe, olaga faaleaiga fiafia po o se galuega lelei o le ki lea e maua ai se olaga fiafia. Pe e te ioe i ai?