Tetee Atu i le Agaga o le Lalolagi Femoumouaʻi

“Ua maua e i matou, e lē o le agaga o lenei lalolagi, a o le agaga mai le Atua.”—1 KORINITO 2:12.

1. I ā auala na ʻolegia ai Eva?

“NA FAASESĒ mai le gata iā te aʻu.” (Kenese 3:13) O nai upu na, na taumafai le uluaʻi fafine o Eva, e faamatala ai le māfuaaga na amata ai ona ia fouvale faasaga iā Ieova le Atua. E saʻo lana faamatalaga, ae e leʻi taʻusaʻoina ai lana mea sesē na fai. Na faagaeeina mulimuli ane le aposetolo o Paulo e tusi e faapea: “Ua ʻolegia [Eva].” (1 Timoteo 2:14) Na ʻolegiaina o ia e talitonu e faapea o se gaoioiga lē usiusitai—le ʻaia o le fua o le laau faasāina—o le a aogā iā te ia, o le a pei ai ia o le Atua. Na ʻolegia foʻi o ia e faatatau i le tulaga moni o lē na faasesēina o ia. Na te leʻi iloaina o le gata o se sui vaaia o Satani le Tiapolo.—Kenese 3:1-6.

2. (a) Ua faapefea ona faasesē e Satani tagata i aso nei? (e) O le ā “le agaga o lenei lalolagi,” ma o le ā le fesili o le a tatou iloiloina nei?

² Talu mai le taimi o Atamu ma Eva, na faaauau ai pea ona faasesē e Satani tagata. O le mea moni, o ia “o lē faasesē i le lalolagi uma.” (Faaaliga 12:9) E leʻi suia lava ana togafiti. E ui na te lē o toe faaaogāina se gata moni lava, ae o loo faaauau pea ona ia natia le faailoaina mai o ia. E ala i le faaaogāina o ni faafiafiaga, o faasalalauga i nusipepa, televise ma leitiō, ma isi auala, ua faasesē ai e Satani tagata e talitonu e faapea, e lē gata latou te lē manaʻomia, ae e lē aogā foʻi iā i latou le taʻitaʻiga alofa a le Atua. O taumafaiga faifai pea a le Tiapolo e faapogaia le taufaaʻoleʻole ua ati aʻe ai i tagata i so o se mea le agaga o le fouvale faasaga i tulafono a le Tusi Paia ma mataupu silisili. Ua taʻua e le Tusi Paia lenei mea o “le agaga o lenei lalolagi.” (1 Korinito 2:12) O lenei agaga ua iai ni aafiaga malolosi i talitonuga, uiga ma amioga a i latou e lē iloa le Atua. O faapefea ona faaalia mai lenā agaga, ma o le ā le auala tatou te teena ai ona aafiaga leaga? Seʻi o tatou vaai.

Paʻū Maulalo Tapulaa Tau Amio

3. Aiseā ua faateteleina ai le faaalia mai o “le agaga o lenei lalolagi” i aso nei?

³ I aso nei, ua faateteleina le faaalia mai o “le agaga o lenei lalolagi.” (2 Timoteo 3:1-5) Atonu, ua e mātauina le paʻū maulalo o tapulaa tau  amio. Ua faamatala mai e le Tusi Paia le māfuaaga. Na gāpā se taua i le lagi ina ua uma ona faavaeina le Malo o le Atua i le tausaga e 1914. Na toʻilalo Satani ma ana temoni ma lafo ifo i le lalolagi. I le matuā lotoa lava, ua faateteleina ai ana taumafaiga faifai pea ina ia faasesē le lalolagi atoa. (Faaaliga 12:1-9, 12, 17) I auala uma na te mafaia, ua ia taumafai ai e ‘faasesē i ē ua filifilia pe afai e mafai ai.’ (Mataio 24:24) I le avea ma tagata o le Atua, ua fai ai i tatou ma ana taulaiga autū. Ua ia taumafai e faaleagaina lo tatou itu faaleagaga ina ia tatou lē maua ai le finagalo malie o Ieova ma le avanoa e ola ai e faavavau.

4. E faapefea ona manatu auauna a Ieova i le Tusi Paia, ma e faapefea ona manatu i ai le lalolagi?

⁴ Ua taumafai Satani e taʻusesē le Tusi Paia, le tusi sili ona tāua o loo aʻoaʻo ai i tatou e uiga i Lē alofa na Foafoaina i tatou. E fiafia ma faatāua e auauna a Ieova le Tusi Paia. Ua tatou iloa o le Tusi Paia o le Afioga faagaeeina a le Atua, ae lē o ni upu a tagata. (1 Tesalonia 2:13; 2 Timoteo 3:16) Peitaʻi, e manaʻo le lalolagi a Satani ia ese le auala tatou te mafaufau ai i le Tusi Paia. O se faaaʻoaʻoga, na taʻua i le faatomuaga o se tusi lea na taʻuleagaina le Tusi Paia e faapea: “E leai se mea e ‘paia’ i le Tusi Paia, pe faapea foʻi o le ‘afioga a le Atua.’ E leʻi tusia e ni tagata paia o ē na faagaeeina e le Atua, ae na tusia e ositaulaga o ē sa saʻilia le pule.” O i latou ua talitonu i na manatu e ono faigofie ona paʻūʻū i le mailei o le taʻitaʻiina sesē i le talitonuga e faapea, e saʻoloto i latou e tapuaʻi i le Atua i so o se auala latou te fiafia i ai—po o le lē tapuaʻi foʻi i le Atua.—Faataoto 14:12.

5. (a) O le ā na fai mai ai se tasi o tusitala e tusa ai ma tapuaʻiga e fesootaʻi atu ma le Tusi Paia? (e) E faapefea ona faatusatusa nisi o manatu taatele faalelalolagi ma le mea ua fai mai ai le Tusi Paia? (Faaaofia ai le pusa i le itulau e sosoo ai.)

⁵ O osofaʻiga tuusaʻo po o le lē tuusaʻo foʻi i le Tusi Paia, faatasi ai ma faiga lē faamaoni faalotu a i latou o ē faapea mai latou te lagolagoina le Tusi Paia, ua iʻu ai i le faateleina o le lē faamaonia o tapuaʻiga, e aofia ai ma le tapuaʻiga o loo fesootaʻi atu i le Tusi Paia. Ua faitioina tapuaʻiga e faasalalauga i nusipepa ma leitiō ma i latou e maualuluga tulaga tauaʻoaʻoga. Na mātauina e se tasi o tusitala e faapea: “O le manatu i le Faa-Iutaia ma le Faa-Kerisiano e faapea ua aafia ai tū ma aganuu masani e lē taliaina e le toʻatele. E tusa lava pe manatu i ai se tasi mai i se tulaga e sili ona aloaʻia, e manatu i ai le toʻatele o se faiga faaanamua; afai foʻi e manatu i ai mai i se tulaga sili ona lē taualoa, e vaai i ai o ni manatu faaanamua e taofia ai le agaʻigaʻi i luma o le atamai faalemafaufau ma le faasaienisi. I tausaga talu ai nei ua faateleina tauemuga ma ua oo atu ai i le feitagaʻi ma le lē fiafia.” O lenei lē fiafia e masani lava e pogai mai iā i latou o ē faafitia le iai o le Atua ma ē ua “faavaleleaina i latou i lo latou taumasalosaloga.”—Roma 1:20-22.

6. O le ā le vaaiga a le lalolagi i faiga faaleituaiga ia e taʻusalaina e le Atua?

⁶ E lē o se mea la e ofo ai, ua matuā see mamao ese tagata mai tapulaa tau amio a le Atua. O se faaaʻoaʻoga, o loo faamatalaina e le Tusi Paia o le tauatane o se mea e “māsiasi ai.” (Roma 1:26, 27) O loo taʻua ai foʻi e faapea, o i latou e faia le faitaaga ma le mulilua e lē fai mo  latou tofi le Malo o le Atua. (1 Korinito 6:9) Peitaʻi, i le tele o atunuu e lē gata latou te taliaina na faiga faaleituaiga ae ua latou faaalialia mai foʻi i tusi, mekasini, pese, tifaga, ma faaaliga i televise. O i latou o ē faitioina na faiga e manatu i ai o ē e lē fetālaʻi o latou mafaufau, e suʻesuʻe masei ma e lē o agaʻigaʻi i luma lo latou malamalama. Na i lo le manatu i tapulaa a le Atua o se faailoaga o lona manatu mamafa, ua manatu le lalolagi i na tapulaa o se mea e taofia ai le saʻolotoga o le tagata lava ia ma mea na te faataunuuina.—Faataoto 17:15; Iuta 4.

7. O ā fesili e ao ona tatou fesiligia ai i tatou lava?

⁷ A o faasolo ina malosi le tetee o le lalolagi i le Atua, e atamai mo i tatou ona tilofaʻia o tatou lava uiga ma tapulaa. E ao ona tatou tatalo ma iloiloina ma le faamaoni i tatou mai i lea taimi i lea taimi, ina ia faamautinoa tatou te lē o tafetafea ese mai le finagalo o Ieova ma ana tapulaa. O se faaaʻoaʻoga, tatou te ono fesili ifo iā te i tatou lava: ‘Pe o faafiafiaina ea aʻu i mataupu ia sa ou ʻalofia i tausaga ua tuanaʻi atu? Pe o oʻu taliaina faiga ia e taʻusalaina e le Atua? Pe ua faaitiitia loʻu naunau i mataupu faaleagaga na i lo taimi ua teʻa? Pe o faaalia i le auala o oʻu ola ai loʻu faamuamua o manaʻoga o le Malo i loʻu olaga?’ (Mataio 6:33) O le toe manatunatu faapena o le a fesoasoani iā i tatou e teena le agaga o le lalolagi.

“Neʻi Teʻa Ese i Tatou ma ia Mea”

8. E faapefea ona ono tafetafea ese se tasi mai iā Ieova?

⁸ Na tusi Paulo i Kerisiano e faapea: “E tatau ona atili ai ona tatou naunau i mea ua tatou faalogologo i ai, neʻi teʻa ese i tatou ma ia mea.” (Eperu 2:1) Pe a tafea ese se vaa mai i lona alāvaa, e lē taunuu i lona taunuuga. Pe afai e lē mataalia se kapeteni i le matagi ma peau o le sami, o le a ono faigofie ai i lona sā ona tafea ese atu mai se taulaga o vaa o loo saogalemu ai ma oo ina paʻulia i luga o se matafaga gaoā. I se tulaga tutusa, pe afai tatou te lē mataalia i upu moni tāua o le Afioga a le Atua, e ono faigofie ona tatou tafetafea ese mai iā Ieova ma faavaatuʻia ai faaleagaga. Ina ia ʻalofia le mafatia i se tulaga faapena, e lē tatau ona tatou teena le upu moni. O le mea moni, e lē faafuaseʻi ona teena ma le loto i ai e le toʻatele Ieova. E masani lava, e faasolosolo ona latou aafia i se mea e faalavelavea ai mai le uaʻi atu i le Afioga a le Atua. E toetoe lava ina a lē iloa, ua latou tafetafea atu i le faia o le agasala. E pei lava o se kapeteni o loo moe, o na tagata taʻitoʻatasi e faatoʻā toe tagi lava foʻi Vī a ua i le vaa o Egelī.

9. I ā auala na faamanuia ai Ieova iā Solomona?

⁹ Seʻi tatou iloiloina le soifuaga o Solomona. Na tuuina atu e Ieova iā te ia le tulaga tautupu i Isaraelu. Na faataga e le Atua Solomona ina ia fausia le malumalu ma faatonutonuina o ia e tusia se vaega o le Tusi Paia. E faalua ona fetalai mai Ieova iā te ia ma aumai iā te ia le tamaoaiga, taʻutaʻua ma le filemu o lana pulega. Ae o le laualuga o na mea uma, na faamanuia Ieova iā Solomona e ala i le foaʻi atu i ai o le tele o le poto. Ua taʻua i le Tusi Paia e faapea: “Ua foaʻiina mai e le Atua iā Solomona le poto ma le loto matala e matuā tele lava, ma le loto e oo i mea e tele, e  faapei o le oneone o i le matafaga. Ua sili lava le poto o Solomona i le poto o tagata uma i sasaʻe, ma le poto uma o Aikupito.” (1 Tupu 4:21, 29, 30; 11:9) E mautinoa, e ono manatu se tasi e faapea, o Solomona le isi tagata e tatau lava ona tumau i le faamaoni i le Atua. Peitaʻi, na oo ina tafetafea ese Solomona i aʻoaʻoga a i latou e tetee i le upu moni. Na faapefea ona tupu lenā mea?

10. O le ā le faatonuga na lē taulau ona usitaia e Solomona, ma o le ā le iʻuga?

¹⁰ Na matuā iloa ma malamalama lelei lava Solomona i tulafono a le Atua. E lē masalomia lona naunau faapitoa i faatonuga ia na faatulaga mo i latou e avea ma tupu i Isaraelu. O se tasi o na faatonuga na faapea mai: “Aua foʻi neʻi faatoʻateleina e [le tupu] o avā māna, neʻi liliueseina ai lona loto.” (Teuteronome 17:14, 17) E ui i lenā faatonuga manino, ae na iai avā e fitu selau a Solomona ma ana palake e toluselau. O le toʻatele o na fafine sa tapuaʻi i atua ese. Tatou te lē iloaina pe aiseā na tele ai avā a Solomona ma pe sa ia manatu e talafeagai le faia faapea. O le mea ua tatou iloa, sa lē taulau ona ia usitaia faatonuga manino a le Atua. Na oo i iʻuga e pei lava ona sa lapataʻi atu ai Ieova. Tatou te faitau ai e faapea: “Na faaliliueseina lava lona loto e ana avā . . . e mulimuli i atua ese.” (1 Tupu 11:3, 4) E mautinoa lava, na faasolo ina mou atu lona poto faale-Atua. Na ia tafetafea ese atu. Mulimuli ane, na suia le faanaunauga o Solomona e usitai ma faafiafia le finagalo o le Atua i le faanaunauga e faafiafia ana avā faapaupau. Pagā le faanoanoa mo Solomona, o lē na tusi muamua mai e faapea: “Loʻu atalii e, ia poto oe, ma e faafiafia loʻu loto; ona ou mau tali ai lea i lē faifai mai.”—Faataoto 27:11.

E Malosi le Agaga o le Lalolagi

11. E faapefea ona aafia o tatou manatunatuga i mea tatou te ave i o tatou mafaufau?

¹¹ Ua aʻoaʻoina i tatou e le faaaʻoaʻoga a Solomona i le mataʻutia tele o le manatunatu e faapea, talu ai ua tatou iloa le upu moni, o le a lē aafia la o tatou mafaufau i taaʻiga faalelalolagi. E pei lava ona aafia o tatou tino i taumafa faaletino, e faapena foʻi mea tatou te aveina i o tatou mafaufau ua pei o ni meaʻai ma e aafia ai o tatou mafaufau. O mea tatou te fafagaina ai o tatou mafaufau e aafia ai o tatou manatunatuga ma uiga. O le iloaina o le moni o lenei mea, ua faaaluina ai e kamupani le faitau piliona tālā i tausaga taʻitasi e faasalalau atu ai a latou oloa. Ua faaaogā i na faasalalauga upu faagauloto ma ata ina ia tosina mai ai le manaʻo o tagata faatau. Ua iloa foʻi e i latou e faia faasalalauga e faapea, o le faatasi po o le faalua ona vaai i se faasalalauga e lē uunaʻia ai tagata e vave ona faatauina se oloa. Peitaʻi, o le faifai pea o nei faasalalauga e masani ona faapogaia ai ona manatu tagata faatau i ni oloa e faapea o ni mea tāua ma le mananaia. O loo taulau manuia faasalalauga—o le māfuaaga lenā e faaaogāina ai e tagata. E malolosi ona aafiaga i mafaufauga ma uiga o tagata.

12. (a) E faapefea ona taaʻina e Satani mafaufauga o tagata? (e) O le ā ua faaalia ai e mafai ona taaʻina Kerisiano?

¹² I le pei o se tagata e faia faasalalauga, ua faaauilumaina ai e Satani ona manatu e ala i ana auala faatosina i le iloaina e faapea, e iʻu lava ina mafai ona ia faatalitonuina tagata e manatunatu  i ana auala. E ala i faafiafiaga ma isi auala, ua faasesē ai e Satani tagata e talitonu e faapea, e lelei le mea leaga ae leaga le mea lelei. (Isaia 5:20) E oo lava i Kerisiano moni ua paʻūʻū atu i le mailei a Satani i ana taumafaiga faifai pea e faasalalau faamatalaga sesē. Ua lapataʻi mai le Tusi Paia e faapea: “O loo taʻutino mai e le Agaga, e ō ese nisi i le faatuatua i tausaga amulī, latou te faalogo i agaga e faasesē ma aʻoaʻoga a temoni; ona o le pepelo o tagata tala pepelo, o ē ua faailogaina o latou lava loto fuatia ifo i le uamea aasa.”—1 Timoteo 4:1, 2; Ieremia 6:15.

13. O ā aumea leaga, ma e faapefea ona tatou aafia i a tatou aumea?

¹³ O i tatou uma lava e mafai ona aafia i le agaga o le lalolagi. O aafiaga ma le malosi iloagatā o le faiga o mea a Satani e malolosi tele. Ua apoapoaʻi mai ma le atamai le Tusi Paia iā i tatou e faapea: “Aua neʻi faasesēina outou, ‘O le feoaʻi ma ē amio leaga e leaga ai amio lelei.’ ” (1 Korinito 15:33) O aumea leaga e mafai ona aofia ai so o se mea lava pe so o se tasi foʻi—e oo lava i totonu o le faapotopotoga—ua atagia ai le agaga o le lalolagi. Pe afai tatou te manatu e tatou te lē afāina i aumea leaga, e ao foʻi la ona tatou faia se faaiʻuga e faapea, e lē mafai ona fesoasoani mai aumea lelei iā i tatou. Pagā le sesē o lenā manatu! Ua faamatala mai ma le manino e le Tusi Paia le mataupu e faapea: “O lē latou te feoaʻi ma tagata popoto, e poto lava ia; a o le uō a ē valelea, e leaga ai lava ia.”—Faataoto 13:20.

14. I ā auala e mafai ona tatou tetee atu ai i le agaga o le lalolagi?

¹⁴ Ina ia teena le agaga o le lalolagi, e ao ona tatou aumea ma tagata popoto, o i latou e auauna iā Ieova. E ao ona tatou faatumu o tatou mafaufau i mea e ati aʻe ai lo tatou faatuatua. Na tusi Paulo e faapea: “O mea uma ua moni, o mea uma ua taʻuleleia, o mea uma ua tonu, o mea uma ua mamā, o mea uma ua matagofie, ma mea uma ua logoleleia, afai foʻi o se isi amio lelei, po o se tasi mea e viia, ia outou manatunatu i ia lava mea.” (Filipi 4:8) I le avea o ni tagata na foafoaina ma le tomai e filifili ai i le saʻo ma le sesē, e mafai ona tatou filifili i mea tatou te iloiloina. Tau ina ia tatou filifili pea e lē aunoa ma manatunatu i mea o le a tatou vavalalata atu ai iā Ieova.

E Sili Atu Ona Malosi le Agaga o le Atua

15. Na faapefea ona ese Kerisiano i Korinito anamua mai i isi tagata na nonofo i lenā aai?

¹⁵ O Kerisiano moni ua taʻitaʻia e le agaga o le Atua e lē pei o i latou ua taʻitaʻiina sesē e le agaga o le lalolagi. Na tusi Paulo i le faapotopotoga i Korinito e faapea: “Ua maua e i matou, e lē o le agaga o lenei lalolagi, a o le agaga mai le Atua, ina ia matou iloa mea ua foaʻifuaina mai e le Atua iā te i matou.” (1 Korinito 2:12) O Korinito anamua o se aai na matuā siʻomia e le agaga o le lalolagi. O le toʻatele o tagata na nonofo ai sa faia amioga matagā lea na iʻu ai ina faaupu, o le “Faa-Korinito” le “faia o amioga lē mamā.” Na faatauasoina e Satani manatu o tagata. O le iʻuga, na itiiti lava po o le leai foʻi o se malamalamaga e faatatau i le Atua moni. (2 Korinito 4:4) Peitaʻi, e ala i lona agaga paia, na faapupula ai e Ieova mata o nisi o tagata Korinito, ma mafai ai ona latou maua le poto o le upu moni. Na uunaʻia ma taʻitaʻia e lona agaga i latou ia faia ni suiga tetele i o latou olaga ina ia maua ai lana faamaoniga ma faamanuiaga. (1 Korinito 6:9-11) E ui e malosi le agaga o le lalolagi peitaʻi, e sili atu ai ona malosi le agaga o Ieova.

16. E faapefea ona tatou maua ma faatumauina iā i tatou le agaga o le Atua?

¹⁶ E tutusa foʻi ma aso nei. O le agaga paia o Ieova o le mana lea e sili ona malosi i le aoao o mea uma, ma na te foaʻi fua mai ma le agalelei iā i latou e ole atu ma le faatuatua. (Luka 11:13) Ae ui i lea, ina ia maua le agaga paia o le Atua, e sili  atu mea e ao ona tatou faia na i lo le na o le teena o le agaga o le lalolagi. E ao foʻi ona tatou suʻesuʻe e lē aunoa ma faatatau le Afioga a le Atua i o tatou olaga, o le a mafai ai ona ōgatusa o tatou agaga po o le tomai e mafaufau ai ma le finagalo o le Atua. Pe afai tatou te faia faapea, o le a faamalosia i tatou e Ieova e teena so o se mailei e ono faaaogā e Satani e faaleagaina ai lo tatou itu faaleagaga.

17. I ā auala e faamāfanafanaina ai i tatou i le mea na tupu iā Lota?

¹⁷ E ui ina e leai se vaega a Kerisiano e fai i le lalolagi, ae o loo latou i ai i le lalolagi. (Ioane 17:11, 16) E leai ma se tasi o i tatou e mafai ona ʻalofia atoatoa le agaga o le lalolagi, ona tatou te ono faigaluega pe nonofo faatasi ma i latou e leai se alofa i le Atua pe mananaʻo i ona ala. Pe tatou te manatu ea pei o Lota, o lē na “tigā” pe ita ona o amioga faalētaupulea a tagata Sotoma ia na latou ola faatasi? (2 Peteru 2:7, 8) Afai o lea, e mafai la ona faamāfanafanaina i tatou. Na puipuia ma faasaoina e Ieova ia Lota, ma o le a ia faia foʻi faapena iā i tatou. E silafia e lo tatou Tamā alofa o tatou tulaga, ma na te aumaia iā i tatou le fesoasoani ma le malosi tatou te manaʻomia e faatumauina ai i lo tatou itu faaleagaga. (Salamo 33:18, 19) Afai tatou te faalagolago iā te ia, faatuatua ma ole atu iā te ia, o le a ia fesoasoani mai iā i tatou e teena le agaga o le lalolagi, e tusa lava po o le ā le faigatā o lo tatou tulaga e ono iai.—Isaia 41:10.

18. Aiseā e ao ai ona faatāua la tatou faiā ma Ieova?

¹⁸ I le avea ai o ni tagata o Ieova, ua faamanuiaina i tatou i le poto o le upu moni a o tatou iai i se lalolagi ua vavae ese mai i le Atua ma ua faasesēina e Satani. Ua tatou maua le fiafia ma le filemu lea e lē o maua e le lalolagi. (Isaia 57:20, 21; Kalatia 5:22) E tatou te faatāuaina le faamoemoe matagofie o le ola e faavavau i le Parataiso, lea o le a lē toe iai le agaga o lenei lalolagi. O lea la, seʻi o tatou faatāuaina la tatou faiā tautele ma le Atua ma mataalia e faasaʻo so o se faanaunauga e tafetafea ese atu ai faaleagaga. Seʻi o tatou matuā faalatalata atu iā Ieova, ona ia fesoasoani mai lea iā i tatou e teena le agaga o le lalolagi.—Iakopo 4:7, 8.

Pe e Mafai Ona E Faamatala?

• I ā auala ua ʻolegia ma faasesē ai e Satani tagata?

• E faapefea ona tatou ʻalofia le tafetafea ese mai iā Ieova?

• O le ā ua faaalia ai e malosi le agaga o le lalolagi?

• E faapefea ona tatou maua ma faatumauina iā i tatou le agaga o le Atua?

[Fesili mo le Suʻesuʻega]

[Siata i le itulau 11]

ESEESEGA O LE POTO FAALELALOLAGI MA LE POTO FAALEATUA

E lē saʻo atoatoa le upu moni—e faatulaga e tagata a latou lava upu moni.

‘O le afioga a le Atua o le upu moni lea.’—Ioane 17:17.

Ina ia fuafua le saʻo mai le sesē, ia faalagolago i ou manatu.

“E sili le faaʻoleʻole o le loto i mea uma, ma ua matuā leaga lava.”—Ieremia 17:9.

Ia fai mea e te manaʻo oe lava e fai.

“E lē o i le tagata e savali ona faatonuina le mea e ui ai o ia.”—Ieremia 10:23.

A tamaoaiga ua maua le fiafia.

“O le manaʻo i tupe, o le pogai lea o mea leaga uma lava.”—1 Timoteo 6:10.

[Ata i le itulau 10]

Sa tafetafea ese Solomona mai le tapuaʻiga moni ma liliu atu i atua sesē

[Ata i le itulau 12]

I le pei o se tagata e faia faasalalauga, ua faaauiluma e Satani le agaga o le lalolagi. Pe o e teena lenā agaga?